LUKE 18

1Jesus ɔssabɛ ifɛɛt ’yɔng ɔttɛ ukopolobɛ ɔlɔk nkwaaning bassɛɛn luzɔɔm ɛkɛtɛ ɔkkpɛlɛ, basɛlɛ bbwɔp ka luppyam. 2Ɔttɛ, “Ɔkaal-a-kɛkaal vvɔn ɔdɔkɔ baang ka lɛffɛ zzɔn, wa Ɔlɔɔmɔlɔɔm usimɛnɛ lɛbbwɔpɔ, usi balɔɔt litele. 3Wanavva wa ulam ubbenɛ ɔkɔngɔmɛ ule baang ka lɛffɛ ’zɔng baang ka ullunɛ. Umii ka ssala ɔkaal-a-kɛkaal ’wɔng baang ɔttɛ, uttelemɛ. Ukkpengemɛ ɔttɛ, ‘Akaal kɛkaal ayyɔɔt la ɔlɔɔt wa kɔlɔɔk kɔttɔnɛyɛlɛ, abee la anaam ellee.’ 4Ɛkɛtɛ ɛmmɛ, ɔkaal-a-kɛkaal usi lɛggyan ɔttɛ, uttelemɛ. Ɔtaa uttina ɔlɔɔk kɛyɔɔng ɔttɛ, ‘Mkkpa Ɔlɔɔmɔlɔɔm nsinɛ lɛbbwɔpɔ, nsi ɔlɔɔt litele, 5lilɔɔk ’sɔng sa wanavva ’wɔng mung ɔbwɔɔlɔnɛnɛ mung, vvenɛ nssɛɛnmɛ kɔbɔɔk nnaang bwa ɔggyannɛ; nzang vvenɛ kiffu ammɛ kɛdɛmnɛ nsɛlɛ.’ ” 6Ɔzzánga Uyini ɔttɛ, “Gɔpɔlɔyɔng kɔlɔɔk kwa ɔbbyap-a-ɔkaal-a-kɛkaal ’wɔng baang ɔlɔɔknɛ. 7Mung attina attɛyɔng Ɔlɔɔmɔlɔɔm baala ɔkaal kɛkaal, ubee la balɔɔt ammɛ ba bakkwanɛ kikoon la kɛtɔm, battɛ uttelebɛ ɔɔ? Vvenɛ kɔnaangmɛ bɔkɔɔt a kittelebɛ ɔɔ? 8Nbwɔɔlɔwɔyɔng nttɛ, vvenɛ ɔkaal kɛkaal like like, ubee la abbɛ. Ɔzzànga attina attɛyɔng Waan-Ɔssɛbibbit-Ɔkkpɛlɛ vvenɛ ɔyɛn ɔlɔɔt vvɔn ggbɔɔ wa ɔyanganɛ kiyila ka ɛkɛtɛ ya ule uffu ɔɔ?” 9Jesus ɔssabɛ ifɛɛt ’yɔng mung la balɔɔt ba battinanɛ battɛ abbɛ battanɛ budoddo lɛnaang, bafim kwa babbɛ. 10Ɔttɛ, “Balɔɔt baffa bamii ka Ggwoon-Ɔlɔɔmɔlɔɔm, bamii kɛzɔɔm kinnyi Ɔlɔɔmɔlɔɔm. Ɔlɔɔt vvɔn ɔdɔkɔ wa Pharisees, wa vvɔn ɔdɔkɔ ɔtɔk-innamba. 11Ɔlɔɔt-a-Pharisees ufeele ubee ɔzɔɔm ɔttɛ, ‘Nwomowɔbong kɛnaang Ɔlɔɔmɔlɔɔm. Anaam ɔsaap-a-bɔfɛɛn-ɔlɔɔt lissi, anaam ukup a bwanavva-balɔɔt lissi, ɔlɔɔt ba nsi litele tɛ̀ttɛ̀ balɔɔt balɔk, ɔlɔk vvenɛ nbbɔl tɔkɔlɔ la ba ayyɔɔt. Nwomowɔ kɛnaang ka nsinɛ tɛ̀ttɛ̀ ɔtɔk-innamba ’wɔng mung lile. 12Ntaa buwɔɔng bɛtɔm bɛffa ka liwaazɛ. Nsam bɛfɛɛn anaam nbɛngɛlɛ lakup zzɔɔp, nsanga kukupa kkwɔn nnyiwɔ.’ 13Ɔtɔk-innamba ɔkɔɔng ka lɛmma-ggwoon a luzɔɔm ubee, gɔɔ lusso gbɔɔ ka libat usi liyeek ɔppyɛɛk, utup labɔɔk ka luppyam ɔttɛ, ‘Ellee Ebinukkpaapi, nbbewɔ lɛttɔ, anaam ɔnaang-a-bubbi.’ 14Jesus ɔttɛ, “Nbwɔɔlɔwɔyɔng, ɔlɔɔt wa ukumanɛ mung ɔnaangnɛ kwa Ɔlɔɔmɔlɔɔm ɔggyannɛ wa ikeeng lissi. Ɔlɔɔt duu wa uggbengemɛnɛ kɛyɔɔng vvenɛ usikili usook ka lusso Ɔlɔɔmɔlɔɔm. Ɔlɔɔt wa ɔtɔkmɛnɛ kɛyɔɔng ka busook ule uggbenge ka lusso Ɔlɔɔmɔlɔɔm.” 15Balɔɔt bakɔɔm bwɔɔntiti bafee Jesus battɛ utelebɛ labɔɔk. Balɔɔt a kɔssɛ a Jesus bayɛnnɛ ning baang baggba balɔɔt ’bɔng baang battɛ bafete bwɔɔntiti lɛkɔɔm bamii. 16Ɔzzánga Jesus ɔkkwɔɔ bwɔɔntiti ’bɔng baang ɔssɛɛn ka kkwɔɔt ɔttɛ, “Afɔngɔyɔng bwɔɔntiti battɔnɛ ka kkwɔɔt; tɛ̀ttɛ́ aggbayɔngbɛ. Itutum-Ɔlɔɔmɔlɔɔm ile ya balɔɔt tɛ̀ttɛ̀ abbɛ mung. 17Akke attɛyɔng ɔlɔɔt ɔkkpɛlɛ wa usinɛ kɔlɔɔk Itutum-Ɔlɔɔmɔlɔɔm lɛtɔk ɔssɛɛn ka luppyam tɛ̀ttɛ̀ waantiti utelenɛ zzeen ka abakka la abassɛ, ɔlɔɔt ’wɔng baang baala ufula ka annyɛ.” 18Uzzilɛttɔ balɔɔt a Jews vvɔn ɔbap Jesus ɔttɛ, “Ukopolo-lukopolo wa doddo, mung nnaang nang tɛ́ttɛ́ vvenɛ nyanga kuddu kwa kɛfal a kɛfal?” 19Jesus ɔbapmɛ ɔttɛ, “Mbɔng tɛ́ttɛ́ akkwɔɔnɛ Ukopolo-lukopolo wa Doddo? Ɔlɔɔt wa ɔyyɛɛpnɛ ba ule ɔgbaa la Ɔlɔɔmɔlɔɔm. 20Kɔttɛ asan mung lafɔɔ Ɔlɔɔmɔlɔɔm: ‘Tɛ̀ttɛ́ akup wanavva ɔlɔɔt; tɛ̀ttɛ́ awwɔɔl ɔlɔɔt; tɛ̀ttɛ́ ayip ssip; tɛ̀ttɛ́ akkala lalaak; atele ssaawɔ la ssakawɔ.’ ” 21Ɔlɔɔt ’wɔng baang ɔppyɛlɛmɛ kamma ɔttɛ, “Ka ussinɛ ka ntiinɛ ssup, nle baang ka nlokonɛ lafɔɔ ’zɔng baang ɔkkpɛlɛ.” 22Jesus uppyeenɛ ning baang, ɔlɔɔk la ammɛ ɔttɛ, “Atii ka ale anaang bɔfɛɛn bbwɔn agbaa. Ataan bɛfɛɛn annɔ bya ayanganɛ ɔkkpɛlɛ; asam ikkpoko, annyi balɔɔt ba ɔbbɔlnɛbɛ. Vvenɛ anaang kibeet ka libat. Alenɛ livve, afeele akupnɛ.” 23Ɔlɔɔt ’wɔng baang uppyeenɛ ning baang, livve lɛbbɔlmɛ ka ulenɛ uggboggbo ɔlɔɔt. 24Jesus ɔyɛnnɛ ning baang ka ɔlɔɔt ’wɔng baang livve lɛbbɔlmɛnɛ, ɔttɛ, “Kukoolo-ukoolo tɛ́ttɛ́ uggboggbo ɔlɔɔt ɔmal ka Itutum-Ɔlɔɔmɔlɔɔm. 25Ɔgɔdɔ kɛmal ka lɛmma ɔnnya, mɛ ba kikoolo tɛ̀ttɛ̀ kule kukoolo uggboggbo ɔlɔɔt kɛmal ka Itutum-Ɔlɔɔmɔlɔɔm.” 26Balɔɔt ba bappyeenɛ ka Jesus ɔlɔɔknɛ ning baang babapmɛ battɛ, “Nkkpa mung, nnyinɛ ule uddu?” 27Jesus ɔttɛ, “Kɔlɔɔk kwa kukoolonɛ ɔlɔɔt kɛnaang, kule kpɛkɛlɛm ka labɔɔk Ɔlɔɔmɔlɔɔm.” 28Ɔzzánga Peter ɔttɛ, “Ppyɛɛk, igbatabong ssala ayyɔɔt ikɔngɔ, iffu ikupwɔ tɛ.” 29Jesus ɔttɛbɛ, “Iii, Nbwɔɔlɔwɔyɔng oo, ɔlɔɔt wa ɔgbatanɛ ɔkɔngɔ ssala ammɛ, ɔlɔk ɔgbata wanavva ammɛ ɔkɔngɔ, ɔlɔk itele ammɛ, ɔlɔk abassɛ la abakka, ɔlɔk bwaan ammɛ ka lɛttɔ Itutum-Ɔlɔɔmɔlɔɔm, 30vvenɛ ɔyanga bya bɛttɔnɛ ’byɔng baang ɔgbaa la bwa ɔyanganɛ ka lɛfal ’zɔng, ɔbɛtɛmɛ la kuddu kwa kɛfal a kɛfal ka vveeng wa ule uffu.” 31Jesus ɔsam balɔɔt a kɔssɛ ammɛ ba zzɔɔppabaffa, ubee ka kusɛngɛ. Ɔbwɔɔlɔbɛ ɔttɛ, “Gɔpɔlɔyɔng! Mung ile ka imiinɛyɔng Jerusalem ka ɛfɛɛn ya lilɔɔk ɔkkpɛlɛ sa bappyee-kutolo Ɔlɔɔmɔlɔɔm bakkpɔknɛ batum Waan-Ɔssɛbibbit-Ɔkkpɛlɛ, lile linaang ka lɔkkwɔɔn. 32Vvenɛ basammɛ, bassɛɛn ikanakana ka labɔɔk, ba bale banyɔɔkamɛ bassɛɛnmɛ ka izzit. Vvenɛ bakwula libbaak, ballɔtmɛ. 33Batupmɛ, bawwɔɔl. Ɔzzànga bɛtɔm bɛffa ka bɛkkyaat vvenɛ ufungala ka lubbe, ɔtaa ka kuddu.” 34Balɔɔt a kɔssɛ ammɛ basi kɔlɔɔk lɛsan ka lilɔɔk ’sɔng baang sa Jesus ɔbwɔɔlɔnɛbɛ kkwɔn gbɔɔ. Ifɛɛt a lɛmmwɔɔl ’zɔng baang iddumubɛ, basi lɛsan bwa Jesus ɔlɔɔknɛ utum. 35Jesus uffu ɔffɔ kɛtɛkɛtɛ Jericho. Ussi-ifim vvɔn ɔdɔkɔ baang ka ɔtaanɛ ubbwoom lubbwoom. 36Uppyeenɛ kɛkaan-a-balɔɔt ka kɛsaknɛ, ɔbap ɔttɛ, “Kule nang?” 37Ɔzzánga babwɔɔlɔmɛ battɛ, “Jesus wa Nazareth ɔsaknɛ.” 38Ussi-ifim ’wɔng baang ɔkkwa ɔgaga ɔttɛ, “Jesus, Waan-a-David, nbbewɔ lɛttɔ.” 39Balɔɔt ba lusso baggbamɛ battɛ, ɔtaa zzum. Ammɛ ɔkama-ɔkama ubungu ɔttɛ, “Waan-a-David, nbbewɔ lɛttɔ.” 40Ɔzzánga Jesus ubee ɔttɛ bakɔɔm ussi-ifim ’wɔng baang bafeemɛ. Ussi-ifim ’wɔng baang ɔffɔnɛ kɛtɛkɛtɛ, Jesus ɔbapmɛ ɔttɛ, 41“Aggyan attɛ nnyiwɔ ’bɔng?” Ussi-ifim ɔppyɛlɛmɛ kamma ɔttɛ, “Dedde nggyan nttɛ nppyɛlɛ nyɛn.” 42Jesus ɔlɔɔk la ammɛ ɔttɛ, “Ayɛn! Kiyila annɔ kɛnaangwɔbong ɔppwawɔ.” 43Eseese ɔyɛn. Ɔzzánga ufeele umii ukup Jesus. Ɔzɔnɔ Ɔlɔɔmɔlɔɔm kɛnaang. Kɛkaan ’sɔng baang bayɛnnɛ ning baang, babungu Ɔlɔɔmɔlɔɔm.

will be added

X\