LUKE 16

1Jesus ɔlɔɔk la balɔɔt a kɔssɛ ammɛ ɔttɛ, “Uggboggbo ɔlɔɔt ɔdɔkɔ baang wa ɔyanganɛ akkala wa kɔbɔɔk a kɔbɔɔk ammɛ. Ɔzzánga babwɔɔlɔmɛ battɛ akkala ’wɔng baang ɔbɛpɛbong ikkpoko ammɛ ka itɔk ya isinɛ lɛyyɛɛp. 2Uggboggbo ɔlɔɔt ’wɔng baang ɔkkwɔɔ akkala ’wɔng baang ɔttɛ, ‘Kɔlɔɔk kwa nppyeenɛ ntumwɔ bɛɛ? Asam bɛfɛɛn bya alenɛnɛ la lɛkɔɔm ɔkkpɛlɛ, annyinɛ. Ba nbɛlɛwɔ lɛggyan ka bukkala.’ 3Akkala ’wɔng baang ɔlɔɔk kɛyɔɔng ɔttɛ, ‘Dedde ɔggyannɛ kɛsanga ka kɛnaang anaam, nle nnaang nang? Anaam kaang lakke ba bayanga wa nle ntɔɔk ibbe. Lubbwoom ba nkkwoong ka izzit ile inaangnɛ. 4Kɔlɔɔk ba kule. Nttanɛ ka kɛnaang ’sɔng, vvenɛ nyanga inngwa ya bale batɔknɛ ka bukekeen ka ssala abbɛ.’ 5Ɔzzánga ɔkkwɔɔ balɔɔt ba balemɛnɛ la ippwoot. Ɔbap ɔkɔɔm ɛtɔk ɔttɛ, ‘Annɔ dedde adɔkɔnɛ la ippwoot nang?’ 6Ɔlɔɔt ’wɔng ɔttɛ, ‘Lalɔp ikyamkyam a bannɛ kubbwɔɔk’ Akkala ’wɔng baang ɔttɛ, ‘Uwɔng ulenɛ lɛkɔɔm annɔ; ataa-ɔtaa akkpɔk lalɔp ikyamkyam laffa la ikyamkyam zzɔɔp.’ 7Ɔbbal la ɔlɔɔt wa vvɔn lɛlɔɔk ɔttɛ, ‘Annɔ bɛɛ? Ale dedde la ippwoot nang?’ Ammɛ ɔlɔɔt ’wɔng baang ɔttɛ, ‘Ulenɛ lalɔp issɔ ilaasi kubbwɔɔk.’ Akkala ’wɔng baang ɔbwɔɔlɔmɛ ɔttɛ, ‘Uwɔng ulenɛ lɛkɔɔm annɔ. Ataa-ɔtaa akkpɔk lalɔp issɔ lanna.’ 8Abassɛ ɔbbyap akkala ’wɔng baang ubungu akkala ammɛ ka eleme ya ɔnaangnɛ ukuma, ka balɔɔt a vveeng ’wɔng mung banaangnɛ lagban ka kɛnaang abbɛ batta balɔɔt ba balenɛ ka buppwolo.” 9Jesus ɔbbal lɛlɔɔk ɔttɛ, “Ɔzzànga mung nbwɔɔlɔwɔyɔng! Anaangyɔng ɛnngwa la iyyɛɛp a vveeng nkwaaning, isaalnɛ batɔkwɔyɔng ka doddo ka ssala sa kɛfal a kɛfal. 10Ɔlɔɔt duu wa ɔyyɛɛpnɛ ka lilɔɔk sa ssup, ule ɔssɛ ɔyyɛɛp ning baang ka lilɔɔk sa lɛbaang. Ɔlɔɔt duu wa ɔsɛlɛnɛ latele ka lilɔɔk sa ssup ule ɔssɛ ɔsɛlɛ latele ning baang ka lilɔɔk sa lɛbaang. 11Asinɛ lɛyyɛɛp wa kɛkɔɔm a iyyɛɛp ɛkpansi, ale anaang nang akkɔnɔ wa kɛkɔɔm iyyɛɛp ya lɔkkwɔɔn? 12Asinɛ likkwoong akɔɔm bɔfɛɛn ɔlɔɔt, ɔlɔɔt ule ɔnaang nang unnyiwɔ bwa bulenɛ bwa annɔ? 13“Bɔɔyi vvɔn ba ukkwoong ɔzzanga ubili ibassɛ ammɛ iffa. Ɔyanganɛ ibassɛ iffa vvenɛ vvɔn utunmɛ wakang ɔttamɛ lɛsaap. Vvenɛ utele ɔlɔɔt vvɔn usseke wa vvɔn. Ba akkwoong atele Ɔlɔɔmɔlɔɔm la ikkpoko ɛkɛtɛ nnyɔn.” 14Balɔɔt a Pharisees bappyeenɛ ’kwɔng, banɔk Jesus ka balenɛ balɔɔt ba ikkpoko isaapnɛbɛ. 15Jesus ɔlɔɔk la abbɛ ɔttɛ, “Annyɔɔng alenɛyɔng balɔɔt ba anaangwɔnɛyɔng kitook kɛyɔɔng, ɔlɔɔt ɔppyɛɛkwɔyɔng, akkɔnɔyɔng ka lusso balɔɔt. Ɔzzànga Ɔlɔɔmɔlɔɔm ɔsanwɔyɔng ippyam lɔsan. Bɔfɛɛn bwa ɔlɔɔt uttinanɛ ɔttɛ bule ka kukkam gaang, bule bwa gbɔɔ ka lusso Ɔlɔɔmɔlɔɔm. 16“Lafɔɔ-a-Moses la likkpɔk a Bappyee-kutolo Ɔlɔɔmɔlɔɔm bittumu ning ning bɛffɔ ka ɛkɛtɛ John, Ɔnaang-a-Baptizim. Bassi ka ɛkɛtɛ ’yɔng baang babwɔɔlɔ Kuttu-budoddo Itutum-Ɔlɔɔmɔlɔɔm. Ɔzzánga ɔlɔɔt ɔlɔɔt ututala kɛmal ka Itutum-Ɔlɔɔmɔlɔɔm. 17Ɔzzànga kule kkpɛkɛlɛm ka libat la ɛkpansi bɛkkyaapnɛ, lutini kɛkkyaa waan a Lifɔɔ zzɔn gbɔɔ za utiti kɛzzɔɔk. 18“Ɔlɔɔt wa ɔggbanɛ wanavva ammɛ ɔfɔngɔ kang, ɔtɔk ɔlɔk; ɔlɔɔt ’wɔng baang ɔbɛpɛbong lafɔɔ kimini la wanavva ɔlɔk. Ɔlɔɔt wa ɔtɔknɛ wanavva wa ulam ɔggbamɛnɛ, ɔlɔɔt ’wɔng baang ɔbɛpɛbong lafɔɔ kimini la wanavva ɔlɔk.” 19“Uggboggbo ɔlɔɔt vvɔn ɔdɔkɔ baang wa ɔwɔkɔlɔnɛ iwɔkɔlɔ ya ikkaamnɛ kappya gaang. Ɔnaang kitook lutini livve la zzɔn. 20Ɔlɔɔt ɔlɔk ɔdɔkɔ baang ɔgbaa wa ɔzzanganɛ Lazarus wa lassɔp lannaangmɛnɛ ɔkkpɛlɛ a kkwɔɔt. Ɔtaa baang ka lɛmma ggwoon a uggboggbo ɔlɔɔt ’wɔng baang, 21ɔttɛ ɔlɔk ɔttɔng waan ezuku kazzi wa ɔffaatnɛ ɔttɔ ka lisse uzzi. Ɛkɛtɛ ɛlɔk ibbwa iffu immalmɛ lassɔp. 22Ukee-waan, ɔlɔɔt ’wɔng baang ubbe. Ubbenɛ, bayilabɔtɔɔm-Ɔlɔɔmɔlɔɔm baffu basammɛ bamii ka ɛfɛɛn a Abraham ka kɛtɔm sa balenɛ ka kɛnaang a kazzi kwa lɛbaang ka libat. Uggboggbo ɔlɔɔt ’wɔng baang ɔssɛ ubbe, ballimɛ. 23Ɔdɔkɔ usseke ka akama wa lɛbaang ka Hades. Uyeek ɔppyɛɛk ka libat ɔyɛn Abraham fulufulu la Lazarus ka lufoom ammɛ. 24Ɔzzánga ɔkkwɔɔ ɔgaga ɔttɛ, ‘Dedde, Abraham, nbbewɔ lɛttɔ, atɔɔm Lazarus ɔyan kɛnnɔ ka bannyi, ɔppwanɛ lɛlaak, nle ka akama wa usinɛ lɛyyɛɛp ka tɔkɔlɔ lɔkɔɔn ’gwɔng.’ 25Abraham ɔppyɛlɛmɛ kamma ɔttɛ, ‘Akke oo! Waan anaam, ka ɛkɛtɛ ya atiinɛ ka kuddu, bɛfɛɛn bya doddo ɔkkpɛlɛ annɔ ayanganɛ, Lazarus bulɔk bwa doddo usi lɛyanga. Gedegede mung utii ka vveeng wa doddo, annɔ baang asseke ka akama. 26Gɔɔ nkwɔng baang keem lissi, ogge wa ɔddɔngɔnɛ uleyɛlɛ ka bɛzzɔkɔ, nkwaaning ɔlɔɔt wa uttinanɛ ɔttɛ ussi kaang ning ukum uffu bakang, baala ukkwoong. Gɔɔ ka ussinɛ ka ɛfɛɛn annɔ abeenɛ baang, ɔlɔɔt ba ukkwoong ussi bakang uffu kaang ning.’ 27Uggboggbo ɔlɔɔt ’wɔng baang, ɔttɛ, ‘Ɔɔ. Dedde, kɔyyɛɛp mung nkkpengewɔ nttɛ atɔɔm Lazarus ka ssala dedde anaam, 28ka ɛfɛɛn a nyanganɛ itele kubbwɔɔk, umii ɔbwɔɔlɔbɛ, nkwaaning abbabbɛ keem bafɔngɔ kiffu ka akama wa lɛbaang ’wɔng mung.’ 29Abraham ɔttɛ, ‘Itele annɔ bale bakang la Moses la bappyee-kutolo Ɔlɔɔmɔlɔɔm, vvenɛ bakopolobɛ. Afɔngɔ itele annɔ bagɔpɔlɔ bappyee kwa bale balɔɔk bannyibɛ.’ 30Uggboggbo ɔlɔɔt ’wɔng baang ɔppyɛlɛmɛ kamma ɔttɛ, ‘Nkwɔng baang kɛyɔɔng ba kuffi, Dedde Abraham!, bulenɛ ka ubbu ufungalanɛ ka lubbe, umii ɔbwɔɔlɔbɛ nzang vvenɛ bakkyaa kɛnaang a bubbi bafɔngɔ.’ 31Abraham ɔttɛ, ‘Basinɛ kwa Moses la bappyee-kutolo Ɔlɔɔmɔlɔɔm liyila, kɛfal abbɛ baala bafoolo mkkpa ɔlɔɔt ufungala ka lubbe umii ɔbwɔɔlɔbɛ.’ ”

will be added

X\