1 Ɛkɛtɛ nnyɔn ɛdɔkɔ baang ya batɔk-innamba la balɔɔt ba bafɛɛlɛnɛbɛ ssala baffunɛ bagɔpɔlɔ lɛmmwɔɔl a Jesus. 2 Balɔɔt a Pharisees la bakopolo-Lafɔɔ bazzɔ battɛ, “Ɔlɔɔt ’wɔng ɔtɔk balɔɔt ba bafɛɛlɛnɛbɛ ssala la batɔk-innamba ɔssɛɛn ka kkwɔɔt, uzzi kazzi ɛfɛɛn kkwɔn la abbɛ ffet.” 3 Ɔzzánga Jesus ɔssabɛ ifɛɛt ɔttɛ, 4 “Ulenɛ bɔfɛɛn ɔlɔɔt ɔyanganɛ lalɔp itɔɔn kubbwɔɔk, nnyɔn ɛfakalanɛ ɛtaak, ule ɔnaang nang? Vvenɛ ɔgbata ɔkɔngɔ lalɔp itɔɔn lanna la itɔɔn ɔsɛlɛ-lɔlɔp ka kazzi, umii ɔggyan ya ɛtaaknɛ ɔddɔkɔddɔkɔ ɔyɛnyɛ. 5 Ukoponɛyɛ ɔkaa, vvenɛ uggele gaang gaang, ɔsamyɛ la bɔwaa, utele ka lukat. 6 Ɔtɔkɔyɛ ufula. Ɔffɔnɛ ka ssala ɔkkwɔɔ inngwa ammɛ la bakulufal ammɛ uloko ɛfɛɛn nnyɔn ɔbwɔɔlɔbɛ ɔttɛ, ‘Attelenɛyɔng nggele oo! Nyɛnbong ɛtɔɔn anaam ya ɛtaaknɛ.’ 7 Nbwɔɔlɔwɔyɔng, kule kɛssanga ssɔn, laggele za lalenɛ ka libat, ka ɔnaang-a-bubbi vvɔn ɔnaangnɛ busannɛ ka bubbi ammɛ, latta laggele za kwa lalɔp a balɔɔt lanna la balɔɔt ɔsɛlɛ-lɔlɔp ba doddo. 8 “Ɔlɔk wanavva wa ɔyanganɛ isiling zzɔɔp, ulenɛ ka siling vvɔn ɔttanɛ ɔttɔ ɔtaak, attina attɛ, ule ɔnaang nang? Vvenɛ uyenge luggo ɔkkyaang kɛsana ggwoon ammɛ, ɔggyan ukkpit ning ning ɔttɔngmɛ. 9 Ɔttɔngnɛ, ɔkkwɔɔ inngwa ammɛ la bakulufal ammɛ, ubbi ɛfɛɛn nnyɔn ɔttɛ battelemɛ uggele, ka ulenɛ siling ammɛ lɛttɔng. Nbbalwɔyɔng lɛbwɔɔlɔ nttɛ 10 bayilabɔtɔɔm bassɛ baggele ning baang ka bayɛnnɛ ɔnaang-a-bubbi ka ɔnaangnɛ busannɛ ka bubbi bwa ɔnaangnɛ.” 11 Jesus ɔbbal lɛlɔɔk ɔttɛ, “Ɔlɔɔt ɔdɔkɔ baang wa ɔfɔɔnnɛ bwɔɔn baffa. 12 Usseke-isimi ɔlɔɔk la abassɛ ɔttɛ, ‘Dedde, annyinɛ kazzi kullu kwa anaam!’ Ɔzzánga ɔsam bɛfɛɛn ammɛ bya ɔyanganɛ ɔkkpɛlɛ, ɔbɛngɛlɛ bwaan ammɛ ’bɔng baang baffa. 13 Bwaan a bɛtɔm ssup bɛsaknɛ usseke isimi a waan ammɛ ’wɔng baang, ɔttɔng etini kazzi kullu ya ammɛ, ɔtaan; ɔgbata umii ikaan la ikkpoko. Umiinɛ ka ikaan ya fulufulu, ɔsam ikkpoko ammɛ uzzi uvve. 14 Bɔfɛɛn ɔkkpɛlɛ bwa ɔyanganɛ uzzibong uvve. Uvvenɛ bɛfɛɛn ammɛ lizzi, buwɔɔng buttɔ ka lɔkaan ’gwɔng baang. Bulɔk bwa ɔbbalnɛ lɛyanga gbɔɔ ba bule. 15 Ɔzzánga ɔgbata umii ɔtaa la ɔlɔɔt a lɔkaan ’gwɔng baang. Ɔlɔɔt a lɔkaan ’gwɔng baang ɔsangamɛ ɔttɛ umii ɔppyɛɛk ikkumma ka bɔtɔɔm. 16 Umiinɛ, ɔkkɔlɔ kazzi kwa ikkumma izzinɛ. Ɔlɔɔt wa ɔwɔkɔmɛnɛ gbɔɔ ba ule. 17 Ka lakuma ɔnaangmɛ ggbool, ɔttɛ, ‘Balɔɔt a kɛnaang a dedde ɔkkpɛlɛ abbɛ bazzi kazzi bakɔɔm batutulu, mung anaam nle ka nbbenɛ buwɔɔng. 18 Vvenɛ nfeele nmii ka ɛfɛɛn a dedde, nbwɔɔlɔmɛ nttɛ, “Dedde nnaangbong bubbi ntum Ɔlɔɔmɔlɔɔm la annɔ. 19 Anaam ba nbɛlɛ lɛkkɔnɔ kɛkkwɔɔnɛ waan annɔ. Appyɛɛ akɔɔmnɛ tɛ̀ttɛ̀ akɔɔmnɛ illeebila annɔ ɔkkpɛlɛ.” ’ 20 Ɔzzánga ufeele kɔssɛ kimii ka ɛfɛɛn abassɛ. “Utii ka utumanɛ fulufulu bakang, abassɛ ɔyɛnmɛ, bibbemɛ lɛttɔ, ɔmma umii, ugbugbamɛ. 21 Waan ’wɔng baang ɔttɛ, ‘Dedde nnaangbong bubbi ntum Ɔlɔɔmɔlɔɔm la annɔ. Ba nbɛlɛ lɛkkɔnɔ kɛkkwɔɔnɛ waan annɔ.’ 22 Ɔzzánga abassɛ ɔkkwɔɔ ibɔɔyi ammɛ, ɔttɛ, ‘Azzuma asamyɔng ewuulu ya ɛttanɛ lɛyyɛɛp, affu awɔkɔlɔmɛyɔng. Assɛɛnmɛyɔng waan-ella ka kɛnnɔ. Assɛɛnmɛyɔng ikkpa-bukkpɔ. 23 Usseke amii akaayɔng ufala ɔgɔdɔ wa ɔkkaamnɛ kappya, affu awwɔɔlyɔng, banaang kazzi kwa lɛbaang. 24 Waan anaam ’wɔng mung wa ɔdɔkɔnɛ ule libbe, gedegede nyɛnmɛbong ka kuddu. Ɔdɔkɔbong ɔtaak kkpal, mung idunamɛbong!’ Ɔzzánga batte kɛnaang a kazzi kwa lɛbaang eseese. 25 “Ka ɛkɛtɛ ’yɔng baang waan ammɛ wa ɔgɛlɛnya ule ka bɔtɔɔm. Usi lɛmmɛ waan ammɛ wa ɔgɛlɛnya ’wɔng baang ɔppyɛlɛ. Ɔppyɛlɛnɛ, uffu ɔffɔ kɛtɛkɛtɛ a ssala, uppyee ibin ka bakkpanɛ basoom batɔm. 26 Ɔkkwɔɔ bɔɔyi-abassɛ vvɔn ɔbapmɛ ɔttɛ, ‘Bakang bale ka ’bɔng?’ 27 Ɔzzánga bɔɔyi ’wɔng baang ɔbwɔɔlɔmɛ ɔttɛ, ‘Etele annɔ ɔppyɛlɛnɛ, kwakkwɛ ssaawɔ ɔwwɔɔlmɛnɛ ufala ɔgɔdɔ wa ɔkkaamnɛ kappya.’ 28 Waan ’wɔng baang wa ɔgɛlɛnya kutunmɛ ssassa, gɔɔ kimii ka ssala kisimɛ lɛbɛlɛ lɛsaap. Ɔzzánga abassɛ umii ukkpengemɛ uffu ka ssala. 29 Ɔkɔɔm-ɛtɔk a waan ’wɔng baang ɔppyɛlɛ abassɛ kamma ɔttɛ, ‘Ka ussinɛ ka kukkpa kwa abɛngɛlɛnɛyɛlɛ bɛfɛɛn ɔffɔ ka mmwɔɔm, nle baang kkwɔk ka nnaangwɔnɛ kɛnaang tɛ̀ttɛ̀ ubili. Kɛtɔm ssɔn gbɔɔ lɛmmwɔɔl annɔ ba ntaka nkangala, ɔdɔkɔ alenɛ bɔng linnyi? Gɔɔ ɛbal mung gbɔɔ nɛ ba ataka annyi, nnaang kazzi, izzi la inngwa anaam. 30 Mung waan annɔ ɔtaanbong bɛfɛɛn annɔ ɔkkpɛlɛ; uzzi uvve la ikkpàlà; ɔppyɛlɛ, annɔ asam ɔgɔdɔ wa ɔkkaamnɛ kappya awwɔɔlmɛ.’ 31 Abassɛ ɔttɛ, ‘Waan anaam, ale mung ka ssala anaam, bɛfɛɛn ɔkkpɛlɛ bya nyanganɛ bya annɔ. 32 Kɔyyɛɛp ka inaangnɛ kazzi iggele ka etele annɔ ɔdɔkɔnɛ ule libbe, mung ippyɛlɛ iyɛnmɛ ka kuddu; ɔdɔkɔbong ɔtaak, ɔzzànga mung idunamɛbong.’ ”
