LUKE 1

1Nwomowɔbong Theophilus: Balɔɔt ppwap babumbong tɛ̀ttɛ̀ bakkwoongnɛ bakkpɔk lilɔɔk sa linaangnɛyɛlɛ mung ka bɛzzɔkɔ, bassɛɛn ka luvva. 2Bakkpɔk kwa balɔɔt ba bayɛnnɛ lilɔɔk ’sɔng mung ka zzeen ka ussinɛ ka lutte assɛ babwɔɔlɔnɛyɛlɛ. 3Dedde, ka nlenɛ luppyam libbe nkoop lilɔɔk ’sɔng mung ka lutte assɛ, nttina nttɛ kule kɔyyɛɛp ka nkkpɔknɛsɛ silididi, nnyiwɔ. 4Nggyan nttɛ nkwaaning asan lɔkkwɔɔn a kɔlɔɔk a lilɔɔk ’sɔng mung ɔkkpɛlɛ sa balewɔnɛ likopolo. 5Ka ɛkɛtɛ ya Herod ɔdɔkɔnɛ ubeet ka ɛkpansi Israel, ɔssɛɛn-a-luzɔɔm ɔdɔkɔ baang wa ɔzzanganɛ Zachariah wa ussinɛ ka kɛkaan a bassɛɛn-a-luzɔɔm sa Abijah. Avva ɔdɔkɔ ɔzzanga Elizabeth. Elizabeth ɔgbaa ɔdɔkɔ ussi ka itutum a ɔssɛɛn-a-luzɔɔm. 6Ɔkkpɛlɛ abbɛ baffa badɔkɔ balɔɔt ba doddo ka lusso Ɔlɔɔmɔlɔɔm. Batele lafɔɔ Ɔlɔɔmɔlɔɔm ɔkkpɛlɛ azzɛ. 7Bwɔɔn basi lɛfɔɔn ka Elizabeth ɔdɔkɔnɛ ulleep. Ɔgbaa ɔkkpɛlɛ abbɛ bakkpɛɛmbong gaang gaang. 8Kɛtɔm ssɔn, Zachariah ɔdɔkɔ ka kɛnaang a kɛssɛɛn a luzɔɔm ka Ggwoon-Ɔlɔɔmɔlɔɔm ka ɔdɔkɔnɛ kɛbap sa ammɛ. 9Ka eleme abbɛ, bassɛɛn-a-luzɔɔm badɔkɔ bakɔɔm illɔ, basangamɛ battɛ umii ɔfɔɔp bɛfɛɛn ka labun-Ɔlɔɔmɔlɔɔm. Keem umii ka tɔkɔlɔ a Ggwoon-Ɔlɔɔmɔlɔɔm. 10Balɔɔt babbi ka vveeng, bazɔɔm ka ɛkɛtɛ kɛfɔɔp a bɛfɛɛn ’byɔng baang. 11Uyilabɔtɔɔm-Ɔlɔɔmɔlɔɔm utuma ka ɛfɛɛn a Zachariah. Ɔkɔɔng baang ka kufoom ɛlaabɔɔk a labun-Ɔlɔɔmɔlɔɔm za bafɔɔpnɛ bɛfɛɛn, ubee. 12Zachariah ɔyɛnmɛnɛ, tɔkɔlɔ ɔbbɔlmɛ, ɔbbwɔpɔmɛ. 13Ɔzzánga uyilabɔtɔɔm ’wɔng baang ɔttɛ, “Zachariah, tɛ̀ttɛ́ ɔbbwɔpɔwɔ! Ɔlɔɔmɔlɔɔm uppyeewɔbong luzɔɔm. Wanavva annɔ vvenɛ ɔmaatwɔ waanawalam. Akɔlɔmɛ John. 14Vvenɛ aggele gaang gaang ka bale bamaatmɛ. Balɔɔt ppwap vvenɛ bassɛ baggele gaang gaang ka bale bamaatmɛ! 15Vvenɛ ule ule ɔlɔɔt wa lɛbaang ka lusso Ɔlɔɔmɔlɔɔm. Tɛ̀ttɛ́ ɔvva batak nakanaka. Kuyeeng-Ɔlɔɔmɔlɔɔm vvenɛ kuvvoongmɛ ka ussinɛ ka kɛtɔm sa bale bamaatmɛ. 16Vvenɛ ɔkɔɔm balɔɔt a Israel ppwap, ɔppyɛlɛ ufee Ebinukkpaapi, Ɔlɔɔmɔlɔɔm abbɛ. 17Vvenɛ ɔkɔɔm ɛtɔk umii ka lusso la bɔkkaam la buggbenge tɛ̀ttɛ̀ Elijah uppyee-kutolo Ɔlɔɔmɔlɔɔm. Vvenɛ ɔnaang ibassɛ balɔɔt la bwɔɔn abbɛ bappyɛlɛ bataa ɛfɛɛn kkwɔn. Vvenɛ ɔnaang banaang-a-bubbi banaang ikɔlɔ, bakup ɛtɔk ya doddo. Vvenɛ ɔbama balɔɔt Ɔlɔɔmɔlɔɔm ulokomɛ.” 18Zachariah ɔlɔɔk la uyilabɔtɔɔm ɔttɛ, “Nle nnaang nang nsan nttɛ kɔlɔɔk kwa alɔɔknɛ mung kule ka lɔkkwɔɔn? Anaam ntii ukuku, wanavva anaam ɔgbaa ɔkkpɛɛmbong.” 19Uyilabɔtɔɔm-Ɔlɔɔmɔlɔɔm ɔppyɛlɛmɛ kamma ɔttɛ, “Anaam nlenɛ Gabriel wa ubeenɛ ka lusso Ɔlɔɔmɔlɔɔm. Ammɛ ɔtɔɔmnɛnɛ, ɔttɛ nffu nbwɔɔlɔwɔ kuttu kwa doddo ’kwɔng mung. 20Ɔzzànga mung asibong bɔtɔɔm bwa ɔtɔɔmnɛnɛ bwa bule bunaang ka ɛkɛtɛ ele ɛffɔ liyila. Ka alenɛ lifim liyila, vvenɛ nlakawɔ lɛkkɔ. Lɛmmwɔɔl vvenɛ ba abɛlɛ likkwoong azza tɔttɔt ɔffɔ ka kɛtɔm sa lilɔɔk sa nbwɔɔlɔwɔnɛ mung lile linaang ka lɔkkwɔɔn.” 21Ka ɛkɛtɛ ’yɔng baang balɔɔt ɔkkpɛlɛ bale baang ka bataanɛ bakat Zachariah. Kɔkɛɛlɛbɛ ka ɔmmɛmɛnɛ ka tɔkɔlɔ a Ggwoon-Ɔlɔɔmɔlɔɔm. 22Zachariah ɔttanɛ ka vveeng, kɛlɔɔk usi lɛbɛlɛ likkwoong. Abbɛ bakɔɔlɔ battɛ ɔyɛnbong biyɛnɛ ka Ggwoon-Ɔlɔɔmɔlɔɔm. Usseke ka ɔlɔɔknɛ ka bɛnnɔ. Lɛmmwɔɔl lisi lɛbɛlɛ lɛtta. 23Ɛkɛtɛ kɛnaang ammɛ ka Ggwoon-Ɔlɔɔmɔlɔɔm elenɛ lɛsak, ɔppyɛlɛ ufula ka ssala ammɛ. 24Ɔmmɛnɛ ssup wanavva ammɛ Elizabeth ɔyɛɛm. Usi ka ssala lɛgbata ka ittuma kubbwɔɔk. Ɔttɛ, 25“Ebinukkpaapi ɛyɛnnɛbong kibbe-lɛttɔ, ɛyaammɛ, ɛsanganɛbong ka izzit ka lusso balɔɔt ɔkkpɛlɛ.” 26Elizabeth ulenɛ lɛyɛɛm, ɔffɔmɛ ittuma bwɔlaaning, Ɔlɔɔmɔlɔɔm ɔtɔɔm uyilabɔtɔɔm ammɛ Gabriel, ɔttɛ, umii ka lɛffɛ za lɛzzanganɛ Nazareth ka ɛkpansi a Galilee. 27Ɔttɛ umii ɔbwɔɔlɔ waanawanavva wa ɔtakanɛ walam lɛsan, wa Joseph wa ussinɛ ka kikkwu a David ɔggyannɛ. Waanawanavva ’wɔng baang ɔzzanga Mary. 28Uyilabɔtɔɔm-Ɔlɔɔmɔlɔɔm umii ka ɛfɛɛn a Mary ɔttɛ, “Bɔkaat butaa la annɔ! Ebinukkpaapi ele la annɔ! Ɛnaangwɔbong ppyɛɛ ɔttala!” 29Mary luppyam lɔzzamɛ ka uppyeenɛ bɔtɔɔm bwa uyilabɔtɔɔm ɔbwɔɔlɔmɛnɛ. Kɔkɛɛlɛmɛ bwa ɔlɔɔknɛ utum. 30Uyilabɔtɔɔm ɔlɔɔk la ammɛ ɔttɛ, “Tɛ̀ttɛ́ ɔbbwɔpɔwɔ Mary, Ɔlɔɔmɔlɔɔm asaapmɛ gaang. 31Vvenɛ ayɛɛm, amaat waanawalam wa ale akɔlɔmɛ Jesus. 32Vvenɛ uggbenge bakkwɔɔmɛ Waan-Ɔlɔɔmɔlɔɔm. Ɔlɔɔmɔlɔɔm vvenɛ ɔnaangmɛ ɔzzanga ubeet tɛ̀ttɛ̀ abassɛ, David, wa iyɛddɛ-iyɛddɛ ɔdɔkɔnɛ. 33Vvenɛ ɔzzanga ubeet ka kikkwu a Jacob. Kibeet ammɛ baala kikpeke yoyyoyyo.” 34Mary ɔlɔɔk la uyilabɔtɔɔm ɔttɛ, “Anaam kaang ntii waanawanavva wa ɔtakanɛ la walam limini. Nkwɔng kule kɔnaang nang, vvenɛ kule ning baang?” 35Uyilabɔtɔɔm ɔppyɛlɛmɛ kamma ɔttɛ, “Kuyeeng-Ɔlɔɔmɔlɔɔm vvenɛ kuvvoongwɔ; lakke ammɛ vvenɛ lataa la annɔ. Ka kulenɛ ning baang, waan wa doddo ’wɔng baang vvenɛ bakkwɔɔmɛ Waan-Ɔlɔɔmɔlɔɔm. 36Akke attɛ ɔkpana annɔ Elizabeth wa ɔdɔkɔnɛ ulleep, gedegede mung utiimɛ ittuma bwɔlaaning ka ulenɛ la zzɛɛm la lɛkkpɛɛm ’zɔng baang tɛ. 37Kɔlɔɔk kwa Ɔlɔɔmɔlɔɔm usinɛ likkwoong ɔnaang ba kule.” 38Mary ɔttɛ, “Anaam ubili a Ebinukkpaapi, kɔtaa ning baang tɛ̀ttɛ̀ alɔɔknɛ.” Ɔzzánga uyilabɔtɔɔm ɔgbata ussekemɛ. 39Ka bɛtɔm ’byɔng baang Mary ufeele la lazzuma la lazzuma, umii ka killu sa kilenɛ ikpok-ikpok ka Judea. 40Umii ka ssala Zachariah, uwomo Elizabeth. 41Elizabeth uppyeenɛ ka Mary uwomomɛnɛ, ubbu ufeelemɛ ka lɛmmɛ. Ɔzzánga Kuyeeng-Ɔlɔɔmɔlɔɔm kuvvoongmɛ. 42Elizabeth ɔlɔɔk ɔgaga ɔttɛ, “Ppyɛɛ ule wa annɔ ɔtta wa bwanavva ɔkkpɛlɛ. Ppyɛɛ ule wa waan annɔ wa ale amaat. 43Mbɔng tɛ́ttɛ́ uggboggbo kɔlɔɔk ’kwɔng kɔnaangnɛ ka abakka Uyini anaam uffunɛ ukoolonɛ? 44Nppyeenɛ luwomo annɔ, eseese ubbu ufeelenɛ ka lɛmmɛ la laggele. 45Ppyɛɛ ule wa annɔ wa ayilanɛ kwa Uyini ɔlɔɔknɛ unnyiwɔ.” 46Mary ubungu Ɔlɔɔmɔlɔɔm ɔttɛ, “Nbungubong Ɔlɔɔmɔlɔɔm ka luppyam anaam. 47Nggelebong kwa Ɔlɔɔmɔlɔɔm Ɔkkala-ikkala anaam, 48ka ulenɛnɛ anaam ukee-waan, ubili ammɛ, likke. Ka ussinɛ mung umii ka lusso, balɔɔt ɔkkpɛlɛ vvenɛ bakkwɔɔnɛ ɔlɔɔt a latele, 49ka uggboggbo lilɔɔk ’sɔng sa Ɔlɔɔmɔlɔɔm ɔnaangnɛ unnyinɛ, lɛkɔɔl ammɛ, lɛkɔɔl a doddo. 50Ɔyɔɔ kibbe-lɛttɔ la balɔɔt ba batelemɛnɛ la kɛkkpa la kɛkkpa. 51Utuulu kɔbɔɔk ammɛ; ubbum balɔɔt ba baggbengenɛbɛ kɛyɔɔng la ittina abbɛ. 52Ɔggba babeet ka kibeet abbɛ, ɔssanga bakee-bwɔɔn bazzanga babeet. 53Unnyibong balɔɔt a buwɔɔng kazzi kwa doddo; ɔggba balɔɔt ba ɔyyɛɛpnɛbɛ bamii ibɔɔk ibɔɔk. 54Ulokobong nsekele wa ɔnaangnɛ la balɔɔt iyɛddɛiyɛddɛ, ɔttɛ vvenɛ uffu uttele balɔɔt ammɛ Israel. 55Ukkebong Abraham la kikkwu ammɛ, babbemɛ lɛttɔ kɛfal a kɛfal.” 56Mary ɔtaa la Elizabeth ka ittuma ikkyaat tɛ́ttɛ́ ɔppyɛlɛ ufula ka ssala ammɛ. 57Ɛkɛtɛ ɛffɔ Elizabeth ya kɛmaat, ɔzzánga ɔmaat waanawalam. 58Bakulufal ammɛ la ikpana ammɛ bappyeenɛ kɔkɛɛlɛbɛ, ɔkkpɛlɛ abbɛ baggele ka budoddo bwa Ebinukkpaapi ɛnaangnɛ Elizabeth. 59Waan ’wɔng baang liwaazɛ liffumɛnɛ, bakɔɔmnɛ baffu kɛzza lɛtaa. Badɔkɔ battɛ bakɔlɔmɛ Zachariah, lɛkɔɔl a abassɛ. 60Ɔzzánga Mary, abakka, ɔttɛ “Maaye oo! ɔzzànga John.” 61Balɔɔk la abakka battɛ, “Ɔlɔɔt wa ɔzzanganɛ lɛkɔɔl ’zɔng ka itutum annɔ ba ule!” 62Ɔzzánga balɔɔk ka bɛnnɔ, babap Zachariah, abassɛ waan, lɛkɔɔl za waan ammɛ ule ɔzzànga. 63Zachariah ɔggyan luvva gwa kɛkkpɔk. Ɔkkpɔk ɔttɛ, “Lɛkɔɔl ammɛ ule ɔzzanga John.” Balɔɔt ɔkkpɛlɛ kɔkɛɛlɛbɛ. 64Ka ussinɛ ka ɛkɛtɛ ’yɔng baang, Zachariah ɔbbal kɛlɔɔk likkwoong. Ubungu Ɔlɔɔmɔlɔɔm. 65Bakulufal ammɛ ɔkkpɛlɛ ɔbbwɔpɔbɛ. Ɔzzánga kuttu kɔlɔɔk ’kwɔng kɔwaala ɔkkpɛlɛ ka billu bya ikpok-ikpok ka Judea. 66Ɔlɔɔt ɔkkpɛlɛ wa uppyeenɛ kuttu ’kwɔng baang uttina utumkwɛ. Ɔbap ɔttɛ, “Waan ’wɔng baang ule ule bɔng?” Baggba lɛsan battɛ likke Ɔlɔɔmɔlɔɔm lile la ammɛ. 67Kuyeeng Ɔlɔɔmɔlɔɔm kuvvoong Zechariah, abassɛ a John, Zechariah ɔlɔɔk kwa bɔtɔɔm a Ɔlɔɔmɔlɔɔm ɔttɛ, 68“Affu ibunguyɔng Ebinukkpaapi, Ɔlɔɔmɔlɔɔm a Israel, ka ulenɛ liffu ɔkkala balɔɔt ammɛ. 69Unnyibongyɛlɛ Ɔkkala-ikkala wa lɛbaang wa ussinɛ ka kikku waan ammɛ David. 70Nkwɔng kulenɛ kɔlɔɔk kwa bappyee-kutolo Ɔlɔɔmɔlɔɔm baggbanɛ lɛlɔɔk bakɔɔl Ɔlɔɔmɔlɔɔm. 71Ɔlɔɔmɔlɔɔm uyila ɔttɛ vvenɛ ɔkkalayɛlɛ ka labɔɔk a balɔɔt a kɔfɔk ayyɔɔt la balɔɔt ba itunnɛbɛ. 72Ɔttɛ vvenɛ ɔyɔɔ bagɛlɛnya ayyɔɔt ba iyɛddɛ-iyɛddɛ kibbe-lɛttɔ. vvenɛ ɔnaang nsekele ammɛ wa lɔkkwɔɔn. 73- 75Ɔnaang nsekele la Abraham, ɔgɛlɛnya ayyɔɔt wa iyɛddɛ-iyɛddɛ, uyim ɔttɛ vvenɛ ɔsangayɛlɛ ka labɔɔk a balɔɔt a kɔfɔk ayyɔɔt, ɔfɔngɔyɛlɛ iyilamɛ bɔtɔɔm ammɛ isɛlɛ bbwɔp ilokoyɛlɛ kɛyɔɔng doddo, inaang lilɔɔk ɔkkpɛlɛ sa liyyɛɛpnɛ ka lusso ammɛ tɔttɔt ikkpɛɛm ibbe. 76“Annɔ waan anaam, bale bakkwɔɔwɔ uppyee-kutolo Ɔlɔɔmɔlɔɔm wa libat. Vvenɛ akɔɔm ɛtɔk amii alɔngɔlɔ ɛtɔk Uyini alokomɛ. 77Vvenɛ abwɔɔlɔ balɔɔt ammɛ attɛ vvenɛ ɔkkalabɛ ka ule asɔɔkbɛ bubbi abbɛ. 78Ɔlɔɔmɔlɔɔm ayyɔɔt ibbemɛ lɛttɔ, ɔkɔɔmyɛlɛ doddo. Vvenɛ ɔnaang buppwolo kuddu, buppwolo ka ayyɔɔt. 79Vvenɛ buppwolo ’bwɔng baang bussi ka libat buvvoong balɔɔt ba balenɛ ka tɔkɔlɔ kisul a ntɛm a lubbe, vvenɛ ɔkat lakaat ayyɔɔt, issɛ ka ɛtɔk a bɔkaat.” 80Waantiti ɔmmala uggbenge ka kkwɔɔt la lɔtan, ullu ka kasɛkɛ atingating tɔttɔt ɔffɔ ka kɛtɔm sa ule ɔtta ka lusso balɔɔt a Israel.

will be added

X\