JOHN 6

1Nkwɔng kɔsaalnɛ, Jesus umii kukupa libbwɛ a Galilee (lɛzzanga Libbwɛ a Tiberias ɔgbaa). 2Kɛkaan a balɔɔt kikupmɛ ka balenɛ ittula ya uttulanɛ ka bɛmaanga lɛyɛn. 3Jesus ubbulu lɛttaal umii ɔtaa-ɔtaa la balɔɔt a kɔssɛ ammɛ. 4Ɛkɛtɛ Kazzi-Kɛsak-Kɛkɔngɔ ɛkkɛtɛbong. 5Jesus uyeeknɛ ɔppyɛɛk ɔyɛn ɔttɛ kɛkaan a balɔɔt kikupmɛbong, ɔbap Philip ɔttɛ, “Kazzi ile iyɛn ’yang ilɛɛp kaddu balɔɔt ’bɔng mung?” ( 6Ule Philip ka kɛllɛ. Ammɛ biini ɔggba lɛsan bwa ule ɔnaang.) 7Philip ɔttɛ, “Iggyannɛ ittɛ ezuku ɛffɔ ɔlɔɔt ɔkkpɛlɛ, vvenɛ ikɔɔm bɔfɛɛn busak lalɔp naira laffa ilɛɛp brɛɛd wa ule uddu.” 8Andrew, ɔlɔɔt a kɔssɛ ammɛ wa vvɔn, wa ulenɛ etele a Simon Peter ɔttɛ, 9“Waanwalam ule mung wa ɔyanganɛ igɔngɔ a brɛɛd kubbwɔɔk la isɛɛnabannyi iffa, ɔzzànga baala iddu balɔɔt ’bɔng mung ka naka-naka,” 10Jesus ɔttɛ, “Alɔɔkyɔngbɛ bataa-ɔtaa.” (Lifaat littala ɔttala baang) Ɔzzánga balɔɔt ’bɔng baang bataa-ɔtaa baang. Badɔkɔ innɔ zzɔɔppiffa la lalɔp zzɔɔp. 11Jesus ɔsam brɛɛd ’wɔng baang, uwomo Ɔlɔɔmɔlɔɔm kɛnaang, ɔtɔk ɔbɛngɛlɛbɛ. Ɔbbal isɛɛnabannyi lɛsam, ɔbbal Ɔlɔɔmɔlɔɔm kɛnaang liwomo, ɔtɔk ɔbɛngɛlɛbɛ, bazzi bawukala. 12Bawukalanɛ, ɔlɔɔk la balɔɔt a kɔssɛ ammɛ ɔttɛ, “Attɔngyɔng izuku ya issekenɛ, tɛ̀ttɛ́ ezuku ɛlɔk ɛbɛpɛ.” 13Ɔzzánga battɔng izuku ya issekenɛ ya igɔngɔ a brɛɛd kubbwɔɔk ’yɔng baang bassɛɛn ka isangala zzɔɔppiffa iyipi. 14Balɔɔt ’bɔng baang bayɛnnɛ bɛmaanga bya Jesus ɔnaangnɛ, battɛ, “Uwɔng uppyee-kutolo Ɔlɔɔmɔlɔɔm aawɛ wa ulenɛ ka kiffu ka ɛkpansi ’yɔng ka lɔkkwɔɔn!” 15Jesus ɔsannɛ ɔttɛ bale ka bakaamɛnɛ kibeet ka lagabwɔ, ɔgbata ubbulu lattaal kɛyɔɔng umii. 16Kulele kɔnaangnɛ, balɔɔt a kɔssɛ a Jesus bafeele bamii ka libbwe. 17Bamal ka akkpaat bawaat bappyɛlɛ isimisimi. Bale ka kɛzza libbwe kikum kimii Capernaum. Usulbɛ ka Jesus ɔtakanɛ ka ɛfɛɛn abbɛ lile. 18Ka ɛkɛtɛ ’yɔng baang, kɛffa sa kɛkkaamnɛ kɛffa kiggbuku bannyi. 19Bawaatnɛ akkpaat tɔttɔt bamii, bayɛn Jesus ka ɔssɛnɛ ka ɛkkpabannyi uffu kɛtɛkɛtɛ akkpaat. Ɔbbwɔpɔbɛ. 20Jesus ɔttɛ, “Tɛ̀ttɛ́ ɔbbwɔpɔwɔyɔng, anaam tɛ!” 21Ɔzzánga baggele gaang gaang basam Jesus bassɛɛn ka akkpaat eseese akkpaat ɔffɔ ka ɛkpansi ɛfɛɛn ya balenɛ ka kimii. 22Ɔffɔnɛ libessolo, kibbi balɔɔt sa kɛtaanɛ ka kukupa libbwe kwa kkwɔn bakke battɛ akkpaat vvɔn keem ussekenɛ baang. Basan battɛ Jesus usi ka akkpaat lɛmal la balɔɔt a kɔssɛ ammɛ, bagbatabong bakɔngɔmɛ ka isimi. 23Ikkpaat ilɔk ya issinɛ Tiberias iffu ibee ka lɛgga kɛtɛkɛtɛ ɛfɛɛn ya balɔɔt ’bɔng baang bázzinɛ brɛɛd wa Uyini uwomonɛ Ɔlɔɔmɔlɔɔm kɛnaang tɛ́ttɛ́ bazzi. 24Kibbi ’sɔng baang kɛkɔɔlɔnɛ battɛ Jesus baang ba ule, gɔɔ balɔɔt a kɔssɛ ammɛ baang mgbaa ba bale, bamal ka ikkpaat ’yɔng baang bamii baggyanmɛ ka Capernaum. 25Balɔɔt ’bɔng baang bayɛnnɛ Jesus ka kukupa libbwe kwa kkwɔn, battɛ, “Ukopolo-lukopolo, kaang affɔ ɛkɛtɛ nang?” 26Jesus ɔttɛ, “Nbwɔɔlɔwɔyɔng lɔkkwɔɔn a kɔlɔɔk: aggyannɛyɔng ka alenɛyɔng brɛɛd lizzi tɛ̀ttɛ̀ ɔyyɛɛpwɔnɛyɔng. Nɛyɔng ba aggyanyɔng ka asannɛyɔng ifɛɛt imaanga ya nnaangnɛ. 27Tɛ̀ttɛ́ anaangyɔng kɛnaang kwa kazzi kwa kale kabɛpɛ. Lutini ’gwɔng, anaangyɔng kɛnaang kwa kazzi kwa kattumunɛ kɛfal a kɛfal. Uwɔng baang ulenɛ kazzi kwa Waan-Ɔssɛbibbit-Ɔkkpɛlɛ ule unnyiwɔyɔng ka Abassɛ ulenɛ eleme kiyila kamma lɛnaang ka kkwɔɔt a Waan-Ɔssɛbibbit-’wɔng baang.” 28Ɔzzánga babap Jesus battɛ, “Ile inaang nang ikkwoong inaang kwa Ɔlɔɔmɔlɔɔm ɔttɛnɛ inaang?” 29Jesus ɔttɛ, “Kwa Ɔlɔɔmɔlɔɔm ɔggyannɛ ɔttɛ anaangyɔng ulenɛ kiyila lɛmmwɔɔl a ɔlɔɔt wa ɔtɔɔmnɛ.” 30Abbɛ battɛ, “Bɛmaanga bya ale anaang ayɔɔyɛlɛ iyɛn iyila lɛmmwɔɔl annɔ, bilenɛ bɔka abbyɛ? Ale anaang mbɔng? 31Balɔɔt ayyɔɔt ba iyɛddɛ iyɛddɛ bazzi manna ka kkpelenene tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, ‘Unnyibɛ brɛɛd wa ussinɛ ka libat bazzi.’ ” 32Jesus ɔttɛ, “Nbwɔɔlɔwɔyɔng lɔkkwɔɔn a kɔlɔɔk: kazzi kwa Moses unnyiwɔnɛyɔng azziyɔng, brɛɛd wa ussinɛ ka libat lissi. Dedde anaam unnyiwɔnɛyɔng brɛɛd wa ussinɛ ka libat ka lɔkkwɔɔn. 33Brɛɛd wa Ɔlɔɔmɔlɔɔm unnyinɛ ulenɛ ɔlɔɔt ’wɔng baang wa ussinɛ ka libat uffu unnyi ɛkpansi kuddu.” 34Babap Jesus battɛ, “Dedde, annyiyɛlɛ brɛɛd ’wɔng baang ɛkɛtɛ ɔkkpɛlɛ.” 35Jesus ɔbwɔɔlɔbɛ ɔttɛ, “Anaam nlenɛ brɛɛd a kuddu. Ɔlɔɔt wa ukupnɛnɛ baala ɔkkwa buwɔɔng. Ɔlɔɔt wa uyilanɛ kwa anaam, bannyi mɛ baala basaap. 36Nbwɔɔlɔwɔyɔngbong kkpal nttɛ ayɛnnɛyɔngbong ɔzzànga baala ayilayɔng. 37Ɔlɔɔt duu wa Dedde ulenɛnɛ linnyi vvenɛ ukupnɛ. Ɔlɔɔt duu wa uffunɛ ka ɛfɛɛn anaam, mɛ baala nfim, 38ka nlenɛ ka libat lissi nffu nnaang kwa ɔlɔɔt wa ɔtɔɔmnɛnɛ ɔttɛnɛ nnaang, nsi kwa luppyam anaam lɛnaang. 39Nkwɔng kulenɛ kwa ɔlɔɔt wa ɔtɔɔmnɛnɛ ɔttɛnɛ nnaang. Ɔttɛ tɛ̀ttɛ́ ntaka ɔlɔɔt vvɔn gbɔɔ ka ɔkkpɛlɛ balɔɔt ba ulenɛnɛ linnyi. Nfungalabɛ ɔkkpɛlɛ ka lubbe ka kɛtɔm-a-lakpeke. 40Dedde ɔggyan ɔttɛ balɔɔt ɔkkpɛlɛ ba bayɛnnɛ Awaan bayila lɛmmwɔɔl ammɛ, baddu kuddu kwa kɛfal a kɛfal. Anaam vvenɛ nfungalabɛ ka lubbe ka kɛtɔm-a-lakpeke.” 41Balɔɔt a Jew ’bɔng baang bazzɔ eseese ka ɔttɛnɛ, “Anaam nlenɛ brɛɛd wa ussinɛ ka libat uffu.” 42Ɔzzánga battɛ, “Ɔlɔɔt ’wɔng mung Jesus, waan a Joseph, ammɛ lissi ɔɔ? Isan abakka la abassɛ lɔsan, ɔnaang nang ɔttɛ ammɛ ussi ka libat uffu.” 43Jesus ɔttɛ, “Tɛ̀ttɛ́ abɛlɛyɔng annyɔɔng annyɔɔng lɛzzɔ! 44Ɔlɔɔt wa ukkwoongnɛ uffu ukupnɛ ba ule; Dedde wa ɔtɔɔmnɛnɛ usinɛ ɔlɔɔt ’wɔng baang littulu unnyinɛ. Vvenɛ nfungala ɔlɔɔt ’wɔng baang ka lubbe ka kɛtɔm-a-lakpeke. 45Bappyee-kutolo Ɔlɔɔmɔlɔɔm bakkpɔk battɛ, ‘Ɔlɔɔmɔlɔɔm vvenɛ ukopolo ɔlɔɔt ɔkkpɛlɛ.’ Ɔlɔɔt duu wa uppyeenɛ lɛmmwɔɔl a Dedde ukkoop kɔlɔɔk ka ammɛ, ukupnɛnɛ anaam. 46Ba kule kɛttɛ ɔlɔɔt ɔlɔk ɔyɛnbong dedde, ammɛ wa ussinɛ ka Ɔlɔɔmɔlɔɔm keem ulenɛ Abassɛ lɛyɛn. 47Nbwɔɔlɔwɔyɔng lɔkkwɔɔn a kɔlɔɔk: Ɔlɔɔt wa uyilanɛ, ɔyanga kuddu kwa kɛfal a kɛfal. 48Anaam nlenɛ brɛɛd a kuddu. 49Idedde annyɔɔng ba iyɛddɛ iyɛddɛ bazzi manna ka kasɛkɛ kɛmat ɔzzànga balɔngɔlɔ babbe tɔttɔt. 50Ɔzzànga brɛɛd wa ussinɛ ka libat uffu ule kɛssanga sa ɔlɔɔt duu wa uzzinɛsɛ ule usi lɛbɛlɛ libbe. 51Anaam nlenɛ brɛɛd wa ulenɛ ka kuddu ussi ka libat uffu. Ɔlɔɔt wa uzzinɛ brɛɛd ’wɔng mung uddu kuddu kwa kɛfal a kɛfal. Brɛɛd wa nle nnyimɛ ulenɛ ɛkkpakkwɔɔt anaam ya nsamnɛ nnyi ɔkkɔɔnɛ ɛkpansi ɛtaa ka kuddu.” 52Nkwɔng kɔdɛm ikangala ya ikkaamnɛ ittɔbɛ ka bɛzzɔkɔ. Battɛ, “Ɔlɔɔt ’wɔng ulenɛ nyinɔɔng wa unnyinɛyɛlɛ ɛkkpakkwɔɔt ammɛ izzi.” 53Jesus ɔttɛ, “Nbwɔɔlɔwɔyɔng lɔkkwɔɔn a kɔlɔɔk: asinɛyɔng ɛkkpakkwɔɔt a Waan-Ɔssɛbibbit-Ɔkkpɛlɛ lizzi, avvayɔng linnyi ammɛ, ka kuddu baala ataayɔng. 54Ɔlɔɔt duu wa uzzinɛ ɛkkpakkwɔɔt anaam ɔvva linnyi anaam, vvenɛ uddu kɛfal a kɛfal, nfungalamɛ ɔtaa ka kuddu ka kɛtɔm-a-lakpeke. 55Ɛkkpakkwɔɔt anaam elenɛ kazzi kwa lɔkkwɔɔn, linnyi anaam lile kɛvva sa lɔkkwɔɔn. 56Ɔlɔɔt duu wa uzzinɛ ɛkkpakkwɔɔt anaam, ɔvva linnyi anaam ulenɛ ka luppyam anaam nle ka luppyam ammɛ. 57Dedde wa usinɛ libbe ɔtɔɔmnɛnɛ, anaam nddu kwa ammɛ. Kɔssɛ kule ning baang: ɔlɔɔt duu wa uzzinɛnɛ vvenɛ uddu kwa anaam. 58Uwɔng ulenɛ brɛɛd wa ussinɛ ka libat uffu. Brɛɛd ’wɔng ba ule tɛ̀ttɛ̀ brɛɛd wa balɔɔt annyɔɔng ba iyɛddɛ iyɛddɛ bazzinɛ balɔngɔlɔ babbe. Ɔlɔɔt wa uzzinɛ brɛɛd ’wɔng mung vvenɛ uddu kuddu kwa kɛfal a kɛfal.” 59Jesus ɔlɔɔk ’byɔng ka ɛkɛtɛ ulenɛ ka kikopolo ka ggwoon a mitin ka Capernaum. 60Balɔɔt a kɔssɛ ammɛ ppwap bappyeenɛ ’kwɔng, battɛ, “Lukopolo ’gwɔng lukoolobong lɔsak, nyinɛ ule ukkwoong uppyeegwɛ?” 61Gɔɔ mɛ ba bataka babwɔɔlɔ, Jesus ɔggba lɛsan kɛyɔɔng ɔttɛ bale ka kɛzzɔ batum lukopolo ’gwɔng baang. Ɔzzánga ɔttɛ, “Nkwɔng kule ka kɔnaangwɔnɛyɔng uttunwɔyɔng ɔɔ? 62Ulenɛ bɔfɛɛn a ayɛnnɛyɔng Waan-Ɔssɛbibbit-Ɔkkpɛlɛ ka ɔppyɛlɛnɛ umii ka ɛfɛɛn a ɔdɔkɔnɛ bɛɛ? 63Kuyeeng-Ɔlɔɔmɔlɔɔm kunnyinɛ kuddu; lakke ɔlɔɔt baang ba kule kpong-kpong. Lɛmmwɔɔl za nlɔɔknɛ mung lɛkɔɔmnɛ Kuyeeng-Ɔlɔɔmɔlɔɔm kwa kunnyinɛ kuddu liffu, 64ɔzzànga annyɔɔng balɔk ba ayilayɔng.” (Jesus ɔggba lɛsan balɔɔt ba bale basi liyila la ɔlɔɔt wa ule uzzi issɛ ammɛ.) 65Ɔbbal lɛttɛ, “Ngkwɔng kulenɛ kwa nbwɔɔlɔwɔyɔng nttɛ ɔlɔɔt wa ule ukkwoong ukupnɛ ba ule Dedde ɔtakabong uyila ɔttɛ ukupnɛ.” 66Ngkwɔng kɔdɛm balɔɔt a kɔssɛ a Jesus ppwap basimɛ lɛbɛlɛ likup. 67Ɔzzánga ɔbap bayilabɔtɔɔm ammɛ ba zzɔɔppabaffa ɔttɛ, “Annyɔɔng ɔgbaa vvenɛ agbatayɔng ɔɔ?” 68Simon Peter ɔttɛ, “Uyini, ile igbata imii ikup nyinɔɔng? Annɔ ayanganɛ lɛmmwɔɔl za linnyinɛ kuddu kwa kɛfal a kɛfal. 69Iyilabong isan ittɛ annɔ alenɛ Usi-bubbi lɛnaang wa ussinɛ ka Ɔlɔɔmɔlɔɔm.” 70Jesus ɔttɛ, “Anaam nsangawɔnɛyɔng annyɔɔng ba zzɔɔppabaffa ’bɔng. Ning lissi ɔɔ? Ɔzzànga ɔlɔɔt vvɔn ule mung ka bɛzzɔkɔ annyɔɔng wa ulenɛ ɔbbyap!” 71Ɔdɔkɔ ɔlɔɔk utum Judas, waan a Simon Iscariot. Uvve Judas ule ka kɛkaan a bayilabɔtɔɔm a Jesus ba zzɔɔppabaffa, ɔzzànga ule ka ɛtɔk a kizzi Jesus issɛ.

will be added

X\