1 Balɔɔt a Pharisees bappyee battɛ Jesus ɔyangabong balɔɔt ɔnaangbɛ baptizim ɔtta John. ( 2 Ka kkpɔɔ Jesus usi ɔlɔɔt baptizim lɛnaang. Balɔɔt a kɔssɛ ammɛ keem banaangnɛ balɔɔt baptizim.) 3 Ɔzzánga Jesus uppyeenɛ kwa balenɛ lɛlɔɔk, ɔgbata Judea umii Galilee. 4 Umiinɛ ɔdɔkɔ ɔssɛ ɔtta Samaria. 5 Ɔffɔnɛ Samaria, umii ka lɛffɛ za lɛzzanganɛ Sychar. Sychar ba ufulu ka ussinɛ ka ɛkpansi ya Jacob unnyinɛ awaan Joseph. 6 Wɛɛl a Jacob ɔdɔkɔ baang. Ɔzzánga Jesus kɔssɛ kɔkɔɔtmɛnɛ, ɔkɔɔng baang ka lufoom a wɛɛl ɔtaa. Ɛkɛtɛ ’yɔng baang livve lile ka littelenɛ. 7 Wanavva wa Samaria uffu kɛkap a bannyi, ɔzzánga Jesus ɔttɛ, “Annyinɛ bannyi nvva bɛɛ.” ( 8 Ka ɛkɛtɛ ’yɔng baang balɔɔt a kɔssɛ ammɛ bamiibong kɛlɛɛp a kazzi.) 9 Wanavva ’wɔng baang ɔttɛ, “Annɔ wa Jew, anaam wa Samaria, anaang nang abapnɛ attɛ nnyiwɔ bannyi?” (Balɔɔt a Jew la balɔɔt a Samaria, ommonggo ba batul.) 10 Jesus ɔttɛ, “Bulenɛ ka asannɛ bwa Ɔlɔɔmɔlɔɔm unnyinɛ asan ɔlɔɔt wa ɔbapwɔnɛ bannyi, nzang asikili abapmɛ attɛ unnyiwɔ bannyi ba bannyinɛ kuddu.” 11 Wanavva ’wɔng baang ɔttɛ, “Dedde, pokkiti ba ayanga. Wɛɛl kaang ɔddɔng lɔddɔng. Bannyi ’bɔng baang ba bannyinɛ kuddu bale bassiwɔ ka iyang? 12 Jacob, dedde ayyɔɔt wa iyɛddɛ iyɛddɛ, unnyinɛyɛlɛ wɛɛl ’wɔng mung. Ammɛ la bwaan ammɛ la lakɔmɔlɔ ammɛ ɔkkpɛlɛ bannyi bavva mung. Tɛ̀ttɛ́ atɔkwɔ kɛyɔɔng attɛ annɔ attanɛ Jacob; attamɛ mung ɔɔ?” 13 Jesus ɔttɛ, “Ɔlɔɔt duu wa ɔvvanɛ bannyi ’bɔng mung, batii ka bale basaapmɛ. 14 Ɔzzànga ɔlɔɔt wa ɔvvanɛ bannyi ba nle nnyimɛ, mɛ baala babɛlɛ lɛsaap. Bannyi ba anaam nle nnyimɛ vvenɛ basikilimɛ ɛggbɔlɔ ka tɔkɔlɔ ya ele ennyimɛ bannyi ba bannyinɛ kuddu kwa kɛfal a kɛfal.” 15 Wanavva ’wɔng baang ɔttɛ, “Dedde, annyinɛ bannyi ’bɔng baang! Ɔkkɔɔnɛ bannyi basinɛ lɛbɛlɛ lɛsaap nsi mung lɛbɛlɛ liffu nkap bannyi.” 16 Jesus ɔttɛ, “Amii akkwɔɔ walam annɔ affuyɔng.” 17 Ammɛ ɔttɛ, “Walam ba ntaka nyanga.” Jesus ɔttɛ, “Ale bbwak ka attɛnɛ walam ba ataka ayanga. 18 Allubong bwalam kubbwɔɔk. Walam wa allunɛ gedegede mung walam annɔ bbwak lissi. Abwɔɔlɔnɛbong lɔkkwɔɔn a kɔlɔɔk.” 19 Wanavva ’wɔng baang ɔttɛ, “Nyɛnwɔbong dedde. Annɔ baang uppyee-kutolo Ɔlɔɔmɔlɔɔm. 20 Idedde ayyɔɔt balɔɔt a Samaria ya iyɛddɛ iyɛddɛ bazɔɔm bakkwɔɔ Ɔlɔɔmɔlɔɔm ka lɛttaal ’zɔng mung. Ɔzzànga annyɔɔng, balɔɔt a Jews, attɛyɔng Jerusalem ulenɛ ɛfɛɛn ya bubeenɛ izɔɔm ikkwɔɔ Ɔlɔɔmɔlɔɔm.” 21 Jesus ɔttɛ, “Wanavva, ayila kwa anaam. Ɛkɛtɛ vvenɛ ɛffɔ ya balɔɔt bale basi ka libat a lɛttaal ’zɔng mung libee gɔɔ ka Jerusalem bazɔɔm bakkwɔɔ Ɔlɔɔmɔlɔɔm. 22 Annyɔɔng balɔɔt a Samaria ba asanyɔng bwa azɔɔmnɛ akkwɔɔyɔng. Ayyɔɔt balɔɔt a Jew isannɛ bwa izɔɔmnɛ, ikkwɔɔ ka kuddu kussinɛ ka balɔɔt a Jew kuffu. 23 Ɛkɛtɛ vvenɛ ɛffɔ gɔɔ ɛffɔbong, ya balɔɔt bale bazɔɔm bakkwɔɔ Ɔlɔɔmɔlɔɔm tɛ̀ttɛ̀ ulenɛ, ka lakke Kuyeeng ammɛ. Vvenɛ bazɔɔm bakkwɔɔmɛ tɛ̀ttɛ̀ kɔsaapmɛnɛ. 24 Ɔlɔɔmɔlɔɔm ule Kuyeeng, balɔɔt bakɔɔm lakke Kuyeeng ammɛ keem bazɔɔm bakkwɔɔmɛ tɛ̀ttɛ̀ ulenɛ.” 25 Wanavva ’wɔng baang ɔttɛ, “Nsan lɔsan nttɛ Ɔlɔɔt wa Ɔlɔɔmɔlɔɔm ɔsanganɛ vvenɛ uffu. Ɛkɛtɛ uffunɛ, vvenɛ ɔbwɔɔlɔyɛlɛ lilɔɔk ɔkkpɛlɛ.” 26 Jesus ɔttɛ, “Anaam wa nlɔɔknɛ mung la annɔ nlemɛnɛ ammɛ.” 27 Eseese balɔɔt a kɔssɛ ammɛ bappyɛlɛ. Kɔkɛɛlɛbɛ gaang gaang ka bayɛnnɛ Jesus ka kutolo la wanavva. Ɔzzànga ɔlɔɔt wa ɔzzanɛ wanavva ’wɔng baang lɛmmwɔɔl ɔttɛ, “Aggyan ’bɔng?” ɔlɔk ɔbap Jesus ɔttɛ, “Atoloyɔng bɔng?” usi lile. 28 Ɔzzánga wanavva ’wɔng baang ɔgbata ekkpo-bannyi ɔkɔngɔ baang umii ɔbwɔɔlɔ balɔɔt a lɛffɛ ɔttɛ, 29 “Affu ayɛnyɔng ɔlɔɔt wa ɔbwɔɔlɔnɛnɛ lilɔɔk ɔkkpɛlɛ sa nssinɛ nnaang. Baang Ɔlɔɔt wa Ɔlɔɔmɔlɔɔm ɔsanganɛ ɔɔ?” 30 Ɔzzánga bafeele bamii ka ɛfɛɛn a Jesus. 31 Ning balɔɔt a kɔssɛ a Jesus balemɛ ka lakkpenge battɛ, “Ukopolo-lukopolo, azzi bɔfɛɛn bɛɛ!” 32 Jesus ɔttɛ, “Nyanga kazzi kwa nle ka nzzinɛ kwa annyɔɔng asinɛyɔng lɛsan.” 33 Ɔzzánga balɔɔt a kɔssɛ ammɛ babapbɛ kɛyɔɔng battɛ, “Ɔlɔɔt ɔlɔk unnyimɛbong kazzi ɔɔ?” 34 Jesus ɔbwɔɔlɔbɛ ɔttɛ, “Kazzi anaam ulenɛ kɛnaang a kwa ɔlɔɔt wa ɔtɔɔmnɛnɛ ɔggyannɛ la kivve kɛnaang ammɛ. 35 Ayangayɔng ifɛɛt ya attɛnɛyɔng ‘Ittuma inna tɛ́ttɛ́ bayaat liyaat.’ Yeek appyɛɛkyɔng itɔɔm ayɛnyɔng; iwopowopo ilatbong itii ya kɛyaat! 36 Ɔlɔɔt wa ɔyaatnɛ liyaat ɔlɔngɔlo bɛfɛɛn ’byɔng baang uloko ka kuddu kwa kɛfal a kɛfal ɔyanga ikipili nkwaaning uwoopuwoop la ɔyaat-ɔyaat bataa ka laggele. 37 Ifɛɛt ya ittɛnɛ, ‘Ɔlɔɔt ɔlɔk uwoopnɛ luwoop, ɔlɔɔt ɔlɔk ɔyaat lɔyaat’ ile ka lɔkkwɔɔn. 38 Ntɔɔmwɔyɔngbong nttɛ amii ayaatyɔng liyaat ka bɔtɔɔm bwa atakanɛyɔng kɛnaang baang lɛnaang. Balɔɔt balɔk banaangnɛ kɛnaang baang, annyɔɔng azziyɔng isak a kɛnaang abbɛ.” 39 Balɔɔt a Samaria gbadam bayila lɛmmwɔɔl a Jesus ka wanavva ’wɔng baang ulenɛ lɛttɛ, “Ɔbwɔɔlɔnɛbong lilɔɔk ɔkkpɛlɛ sa nssinɛ nnaang.” 40 Ɔzzánga balɔɔt a Samaria baffunɛ, bakkpengemɛ battɛ ukkwunu la abbɛ. Ɔzzánga Jesus ukkwunu baang la abbɛ ka bɛtɔm bɛffa, 41 Balɔɔt balɔk ppwap bayila lɛmmwɔɔl ammɛ bagbaa ɔssanga kutolo kwa utolonɛ. 42 Babwɔɔlɔ wanavva ’wɔng baang battɛ, “Iyilabong. Ɔzzànga ba iyila issanga ka kwa annɔ abwɔɔlɔnɛyɛlɛ. Iyila ka ayyɔɔt biini ilenɛ lippyee. Isanbong ittɛ ammɛ ulenɛ ɔlɔɔt wa ɔkkalanɛ ɛkpansi ka lɔkkwɔɔn.” 43 Ukkwununɛ baang ka bɛtɔm bɛffa, umii Galilee. 44 Ammɛ biini ɔlɔɔkbong ɔttɛ, “Uppyee-kutolo Ɔlɔɔmɔlɔɔm latele ka ɛkpansi ammɛ biini ba ɔyanga” 45 Ɔffɔnɛ Galilee, batɔkmɛ ka laggele ka balenɛ Kazzi-Kɛsak-Kɛkɔngɔ ka Jerusalem limii bayɛn lilɔɔk sa ɔnaangnɛ ɔkkpɛlɛ ka ɛkɛtɛ kazzi ’kwɔng baang. 46 Jesus ɔppyɛlɛ isimi isimi umii Cana ka Galilee, ɛfɛɛn a usikilinɛ bannyi basseke batak. Ɔlɔɔt a kɛnaang a government ɔdɔkɔ baang wa awaan usimɛnɛ lɛppwa ka Capernaum. 47 Uppyeenɛ ɔttɛ Jesus ussibong Judea uffu Galilee, umii ukkpengemɛ ɔttɛ umii uttula awaan wa likke lile ka lɛsaalmɛnɛ ka Capernaum. 48 Jesus ɔttɛ, “Ɔlɔɔt wa ule uyila baala ule atakabong ayɛnyɔng bɛmaanga la lilɔɔk sa likɛɛlɛnɛ.” 49 Akkala ’wɔng baang ɔttɛ, “Dedde, affu imiibong tɛ́ttɛ́ waan anaam ubbe.” 50 Jesus ɔttɛ, “Amii, waan annɔ vvenɛ uddu!” Ɔlɔɔt ’wɔng baang uyila lɛmmwɔɔl a Jesus, umii. 51 Ɔffɔnɛ ka ɛtɔk, ududa ibɔɔyi ammɛ babwɔɔlɔmɛ battɛ, “Waan annɔ vvenɛ uddu!” 52 Ɔbapbɛ ɛkɛtɛ ya ussinɛ ɔsɛɛlɛ awaan. Babwɔɔlɔmɛ battɛ, “Ɔdɔkɔ ka ɛkalangka nnyɔn lisee kikoon ka ussinɛ baang ɔsɛɛlɛmɛ.” 53 Ɔzzánga abassɛ ukke ɔttɛ ɔdɔkɔ ka ɛkɛtɛ ’yɔng baang bbwak ka Jesus ɔttɛnɛ, “Waan annɔ vvenɛ uddu.” Ɔzzánga ammɛ la balɔɔt a ssala ammɛ ɔkkpɛlɛ bayila lɛmmwɔɔl a Jesus. 54 Uwɔng ɔdɔkɔnɛ bɛmaanga bya ibaala bya Jesus ɔnaangnɛ ka ussinɛ Judea umii Galilee.
