JOHN 3

1Uzzilɛttɔ wa Jew ɔdɔkɔ baang wa ɔzzànganɛ Nicodemus. Ɔdɔkɔ ka kɔssɛ balɔɔt a Pharisees. 2Kɛtɔm ssɔn, ufele kɛtɔm umii ukup Jesus ɔttɛ, “Ukopolo-lukopolo, isan lɔsan ittɛ annɔ alenɛ Ukopolo-lukopolo wa Ɔlɔɔmɔlɔɔm ɔtɔɔmnɛ. Ɔlɔɔt wa ukkwoongnɛ ɔnaang imaanga ya annɔ anaangnɛ mung ba ule, Ɔlɔɔmɔlɔɔm usinɛ la ɔlɔɔt ’wɔng baang libee.” 3Jesus ɔttɛ, “Mung nbwɔɔlɔwɔ lɔkkwɔɔn a kɔlɔɔk: ɔlɔɔt wa ule ukkwoong ufula ka Itutum-Ɔlɔɔmɔlɔɔm ba ule basinɛ lɛppyɛlɛ bamaatmɛ.” 4Nicodemus ɔbap Jesus ɔttɛ, “Ɔlɔɔt ulenɛ liggbenge bale banaang nang bappyɛlɛ bamaatmɛ? Baala ukkwoong ɔmal abakka ka lɛmmɛ bappyɛlɛ bamaatmɛ ka bikkpit bɛffa!” 5Jesus ɔttɛ, “Nbwɔɔlɔwɔ lɔkkwɔɔn nttɛ ɔlɔɔt wa ukkwoongnɛ ufula ka Itutum-Ɔlɔɔmɔlɔɔm ba ule, bannyi la Kuyeeng bisimɛnɛ lɛppyɛlɛ bɛmaat. 6Ɛkkpakkwɔɔt ɛmaat ɛkkpakkwɔɔt, Kuyeeng kɔmaat kuyeeng. 7Tɛ̀ttɛ́ kɔkɛɛlɛwɔ ka nbwɔɔlɔwɔnɛ nttɛ bappyɛlɛ babbalwɔ lɛmaat. 8Kɛffa kɛ́ffà kimii ɛfɛɛn duu ya kɔsaapnɛsɛ. Appyee mung lɔsap gwa kɛnaangnɛ ɔzzànga ba asan ɛfɛɛn ya kissinɛ ɔlɔk ɛfɛɛn ya kimiinɛ. Kule ning baang la ɔlɔɔt ɔkkpɛlɛ wa Kuyeeng kɔmaatmɛnɛ.” 9Nicodemus ɔttɛ, “Kule kɔnaang nang nkwɔng kule ning?” 10Jesus ɔttɛ, “Annɔ wa alenɛ ukopolo-lukopolo wa lɛbaang ka Israel ’kwɔng ba asan ɔɔ? 11Mung nbwɔɔlɔwɔ lɔkkwɔɔn a kɔlɔɔk: Ilɔɔk bwa isannɛ, ibwɔɔlɔ kwa iyɛnnɛ ɔzzànga annyɔɔng ɔlɔɔt vvɔn gbɔɔ wa uyilanɛ ɔtɔk lɛmmwɔɔl ayyɔɔt ba ule. 12Ba ayila ka nbwɔɔlɔwɔnɛ lilɔɔk a vveeng ’wɔng, ale anaang nang ayila ka nle nbwɔɔlɔwɔ lilɔɔk sa libat? 13Ɔlɔɔt wa ulenɛ ka libat limii ba ule ɔgbaa la Waan-Ɔssɛbibbit-Ɔkkpɛlɛ wa ussinɛ ka libat uffu. 14“Tɛ̀ttɛ̀ Moses ɔkɔɔmnɛ lukut uyeek ɛzzɔkɔ ya banaangnɛyɛ la lukkpi ka kɛmat, Waan-Ɔssɛbibbit-Ɔkkpɛlɛ bale bassɛ bayeekmɛ ning baang, 15ɔkkɔɔnɛ ɔlɔɔt duu wa uyilanɛ kwa ammɛ uddu kuddu kwa kɛfal a kɛfal. 16Vveeng ’wɔng ɔsaapbong Ɔlɔɔmɔlɔɔm gaang gaang ɔsanga Waan ammɛ vvɔn keem wa ɔyanganɛ, unnyi ɔttɛ nkwaaning ɔlɔɔt duu wa uyilanɛ kwa Awaan ’wɔng baang ɔfɔngɔ kibbe, uddu kuddu kwa kɛfal a kɛfal. 17Ɔlɔɔmɔlɔɔm usi Awaan lɛtɔɔm ka vveeng ’wɔng ɔttɛ uffu unnyi ɛkpansi kibbi, ɔtɔɔmnɛ ɔttɛ uffu ɔzzánga ɔkkala-ɛkpansi. 18“Ɔlɔɔt duu wa uyilanɛ kwa Waan-Ɔlɔɔmɔlɔɔm kɛkaal ammɛ baala bakaal. Ɔzzànga ɔlɔɔt wa usinɛ kwa ammɛ liyila vvenɛ ɔkaal ka ulenɛ kwa Waan-Ɔlɔɔmɔlɔɔm lifim kiyila. 19Kɛkaal kitele lɛttɔ kɛttɛ: buppwolo buffubong ka ɛkpansi ɔzzànga balɔɔt kisul kɛsaapnɛbɛ kɛtta buppwolo ɔssanga babbu linaang abbɛ. 20Ɔlɔɔt duu wa ɔnaangnɛ bubbi, buppwolo mɛ ba busaap. Ka busimɛnɛ lɛsaap, ka abbwɛ baala umii ka usinɛ lɛggyan ɔttɛ babbu linaang ammɛ batta ka vveeng. 21Ɔlɔɔt duu wa ɔnaangnɛ kwa kɔyyɛɛpnɛ ɔtta ubee ka buppwolo ɔkkɔɔnɛ buppwolo buyɔɔ balɔɔt basan battɛ kwa ɔnaangnɛ kule ka latele Ɔlɔɔmɔlɔɔm.” 22Nkwɔng kɔsaalnɛ, Jesus la balɔɔt a kɔssɛ ammɛ bamii ka ɛkpansi a Judaea ka ɛfɛɛn ɔtaanɛ baang la abbɛ ɔnaangbɛ baptizim. 23John ɔgbaa ɔdɔkɔ ka kɛnaang a balɔɔt baptizim ka Aenon, ka bannyi balenɛ ppwap ka Aenon. Aenon ba ufulu ka assinɛ Salim. Balɔɔt bale baang ka bamiinɛ ɔnaangbɛ baptizim. ( 24Nkwɔng kɔdɔkɔ ka ɛkɛtɛ ya John ɔtakanɛ ka igbakkɔpɔ lile) 25Balɔɔt a kɔssɛ a John balɔk babee ikangala la wa Jew batum lafɔɔ kiyila bikkeep a kkwɔɔt. 26Ɔzzánga bamii ka ɛfɛɛn a John battɛ, “Ukopolo-lukopolo, akke mung ɔlɔɔt wa ɔdɔkɔnɛ la annɔ ka kufoom a Jordan kwa livveluwee lɔfɔm, wa alɔɔknɛ kɔlɔɔk a ammɛ ɔɔ? Mung usseke ka kɛnaang a balɔɔt baptizim gedegede mung. Ɔlɔɔt ɔkkpɛlɛ ɔppyɛɛ umii ka ammɛ!” 27John ɔttɛ, “Ɔlɔɔt wa ukkwoongnɛ ɔyanga bɔfɛɛn usi Ɔlɔɔmɔlɔɔm lile unnyimɛnɛ ba ule. 28Annyɔɔng alenɛyɔng ittɛɛsɛ anaam ka nttɛnɛ ‘Anaam Ɔlɔɔt wa Ɔlɔɔmɔlɔɔm ɔsanganɛ lissi, ɔzzànga basanganɛ anaam nkɔɔm ɛtɔk.’ 29Uyini-libbeel ulenɛ ɔyanga wanavva-libbeel. Ɛnngwa uyini-libbeel ebee ka lufoom ɛgɔpɔlɔ, eggele ka eppyeenɛ lɛmmwɔɔl a uyini-libbeel. Anaam nggele nffɔ ning. 30Ammɛ ule ka ulenɛ ɔlɔɔt wa lɛbaang, anaam nle ɔlɔɔt wa utiti. 31“Ammɛ wa ussinɛ ka libat uffu ɔttanɛ liggbenge ɔkkpɛlɛ. Ɔlɔɔt wa ussinɛ ka ɛkpansi ule wa ɛkpansi, kɔlɔɔk ɔlɔɔk kwa lilɔɔk ɛkpansi. Ɔzzànga ammɛ wa ussinɛ ka libat uffu ɔttanɛ ɔkkpɛlɛ. 32Ɔbwɔɔlɔ bwa ɔyɛnnɛ ka zzeen uppyee ka latɔɔk, ɔzzànga ɔlɔɔt wa uyilanɛ lɛmmwɔɔl ammɛ ba ule. 33Ɔlɔɔt wa uyilanɛ lɛmmwɔɔl ammɛ ɔkɔɔm kwɛ akkwɛ uyila ɔttɛ Ɔlɔɔmɔlɔɔm lɛlaak ba ɔlɔɔk. 34Ɔlɔɔt wa Ɔlɔɔmɔlɔɔm ɔtɔɔmnɛ ɔ̀lɔ́ɔk lɛmmwɔɔl Ɔlɔɔmɔlɔɔm ka Ɔlɔɔmɔlɔɔm uvvoongmɛnɛ Kuyeeng ammɛ ɔkkpɛlɛ. 35Ɔlɔɔmɔlɔɔm Awaan ɔsaapmɛ gaang gaang kwakkwɛ ɔsamnɛ bɛfɛɛn ɔkkpɛlɛ ɔssɛɛnmɛ ka eddu. 36Ɔlɔɔt duu wa uyilanɛ kwa Awaan, uddu kuddu kwa kɛfal a kɛfal. Ɔlɔɔt duu wa ufimnɛ kwa Awaan, kuddu kwa kɛfal a kɛfal baala uddu, ule ɔkɔɔng ka akama wa Ɔlɔɔmɔlɔɔm ule ɔyɔɔmɛ.”

will be added

X\