JOHN 20

1Lɔfɔm a lɔfɔm a livve luzɔɔm, gɔɔ utii zuulu-zuulu ning, Mary Magdalene ufeele umii ka lilli, ɔyɛn ka lɛttaal lilenɛ lɛttɔm lisseke kamma lilli. 2Ɔmma eseese umii ɔbwɔɔlɔ Simon Peter la balɔɔt a kɔssɛ a Jesus balɔk ba Jesus ɔsaapnɛbɛ gaang gaang ɔttɛ, “Basangabong Uyini ayyɔɔt ka lilli tɛ, mung ba isan ka ɛfɛɛn a balokomɛnɛ tɛ!” 3Ɔlɔɔknɛ ning baang, Peter la ɔlɔɔt a kɔssɛ a Jesus ɔlɔk bamma bamii ka lilli. 4Badɔkɔ baffa ning baang ka bammanɛ, ɔzzanga ɔlɔɔt a kɔssɛ a Jesus wa kang ɔmma ɔkɔngɔ Peter, umii utte ka lilli lɛffɔ. 5Ɔkpɔkɔ uvvoop, ɔyɛn ibba baang ka tɔkɔlɔ lilli. Ammɛ biini ka tɔkɔlɔ usi lɛmal. 6Simon Peter ɔdɔkɔ baang ka ukupmɛnɛ ka lɔnnyɔ, ɔffɔnɛ, ɔsak ssɔng umii ɔmal ka tɔkɔlɔ lilli. Ɔyɛn ibba ’yɔng baang 7la ubba wa baggbɔnɛ Jesus ka lɛttɔ. Ubba ’wɔng baang ɔkkɔtbong kɛyɔɔng ammɛ ɔtaa zzekep usseke ibba ’yɔng kang ɔkkpɛlɛ. 8Ɔlɔɔt a kɔssɛ a Jesus wa uttenɛ ka lilli lɛffɔ, ɔssɛ umii ɔmal; ɔyɛn ka zzeen ammɛ, uyila. ( 9Gɔɔ tɔttɔt basi lippyee bakpala ka Luvva-Ɔlɔɔmɔlɔɔm lɔttɛnɛ, vvenɛ ufungala ka lubbe.) 10Ɔzzánga balɔɔt a kɔssɛ a Jesus bappyɛlɛ bafula. 11Mary ubee baang ka libat a lilli ɔkkwa. Ɔkkwanɛ, ɔkɔɔm ɔkpɔkɔ uvvoop ka tɔkɔlɔ lilli, 12ɔyɛn bayilabɔtɔɔm Ɔlɔɔmɔlɔɔm baffa baang ka bataanɛ ka ɛfɛɛn a bawulunɛ Jesus, vvɔn ka lɛttɔ wa vvɔn ka bukkpɔ. 13Babapmɛ battɛ, “Wanavva, akkwa ’bɔng?” Ɔppyɛlɛbɛ kamma ɔttɛ, “Basambong Uyini anaam bagbata, mung ba nsan ka ɛfɛɛn a balokomɛnɛ!” 14Ɔssanganɛ usikili ning mung, ɔyɛn Jesus bang ka ubeenɛ, ɔzzànga usimɛ lɛkɔɔlɔ. 15Jesus ɔbapmɛ ɔttɛ, “Wanavva, akkwa ’bɔng? Mung aggyan nnyinɔɔng?” Ammɛ wanavva ’wɔng baang uttina ɔttɛ baang ɔkat ɛfɛɛn ’yɔng baang, ɔzzánga ɔlɔɔk la ammɛ ɔttɛ, “Dedde, ulewɔnɛ annɔ asammɛnɛ abbɛ mung, abwɔɔlɔnɛ ka ɛfɛɛn alokomɛnɛ, nmii nsammɛ.” 16Jesus ɔlɔɔk la ammɛ ɔttɛ, “Mary!” Ammɛ usikili ɔppyɛɛkmɛ ɔlɔɔk ka kukaan a Hebrews ɔttɛ, “Rabboni!” (Ning baang ulenɛ “Ukopolo-lukopolo.”) 17Jesus ɔbwɔɔlɔmɛ ɔttɛ, “Tɛ̀ttɛ́ alɔmnɛ ka ntakanɛ ka ɛfɛɛn a Dedde lɛppyɛlɛ nmii. Ɔzzànga amii abwɔɔlɔ ikpana anaam attɛ nle ka nppyɛlɛnɛ nmii ka ɛfɛɛn ammɛ wa ulenɛ Dedde ayyɔɔt la abbɛ, Ɔlɔɔmɔlɔɔm ayyɔɔt la abbɛ.” 18Mary Magdalene umii ɔbwɔɔlɔ balɔɔt a kɔssɛ ammɛ ɔttɛ ammɛ ɔyɛnbong Uyini, ɔbwɔɔlɔbɛ bwa ɔlɔɔknɛ la ammɛ ɔkkpɛlɛ. 19Kulele ka kɛtɔm ’sɔng baang, balɔɔt a kɔssɛ ammɛ bammabong baddumu ka tɔkɔlɔ a ggwoon bafɛɛn lamma bassɛɛn ikpaka bakakabɛ kɛyɔɔng ka bazzilɛttɔ balɔɔt a Jews babbwɔpɔnɛbɛ. Jesus uffu ubeebɛ baang ka bɛzzɔkɔ ɔttɛ, “Ataayɔng ka bɔkaat.” 20Ulenɛ ning baang livve lɛlɔɔk, ɔyɔɔbɛ labɔɔk la lufoom. Balɔɔt a kɔssɛ ammɛ baggele gaang gaang ka bayɛnnɛ Uyini. 21Jesus ɔbbal la abbɛ lɛlɔɔk ɔttɛ, “Ataayɔng ka bɔkaat. Tɛ̀ttɛ̀ Dedde ɔtɔɔmmɛnɛ anaam, annyɔɔng nle nssɛ ntɔɔmwɔyɔng ning baang.” 22Ulenɛ livve lɛlɔɔk, ɔfɛkɛlɛ uvvoongbɛ, ɔttɛ, “Atɔkyɔng Kuyeeng-Ɔlɔɔmɔlɔɔm. 23Asɔɔknɛyɔng balɔɔt bubbi, vvenɛ bubbi abbɛ busaal; asinɛyɔngbɛ lɛsɔɔk, bubbi abbɛ bukɔɔngbɛ baang.” 24Ɔlɔɔt a kɔssɛ a Jesus vvɔn wa ɔzzanganɛ Thomas (Bakkwɔɔmɛ, Waan-ippɛlɛng) usi lile ka ɛkɛtɛ a Jesus uffunɛ. 25Ɔzzánga balɔɔt a kɔssɛ a Jesus balɔk babwɔɔlɔmɛ battɛ, “Iyɛnbong Uyini.” Thomas ɔlɔɔk la abbɛ ɔttɛ, “Nsinɛ binuku bya bamatmɛnɛ bɛfɔl ka labɔɔk lɛyɛn, nsam kɛnnɔ anaam nwɔkɔlɔ baang, nsam kɔbɔɔk anaam nwɔkɔlɔmɛ ka lufoom ba nyila.” 26Liwaazɛ liffunɛ, balɔɔt a kɔssɛ a Jesus babbal lɛggba ɛfɛɛn nnyɔn ka tɔkɔlɔ a ggwoon. Livve ’zɔng baang Thomas ɔdɔkɔ baang. Bafɛɛnbong lamma bassɛɛn ikpaka ɔkkpɛlɛ, ɔzzánga Jesus ɔmal ubeebɛ ka bɛzzɔkɔ baang ɔttɛ, “Ataayɔng ka bɔkaat.” 27Keem ɔlɔɔk la Thomas ɔttɛ, “Ppyɛɛk labulakaat anaam mung, awɔkɔlɔ kɛnnɔ annɔ, alenɛ livve atɔnɔ kɔbɔɔk awɔkɔlɔnɛ ka lufoom. Kkyaa ikangala annɔ afɔngɔ, ayila.” 28Thomas ɔppyɛlɛmɛ kamma ɔttɛ, “Uyini anaam, Ɔlɔɔmɔlɔɔm anaam.” 29Jesus ɔlɔɔk la ammɛ ɔttɛ, “Mung ayila ka alenɛnɛ lɛyɛn ɔɔ? Laggele lale za balɔɔt ba batakanɛnɛ lɛyɛn, ɔzzànga bayila tɔttɔt!” 30Jesus ɔnaang bɛmaanga ggbadam ggbadam bya basinɛ lɛkkpɔk bassɛɛn ka luvva ’gwɔng mung ka bassɛnɛ la balɔɔt a kɔssɛ ammɛ. 31Nkkpɔk lilɔɔk ’sɔng ɔkkpɛlɛ nttɛ nkwaaning ayila attɛyɔng Jesus ulenɛ Ɔlɔɔt wa Ɔlɔɔmɔlɔɔm ɔsanganɛ, Waan Ɔlɔɔmɔlɔɔm. Ayilanɛyɔng ning baang vvenɛ ayangayɔng kuddu.

will be added

X\