JOHN 17

1Jesus ulenɛ ’kwɔng livve lɛlɔɔk, uyeek ɔppyɛɛk ka libat ɔttɛ, “Dedde, ɛkɛtɛ anaam ɛffɔbong. Annyi Waan annɔ lakke la latele usseke ɔnaangwɔ ɔwaawɔ. 2Annɔ annyimɛnɛ lakke ɔtta ɔssɛbitbit ɔkkɔɔnɛ unnyi balɔɔt ba annyimɛnɛ kuddu kwa kɛfal a kɛfal. 3Kuddu kwa kɛfal a kɛfal ulenɛ kɛsanwɔ, annɔ wa alenɛ Ɔlɔɔmɔlɔɔm wa lɔkkwɔɔn, la kɛsan a Jesus Christ wa atɔɔmnɛ. 4Nyɔɔbong lakke annɔ ka ɛkpansi. Nvvebong kɛnaang annɔ sa annyinɛnɛ attɛ nnaang. 5Dedde! Annyinɛ lakke ka lusso annɔ gedegede mung. Lakke ’zɔng baang za iyanganɛ tɛ́ttɛ́ vveeng ule la kɛnaang. 6“Nnaangbong balɔɔt ba asanganɛ ka ɛkpansi annyinɛ basanwɔ. Bale ba annɔ. Annɔ annyinɛnɛbɛ. Batelebong lɛmmwɔɔl annɔ. 7Basanbong gedegede mung battɛ bɛfɛɛn ɔkkpɛlɛ bya annyinɛnɛ bissi ka annɔ. 8Nbwɔɔlɔbongbɛ bɔtɔɔm bwa atɔɔmnɛnɛ batɔkbwɛ. Basan lɔsan battɛ kule ka lɔkkwɔɔn nssi ka annɔ nffu. Bayilabong battɛ annɔ atɔɔmnɛnɛ. 9“Nzɔɔm nssɛɛnbɛ abbɛ, ɛkpansi lissi. Nzɔɔm nssɛɛn balɔɔt ba annyinɛnɛ ka balenɛ ba annɔ. 10Bɛfɛɛn ɔkkpɛlɛ bya nyanganɛ bile bya annɔ. Bɛfɛɛn ɔkkpɛlɛ bya annɔ ayanganɛ bile bya anaam. Abbɛ bayɔɔnɛ lakke anaam. 11Mung nle ka nffunɛ ka ɛfɛɛn annɔ. Mung ka ɛkpansi ba nbɛlɛ lile, ɔzzànga abbɛ batii mung. Dedde wa Doddo, alokobɛ ka bɔppwakkwɔɔt ka lakke lɛkɔɔl annɔ za annyinɛnɛ ɔkkɔɔnɛ basseke bɔfɛɛn bbwɔn tɛ̀ttɛ̀ ayyɔɔt la annɔ ilenɛ. 12Ka ndɔkɔnɛ la abbɛ, nlokobɛ ka bɔppwakkwɔɔt ka lakke lɛkɔɔl annɔ za annyinɛnɛ. Nkatbɛ ɔlɔɔt vvɔn gbɔɔ usi lɛtaak ɔgbaa la ɔlɔɔt wa ɔggbanɛ lissi ule wa kɛtaak, ɔkkɔɔnɛ kɔlɔɔk a luvva Ɔlɔɔmɔlɔɔm kule ka lɔkkwɔɔn. 13Mung nle ka nffunɛ ka ɛfɛɛn annɔ. Kɔlɔɔk ’kwɔng mung nlɔɔk ka ɛkpansi ɔkkɔɔnɛ bayanga laggele ka luppyam lattala. 14Nbwɔɔlɔbɛ bɔtɔɔm bwa atɔɔmnɛnɛ ngkka mung batunbong ɛkpansi. 15Ba nlɔɔk nttɛ asambɛ agbata ka ɛkpansi, nlɔɔk nttɛ akatbɛ asseke Ɔnaang-a-kɛsɛɛm. 16Tɛ̀ttɛ̀ anaam nsinɛ wa ɛkpansi lile, abbɛ wa ɛkpansi ba bassɛ bale. 17Anaangbɛ basseke ba annɔ ka lɔkkwɔɔn a kɔlɔɔk. 18Ntɔɔmbɛ ka vveeng ’wɔng tɛ̀ttɛ̀ annɔ atɔɔmnɛnɛ anaam. 19Nzzenge luzzi abbɛ kwakkwɛ nsamnɛnɛ kɛyɔɔng nnyiwɔ ɔkkɔɔnɛ bale ba annɔ ka lɔkwɔɔn. 20“Abbɛ kɛyɔɔng keem lissi ka nzɔɔmnɛ nssɛɛn. Nssɛ nzɔɔm nssɛɛn balɔɔt ba bayanganɛ kiyila ka bappyeenɛ lɛmmwɔɔl abbɛ ɔgbaa. 21Nzɔɔm nttɛ ɔkkpɛlɛ abbɛ bale bɔfɛɛn bbwɔn. Dedde! Nkkpee baleyɛlɛ ka luppyam tɛ̀ttɛ̀ ayyɔɔt la annɔ ilenɛyɛlɛ kɛyɔɔng ka ippyam. Nkkpenge nttɛ bale bɔfɛɛn bbwɔn nkwaaning vveeng ’wɔng ɔsan ɔttɛ annɔ atɔɔmnɛnɛ. 22Nnyibongbɛ lakke za annyinɛnɛ ɔkkɔɔnɛ bale bɔfɛɛn bbwɔn tɛ̀ttɛ̀ ayyɔɔt la annɔ ilenɛ bɔfɛɛn bbwɔn: 23anaam nlebɛ ka luppyam, annɔ alenɛ anaam ka luppyam, ɔkkɔɔnɛ ɛkpansi ɛsan ɛttɛ annɔ atɔɔmnɛnɛ. Tɛ̀ttɛ̀ anaam nsaapwɔnɛ, abbɛ bassɛ basaapwɔ ning baang. 24“Dedde! Asambongbɛ annyinɛ, nggyan nttɛ bataa la anaam ka ɛfɛɛn a nlenɛ ɔkkɔɔnɛ bayɛn lakke anaam za annyinɛnɛ. Nggba lissi nsaapwɔ tɛ́ttɛ́ ɛkpansi ele la kɛlɔɔm. 25Dedde wa Doddo! Ɛkpansi wɔ ba ɛsan, anaam nsanwɔnɛ. Balɔɔt ’bɔng mung basan lɔsan battɛ annɔ atɔɔmnɛnɛ. 26Anaam nnaangnɛ basanwɔ. Kɛnaang balɔɔt basanwɔ baala nkkyaa nfɔngɔ, ɔkkɔɔnɛ kɛsaap sa nsaapwɔnɛ kɛtaa ka ippyam abbɛ, anaam nssɛ ntaabɛ ka ippyam.”

will be added

X\