JOHN 16

1“Nbwɔɔlɔwɔyɔngbong ’kwɔng nkwaaning asiyɔng kiyila annyɔɔng lɛkkyaa azzɔɔkyɔng. 2Vvenɛ baggbawɔyɔng ka idda mitin. Ɛkɛtɛ vvenɛ ɛffɔ ya ɔlɔɔt wa ule ɔwwɔɔlwɔyɔng ule uttina ɔttɛ ule ka kitele Ɔlɔɔmɔlɔɔm. 3Balɔɔt vvenɛ banaangwɔyɔng lilɔɔk ’sɔng ka batakanɛ Dedde anaam la anaam biini lɛsan. 4Nbwɔɔlɔwɔyɔng ’kwɔng nttɛ nkwaaning ɛkɛtɛ ɛffɔnɛ ya banaangwɔnɛyɔng lilɔɔk ’sɔng akke attɛyɔng ndɔkɔ nbwɔɔlɔwɔyɔng. “Nsiwɔng ’kwɔng lɛbwɔɔlɔ ka lutte ka anaam biini ndɔkɔnɛ la annyɔɔng. 5Mung ka nle ka nmiinɛ ka ɛfɛɛn ɔlɔɔt wa ɔtɔɔmnɛnɛ ɔzzànga ɔlɔɔt wa ɔbapnɛnɛ ɔttɛ, ‘Amii ’yang?’ ba ule. 6Mung ka nppyɛɛnɛ nbwɔɔlɔwɔyɔng mung, bukee buppyɛɛbong bunaangwɔyɔng. 7Mung nbwɔɔlɔwɔyɔng lɔkkwɔɔn a kɔlɔɔk: kɔttawɔyɔng lɛyyɛɛp ka ngbatanɛ. Nsinɛ lɛgbata nmii, ɔlɔɔt wa ule uttelewɔyɔng baala uffu. Ngbatanɛ nmii, vvenɛ ntɔɔmmɛ uffu ka ɛfɛɛn annyɔɔng. 8Uffunɛ, vvenɛ ɔyɔɔ balɔɔt a vveeng ’wɔng mung ɔttɛ bbwak ba bale, basɛpɛbong ka ɛtɔk a bubbi. Vvenɛ ɔbwɔɔlɔbɛ bwa bulenɛ bbwak ka kɛkaal Ɔlɔɔmɔlɔɔm. 9Basɛpɛbong ka ɛtɔk a bubbi ka basinɛ lɛmmwɔɔl anaam liyila. 10Basɛpɛbong ka kɔlɔɔk kwa bbwak. Anaam nle ka nmiinɛ ka ɛfɛɛn a Dedde, nɛyɔng vvenɛ ba abɛlɛyɔng lɛyɛn. 11Basɛpɛbong ka ɛtɔk a kɛkaal ka balenɛ kɛkaal ɔkɔɔm-ɛkpansi ’yɔng lɛzza. 12“Lilɔɔk litii ppwap sa nle ka nbwɔɔlɔwɔnɛyɔng. Ɔzzànga gedegede mung liyipiwɔyɔngbong gaang kɛssɛɛn ka luppyɔm. 13Ɛkɛtɛ Kuyeeng-Ɔlɔɔmɔlɔɔm kule kuffu, vvenɛ kukopolowɔyɔng lɔkkwɔɔn a kɔlɔɔk ɔkkpɛlɛ. Ɔzzànga kwa akkwɛ biini lissi ka kule kukopolo. Kule kukopolo, kwa kuppyeenɛ. Vvenɛ kɔbwɔɔlɔwɔyɔng lilɔɔk sa lusso. 14Vvenɛ kunnyinɛ latele ka kule kɔsam kwa anaam nlɔɔknɛ kɔbwɔɔlɔwɔyɔng. 15Bɛfɛɛn ɔkkpɛlɛ bya Dedde ɔyanganɛ bile bya anaam, kwakkwɛ baang nttɛnɛ Kuyeeng-Ɔlɔɔmɔlɔɔm kule kɔtɔk kwa nbwɔɔlɔnɛkwɛ kɔbwɔɔlɔwɔyɔng annyɔɔng. 16“Usseke ssup nɛyɔng ba abɛlɛ lɛyɛn, ɔzzànga ɔmmɛnɛ ssup abbalnɛyɔng lɛyɛn.” 17Balɔɔt a kɔssɛ ammɛ balɔk babap battɛ, “Baang ɔlɔɔk nang? Ɔttɛ usseke ssup vvenɛ mɛ ba ibɛlɛ lɛyɛn. Ɔbbal lɛttɛ ɔzzànga ɔmmɛnɛ ssup vvenɛ iyɛnmɛ. Ɔbbal lɛttɛ, ‘Nlɔɔk ka nle ka nmiinɛ ka ɛfɛɛn a Dedde.’ 18‘Usseke ssup’ ulenɛ ’bɔng? Ba isan bwa ɔlɔɔknɛ utum!” 19Jesus ɔkɔɔlɔ ɔttɛ bale ka babapmɛnɛ lɔbap, ɔzzánga ɔttɛ, “Nttɛ ‘Usseke ssup nɛyɔng ba abɛlɛ lɛyɛn, ɔzzànga ɔmmɛnɛ ssup abbalnɛyɔng lɛyɛn.’ Nkwɔng kulenɛ kwa abapwɔnɛyɔng kɛyɔɔng ɔɔ? 20Nbwɔɔlɔwɔyɔng lɔkkwɔɔn a kɔlɔɔk: vvenɛ akkwa attɔlyɔng layilili ɔzzànga ɛkpansi ele ele ka laggele. Vvenɛ bukee bunaangwɔyɔng, ɔzzànga bukee annyɔɔng vvenɛ busikili laggele. 21Wanavva ule ka ɔmaatnɛ, bukee bunaangmɛ ka ɛkɛtɛ kɛyɛn akama elemɛnɛ ɛffɔ. Ɔmaatnɛ uvve, usumala bɔssɔp bwa uppyeenɛ, ɔssanga laggele za ulenɛ waan lɛmaat uloko ka ɛkpansi. 22Annyɔɔng kulewɔyɔng ning baang. Gedegede mung aleyɔng ka bukee ɔzzànga vvenɛ nbbalwɔyɔng lɛyɛn ippyam annyɔɔng iggele laggele za lɛbaang, za ɔlɔɔt ule usiwɔyɔngzɛ likkwoong ɔtɔk. 23Kɛtɔm ’sɔng baang kɛffɔnɛ, bulɔk nɛyɔng baala abapyɔng. Mung nbwɔɔlɔwɔyɔng lɔkkwɔɔn a kɔlɔɔk: Dedde vvenɛ unnyiwɔyɔng duu bwa abapmɛnɛyɔng ka lɛkɔɔl anaam. 24Ka ussinɛ bakang uffu ɔffɔ mmwɔɔn, bulɔk ba ataka abapyɔng ka lɛkɔɔl anaam. Abapyɔng usseke ayangayɔng, nkwaaning aggeleyɔng gaang gaang.” 25“Nkɔɔmbong ifɛɛt nbwɔɔlɔwɔyɔng lilɔɔk ggbadam ɔzzànga ɛkɛtɛ vvenɛ ɛffɔ ya nle nsi ifɛɛt lɛbɛlɛ lɛkɔɔm ntolo kutolo. Nle nppyɛɛ ntolo ppwool ppwool ntum Dedde nbwɔɔlɔwɔyɔng. 26Kɛtɔm ’sɔng baang kɛffɔnɛ, vvenɛ abapmɛyɔng ka lɛkɔɔl anaam. Ba nlɔɔk nttɛ vvenɛ nbapmɛ nkkalawɔyɔng. 27Dedde biini asaapmɛyɔng gaang gaang. Asaapmɛyɔng ka anaam nsaapwɔnɛyɔng, ayila attɛyɔng anaam nssi ka Ɔlɔɔmɔlɔɔm nffu. 28Nssi ka Dedde nffu ka vveeng ’wɔng, mung nle ka ngbatanɛ ka vveeng ’wɔng nppyɛlɛ nmii ka ɛfɛɛn a Dedde.” 29Balɔɔt a kɔssɛ ammɛ battɛ, “Asseke ka alɔɔknɛ kɔlɔɔk ppwool ppwool ifɛɛt ba abɛlɛ lɛkɔɔm. 30Isanbong ittɛ asan lilɔɔk ɔkkpɛlɛ, ba kɔbɛlɛ lile kwa ɔlɔɔt ɔbapwɔnɛ ibap. Nkwɔng kɔnaangnɛyɛlɛ iyila ittɛ assi ka Ɔlɔɔmɔlɔɔm affu.” 31Jesus ɔttɛ, “Ayilayɔngbong bɔk ɔɔ? 32Ɛkɛtɛ vvenɛ ɛffɔ, gɔɔ mung ɛffɔbong ya bale babbumwɔyɔng ɔlɔɔt ɔlɔɔt umii ka ssala ammɛ, anaam nsseke kɛyɔɔng. Ɔzzànga kɛyɔɔng ba nle ka lɔkkwɔɔn, ka Dedde ulenɛ la anaam. 33Nbwɔɔlɔwɔyɔng ’kwɔng nkwaaning luppyam lɔfɔngɔwɔyɔng kɛzza ka alenɛyɔng ka bɔkaat la anaam. Ɛkpansi vvenɛ ɛnaangwɔyɔng ayɛnyɔng akama ɔzzànga ɔkkaamwɔyɔng! Nbɛtɛbong ɛkpansi!”

will be added

X\