JOHN 14

1Ɔbwɔɔlɔbɛ ɔttɛ, “Tɛ̀ttɛ́ ittina ibbɔlwɔyɔng, ɔlɔk kutunwɔyɔng. Ayilayɔng kwa Ɔlɔɔmɔlɔɔm, ayilayɔng kwa anaam ɔgbaa. 2Lanɔk lale ppwap ka ggwoon a Dedde. Mung nle ka nmiinɛ nlɔngɔlɔ ɛfɛɛn nlokowɔyɔng. Kusinɛ ka lɔkkwɔɔn lile, nzang wɔyɔng ba nbwɔɔlɔ. 3Nlenɛ ɛfɛɛn limii nlɔngɔlɔ, vvenɛ nppyɛlɛ nffu nsamwɔyɔng nmii nlokonɛ bakang ɔkkɔɔnɛ ataayɔng ka ɛfɛɛn anaam nlenɛ. 4Asanyɔngbong ɛtɔk ya emiinɛ ka ɛfɛɛn a nle ka nmiinɛ.” 5Thomas ɔttɛ, “Uyini, ba isan ɛfɛɛn ale ka amiinɛ? Inaang nang isan ɛtɔk ya ile issɛ iffɔ bakang?” 6Jesus ɔttɛ, “Anaam nlenɛ ɛtɔk ’yɔng baang, la lɔkkwɔɔn a kɔlɔɔk, la kuddu. Ɔlɔɔt wa ukkwoongnɛ ɔffɔ ka ɛfɛɛn a Dedde ba ule usinɛ la anaam lɛssɛ. 7Ka alenɛnɛyɔng anaam lɛsan, vvenɛ asanyɔng Dedde anaam. Asanmɛyɔngbong ka ussinɛ mung umii ka lusso, ayɛnmɛyɔng.” 8Philip ɔttɛ, “Uyini, ayɔɔyɛlɛ Dedde ’wɔng baang, akkwɛ kulenɛ kwa iggyannɛ.” 9Jesus ɔttɛ, “Ɔmmɛbong ka nlenɛ la annyɔɔng ɔzzánga nɛ ba asan ɔɔ, Philip? Ɔlɔɔt duu wa ɔyɛnnɛnɛ anaam ɔyɛnbong Dedde. Mbɔng abbalnɛ lɛttɛ, ‘Ayɔɔyɛlɛ Dedde ’wɔng baang’? 10Philip, ba ayila attɛ anaam nle ka tɔkɔlɔ Dedde, Dedde ule ka tɔkɔlɔ anaam ɔɔ?” Ɔbwɔɔlɔ balɔɔt a kɔssɛ ammɛ ɔttɛ, “Lɛmmwɔɔl za nlɔɔknɛ nnyiwɔyɔng ka anaam ba lissi. Dedde wa ɔtaanɛnɛ ka tɔkɔlɔ ɔnaangnɛ kɛnaang ammɛ. 11Ayila kwa anaam ka nbwɔɔlɔwɔnɛ nttɛ anaam nlenɛ luppyam a Dedde, Dedde ule luppyam anaam. Asinɛ ’kwɔng liyila, ayila assanga kwa bɛfɛɛn bya nnaangnɛ. 12Nbwɔɔlɔwɔ lɔkkwɔɔn a kɔlɔɔk: Ɔlɔɔt duu wa uyilanɛ kɔlɔɔk anaam, vvenɛ ɔnaang kwa anaam nnaangnɛ. Vvenɛ ɔnaang bɛfɛɛn bɛsak bya anaam, ka anaam nle ka nmiinɛ ka ɛfɛɛn a Dedde. 13Anaam vvenɛ nnaang bɔfɛɛn duu bwa abapnɛyɔng ka lɛkɔɔl anaam nkwaaning latele a Dedde lassɛ ka Awaan balɔɔt bayɛnzɛ. 14Abapnɛyɔng bɔfɛɛn duu ka lɛkɔɔl anaam, vvenɛ nnaangbwɛ nnyiwɔyɔng.” 15“Nsaapwɔnɛyɔng, alokoyɔng lafɔɔ anaam. 16Vvenɛ nbap Dedde unnyiwɔyɔng ɔlɔɔt ɔlɔk wa ule uttelewɔyɔng. Ammɛ vvenɛ ɔtaa la annyɔɔng kɛfal a kɛfal. Ammɛ ulenɛ Kuyeeng kwa kɔbwɔɔlɔnɛ lɔkkwɔɔn a kɔlɔɔk lutum Ɔlɔɔmɔlɔɔm. 17Ɛkpansi mɛ ba ekkwoong ɛtɔk ka esimɛnɛ likkwoong ɛyɛn, esimɛ likkwoong ɛsan. Annyɔɔng asanmɛyɔng lɔsan ka ɔtaanɛ la annyɔɔng, ulewɔyɔng ka tɔkɔlɔ. 18“Ngbatanɛ, kɛyɔɔng baala assekeyɔng. Vvenɛ nppyɛlɛ nffu nkupwɔyɔng. 19Usseke ssup vveeng ’wɔng nɛ ba ɔbɛlɛ lɛyɛn, ɔzzànga annyɔɔng vvenɛ ayɛnnɛyɔng. Anaam ka nlenɛ liddu, annyɔɔng vvenɛ assɛ adduyɔng. 20Kɛtɔm ’sɔng baang kɛffɔnɛ, vvenɛ asan attɛyɔng nle Dedde ka luppyam tɛ̀ttɛ̀ annyɔɔng alenɛnɛyɔng anaam ka luppyam, anaam nlewɔyɔng annyɔɔng ka luppyam. 21“Ɔlɔɔt duu wa ɔtɔknɛ lafɔɔ anaam utelezɛ, ulenɛ ɔlɔɔt wa nsaapmɛnɛ. Ɔlɔɔt duu wa nsaapmɛnɛ, vvenɛ ɔssɛ ɔsaap Dedde. Vvenɛ ɔlɔɔt ’wɔng baang ɔssɛ ɔsaapnɛ anaam, nsamnɛ kɛyɔɔng nyɔɔmɛ.” 22Judas (Judas Iscariot lissi) ɔttɛ, “Ale anaang nang ayɔɔyɛlɛ ayyɔɔt kɛyɔɔng bwa alenɛ usseke ɛkpansi?” 23Jesus ɔttɛ, “Ɔlɔɔt wa nsaapmɛnɛ uyilanɛ lukopolo anaam. Vvenɛ ɔlɔɔt ’wɔng baang ɔsaap Dedde. Anaam la Dedde vvenɛ iffu itaa la ɔlɔɔt ’wɔng baang. 24Ɔlɔɔt wa ntunmɛnɛ ufimnɛ lukopolo anaam. Lukopolo gwa appyeenɛnɛyɔng ka nkopolonɛ, gwa anaam lissi, lussinɛ ka Dedde wa ɔtɔɔmnɛnɛ. 25“Nbwɔɔlɔwɔyɔngbong ’kwɔng ka ntiinɛ mung la annyɔɔng. 26Kuyeeng-Ɔlɔɔmɔlɔɔm kulenɛ ɔlɔɔt wa ule uttelewɔyɔng wa Dedde ɔtɔɔmnɛ ka lɛkɔɔl anaam. Vvenɛ kukopolowɔyɔng lilɔɔk ɔkkpɛlɛ, kɔnaangwɔyɔng akkeyɔng lilɔɔk ɔkkpɛlɛ sa nlewɔnɛyɔng lɛbwɔɔlɔ. 27“Nbbɛbong bɔkaat nkɔngɔwɔyɔng. Nnyiwɔyɔng bɔkaat bwa anaam biini. Ba nnyiwɔyɔng bɔkaat tɛ̀ttɛ̀ vveeng unnyinɛ. Tɛ̀ttɛ́ ittina ibbɔlwɔyɔng. Tɛ̀ttɛ́ kutunwɔyɔng, tɛ̀ttɛ́ ɔbbwɔpɔwɔyɔng. 28Appyeeyɔng ka nttɛnɛ, ‘Nle ka ngbatanɛ ɔzzànga vvenɛ nppyɛlɛ nffu nkupwɔyɔng.’ Nsaapwɔnɛyɔng, aggeleyɔng ka nle ka nmiinɛ ka ɛfɛɛn a Dedde wa ɔttanɛnɛ anaam. 29Nbwɔɔlɔwɔyɔngbong ’kwɔng tɛ́ttɛ́ vvenɛ kɔnaang, ɔkkɔɔnɛ ɔffɔnɛ ka kɔnaangnɛ, ayilayɔng. 30Baala nkkwoong ntolo kutolo la annyɔɔng mmɛmmɛ, Satan ule ka uffunɛ ɔzzànga lakke ba ɔyanga la anaam. 31Ɔzzànga ɛkpansi vvenɛ ɛsan ɛttɛ Dedde ɔsaapnɛ lɔsaap kwakkwɛ nnaangnɛ lilɔɔk ɔkkpɛlɛ sa ɔddanɛnɛ ɔttɛ nnaang. “Feele igbatayɔng mung.”

will be added

X\