JAMES 5

1Balɔɔt iyyɛɛp, gɔpɔlɔyɔng! Akkwa attɔlyɔng layilili ka akama wa ale ka ayɛnnɛyɔng. 2Iyyɛɛp annyɔɔng iddɔlɔbong isaal. Bisili bizzibong ibba annyɔɔng bivve. 3Gold annyɔɔng la silver bittelebong itilikɔɔt. Itilikɔɔt ’yɔng baang vvenɛ ibee ittɛɛsɛ ittɛ issɛɛnwɔyɔng ka kɔlɔɔk. Vvenɛ ibee bbwak izziwɔyɔng ɛkkpakkwɔɔt tɛ̀ttɛ̀ lɔkɔɔn. Afaanyɔngbong iyyɛɛp ka bɛtɔm a lakpeke ’byɔng mung. 4Ba ataka akipiliyɔng balɔɔt ba banaangnɛ kɛnaang ka itɔɔm annyɔng. Agɔpɔlɔyɔng ibwɔɔlɔ ya babwɔɔlɔnɛ. Kullu kwa balɔɔt ’bɔng baang ba banaangnɛ kɛnaang ka itɔɔm annyɔɔng bakkwanɛ kɔffɔbong Ɔlɔɔmɔlɔɔm, Uyini wa ɔyanganɛ lakke ɔkkpɛlɛ. 5Lafal annyɔɔng ka ɛkpansi laggba lissi lale za kizzi ladoddo la kɛtaa ka laggele. Azzibong aggbengeyɔng ka kɛtɔm sa bale bawwɔɔlwɔyɔng. 6Annyiyɔng balɔɔt ba basinɛ kwɛ lɛsan kibbi, awwɔɔlyɔngbɛ. Ɔzzànga wɔyɔng ba bapipili. 7Ikpana anaam, abbeyɔng luppyam tɔttɔt Uyini uffu. Ayɛnyɔng tɛ̀ttɛ̀ uwoop-a-bɔtɔɔm ubbenɛ luppyam ɔtaa ɔkat ɛkpansi ammɛ ya uwoopnɛ bɔtɔɔm ennyimɛ liyaat sa doddo. Ubbe luppyam bɛɛm ɔkat ɛkɛtɛ ya uteepnɛ. 8Annyɔɔng ɔgbaa assɛ abbeyɔng luppyam. Alokoyɔng ittina annyɔɔng kkpɔk ka Kɛtɔm-a-kiffu Uyini kilenɛ lɛkkɛtɛ. 9Ikpana anaam, tɛ̀ttɛ́ assɛyɔng lɔzzɔ kɔlɔɔk kɔlɔk atumyɔng wannyɔɔng nkwaaning Ɔlɔɔmɔlɔɔm usiwɔyɔng kibbi linnyi. Ɔkaal-a-kɛkaal utii kɛtɛkɛtɛ, ɔbamabong, ule ka uffunɛ. 10Ikpana anaam, akkeyɔng kwa bappyee-kutolo Ɔlɔɔmɔlɔɔm, ba balɔɔknɛ kɔlɔɔk ka lakke Uyini. Atɔkyɔngbɛ ka iyɔɔ kibbe luppyam la kɛbbɔ akama. 11Ikkwɔɔbɛ balɔɔt a laggele ka babbɔnɛ akama. Appyeeyɔngbong kibbe luppyam a Job. Asanyɔng bwa Ɔlɔɔmɔlɔɔm unnyimɛnɛ ka lakuma. Ɔlɔɔmɔlɔɔm ulenɛ uyini kibbelɛttɔ la kɛyyɛɛp eleme. 12Ikpana anaam, kwa kɔttanɛ ɔkkpɛlɛ, tɛ̀ttɛ́ ayimyɔng ka ɛkɛtɛ ya anaangnɛyɔng nsekele. Tɛ̀ttɛ́ ayimyɔng libat ɔlɔk ɛkpansi ɔlɔk bɔfɛɛn duu. Attɛnɛyɔng “Iii” ɔkɔɔngwɔyɔng “Iii” ’wɔng baang. Attɛnɛyɔng “Mmaaye”, ɔkɔɔngwɔyɔng “Mmaaye” ’wɔng baang nkwaaning asiyɔng ka kɛkaal a Ɔlɔɔmɔlɔɔm lile. 13Ɔlɔɔt ɔlɔk ulewɔyɔng baang ka bɛzzɔkɔ wa ulenɛ ka kɔlɔɔk lɛttɔ ɔɔ? Ulenɛ baang, ɔssɛɛn luzɔɔm. Ɔlɔɔt annyɔɔng ɔlɔk ule baang wa ulenɛ ka laggele ɔɔ? Ulenɛ baang, usoom ubungu Ɔlɔɔmɔlɔɔm. 14Ɔlɔɔt ɔlɔk ule baang wa usimɛnɛ lɛppwa ɔɔ? Ulenɛ baang, ɔkkwɔɔ bagɛlɛnya-luzɔɔm baffu bazɔɔm bassɛɛnmɛ, bappwɔɔngmɛ bannɛ ka lɛkɔɔl a Jesus. 15Luzɔɔm ’gwɔng gwa azɔɔmnɛ la kiyila ka tɔkɔlɔ vvenɛ lɔnaang ɔlɔɔt iffaak ɔppwamɛ, Uyini ɔnaangmɛ ɔppwamɛ, ɔsɔɔkmɛ bubbi bwa ulenɛ lɛnaang. 16Ɔ̀zzànga abwɔɔlɔyɔng bubbi annyɔɔng annyɔɔng azɔɔm assɛɛnwɔyɔng kɛyɔɔng nkwaaning ɔppwawɔyɔng. Luzɔɔm Ɔlɔɔt wa doddo lɔnaang kɛnaang kɛttala. 17Elijah ɔdɔkɔ kɛssanga ɔlɔɔt tɛ̀ttɛ̀ ayyɔɔt mung. Ɔzɔɔm ɔttɛ ɔfɔngɔ kiteep. Usi liteep ka lɔkkwɔɔn ka likkpa liffa la kufaak. 18Ɔbbal lɛzɔɔm ɔttɛ uteep. Uteep ka lɔkkwɔɔn ɔllɔt ka ɛkpansi iwopowopo iyyɛɛp. 19Ikpana anaam, ulenɛ bɔfɛɛn ɔlɔɔt ɔgbatanɛ ka bɛzzɔkɔ annyɔɔng usseke lɔkkwɔɔn a kɔlɔɔk, ɔlɔɔt ɔlɔk ɔnaangmɛnɛ ɔppyɛlɛ uffu, 20akke attɛyɔng ɔlɔɔt duu wa ukkwoongnɛ ɔnaang ɔnaang-a-bubbi ɔkkyaa kɛnaang a bubbi ɔfɔngɔ, ɔlɔɔt ’wɔng baang ɔkkalabong lɛfɛkɛlɛ ɔnaang-a-bubbi ’wɔng baang, ɔnaang kɛsɔɔk a bubbi ppwap kile.

will be added

X\