1 Kullu la kɔwɔlɔ ’kwɔng mung ɔkkpɛlɛ ka bɛzzɔkɔ annyɔɔng bissi yang? Bissi ka kusapa ladoddo za lalenɛ baang ka kullu ka kkwɔɔt annyɔɔng ɛkɛtɛ ɔkkpɛlɛ. 2 Aggyanyɔng bɛfɛɛn ɔzzànga ba akkwoong ayangayɔngbwɛ, kwakkwɛ assekenɛ ka aggyannɛyɔng kɛwwɔɔl. Bɛfɛɛn bɛsaapwɔyɔng ɔ̀zzànga ba ayɛnyɔngbyɛ, ɔ̀zzánga awɔlɔyɔng akɔɔm alluyɔng. Baala ayangayɔng bwa aggyannɛyɔng ka asinɛyɔng Ɔlɔɔmɔlɔɔm lɛbap. 3 Abapnɛyɔng, baala ayɛnyɔng bwɛ, ka linaang annyɔɔng libbɔlnɛ. Abapyɔng kwa bɛfɛɛn bya binnyiwɔnɛyɔng laggele. 4 Basɛlɛ kiyila balɔɔt ’bɔng! Ba asan attɛyɔng alenɛyɔng ɛnngwa vveeng ’wɔng, aleyɔng balɔɔt a kɔfɔk Ɔlɔɔmɔlɔɔm ɔɔ? Ɔlɔɔt duu wa ulenɛ ɛnngwa vveengodde, ɔnaangmɛbong kɛyɔɔng ɔlɔɔt a kɔfɔk Ɔlɔɔmɔlɔɔm tɛ. 5 Tɛ̀ttɛ́ attina attɛyɔng luvva Ɔlɔɔmɔlɔɔm lɔkkwɔɔn ba lɔlɔɔk ka lɔttɛnɛ, “Luppyam gwa Ɔlɔɔmɔlɔɔm ɔssɛɛnnɛyɛlɛ ka kkwɔɔt lɔyanga kusapa kwa lɛbaang.” 6 Ɔzzànga lakke za Ɔlɔɔmɔlɔɔm unnyinɛyɛlɛ lattanɛ lɛkkaam. Tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, “Ɔlɔɔmɔlɔɔm ufim balɔɔt ba basaapnɛbɛ kɛyɔɔng, ɔnaang balɔɔt ba batɔknɛbɛ kɛyɔɔng ka bukeewaan ppyɛɛ.” 7 Kule ning baang ayilayɔng kwa Ɔlɔɔmɔlɔɔm. Afimnɛyɔng kwa Ubbu, vvenɛ ɔmma ussekewɔyɔng. 8 Attɔm akkɛtɛyɔng Ɔlɔɔmɔlɔɔm, ammɛ vvenɛ ɔssɛ ɔttɔm ɔkkɛtɛwɔyɔng. Ayilayɔng labɔɔk, annyɔɔng banaang-a-bubbi. Azzaayɔng ippyam annyɔɔng, annyɔɔng banaang-a-lalaak. 9 Bukee bunaangwɔyɔng, akɔɔm akkwayɔng, amanyɔng, asikiliyɔng kɛsɛɛk annyɔɔng usseke kullu, laggele annyɔɔng lasseke bukee. 10 Akunyɔng laddu ka lusso Uyini, vvenɛ ɔlɔmwɔyɔng ufeele. 11 Ikpana anaam, tɛ̀ttɛ́ akpɛnyɔng ba annyɔɔng. Ɔlɔɔt duu wa ɔkpɛnnɛ ɔkpana wa ukupnɛ Christ ɔlɔk unnyimɛ kibbi, ɔkpɛnbong Lafɔɔ unnyizɛ kibbi ɔgbaa. Annyinɛ Lafɔɔ kibbi nzang asibong ɔlɔɔt wa utelenɛzɛ lile, asseke ɔlɔɔt wa unnyinɛzɛ kibbi. 12 Ɔlɔɔmɔlɔɔm ulenɛ ɔlɔɔt wa unnyinɛ lafɔɔ ɔbbal ɔkaal-a-kɛkaal lile. Ammɛ kɛyɔɔng ukkwoongnɛ ɔkkala ɔfɔngɔ, ukkwoong ɔbɛpɛ. Attina attɛ annɔ alenɛ nnyinɔɔng wa annyinɛ wannyɔɔng ɔlɔɔt kibbi? 13 Agɔpɔlɔnɛyɔng gedegede mung, annyɔɔng ba alɔɔknɛ attɛyɔng, “Mmwɔɔn ɔlɔk lufat vvenɛ imii ka lɛffɛ lɛlɔk, ka ɛfɛɛn ile itaa ka kukkpa, inaang kɛnaang, iyanga ikkpoko ggbadam.” 14 Ba asanyɔng tɛ̀ttɛ̀ lɛfal annyɔɔng lile lile lufat. Ale yɔng tɛ̀ttɛ̀ kibut sa ayɛnnɛyɔng lɔfɔm, kikoon kisi lɛbɛlɛ lile. 15 Kwa ale alɔɔkyɔng ulenɛ ’kwɔng! “Ɔlɔɔmɔlɔɔm kɔsaapmɛnɛ vvenɛ iddu inaang ’bwɔng ɔlɔk ’bwɔng kang.” 16 Gedegede mung ɔkkyaawɔyɔng lɔkkyaa, anaangyɔng kamma, Kɛnaang a kamma ’sɔng baang ɔkkpɛlɛ bbwak ba kile. 17 Kule ning baang, ɔlɔɔt wa usinɛ lɛnaang kwa ɔsannɛ ɔttɛ ɔnaangnɛ kɔyyɛɛp mung, ɔnaangbong bubbi.
