1 Ikpana anaam, tɛ̀ttɛ́ ɔkkpɛlɛ annyɔɔng azzangayɔng bakopolo-lukopolo. Asanyɔng lɔsan attɛyɔng Ɔlɔɔmɔlɔɔm ule ɔtta kɛkaal sa ayyɔɔt, bakopolo-lukopolo, lɛssɛɛn ɔtta sa balɔɔt balɔk. 2 Ɔkkpɛlɛ ayyɔɔt itaa-lɔtaa isɛpɛ ɛkɛtɛ ɔkkpɛlɛ. Ɔlɔɔt ɔtakanɛ lɛsɛpɛ ka kɔlɔɔk kwa ɔlɔɔknɛ, ɔlɔɔt ’wɔng baang ɔlɔɔt wa doddo, ukkwoong lukkwoong ɔkɔɔm lɛfal ammɛ. 3 Issɛɛn eyim luzzi ka kamma nkwaaning eteleyɛlɛ, ikkwoong inaangyɛ emii ka ɛfɛɛn iggyannɛ ittɛ emii. 4 Attina kwa akkpaat wa lɛbaang: Tɛ̀ttɛ̀ uggbengenɛ baang, kɛffa kikkwoong mung kɛffamɛ. Akkwoong mung asikilimɛ la waan a bissɛ ning umii ka ɛfɛɛn ya ɔwaat-ɔwaat ɔggyannɛ ɔttɛ umii. 5 Kule ning baang la lɛlaak, tɛ̀ttɛ̀ lissupnɛ baang, likkwoong mung lɛnaang kamma litum bɛfɛɛn bya lɛbaang. Attina tɛ̀ttɛ̀ waan a lɛlaak a lɔkɔɔn ssup ning ukkwoongnɛ ɔssɛɛn lɛkɔɔt za lɛbaang a lɛbaang lɛkkɔm! 6 Lɛlaak lile tɛ̀ttɛ̀ lɔkɔɔn. Azzɛ lilenɛ ɛkpansi bubbi ya elenɛyɛlɛ ka kkwɔɔt, ɛnaang bubbi buwaala kkwɔɔt ayyɔɔt ɔkkpɛlɛ. Lɛkɔɔm lɔkɔɔn gwa lussinɛ ka Hell biini luffu lukupzɛ lɛssɛɛn kɛfal ayyɔɔt ɔkkpɛlɛ lɛkkɔm. 7 Ɔlɔɔt ukkwoong mung ɔbɛtɛ bɛfɛɛn ɔkkpɛlɛ bya Ɔlɔɔmɔlɔɔm ɔlɔɔmnɛ. Ɔbɛtɛbong isɛɛn ka kɛmat la bunɔɔn la izzɔkɔ ɔbɛtɛ la isɛɛnabannyi. 8 Ɔzzànga ɔlɔɔt wa ukkwoongnɛ ɔbɛtɛ lɛlaak ba ule. Lɛyanga ibbyap. Ɔlɔɔt wa ukkwoong ɔkatzɛ ba ule. Lɛyanga bussi lubbe lubbe. 9 Ikɔɔmzɛ azzɛ iwomo Dedde Uyini Ayyɔɔt kɛnaang. Ikɔɔmzɛ azzɛ ɔgbaa izɔɔm wayyɔɔt wa Ɔlɔɔmɔlɔɔm ɔlɔɔmmɛnɛ ɔbalmɛ ammɛ biini. 10 Lɛmmwɔɔl za kiwomo kɛnaang la lɛmmwɔɔl za kɛzɔɔm wannyɔɔng bissi ka kamma kkwɔn. Ikpana anaam, tɛ̀ttɛ́ afɔngɔyɔng ’kwɔng kɔnaang. 11 Lubbebannyi gwa lussinɛ bannyi ba baggwoomnɛ la bannyi ba bakkpannɛ ka lɛmma zzɔn ba lule. 12 Ikpana anaam, ɛkɔɔng ya ɛwɔmnɛ lakkpo manggolo ba ele. Manggolo wa ɔwɔmnɛ lakkpo ɛkɔɔng ba ule. Lubbe-bunɔk bannyi ba doddo ba lukkwoong lussi. 13 Ɔlɔɔt ɔlɔk ule baang ka bɛzzɔkɔ annyɔɔng wa ɔsannɛ kɔlɔɔk, ukkwoong uppyeekwɛ doddo ɔɔ? Ulenɛ baang, ɔyɔɔ kɛsan-a-kɔlɔɔk ammɛ ka lɛfal ammɛ za doddo, ka linaang a bukee-waan la kɛsan-a-kɔlɔɔk. 14 Ɔzzànga ayanganɛ luleep la kitun-a-kɔlɔɔk, la kɛssɔp-a-bɔfɛɛn ka luppyam annɔ, ɔfɔngɔ kɛkkyaa anaang kamma atum lɔkkwɔɔn-a-kɔlɔɔk. 15 Kɛsan-a-kɔlɔɔk ’sɔng mung ka libat mɛ ba kissi, kile sa ɛkpansi, sa Kuyeeng-Ɔlɔɔmɔlɔɔm lissi, sa ubbu. 16 Ɛfɛɛn a luleep ɔlɔk kɛssɔp a bɔfɛɛn kilenɛ, kɔwɔlɔ la bubbi bussɛ bule baang. 17 Ɔzzànga bisana pya bissinɛ ka libat biyyɛɛppɔyyɛɛp bisak. Ka kɛkɔɔm ɛtɔk, biyanga bɔkaat ɔgbaa la kibbe-luppyam la bunngwa, bile akama akama ɔzzànga appyɛ bimaatnɛ linaang sa doddo. Lɔgbɛɛk ba lule la kɛkkala-lɛlaak. 18 Budoddo bulenɛ liyaat ayyɔɔt sa lissinɛ ka ifɔɔk a bɛfɛɛn ya baggyan a bɔkaat bakɔɔnnɛ.
