1 Ikpana anaam, ka alenɛyɔng balɔɔt a kiyila ka Uyini ayyɔɔt Jesus Christ, wa ulenɛ Uyini lakke, tɛ̀ttɛ́ akɔɔmyɔng balɔɔt buubuu akupyɔng linaang abbɛ. 2 Uggboggbo ɔlɔɔt ɔwɔkɔlɔnɛ iwɔkɔlɔ ya doddo, ɔssɛɛn waan-ɛlla gold ka kɛnnɔ uffu ka mitin annyɔɔng, ɔlɔɔt wa ɔbbɔlmɛnɛ ɔssɛ uffu la bissaka iwɔkɔlɔ. 3 Attanɛ ɔlɔɔt wa ɔwɔkɔlɔnɛ iwɔkɔlɔ ya doddo latele linnyi, attɛ, “Ataa mung ka kɛtaa sa doddo,” alɔɔk la ɔlɔɔt wa ɔwɔkɔlɔnɛ bissaka iwɔkɔlɔ attɛ, “Afeele abee-lubee,” ɔlɔk attɛ “Ataa mung ka lisse ka lataak anaam.” 4 Ning baang azzibong kibbi ka alenɛ bubuubuu litte ka bɛzzɔkɔ annyɔɔng ɔgbaa ka alenɛ ubbu luppyam lɛkɔɔm akaal kɛkaal. 5 Gɔpɔlɔyɔng, Ikpana anaam! Ɔlɔɔmɔlɔɔm ɔssang balɔɔt ba ɔbbɔlnɛbɛ ka vveeng ’wɔng mung ɔnaangbɛ baggbenge ka kiyila, batɔk Itutum-Ɔlɔɔmɔlɔɔm bayanga. Annyɛ ya ulenɛ lisekele ɔttɛ vvenɛ unnyi balɔɔt ’bɔng baang ba batelemɛnɛ. 6 Ɔzzànga asiyɔng balɔɔt ba ɔbbɔlnɛbɛ latele linnyi! Babang bayɔɔwɔnɛyɔng akama, battuluwɔyɔng bamii ka idda kɛkaal? Balɔɔt ba ɔyyɛɛpnɛbɛ! 7 Abbɛ baang balenɛ balɔɔt ba balɔɔknɛ bubbi batum ubeet a lɛkɔɔl ’zɔng baang za balewɔnɛyɔng linnyi. 8 Vvenɛ anaangyɔng kwa kulenɛ bbwak ulenɛ ka atelenɛ lifɔɔ Itutum-Ɔlɔɔmɔlɔɔm, za ayɛnnɛyɔng ka luvva lafɔɔ Ɔlɔɔmɔlɔɔm za lattɛnɛ, “Wa annyɔɔng ɔsaapwɔ tɛ̀ttɛ̀ asaapwɔnɛ kɛyɔɔng.” 9 Ulenɛ ka akɔɔmnɛ balɔɔt tɛ̀ttɛ̀ ayɛnnɛ linaang abbɛ, azzibong kibbi. Lafɔɔ vvenɛ lannyiwɔ kibbi ka alenɛ ɔbɛpɛ-lafɔɔ. 10 Ɔlɔɔt duu wa ɔbɛpɛnɛ lifɔɔ zzɔn ɔbɛpɛbong lafɔɔ ɔkkpɛlɛ. 11 Ka ulenɛ ɔlɔɔt vvɔn ɔlɔɔknɛ ɔttɛ, “Tɛ̀ttɛ́ akup wanavva ɔlɔɔt.” ɔbbal lɛttɛ, “Tɛ̀ttɛ́ awwɔɔl balɔɔt.” Gɔɔ mkkpa asi wanavva ɔlɔɔt likup, alenɛ ɔlɔɔt lɛwwɔɔl azzangabong ɔbɛpɛ-lafɔɔ. 12 Atoloyɔng kutolo, anaangyɔng linaang tɛ̀ttɛ̀ balɔɔt ba lafɔɔ za lasanganɛyɛlɛ ka kɔlɔɔk lale lakaal kɛkaal abbɛ. 13 Ɔlɔɔmɔlɔɔm kibbe-lɛttɔ baala ɔyanga ka kɛkaal ɔlɔɔt wa ɔsɛlɛnɛ kibbe-lɛttɔ. Ɔzzànga kaang kibbe-lɛttɔ kɛbɛtɛnɛ kɛkaal. 14 Ikpana anaam, budoddo bulenɛ bɔkka abbwɛ ka ɔlɔɔt ɔttɛnɛ ammɛ ɔyanga kiyila, linaang ammɛ lisi kiyila ’sɔng baang lɛyɔɔ? Kiyila ’sɔng baang vvenɛ kikkwoong kɛkkalamɛ ɔɔ? 15 Ulenɛ bɔfɛɛn ikpana annyɔɔng baggyannɛ iwɔkɔlɔ ɔbɛtɛ la kazzi bɛɛ? 16 Bɔkka budoddo bwa alenɛbɛ lɛnaang ka kɛttɛ, “Ɔlɔɔmɔlɔɔm ɔnaangwɔyɔng ppyɛɛ! Ataayɔng bbwak azziyɔng budoddo!” –asinɛbɛ bɛfɛɛn ɔkkpɛlɛ bya kuddu abbɛ kɔggyannɛ linnyi. 17 Kule ning baang la kiyila, Kiyila kilenɛ kɛyɔɔng kɛsɛlɛ linaang, nzang kibbebong. 18 Ɔzzànga ɔlɔɔt ɔlɔk vvenɛ ɔttɛ, “Ɔlɔɔt vvɔn ɔyanga kiyila, wa vvɔn ɔyanga linaang.” Kɛppyɛlɛ kamma anaam kile kɛttɛ, “Ayɔɔnɛyɔng tɛ̀ttɛ̀ ɔlɔɔt ɔyanganɛ kiyila ɔsɛlɛ linaang. Vvenɛ anaam nyɔɔwɔyɔng kiyila anaam ka linaang anaam. 19 Ayilayɔng mung attɛyɔng Ɔlɔɔmɔlɔɔm ule vvɔn keem ɔɔ? Kɔyyɛɛp mung! Babbu liyeeng lissɛ liffula ning liyila littɛ Ɔlɔɔmɔlɔɔm ule vvɔn. 20 Annyɔɔng bakun ’bɔng. Aggyan attɛ bayɔɔwɔyɔng battɛ kiyila sa kɛsɛlɛnɛ linaang ba kɛyyɛɛp ɔɔ? 21 Mung ɔgɛlɛnya ayyɔɔt Abraham ɔdɔkɔ ɔtaa bbwak nang la Ɔlɔɔmɔlɔɔm? Ɔdɔkɔ ka linaang ammɛ ka ɔttɛnɛ ɔsam awaan Isaac ɔnaang bigwugwulu unnyi Ɔlɔɔmɔlɔɔm. 22 Ba ayɛnyɔng ɔɔ? Kiyila ammɛ la linaang bɛnaangnɛ kɛnaang ɛfɛɛn kkwɔn. Kiyila ammɛ kɛdɔkɔ kile bbwak ka ussinɛ ka linaang ammɛ. 23 Luvva Ɔlɔɔmɔlɔɔm lɔlɔɔk ka lɔkkwɔɔn ka lɔttɛnɛ, “Abraham uyila kwa Ɔlɔɔmɔlɔɔm. Ka kiyila ammɛ, Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak.” Kule ka lɔkkwɔɔn, kussi ning baang bakkwɔɔ Abraham ɛnngwa Ɔlɔɔmɔlɔɔm. 24 Asan attɛyɔng linaang linaangnɛ ɔlɔɔt ɔtaa bbwak la Ɔlɔɔmɔlɔɔm, kwa ɔyanganɛ kiyila utum Ɔlɔɔmɔlɔɔm keem lissi kɔnaangmɛnɛ. 25 Kɔdɔkɔ kɛssanga ssɔn la Rahab, wa àkkpàla; Linaang ammɛ lidɛmmɛnɛ ɔtaa bbwak la Ɔlɔɔmɔlɔɔm, ka ɔtɔknɛ balɔɔt a Israel ba batɔɔmnɛbɛ battɛ bamii bakoolo ɛfɛɛn, ɔssɛɛn ka ssala uttelebɛ bassɛ ka ɛtɔk ɛlɔk bamma basɛɛm. 26 Tɛ̀ttɛ̀ kkwɔɔt sa lisɛlɛnɛ kuyeeng libbenɛ, kiyila sa kɛsɛlɛnɛ linaang kɛssɛbong kibbe ning baang.
