HEBREWS 8

1Mung ulenɛ ɛtɔk a kɔlɔɔk ya ilɔɔknɛ ittɛ iyanga Uzzilɛttɔ bassɛɛn-a-luzɔɔm wa lɛbaang tɛ̀ttɛ̀ ’wɔng mung, wa ɔtaanɛ ka kɔbɔɔk ɛlaabɔɔk ugbaal a kibeet Ɔlɔɔmɔlɔɔm ka libat. 2Ɔnaang kɛnaang tɛ̀ttɛ̀ Ɔssɛɛn-a-luzɔɔm wa lɛbaang ka Labun-Ɔlɔɔmɔlɔɔm Bbwak ka tɔkɔlɔ Ggwoon-Ɔlɔɔmɔlɔɔm gwa usinɛ balɔɔt lile banaangnɛ, ule Ebinukkpaapi ɛnaangnɛ. 3Lutini Uzzilɛttɔ bassɛɛn-a-luzɔɔm wa lɛbaang la vvɔn basangamɛ battɛ ɔkɔɔm lɛkɔmɔlɔ ɔnaang lɛsɔɔk unnyi Ɔlɔɔmɔlɔɔm, ɔzzànga Uzzilɛttɔ bassɛɛn-a-luzɔɔm Wa Lɛbaang ayyɔɔt vvenɛ ɔssɛ ɔyanga bɔfɛɛn bwa ule ɔkɔɔm ɔnaang lɛsɔɔk unnyi Ɔlɔɔmɔlɔɔm. 4Ulenɛ ka ulenɛ ka ɛkpansi nzang ɔssɛɛn-a-luzɔɔm baala ɔzzanga ffet a ffet, ka bassɛɛn-a-luzɔɔm balɔk balenɛ baang ka banaangnɛ Ɔlɔɔmɔlɔɔm lasɔɔk tɛ̀ttɛ̀ Lafɔɔ a balɔɔt Jews lalɔɔknɛ. 5Kɛnaang sa banaangnɛ tɛ̀ttɛ̀ bassɛɛn-a-luzɔɔm kile ka lɔkkwɔɔn. Kule ikete la kuyeeng a kɔlɔɔk kwa kulenɛ ka libat. Kule kɛssanga ssɔn tɛ̀ttɛ̀ kɔdɔkɔnɛ la Moses. Ɛkɛtɛ ya ɔdɔkɔnɛ ɔttɛ ɔbɔɔk Ggwoon, Ɔlɔɔmɔlɔɔm ɔbwɔɔlɔmɛ ɔttɛ, “Asan anaang bɛfɛɛn ɔkkpɛlɛ kɛssanga ssɔn tɛ̀ttɛ̀ bya nyɔɔwɔnɛ ka libat a lɛttaal.” 6Ɔzzanga tɛ̀ttɛ̀ kulenɛ mung, Jesus bannyimɛbong kɛnaang tɛ̀ttɛ̀ uzzilɛttɔ-luzɔɔm sa kɛttanɛ sa abbɛ liggbenge, ɔtaa tɛ̀ttɛ̀ kɛbɛtɛ-kɛnnɔ sa ɔbɛtɛnɛ ka kɔlɔɔk ɔlɔɔt la Ebinukkpaapi sa kilenɛ sa doddo kitum nsekele wa bɛfɛɛn bya doddo. 7Bulɔk búsinɛ̀ lɛnaang la kɛbɛtɛ-kɛnnɔ sa ikeeng ikeeng nzang kɛbɛtɛ-kɛnnɔ kɛlɔk isi lɛbɛlɛ lɛggyan. 8Ɔzzànga Ɔlɔɔmɔlɔɔm ɔyɛn kwa balɔɔt ammɛ banaangnɛ kɔbbɔl ka ɛkɛtɛ ɔlɔɔknɛ ɔttɛ, “Bɛtɔm bile ka biffunɛ, vvenɛ nnaang ufaa kɛbɛtɛ-kɛnnɔ la balɔɔt a Israel la kikkwu Judah. 9Vvenɛ baala kule tɛ̀ttɛ̀ kɛbɛtɛ-kɛnnɔ sa nnaangnɛ la balɔɔt abbɛ ba iyɛddɛ iyɛddɛ ka kɛtɔm sa nsanganɛbɛ bagbata ka ɛkpansi Egypt. Basi lɛnaang kwa kɛbɛtɛ-kɛnnɔ sa nnaangnɛ la abbɛ kɛlɔɔknɛ. Ɔzzánga Ebinukkpaapi ɛlɔɔk ɛttɛ, Kwa abbɛ nsi lɛgɔpɔlɔ.” 10Uyini ɔlɔɔk ɔttɛ, “Gedegede mung uwɔng ulenɛ kɛbɛtɛ-kɛnnɔ sa nle ka nbɛtɛnɛ la balɔɔt Israel, Ka ussoonɛ vvenɛ nnaang Lafɔɔ nssɛɛnbɛ ka ittina, nkkpɔkzɛ ka ippyam abbɛ, Vvenɛ nzzanga Ɔlɔɔmɔlɔɔm abbɛ. Abbɛ bazzanga balɔɔt anaam. 11Ɔlɔɔt ba ule wa ule ukopolo ɔlɔɔt a lɛffɛ ammɛ, ɔlɔk ɔbwɔɔlɔ ɔlɔɔt a lɔkaan ammɛ ɔttɛ, ‘Asan Uyini.’ Ɔkkpɛlɛ abbɛ vvenɛ basannɛ ka ussinɛ ka bwɔɔn ba sɛkɛsɛkɛ umii ɔffɔ ka ba labaang. 12Vvenɛ babbenɛ-lɛttɔ ka akama abbɛ. Bubbi abbɛ vvenɛ ba nbɛlɛ likke ɛkɛtɛ ɛlɔk.” 13Ilɔɔknɛ kwa ufaa kɛbɛtɛ-kɛnnɔ, Ɔlɔɔmɔlɔɔm ɔnaangbong kɛbɛtɛ-kɛnnɔ sa ikeeng kisseke ɔtɔm a bɔfɛɛn. Bɔfɛɛn la bbwɔn bwa bukkpɛɛmnɛ busi lɛbɛlɛ lɛyyɛɛp, vvenɛ butaak lɛkɔɔl.

will be added

X\