HEBREWS 7

1Melchizedek ’wɔng mung ɔdɔkɔnɛ ubeet a Salem. Ɔdɔkɔ Ɔssɛɛn-a-luzɔɔm Ɔlɔɔmɔlɔɔm wa ɔttanɛ lakke ɔkkpɛlɛ. Ka Abraham ussinɛ lɛkɔɔng za ɔwwɔɔlnɛ babeet banna ɔppyɛlɛ, Melchizedek ududamɛ ɔnaangmɛ ppyɛɛ. 2Abraham ɔbɛngɛlɛ bɛfɛɛn bya ɔyanganɛ uloko lakup zzɔɔp, ɔsanga likup zzɔn unnyimɛ. (Ɔkɔɔm ɛtɔk a ifɛɛt a lɛkɔɔl a Melchizedek ulenɛ “Ubeet wa Bbwak.” Ka ulenɛ ubeet wa Salem, ifɛɛt a lakɔɔl ammɛ ilɔk ilenɛ “Ubeet a Bɔkaat.”) 3Ɔlɔɔt wa ɔsannɛ lussimi abassɛ ɔlɔk abakka Melchizedek ba ule, ɔlɔk balɔɔt a kikkwu ammɛ ba ule. Ɔlɔɔt wa ɔsannɛ ɛkɛtɛ bamaatmɛnɛ la ɛkɛtɛ ubbenɛ ba ule. Ule tɛ̀ttɛ̀ Waan-Ɔlɔɔmɔlɔɔm, Ule Ɔssɛɛn-a-luzɔɔm Ɔlɔɔmɔlɔɔm kɛfal a kɛfal. 4Ayɛnyɔngbong tɛ̀ttɛ̀ ɔyanganɛ lakke baang ɔɔ? Abraham, Uyini itutum, ɔsanga likup a bɛfɛɛn zzɔn ka lakup a bɛfɛɛn za zzɔɔp za ɔkɔɔmnɛ ka lɛkɔɔng ɔppyɛlɛ unnyimɛ. 5Balɔɔt a kikkwu a Levi ba balenɛ bassɛɛn-a-luzzɔm bassɛɛnbong Lafɔɔ battɛ balɔɔt a Israel babɛngɛlɛ bɛfɛɛn abbɛ ka lakup zzɔɔp, basanga likup zzɔn bannyi. Ning baang ulenɛ kɛttɛ itɔk ka balɔɔt a lɔkaan abbɛ, mkkpa abbɛ ɔgbaa bale balɔɔt a kikkwu Abraham. 6Melchizedek ka kikkwu a Levi ba ussi. Ɔzzanga ɔtɔk likup zzɔn ka Abraham, ɔnaangmɛ ammɛ wa ɔtɔknɛ nsekele Ɔlɔɔmɔlɔɔm ppyɛɛ. 7Bɛkangala bɛlɔk ba bile, ɔlɔɔt wa ɔnaangnɛ ppyɛɛ ɔttanɛ libbgenge ɔtta ɔlɔɔt wa ɔtɔknɛ ppyɛɛ. 8Ka kɔlɔɔk kwa bassɛɛn-a-luzɔɔm, likup za zzɔɔp balɔɔt ba bale babbe batɔknɛ, ɔzzànga ka kwa Melchizedek, likup za zzɔɔp ɔlɔɔt wa ikokolo ɔtɔknɛ tɛ̀ttɛ̀ luvva Ɔlɔɔmɔlɔɔm lɔlɔɔknɛ. 9Ɔzzànga kule ka lɔkkwɔɔn ka Abraham unnyinɛ likup za zzɔɔp, Ɔlɔɔt a Levi (wa balɔɔt a kikkwu ammɛ batɔknɛ likup za zzɔɔp) ɔssɛ unnyi. 10Levi mɛ ba bataka bamaat, ɔzzanga ka lɔkkwɔɔn ɔdɔkɔ ka kkwɔɔt Abraham uyini kikkwu ammɛ ka ɛkɛtɛ ya Melchizedek ududanɛ Abraham. 11Ɔdɔkɔ eleme balɔɔt a Levi, bassɛɛn-a-luzɔɔm, kwakkwɛ bannyinɛ balɔɔt a Israel Lafɔɔ. Bulenɛ ka kɛnaang a bassɛɛn-a-luzɔɔm a itutum a Levi kɛyyɛɛpnɛ, nzang ɔssɛɛn-a-luzɔɔm ɔlɔk usi lɛbɛlɛ lɛggyan, wa ussinɛ ka bassɛɛn-a-luzɔɔm ba itutum a Melchizedek, usi ka Aeron lissi. 12Bafoolonɛ itutum a bassɛɛn-a-luzɔɔm, vvenɛ bassɛ bafoolo lafɔɔ. 13Ɔzzànga Uyini ayyɔɔt wa balɔɔknɛ lilɔɔk ’sɔng batum, ussi ka kikkwu kɛlɔk. Ɔlɔɔt a kikkwu ammɛ ɔlɔk ba ɔtaka ɔzzánga ɔssɛɛn-a-luzɔɔm. 14Basanbong ppwool battɛ bamaatmɛ ka kikkwu a Judah. Ɔzzanga Moses usi kikkwu ’sɔng baang lɛtala ka ɔlɔɔknɛ kɔlɔɔk a bassɛɛn-a-luzɔɔm. 15Kɔlɔɔk ’kwɔng baang kɔdɔkɔ ppwool; Ɔzsɛɛn-a-luzɔɔm ɔlɔk ɔttabong, wa ulenɛ tɛ̀ttɛ̀ Melchizedek. 16Ɔssɛɛn-a-luzɔɔm usi lɛzzanga kwa lafɔɔ za balɔɔt banaangnɛ, ɔzzanga ka lakke kuddu kwa kɔsɛlɛnɛ lakpeke. 17Luvva Ɔlɔɔmɔlɔɔm lɔttɛ, “Vvenɛ ale ɔssɛɛn-a-luzɔɔm ka kɛfal a kɛfal, tɛ̀ttɛ̀ Melchizedek ɔdɔkɔnɛ.” 18Basambong batɔm a lafɔɔ baloko ka lasinɛ lɛkkaam, lale bɔfɛɛn bwa gbɔɔ. 19Lafɔɔ a Moses bulɔk ba lakkwoong lanaang buyyɛɛp. Ɔzzanga gedegede mung luttina gwa doddo, gwa ile issɛ ka aggwɛ ikkɛtɛ Ɔlɔɔmɔlɔɔm, luffubong. 20Ka kɔgbaanɛ la ’kwɔng, Ɔlɔɔmɔlɔɔm uyim. Kɛssanga kiyim ’sɔng kisi lile ka banaangnɛ balɔɔt balɔk bassɛɛn-a-luzɔɔm. 21Ɔzzanga Jesus ɔzzanga Ɔssɛɛn-a-luzɔɔm ka kiyim sa Ɔlɔɔmɔlɔɔm uyimnɛ la ammɛ ɔttɛ, “Ebinukkpaapi eyimbong, luttina ba ɛbɛlɛ lifoolo. Vvenɛ azzánga Ɔssɛɛn-a-luzɔɔm kɛfal a kɛfal.’ ” 22Bubuubuu ’bwɔng buyɔɔnɛ Jesus budoddo a nlɔɔk-nloko a nsekele wa ɔttanɛ lɛyyɛɛp. 23Bubuubuu bulɔk bule baang. Bassɛɛn-a-luzɔɔm ’bɔng bakang badɔkɔ bayipi uyipi ɔzzanga babbe, basi lɛbɛlɛ likkwoong banaang kɛnaang abbɛ. 24Ɔzzanga Jesus uddu kɛfal a kɛfal, ɔnaang kɛnaang ammɛ tɛ̀ttɛ̀ ɔssɛɛn-a-luzɔɔm. Basimɛsɛ lɛsam bannyi ɔlɔɔt ɔlɔk. 25Ukkwoong mung gedegede mung gɔɔ ɛkɛtɛ duu ɔkkala balɔɔt ba bassɛnɛ ka ammɛ bamii ka ɛfɛɛn Ɔlɔɔmɔlɔɔm, ka ule uddu kɛfal a kɛfal, ukkpenge Ɔlɔɔmɔlɔɔm unnyibɛ. 26Jesus ulenɛ Uzzilɛttɔ bassɛɛn-a-luzɔɔm wa lɛbaang wa iggyannɛ. Ammɛ ulenɛ ɔlɔɔt wa doddo. Kɔlɔɔk ba ɔggyan, ammɛ ɔyyɛɛpnɛ ɔffata. Basammɛbong baloko zzekep ka libat basseke banaang a bubbi. 27Ammɛ ba ule tɛ̀ttɛ̀ bassɛɛn-a-luzɔɔm ba labaang balɔk, lɛtɔm ba utte lɛnaang kɛtɔm ɔkkpɛlɛ kwa bubbi ammɛ tɛ́ttɛ́ ɔnaang kwa bubbi balɔɔt balɔk. Ɔnaang lɛtɔm zzɔn kɔsaal ka ɔsammɛnɛ kɛyɔɔng unnyi ɔttɛ banaang bigwugwulu. 28Lafɔɔ a Moses lassang balɔɔt ba basinɛ badoddo lile, bazzanga Bazzilɛttɔ bassɛɛn-a-luzɔɔm ba labaang. Ɔzzànga nsekele Ɔlɔɔmɔlɔɔm la kiyim sa uyimnɛ ka lafɔɔ lalenɛ liffu kɛsanganɛ Awaan, wa ulenɛ lɛnaang ɔyyɛɛp ɔffata kɛfal a kɛfal.

will be added

X\