HEBREWS 5

1Uzzilɛttɔ bassɛɛn-a-luzɔɔm-Ɔlɔɔmɔlɔɔm wa lɛbaang la vvɔn basangamɛ ka kɛkaan a babbɛ battɛ ɔnaang kɛnaang unnyi Ɔlɔɔmɔlɔɔm ɔkkalabɛ ɔkkpɛlɛ. Ɔzɔɔm unnyi Ɔlɔɔmɔlɔɔm ɔsɔɔk lasɔɔk ɔnaang latɔm unnyi Ɔlɔɔmɔlɔɔm kwa bubbi. 2Ammɛ biini ka ɔkkpɛlɛnɛ ka itɔk gbadam, ukkwoong mung ɔkɔɔmmɛ kɛyɔɔng la ba abbɛ ba basinɛ kwɛ lɛsan banaang basɛpɛ. 3Ammɛ biini ka ulenɛ lakkpɛlɛ liyila, baala ɔzɔɔm ɔssɛɛn balɔɔt ka bubbi abbɛ keem, vvenɛ ɔzɔɔm ɔssɛɛnmɛ ammɛ kɛyɔɔng ka bubbi bwa ammɛ ɔgbaa. 4Ɔlɔɔt wa ɔsangamɛnɛ kɛyɔɔng ɔttɛ ɔzzanga uzzilɛttɔ-luzɔɔm ba ule. Ɔlɔɔmɔlɔɔm utininɛ unnyiwɔ ɔttɛ azzanga uzzilɛttɔ bassɛɛn-a-luzɔɔm Wa Lɛbaang tɛ̀ttɛ̀ utininɛ unnyi Aaron. 5Kɔssɛ kule ning baang la Christ. Christ usi lɛsam latele za kile uzzilɛttɔ-luzɔɔm unnyimɛ kɛyɔɔng. Lutini ’gwɔng, Ɔlɔɔmɔlɔɔm ɔdɔkɔnɛ ɔlɔɔk la ammɛ ɔttɛ, “Annɔ alenɛ Waan anaam, mmwɔɔn anaam nssekenɛ Ssaawɔ.” 6Ɔbbal lɛlɔɔk ka ɛfɛɛn ɛlɔk ɔttɛ, “Vvenɛ ale ɔssɛɛn-a-luzɔɔm ka kɛfal a kɛfal, tɛ̀ttɛ̀ Melchizedek ɔdɔkɔnɛ.” 7Jesus ka kɛfal ammɛ ka ɛkpansi ɔdɔkɔ ɔzɔɔm luzɔɔm ammɛ ɔkɔɔm ɔkkwa la liyeen ɔgaga ɔbap Ɔlɔɔmɔlɔɔm bwa ɔggyannɛ ka ulemɛnɛ ammɛ ukkwoongnɛ ɔkkalamɛ ka lubbe. Ɔdɔkɔ Ukee-waan, utele zzeen ka kɛnaang ammɛ, Ɔlɔɔmɔlɔɔm uppyeemɛ luzɔɔm. 8Ɔdɔkɔ Waan-Ɔlɔɔmɔlɔɔm ffet, ɔzzanga ubum utele Ɔlɔɔmɔlɔɔm ka kɛyɛn akama sa ɔyɛnnɛ. 9Ɔlɔɔmɔlɔɔn ɔnaangmɛnɛ ɔyyɛɛp ɔffata usikili ɔppyɛɛ ɔzzánga ɛtɔk a kuddu balɔɔt ɔkkpɛlɛ ba batelemɛnɛ. 10Ɔzzánga Ɔlɔɔmɔlɔɔm ɔbwɔɔlɔmɛ ɔttɛ ɔzzánga Uzzilɛttɔ bassɛɛn-a-luzɔɔm wa lɛbaang ka kikkwu Melchizedek, ɔssɛɛn-a-luzɔɔm. 11Kɔlɔɔk kɔttala lɔttala kwa ile ilɔɔk itum kɔlɔɔk ’kwɔng mung. Ɔzzanga kukoolo kɛbwɔɔlɔ kkpelegedee ka annyɔɔng akoolonɛyɔng kippyee kɔlɔɔk. 12Ɛkɛtɛ ɛmmɛbong gaang gaang wa bulenɛyɔng bakopolo-lukopolo lɛzzanga, ɔzzanga atiiyɔng baang ka akatnɛ attɛyɔng ɔlɔɔt ukopolowɔyɔng lakkɔ za ikeeng ka bɔtɔɔm bwa Ɔlɔɔmɔlɔɔm ɔtɔɔmnɛ. Lutini gwa bulenɛyɔng kazzi kwa kɔkɔlɔm lizzi tɛ̀ttɛ̀ bagɛlɛnya, atiiyɔng baang ka kɛvva libee. 13Ɔlɔɔt duu wa utiinɛ ka ɔvvanɛ libee, utii waan. Ɔlɔɔt ’wɔng baang ba ɔtaka ɔsan kwa kɔbbɔlnɛ la kwa kɔyyɛɛpnɛ. 14Kazzi kwa kakkaamnɛ kale kwa bagɛlɛnya, ba balenɛ likkoop basan kwa kɔbbɔlnɛ la kwa kɔyyɛɛpnɛ.

will be added

X\