HEBREWS 4

1Ɔlɔɔmɔlɔɔm ɔnaangbong nsekele la ayyɔɔt. Ammɛ ulenɛ wa ile imii ifɛkɛlɛ bakang la ammɛ. Ɔzzànga Ɔlɔɔmɔlɔɔm ɔbbwɔpɔwɔyɔngyɛlɛ nkwaaning ɔkkpɛlɛ annyɔɔng, ɔlɔɔt vvɔn gbɔɔ usi lisseke ka kimii kɛfɛkɛlɛ ’sɔng baang. 2Ayyɔɔt ippyeebong Kuttu-Budoddo Ɔlɔɔmɔlɔɔm tɛ̀ttɛ̀ abbɛ bappyeenɛ. Bappyee bɔtɔɔm ’bwɔng baang ɔzzànga budoddo bulɔk busibɛ linnyi ka bappyeenɛbwɛ basibwɛ lɛtɔk bassɛɛn ka luppyam. 3Ayyɔɔt ba iyilanɛ imiinɛ ifɛkɛlɛ la Ɔlɔɔmɔlɔɔm. Kule gbɔɔ bbwak tɛ̀ttɛ̀ ɔlɔɔknɛ ɔttɛ, “Kɔdɔkɔ kutunnɛ nyim ka lɔkkwɔɔn nttɛ, ‘Baala baffu bafɛkɛlɛ la anaam.’ ” Ɔlɔɔk ’kwɔng mung tɔttɔt mkkpa kɛnaang ammɛ kile lɛsaal ka ussinɛ ka ɛkɛtɛ ɔnaangnɛ vveeng. 4Ɛfɛɛn ele baang ka Luvva-Ɔlɔɔmɔlɔɔm ya ɛlɔɔknɛ ’kwɔng etum kɛtɔm sa bɛnnambɛkkyaat, “Ɔlɔɔmɔlɔɔm ɔnaang kɛnaang ammɛ uvve ɔkkpɛlɛ, ɔfɛkɛlɛ ka kɛtɔm sa bɛnnambɛkkyaat.” 5Kɛssanga kɔlɔɔk ’kwɔng mung kɛbbal baang lile ka ɔlɔɔknɛ, “Baala baffu bafɛkɛlɛ la anaam.” 6Balɔɔt ’bɔng baang ba bakɔɔmnɛ ɛtɔk bappyee Kuttu-budoddo Ɔlɔɔmɔlɔɔm basi ka tɔkɔlɔ lɛmal bamii bataa la Ɔlɔɔmɔlɔɔm bafɛkɛlɛ ka basinɛ kwa bappyeenɛ liyila. Balɔɔt balɔk bale baang ba bale bafɔngɔbɛ bamii ka tɔkɔlɔ bataa bafɛkɛlɛ la Ɔlɔɔmɔlɔɔm. 7Nkwɔng mung kɔyɔɔkwɛ kɛyɔɔng ka Ɔlɔɔmɔlɔɔm ulenɛ kɛtɔm kɛlɔk sa kɛzzanganɛ “Mmwɔɔn” lɛsanga. Ɔmmɛbong ka Ɔlɔɔmɔlɔɔm ɔssɛnɛ la David ɔlɔɔk lɛmmwɔɔl ammɛ za baggbanɛ lɛkkpɔk battɛ, “Appyeenɛ lɛmmwɔɔl Ɔlɔɔmɔlɔɔm mmwɔɔn tɛ̀ttɛ́ asizɛ lɛgɔpɔlɔ.” 8Joshua bukɔɔmnɛ balɔɔt umii ka ɛfɛɛn a kɛfɛkɛlɛ Ɔlɔɔmɔlɔɔm, nzang Ɔlɔɔmɔlɔɔm usi lissum ɔppyɛlɛ ɔlɔɔk kwa kɛtɔm kɛlɔk. 9Ka kulenɛ ning, mkkpa kɔnaang, kɛfɛkɛlɛ kitii baang sa balɔɔt Ɔlɔɔmɔlɔɔm bale bafɛkɛlɛ tɛ̀ttɛ̀ Ɔlɔɔmɔlɔɔm ɔfɛkɛlɛnɛ ka kɛtɔm sa bɛnnambɛkkyaat. 10Ɔlɔɔt duu wa umiinɛ ɔfɛkɛlɛ la Ɔlɔɔmɔlɔɔm vvenɛ ɔssɛ ɔfɛkɛlɛ kɛ kɛnaang ammɛ biini tɛ̀ttɛ̀ Ɔlɔɔmɔlɔɔm ɔfɛkɛlɛnɛ ka sa ammɛ. 11Ɔzzànga ibum kɔbɛtɛyɔngyɛlɛ imii ifɛkɛlɛyɔng ka ssala Ɔlɔɔmɔlɔɔm. Ifɔngɔyɔng kwa Ɔlɔɔmɔlɔɔm ɔttɛnɛ inaang kifim tɛ̀ttɛ̀ balɔɔt ’bɔng baang banaangnɛ basi kɛfɛkɛlɛ ka ssala Ɔlɔɔmɔlɔɔm limii. 12Lɛmmwɔɔl Ɔlɔɔmɔlɔɔm lile ikokolo ka kɛnaang. Ogge lafoom laffa wa ɔlamnɛ ɔffɔ la azzɛ ba ule. Lɛzza dduk lɛffɔ ka laduda lɛfɛkɛlɛ la kuyeeng la ka laduda ulɔl a kɛkɔp la bɛkɔp. Lɛmmwɔɔl ’zɔng baang liffiknɛ ikkɔlɔ balɔɔt la ittina abbɛ. 13Bwa ale akkwoong alup assekeyɔng Ɔlɔɔmɔlɔɔm ba bule. Bɛfɛɛn bya ɔlɔɔmnɛ bile kkpelegedee ka bɛtaanɛ ka lusso ammɛ. Ammɛ ulenɛ ɔlɔɔt wa ile ibwɔɔlɔ lilɔɔk ɔkkpɛlɛ sa inaangnɛ. 14Ibwɔɔpyɔng kiyila sa ibwɔɔlɔnɛ kkpɔk. Iyangabong Uzzilɛttɔ bassɛɛn-a-luzɔɔm wa lɛbaang a lɛbaang, wa ulenɛ ka lataak Ɔlɔɔmɔlɔɔm biini lɛffɔ. Ammɛ ulenɛ Jesus, Waan-Ɔlɔɔmɔlɔɔm. 15Uzzilɛttɔ bassɛɛn-a-luzɔɔm ayyɔɔt wa lɛbaang, ɔlɔɔt wa usinɛyɛlɛ nzɔɔn lɛnaang ka likke lɛsaalnɛyɛlɛ lissi. Ka isimi kukele, iyanga Uzzilɛttɔ bassɛɛn-a-luzɔɔm wa lɛbaang wa balemɛnɛ lɛllɛ ka itɔk ɔkkpɛlɛ ya ayyɔɔt ilenɛ ka annyɛ, ɔzzanga bubbi usi lɛnaang. 16Ikkaamyɔng luppyam iffuyɔng ka lusso Ɔlɔɔmɔlɔɔm ka ɛfɛɛn a kiggwoon a kɔlɔɔk kilenɛ, vvenɛ kibbe-lɛttɔ sa iggyannɛ bakang la kiggwoom a kɔlɔɔk kitteleyɔngyɛlɛ ka ɛkɛtɛ ya iggyannɛsɛ.

will be added

X\