HEBREWS 2

1Kwakkwɛ ile ilɔm lɔkkwɔɔn a kɔlɔɔk kwa ilenɛ lippyee kkpɔk, nkwaaning basiyɛlɛ lɛfɛɛt bassɛɛn ka kɔlɔɔk. 2Bɔtɔɔm bwa bayilabɔtɔɔm Ɔlɔɔmɔlɔɔm babwɔɔlɔnɛ idedde ayyɔɔt ba iyɛddɛ-iyɛddɛ bule ka lɔkkwɔɔn. Akkwɛ kɔnaangnɛ ɔlɔɔt duu wa usinɛbwɛ likup ɔlɔk utelebwɛ vvenɛ ɔyɛn akama wa ɔggyannɛ. 3Ngkka mung ile inaang nang isɛɛm akama ’wɔng, isinɛ lɛgɔpɔlɔ kwa kuddu kwa lɛbaang ’kwɔng. Uyini biini ɔkɔɔmbong ɛtɔk ɔbwɔɔlɔyɛlɛ kwa kuddu ’kwɔng baang. Balɔɔt ba bappyeemɛnɛ babwɔɔlɔyɛlɛ battɛ kule ka lɔkkwɔɔn. 4Ka ɛkɛtɛ ’yɔng baang nnyɔn, Ɔlɔɔmɔlɔɔm ɔgbaabɛ buttɛɛsɛ ammɛ la bɛfɛɛn a bikɛɛlɛ la bɛmaanga lakke ammɛ ggbadam. Ɔgbaa unnyiyɛlɛ lasɔɔk a Kuyeeng-Ɔlɔɔmɔlɔm tɛ̀ttɛ̀ kɔsaapmɛnɛ. 5Ɔlɔɔmɔlɔɔm usi bayilabɔtɔɔm ammɛ lɛsanga ɔttɛ bale bazzilɛttɔ a vveeng ’wɔng wa ɔttɛnɛ ule ka ɔnaangnɛ. Ammɛ ulenɛ vveeng wa ilɔɔknɛ itum mung. 6Kule tɛ̀ttɛ̀ balɔɔknɛ ka ɛfɛɛn ɛlɔk ka Luvva-Ɔlɔɔmɔlɔɔm battɛ, “Ɔlɔɔmɔlɔɔm, ɔlɔɔt ulenɛ ’bɔng wa attinanɛ kwa ammɛ, ɔlɔɔt gbɔɔ mung ulenɛ wa appyɛɛkmɛnɛ ɔɔ? 7Anaangmɛ ka waan ɛkɛtɛ ssup ussup ɔtta bayilabɔtɔɔm annɔ; Ɔzzanga attɔpɔmɛ ododo lakke la latele, 8Anaangmɛ uzzilɛttɔ bɛfɛɛn ɔkkpɛlɛ.” Luvva ’gwɔng lɔlɔɔk lɔttɛ Ɔlɔɔmɔlɔɔm ɔnaang ɔlɔɔt “Uzzilɛttɔ Bɛfɛɛn Ɔkkpɛlɛ.” Nkwɔng kugupu bɛfɛɛn ɔkkpɛlɛ ka lɔkkwɔɔn. Ɔzzànga gedegede mung ɔlɔɔt ba iyɛn ka uzzinɛ lɛttɔ bɛfɛɛn ɔkkpɛlɛ. 9Ɔzzànga iyɛn mung Jesus wa ɔnaangmɛnɛ ussup ɔtta bayilabɔtɔɔm ammɛ ka waan a liggbili ssup. Kussi ka kibbelɛttɔ Ɔlɔɔmɔlɔɔm ubbe ka lɛttɔ balɔɔt ɔkkpɛlɛ. Gedegede mung iyɛnmɛ ka battɔpɔmɛnɛ ododo la lakke Ɔlɔɔmɔlɔɔm la latele ka kɔlɔɔk a lubbe la akama wa ɔyɛnnɛ. 10Kɔdɔkɔ kule bbwak la Ɔlɔɔmɔlɔɔm keem wa ɔlɔɔmnɛ bɛfɛɛn ɔkkpɛlɛ ulokobyɛ ule ɔnaang Jesus ɔtaa ka budoddo ka ussinɛ ka akama wa ɔyɛnnɛ nkwaaning ɔkɔɔm balɔɔt bamii batul laggele ka Jesus ulenɛ ɔlɔɔt wa ɔkɔɔmnɛbɛ uffu ka kuddu. 11Ɔzzaa balɔɔt bubbi abbɛ busaal. Ammɛ la balɔɔt ba ɔzzaanɛ bubbi abbɛ, ɔkkpɛlɛ abbɛ bayanga Abassɛ vvɔn. Kwakkwɛ baang Jesus izzit isimɛnɛ lɛnaang kɛkkwɔɔbɛ ikpana ammɛ. 12Tɛ̀ttɛ̀ ɔlɔɔknɛ la Ɔlɔɔmɔlɔɔm ɔttɛ, “Vvenɛ nlɔɔk ntum bwa alenɛ lɛnaang nbwɔɔlɔ ikpana anaam, Vvenɛ nbunguwɔ ka lusso kibbi ɔkkpɛlɛ.” 13Ɔbbal lɛlɔɔk ɔttɛ, “Vvenɛ nsam luppyam anaam nloko ka Ɔlɔɔmɔlɔɔm.” Ɔbbal lɛttɛ, “Yɛnnɛ mung la bwɔɔntiti ba Ɔlɔɔmɔlɔɔm ulenɛnɛ linnyi.” 14Bwɔɔntiti, tɛ̀ttɛ̀ Jesus ukkwoongnɛ ɔkkwɔɔbɛ, ka bayanganɛ ɛkkpa kkwɔɔt la linnyi, Jesus biini ɔssɛ ule tɛ̀ttɛ̀ abbɛ, ɔyanga kuddu tɛ̀ttɛ̀ abbɛ. Ɔnaang ning baang nkwaaning ɔkɔɔm lubbe ammɛ ɔbɛpɛ likke Ɔnaang-a-kɛsɛɛm a kuyeeng, wa ɔyanganɛ lakke lubbe, 15ɔkkɔɔnɛ ɔkkyaa balɔɔt ’bɔng baang ba badɔkɔnɛ babili ɔkkpɛlɛ ka lafal abbɛ bafɔngɔ ka lubbe lɔbbwɔpɔnɛbɛ. 16Kule kpelegedee, bayilabɔtɔɔm Ɔlɔɔmɔlɔɔm lissi ka uttelenɛ. Lutini ’gwɔng “Uttele balɔɔt a kikkwu Abraham.” tɛ̀ttɛ̀ luvva Ɔlɔɔmɔlɔɔm lɔlɔɔknɛ. 17Uwɔng ulenɛ kɛttɛ ule ɔtaa tɛ̀ttɛ̀ ikpana ammɛ ka linaang ɔkkpɛlɛ la itɔk ɔkkpɛlɛ nkwaaning ule Uzzilɛttɔ bassɛɛn-a-luzɔɔm wa lɛbaang wa ɔyyɛɛpnɛ bɛnaang, ɔlɔɔt ubbemɛ lɛttɔ ka kɛnaang ammɛ sa ɔnaangnɛ unnyi Ɔlɔɔmɔlɔɔm, ɔlɔk bubbi balɔɔt bule la kɛsɔɔk. 18Gedegede mung, ukkwoong mung uttele balɔɔt ’bɔng baang ba ballɛnɛbɛ, ka ammɛ biini balemɛnɛ lɛssɛ ballɛ ɔyɛn akama.

will be added

X\