1 Ateleyɔng ɔlɔɔt la vvɔn tɛ̀ttɛ̀ bakpana ba bakupnɛ Christ. 2 Akke atɔkyɔng bakekeen assɛɛnyɔng ka ssala. Balɔɔt balɔk banaangbong ning kkpal batɔk bayilabɔtɔɔm Ɔlɔɔmɔlɔɔm bassɛɛn ka ssala basi lɛsan. 3 Akkeyɔng balɔɔt ba balenɛ ka igbakkɔpɔ, ɔtaa tɛ̀ttɛ̀ annyɔɔng bulenɛyɔng ka igbakkɔpɔ la abbɛ. Akkeyɔng balɔɔt ba balenɛ ka akama tɛ̀ttɛ̀ annyɔɔng assɛnɛ aleyɔng ka akama wa bayɛnnɛ. 4 Killu a wanavva la ulam kile bɔfɛɛn bwa balɔɔt ɔkkpɛlɛ batelenɛ. Bwaanbwalam la bwanavva abbɛ bayanga kiyila batumbɛ kɛyɔɔng. Ɔlɔɔmɔlɔɔm vvenɛ ɔkaal kɛkaal a bassɛ-kɛzak la bakup a bwanavva balɔɔt. 5 Akatyɔng kɛfal annyɔɔng, ikkpoko ifɔngɔwɔyɔng gaang kɛsaap. Bwa alenɛyɔng lɛyanga buffiwɔyɔng. Ɔlɔɔmɔlɔɔm ɔlɔɔkbong ɔttɛ, “Baala ngbata nkɔngɔwɔyɔng; baala nkkyaawɔyɔng nfɔngɔ.” 6 Ikkaamyɔng luppyam ilɔɔk ittɛyɔng, “Ɔlɔɔmɔlɔɔm ulenɛ Ɔkkala-ikkala anaam, Nɛ baala ɔbbwɔpɔ. Ɔlɔɔt ule ukkwoong ɔnaangnɛ ’bɔng?” 7 Akkeyɔng bazzilɛttɔ annyɔɔng ba isimi, ba babwɔɔlɔwɔnɛyɔng bɔtɔɔm Ɔlɔɔmɔlɔɔm. Attinayɔng tɛ̀ttɛ̀ bataanɛ, tɛ̀ttɛ̀ babbenɛ, usseke akeetyɔng kiyila abbɛ. 8 Jesus Christ ule kɛssanga ssɔn, lisee, mmwɔɔn, gɔɔ yoyyoyyo. 9 Tɛ̀ttɛ́ afɔngɔyɔng ufaa lukopolo ɔnaangwɔyɔng agbatayɔng ka ɛtɔk ya bbwak. Kɔyyɛɛp ka ikkaamnɛ luppyam ka lakke Ɔlɔɔmɔlɔɔm, ba kɔyyɛɛp ka itelenɛ lafɔɔ kazzi. Balɔɔt ba batelenɛ lafɔɔ kazzi bɛ ba lataka lattele. 10 Bassɛɛn-a-luzɔɔm ba banaangnɛ kɛnaang ka ggwoon a luzɔɔm a balɔɔt a Jews ba babɛlɛ lɔkkɔnɔ ba bazzinɛ kazzi kwa banaangnɛ bigwugwulu ka Labun-Ɔlɔɔmɔlɔɔm. 11 Uzzilɛttɔ bassɛɛn-a-luzɔɔm a balɔɔt a Jews wa lɛbaang ɔkɔɔm linnyi umii ka ɛfɛɛn a lafɔɔ ɔnaang bigwugwulu bya kɛkkpɔlɔ bubbi, ɔ̀zzànga isɛɛn biini bafɔɔp ka isimi a ssala. 12 Kwakkwɛ baang, Jesus ɔdɔkɔnɛ ɔssɛ ubbe ka kɛmat nkwaaning ɔkkpɔlɔ bubbi balɔɔt la linnyi ammɛ. 13 Ɔkkpɛlɛ ayyɔɔt itta imii ka vveeng itaayɔng ka izzit la ammɛ. 14 Lɛffɛ za ile itaa ka kɛfal a kɛfal, yɛlɛ ba lile mung ka ɛkpansi, iggyan lɛffɛ za lile ka liffunɛ. 15 Ɔkkpɛlɛ ayyɔɔt ibunguyɔng Ɔlɔɔmɔlɔɔm ɛkɛtɛ ɔkkpɛlɛ, ɔtaayɛlɛ tɛ̀ttɛ̀ bigwugwulu bya issɛnɛ ka Jesus inaang ka lɛmmwɔɔl a kamma za lɛttɛnɛ ammɛ ulenɛ Uyini. 16 Afɔngɔyɔng kisumala kɛnaang budoddo la kittele ɔlɔɔt ɔkkpɛlɛ. Uwɔng baang ulenɛ bigwugwulu bya bɛsaapnɛ Ɔlɔɔmɔlɔɔm. 17 Ateleyɔng bazzilɛttɔ annyɔɔng, akupyɔng lafɔɔ abbɛ. Bakat ippyam annyɔɔng ɛkɛtɛ ɔkkpɛlɛ gɔɔ ba bafɛkɛlɛ, ka bale bakkpele Ɔlɔɔmɔlɔɔm kɛnaang abbɛ. Atelenɛyɔngbɛ, vvenɛ banaang kɛnaang abbɛ la laggele. Usinɛ ning baang lile, bale banaangsɛ la bukee, ning baang baala ayangayɔng kɛyaam. 18 Azɔɔm annyiyɔngyɛlɛ. Isan lɔsan ittɛ iyanga luppyam gwa doddo ka iggyannɛ ittɛ inaang kɔlɔɔk kwa doddo ɛkɛtɛ ɔkkpɛlɛ. 19 Nkpengewɔyɔngbong gaang gaang nttɛ azɔɔm annyinɛyɔng nkwaaning nppyɛlɛ nffu nkupwɔyɔng like like. 20 - 21 Ɔlɔɔmɔlɔɔm ufungalabong Uyini ayyɔɔt, wa ulenɛ ɔkat-itɔɔn wa lɛbaang, ka lubbe gwa ubbenɛ ule kɛbɛtɛ-kɛnnɔ kɛfal a kɛfal lɛbɛtɛ. Ɔlɔɔmɔlɔɔm a bɔkaat unnyiwɔyɔng utini bɔfɛɛn duu bwa buyyɛɛpnɛ bwa aggyannɛyɔng nkwaaning anaangyɔng kɛnaang ammɛ. Ɔzzànga ikpenge ittɛ ka lakke Jesus Christ ɔnaang duu bwa busaapmɛnɛ la ayyɔɔt. Latele lataa la Christ yoyyoyyo. Kulening. 22 Ikpana anaam, nkpengewɔyɔng nttɛ abbeyɔng luppyam agɔpɔlɔyɔng bɔtɔɔm bwa bule bunnyiwɔyɔng kɛkkaam a luppyam. Lɛmmwɔɔl ’zɔng za nkkpɔknɛ nfeewɔyɔng mung gaang ba lɛlɔm. 23 Nggyan nttɛ asan attɛyɔng basangabong ɔkpana ayyɔɔt Timothy ka igbakkɔpɔ. Ɔkkanɛ liffu vvenɛ nkɔɔmmɛ nffu ka ɛkɛtɛ nle nffu nyɛnwɔyɔng. 24 Awomoyɔng bazzilɛttɔ annyɔɔng, la balɔɔt Ebinukkpaapi ɔkkpɛlɛ annyiyɔngyɛlɛ. Ikpana ayyɔɔt ba bassinɛ Italy bawomowɔyɔngbong. 25 Numa lakke Ɔlɔɔmɔlɔɔm lataa la annyɔɔng ɔkkpɛlɛ.
