1 Tɛ̀ttɛ̀ kwa ayyɔɔt mung, iyanga kibbi ittɛɛsɛ ka kikkpitnɛyɛlɛ. Ikkyaayɔng bɛfɛɛn ɔkkpɛlɛ bya bile bitunuyɛlɛ ifɔngɔ, la bubbi bwa bunnengenɛyɛlɛ ka kkwɔɔt ilaa zzeen immayɔng lɔfat gwa ilenɛ ka aggwɛ mung. 2 Iteleyɔng zzeen ka Jesus, wa iyanganɛ kiyila itummɛ ka ussinɛ ka lutte ɔffɔ ka lakpeke. Usi kɔlɔɔk a Cross lɛmma. Usi kwa izzit ya kibbe ka Cross littina. Ka isimi kukele, bɔwaa bwa bulenɛ bakang ka butaanɛ bukatmɛ budɛmnɛ usi littina kwa izzit ya kibbe ka cross. Gedegede mung ule ka kɔbɔɔk ɛlaabɔɔk Ugbaal a kibeet Ɔlɔɔmɔlɔɔm, ka ɔtaanɛ. 3 Attinayɔng akama wa ɔyɛnnɛ. Attinayɔng tɛ̀ttɛ̀ ɔtaanɛ ka bɛzzɔkɔ latun a banaang a bubbi. Tɛ̀ttɛ́ uttunwɔyɔng, ɔlɔk akkyaayɔng kiyila annyɔɔng afɔngɔyɔng. 4 Ka lubum gwa alenɛyɔng baang ka abumnɛ atumyɔng bubbi, ba ataka alluyɔng kullu aggyanyɔng lubbe. 5 Asumalayɔngbong lɛmmwɔɔl a lɔttama za Ɔlɔɔmɔlɔɔm ɔlɔɔknɛ la annyɔɔng tɛ̀ttɛ̀ bwaan ammɛ ɔɔ? Ɔlɔɔk ɔttɛ, “Waan anaam, agɔpɔlɔ ka ɛkɛtɛ Ebinukkpaapi ɛbbawɔnɛ bikɔɔm tɛ̀ttɛ́ ɔkkpɛpwɔ ka luppyam ka ule ɔlɔɔkwɔ kkɔkɔlɔm. 6 Ɔlɔɔt la vvɔn wa ɔsaapnɛ Ebinukkpaapi, Ebinukkpaapi ɛyɔɔmɛ akama. Ɔlɔɔt la vvɔn wa ɛtɔkmɛnɛ tɛ̀ttɛ̀ awaan vvenɛ ɛyɔɔmɛ akama.” 7 Akkaam luppyam ka akama wa ayɛnnɛ tɛ̀ttɛ̀ ulenɛ akama wa ssaawɔ ɔyɔɔwɔnɛ. Kɛyɛn akama annyɔɔng kɛyɔɔnɛ kɛttɛ Ɔlɔɔmɔlɔɔm ɔkɔɔmwɔyɔng tɛ̀ttɛ̀ bwaan ammɛ. Waan ule baang wa abassɛ ɔtakamɛnɛ akama lɛyɔɔ ɔɔ? 8 Usiwɔnɛyɔng akama lɛyɔɔ tɛ̀ttɛ̀ ɔyɔɔnɛ bwaan ammɛ, ba bbwak assiyɔngbong lile, annyɔɔng basɛlɛ ibassɛ balɔɔt. 9 Idedde ayyɔɔt ba vveeng kaang bayɔɔyɛlɛ akama ilɔngɔlɔ itelebɛ, ba attina attɛ Ɔlɔɔmɔlɔɔm wa ulenɛ Dedde ayyɔɔt wa libat vvenɛ itelemɛ gaang gaang ɔlɔk iddu ɔɔ? 10 Idedde ayyɔɔt iyɔɔyɛlɛ akama ka waan ɛkɛtɛ ssup, tɛ̀ttɛ̀ kɔsaapnɛbɛ, kulebɛ bbwak. Ɔzzànga Ɔlɔɔmɔlɔɔm ɔnaangkwɛ ka budoddo ayyɔɔt biini, nkwaaning iyanga etini budoddo ammɛ. 11 Bayɔɔnɛyɛlɛ akama, ɔbalyɛlɛ tɛ̀ttɛ̀ ulenɛ kɔlɔɔk kwa kɔnaangnɛyɛlɛ bukee usiyɛlɛ lɛwaa. Ɔ̀zzànga ulenɛ lɛnaang balɔɔt ba bakɔɔmnɛ kɛyɔɔ akama bakopolobɛ kɔlɔɔk, vvenɛ bayanga lɛsɔɔk a bɔllɛ lɛfal ffɛngɛm. 12 Atɔnɔyɔng inɛngɛnɛngɛ labɔɔk annyɔɔng ka libat annyiyɔng igbeke-gbeke laddu annyɔɔng lakke. 13 Ɔkkaamwɔyɔng assɛyɔng ka ɛtɔk ya bit, nkwaaning ubbu-kikkpɔ annɔ usi kinuka linuka, ɔppwasɛ. 14 Abum ataayɔng ka bɔkaat la balɔɔt ɔkkpɛlɛ. Abum ataayɔng ka kuddu kwa doddo. Ɔlɔɔt wa ɔsɛlɛnɛkwɛ, Uyini baala ɔyɛn. 15 Asan anaangyɔng tɛ̀ttɛ́ ɔlɔɔt ɔlɔk ɔgbata usseke ppyɛɛ Ɔlɔɔmɔlɔɔm. Asan anaangyɔng, afɔngɔyɔng kɛtaa tɛ̀ttɛ̀ lɛsan a kɛssɛ za lɛkkpannɛ, lɛkɔɔm bussi azzɛ lɛggyan kɔlɔɔk la balɔɔt ggbadam. 16 Asan anaangyɔng tɛ̀ttɛ́ ɔlɔɔt ɔlɔk uffu ɔnaang kɔlɔɔk kwa kɔbbɔlnɛ ɔlɔk ɔsɛlɛ luttina tɛ̀ttɛ̀ Esau wa ɔsammɛ bigɛlɛnya ammɛ ufoolo la kazzi. 17 Asanyɔng lɔsan attɛyɔng gaang gaang ɔdɔkɔ ɔggyan ɔttɛ abassɛ ɔnaangmɛ ppyɛɛ, ɔzzànga ppyɛɛ usimɛ lɛbɛlɛ lile, ka usinɛ lɛsan bwa ule ukkwoong ɔkɔɔm ufoolo kwa ulenɛ lɛnaang, mkkpandɔk ɔkɔɔm liyyeen ɔggyan ppyɛɛ. 18 Asiyɔngbong liffu ka kwa attinanɛ atumyɔng lɛttaal a Sinai la lalaak a lɔkɔɔn azzɛ, la kisul la bukee, la kɛffa tɛ̀ttɛ̀ balɔɔt a Israel baffunɛ 19 la lɔsap gwa luffi lɔttanɛ la lɛmmwɔɔl a bɛfɛɛn. Balɔɔt ba bappyeenɛ lɛmmwɔɔl ’zɔng baang ka lɛttanɛ, bakkpenge battɛ tɛ̀ttɛ́ babɛlɛ lɛmmwɔɔl lɛlɔk tɛ̀ttɛ̀ azzɛ baang lippyee. 20 Ka basinɛ lɛbbɔ babee ɔssanga nttama wa ɔttɛnɛ, “Gɔɔ ɛsɛɛn ka kɛmat esinginɛ lɛttaal ’zɔng baang, batɔɔpyɛ lattaal bawwɔɔl.” 21 Biyɛnɛ bisak lɛttala, Moses ɔttɛ, “Abbwɔpɔnɛbong kiffula kɛtɔmmɛ.” 22 Ɔzzànga annyɔɔng affuyɔngbong ka lɛttaal a Zion, ka lɛffɛ Ɔlɔɔmɔlɔɔm a kuddu. Azzɛ lilenɛ Jerusalem wa libat la innɔ bayilabɔtɔɔm Ɔlɔɔmɔlɔɔm ka tɔkɔlɔ. 23 Affuyɔngbong ka laggele kuddu bwaan-ikeeng Ɔlɔɔmɔlɔɔm ba balenɛ lakɔɔl abbɛ lɛkkpɔk ka libat. Affuyɔngbong ka ɛfɛɛn Ɔlɔɔmɔlɔɔm wa ulenɛ ɔkaal a kɛkaal ɔssɛbibit ɔkkpɛlɛ, la liyeeng a banaang a budoddo. 24 Affuyɔngbong ka ɛfɛɛn a Jesus wa utininɛ lutini ufaa kɛbɛtɛ-kɛnnɔ la kɛllɔt a linnyi ammɛ sa libwɔɔlɔnɛ bɛfɛɛn bya bɛttanɛ lɛyyɛɛp bɛtta kwa linnyi Abel. 25 Asan anaangyɔng, afɔngɔyɔng kwa ɔlɔɔt ɔlɔɔknɛ unnyiwɔyɔng kisi lɛgɔpɔlɔ. Balɔɔt ba bafimnɛ kɛgɔpɔlɔ kwa ɔlɔɔt wa unnyinɛ ɔssɛbibit kuttu kwa doddo, basi lɛsɛɛm ka lubbe. Ayyɔɔt ile inaang nang itta ka akkwɛ ulenɛ bɔfɛɛn isinɛ lɛgɔpɔlɔ kwa ɔlɔɔt wa ussinɛ ka libat ɔlɔɔknɛ. 26 Lɛmmwɔɔl ammɛ vvenɛ lɛnnyɛkɛ ɛkpansi ka ɛkɛtɛ yɔng baang. Ɔnaangbong nsekele ɔttɛ, “Vvenɛ nbbal ɛkpansi lɛnnyɛkɛ. Annyɛ keem lissi, vvenɛ nssɛ lɛnnyɛkɛ libat.” 27 Lɛmmwɔɔl za lɛttɛnɛ, “Nbbal.” ɔkkpɛlɛ lɛyɔɔnɛ ppwool ppwool lɛttɛ Ɔlɔɔmɔlɔɔm vvenɛ ɔnnyɛkɛ bɛfɛɛn bya ɔlɔɔmnɛ nkwaaning bɛfɛɛn bya bisinɛ lɛnnyɛkɛ bɛtaa. 28 Iwomomɛyɔng kɛnaang ka ilenɛ itutum lɛyanga ya isinɛ lɛnnyɛkɛ. Ɔwaayɔngyɛlɛ izɔɔm innyiyɔng Ɔlɔɔmɔlɔɔm ka ɛtɔk ya kule kɔsaapmɛ la latele za lɛbaang a lɛbaang. Ɔlɔɔmɔlɔɔm ɔbbwɔpɔyɛlɛ. 29 Ɔlɔɔmɔlɔɔm ayyɔɔt ulenɛ lɔkɔɔn gwa lɔbɛpɛnɛ ɛfɛɛn ka lɔkkwɔɔn.
