HEBREWS 10

1Lafɔɔ balɔɔt a Jews lissi lalenɛ iyɔɔ bɛfɛɛn bya bbwak. Ule gbɔɔ kɛyɔɔ bɛfɛɛn bya bile bɛnaang ka lusso. Banaang kɛssanga lɛtɔm ’zɔng baang zzɔn la kukkpa la kukkpa yoyyoyyo. Lafɔɔ lale lanaang nang lakɔɔm latɔm lanaang balɔɔt ba baffunɛ ka ɛfɛɛn Ɔlɔɔmɔlɔɔm bayyɛɛp baffata? 2Balɔɔt ba batelenɛ Ɔlɔɔmɔlɔɔm bulenɛ lɛyyɛɛp nzang bɛ ba ɔwwɛɛk kwa bubbi bwa banaangnɛ. Gɔɔ nzang kɛnaang a latɔm ɔkkpɛlɛ kittun. 3Nkkpa kɔnaang tɛ̀ttɛ̀ kulenɛ baang, latɔm ’zɔng baang ule kikke balɔɔt bubbi abbɛ la kukkpa la kukkpa. 4Linnyi igɔdɔ la sa ibal ba likkwoong likkpɔlɔ ɔlɔɔt bubbi bwa ɔnaangnɛ. 5Kwakkwɛ baang Christ ɔlɔɔknɛ la Ɔlɔɔmɔlɔɔm ka ɛkɛtɛ ule ka uffunɛ ka vveeng ɔttɛ, “Annɔ ba aggyan kɛnaang a latɔm la bigwugwulu, Ɔzzànga alɔngɔlɔbong kkwɔɔt annyinɛ. 6Wɔ ba kɔsaap ka bafɔɔpnɛ uwɔlɔlɔ ɛsɛɛn ka labun a luzɔɔm. Gɔɔ bigwugwulu bya banaangnɛ bɛzzaa bubbi wa ba bɛsaap. 7Ɔzzánga nlɔɔk nttɛ, ‘Ɔlɔɔmɔlɔɔm yɛnnɛ mung ka nbeenɛ nttɛ nnaang bwa aggyannɛ attɛ nnaang tɛ̀ttɛ̀ balenɛ lɛkkpɔk ka luvva Lafɔɔ tɛ.’ ” 8Ɔlɔɔk ka ikeeng ɔttɛ, “Bigwugwulu la latɔm wɔ ba bɛsaap, gɔɔ kɛfɔɔp isɛɛn ka labun a luzɔɔm la bigwugwulu bya bɛzzaanɛ bubbi.” Ɔlɔɔk ’kwɔng mung tɔttɔt mkkpa ɔsan ɔttɛ bigwugwulu bya banaangnɛ, banaang tɛ̀ttɛ̀ Lafɔɔ lalɔɔknɛ. 9Ɔzzánga ɔlɔɔk ɔttɛ, “Ɔlɔɔmɔlɔɔm, yɛnnɛ mung, nle ka nnaangnɛ bwa aggyannɛ attɛ nnaang tɛ.” Ɔzzánga Ɔlɔɔmɔlɔɔm ɔsam batɔm a latɔm ɔzzɔɔk, ɔsam ufaa lɛtɔm wa Christ ɔppyɛlɛ uloko ka ɛfɛɛn a za ɔtɔm. 10Jesus ka ɔnaangnɛ kwa Ɔlɔɔmɔlɔɔm ɔggyanmɛnɛ ɔttɛ ɔnaang, ɔzzaabong bubbi ayyɔɔt ka bigwugwulu bya ɔnaangnɛ la linnyi ammɛ unnyiyɛlɛ ɔkkpɛlɛ ka ɛkɛtɛ nnyɔn kɔsaal. 11Ɔssɛɛn-a-luzɔɔm a balɔɔt a Jews la vvɔn ɔnaang kɛnaang ’sɔng mung la bigwugwulu ɛkɛtɛ ɔkkpɛlɛ la kɛtɔm la kɛtɔm. Ɔzzànga bigwugwulu ’byɔng baang ba bikkwoong bikkpɔlɔ bubbi bwa ɔlɔɔt ɔnaangnɛ. 12Christ ɔdɔkɔ ɔnaang bigwugwulu bubbi kikkpit ssɔn kɔsaal, bɛyyɛɛp yoyyoyyo, ammɛ umii ɔtaa ka kɔbɔɔk ɛlaabɔɔk Ɔlɔɔmɔlɔɔm. 13Bakang ulenɛ ɛfɛɛn a ɔtaanɛ ɔkat ɔddɔkɔddɔkɔ Ɔlɔɔmɔlɔɔm ɔsam balɔɔt a kɔfɔk ammɛ ulokomɛ ɔtaa using bukkpɔ. 14Ka bigwugwulu ’byɔng baang bbyɔn, ɔnaangbong balɔɔt ba balenɛ bubbi abbɛ lɛkkpɔlɔ bayyɛɛp baffata kɛfal a kɛfal. 15Kuyeeng ɔgbaa kɔlɔɔk kubee la Christ. Ka kɛkɔɔm ɛtɔk, kɔttɛ, 16“Uwɔng ulenɛ kɛbɛtɛ-kɛnnɔ sa nle nnaang la abbɛ ka ussoonɛ, Vvenɛ nssɛɛnbɛ lafɔɔ anaam ka ippyam, nkkpɔkbɛzɛ ka ittina.” 17Ɔzzánga ɔlɔɔk ɔttɛ “Ba nbɛlɛ likke bubbi abbɛ la babbu linaang abbɛ ɛkɛtɛ ɛlɔk.” 18Ulenɛbɛ ’kwɔng lɛsɔɔk, bigwugwulu bya bile bɛkkpɔlɔ balɔɔt bubbi bwa banaangnɛ ba babɛlɛ lɛggyan. 19Ikpana anaam, iyangayɔngbong kufuk kwa kɛmal ka Labun-Ɔlɔɔmɔlɔɔm Bbwak ka ussinɛ ka lubbe gwa Christ ubbenɛ. 20Uwongolobong ufaa ɛtɔk ulokoyɛlɛ, ɛtɔk a kuddu ya ɛsaknɛ ubba lusso Labun-Ɔlɔɔmɔlɔɔm Bbwak. Ɛtɔk ’yɔng baang elenɛ kkwɔɔt ammɛ. 21Iyangayɔngbong ɔssɛɛn-a-luzɔɔm wa lɛbaang wa ulenɛ ka kizzi lɛttɔ ka Ggwoon-Ɔlɔɔmɔlɔɔm. 22Ittɔm ikkɛtɛyɔng Ɔlɔɔmɔlɔɔm la luppyam gwa doddo la kiyila, la luttina gwa ilenɛ ka kɔlɔɔk lɛtta, la kkwɔɔt sa balenɛyɛlɛsɛ lɛzzaa ka bannyi Lɛmmwɔɔl Ɔlɔɔmɔlɔɔm. 23Ikɔɔm kiyila sa iyanganɛ kkpɔk ka kwa ikopolonɛ, ka isannɛ ittɛ Ɔlɔɔmɔlɔɔm vvenɛ uloko nsekele ammɛ. 24Ittinayɔng kwa ɔlɔɔt la vvɔn, iyaamyɔng ɔlɔɔt la vvɔn, iyɔɔyɔng kɛsaap ka kɛnaang a budoddo. 25Tɛ̀ttɛ́ ikkyaayɔng eleme ya kiduda ɛfɛɛn kkwɔn ɛkɛtɛ ɔkkpɛlɛ ifɔngɔyɔng tɛ̀ttɛ̀ balɔɔt balɔk balenɛ lɛnaang. Lutini ’gwɔng ibba ɔlɔɔt la vvɔn bikɔɔm, gaang gaang ka asannɛ attɛyɔng Kɛtɔm-Uyini ule ka uffunɛ kɛkkɛtɛbong. 26Bigwugwulu bɛlɔk ba babɛlɛ lile bya bile bɛkkpɔlɔ bubbi ayyɔɔt, ikongonɛ lukongo inaang bubbi ka balenɛyɛlɛ lɔkkwɔɔn lɛbwɔɔlɔ. 27Lutini ’gwɔng, kwa kussekenɛ ule ka kwa kule kɔnaang kɔbwɔpɔnɛyɛlɛ: Akkwɛ kulenɛ kwa kɛkaal la lɔkɔɔn gwa lɔbbɔlnɛ, gwa lule lɔbɛpɛ balɔɔt ba bafimnɛ kwa Ɔlɔɔmɔlɔɔm. 28Ɔlɔɔt duu wa ufimnɛ kwa lafɔɔ Moses vvenɛ ubbe, kibbe-lɛttɔ ba kile, balɔɔt baffa ɔlɔk bakkyaat ba balenɛ ittɛɛsɛ annɔ, balenɛ lɛttɛ kɔbbɔlwɔbong. 29Ɔlɔɔt wa ufimnɛ Waan-Ɔlɔɔmɔlɔɔm kule kɔbbɔlmɛ nang? Ɔlɔɔt wa ɔtɔknɛ linnyi kɛbɛtɛ kɛnnɔ Ɔlɔɔmɔlɔɔm tɛ̀ttɛ̀ bɔfɛɛn bwa gbɔɔ bɛɛ? Kule kɔbbɔlmɛ nang? Ɔlɔɔt wa ɔkpɛnnɛ Kuyeeng kwa kɔsɔɔknɛ bubbi bɛɛ? Kule kɔbbɔlmɛ nang? Attina kɛssanga akama wa ule ɔyɛn. 30Isan mung ɔlɔɔt wa ɔlɔɔknɛ ɔttɛ, “Vvenɛ npipili, vvenɛ nppyɛlɛbɛ.” la ɔlɔɔt wa ɔlɔɔknɛ ɔttɛ, “Uyini vvenɛ ɔkaal kɛkaal a balɔɔt ammɛ.” 31Ule kɔlɔɔk kwa kɔbbɔlnɛ lɔbbɔl kɔsak ka attɔnɛ ka kɔlɔɔk Ɔlɔɔmɔlɔɔm a kuddu. 32Akke tɛ̀ttɛ̀ kɔdɔkɔnɛ kɔnaangwɔyɔng ka isimi. Ka bɛtɔm bya isimi ka buppwolo Ɔlɔɔmɔlɔɔm bulenɛ lippwolo buvvoongwɔyɔng, ayɛnyɔng akama ka lilɔɔk ggbadam, ɔzzànga gɔɔ akama ’wɔng baang usiwɔyɔng lɛbɛtɛ. 33Bakpɛnwɔyɔng ɛkɛtɛ ɛlɔk kkpal ka lusso balɔɔt, banaangwɔyɔng bɛfɛɛn bya bbɔlbbɔl. Ɔzzànga abamayɔng kɛmal tɔttɔt ka kɛkaan a balɔɔt ba bakɔɔmnɛbɛ bbɔlbbɔl. 34Atulyɔng akama balɔɔt igbakkɔpɔ ayɛnyɔng. Ka bannaawɔnɛyɔng bɛfɛɛn ɔkkpɛlɛ, ayɛnyɔng akama la laggele ka asannɛ attɛyɔng atii ka ale ayangayɔng bɔfɛɛn bwa buttanɛ lɛyyɛɛp kɛfal a kɛfal. 35Tɛ̀ttɛ́ akkyaayɔng ntɛtɛ afɔngɔyɔng. Kɔbɛtɛwɔyɔng, lɛsɔɔk za lɛbaang lile baang ka akkwɛ. 36Abbeyɔng luppyam anaangyɔng kɛnaang Ɔlɔɔmɔlɔɔm, nkwaaning atɔkyɔng bwa ulenɛ lisekele. 37Luvva Ɔlɔɔmɔlɔɔm lɔttɛ, “Ɛkɛtɛ ɛmmɛnɛ ssup, ammɛ wa ulenɛ ka kiffu, ɛkɛtɛ baala ɔbɛpɛ. 38Balɔɔt anaam ba doddo vvenɛ bayanga kiyila baddu, ɔzzànga ɔlɔɔt ɔlɔk ɔbbalnɛ kiyila lisi lɛyanga baala kɔsaapnɛ la ammɛ.” 39Ayyɔɔt balɔɔt ba iyanganɛ kiyila kkpal ikkyaa ifɔngɔ ile lɛtaak lissi, lutini ’gwɔng ikɔɔm kiyila kkpɔk kɛkkalayɛlɛ.

will be added

X\