HEBREWS 1

1Ka isimi ka isimi, Ɔlɔɔmɔlɔɔm ɔssɛ la bappyee-kutolo ammɛ utolo kutolo unnyi idedde ayyɔɔt ya iyɛddɛ-iyɛddɛ bikkpit ggbadam ka itɔk ppwap. 2Ɔzzanga ka bɛtɔm a lakpeke ’byɔng mung Ɔlɔɔmɔlɔɔm ɔssɛbong la Awaan ɔlɔɔk unnyiyɛlɛ. Ammɛ ulenɛ ɔlɔɔt wa Ɔlɔɔmɔlɔɔm ɔkɔɔmnɛ ɔlɔɔm vveengodde. Ammɛ ulenɛ ɔlɔɔt wa Ɔlɔɔmɔlɔɔm ulenɛ lɛsanga ɔttɛ ɔtɔk bɛfɛɛn ɔkkpɛlɛ ɔyanga ka lakpeke. 3Uwongolo la buppwolo lakke Ɔlɔɔmɔlɔɔm. Ule tɛ̀ttɛ̀ Ɔlɔɔmɔlɔɔm biini bbwak. Lakke lɛmmwɔɔl ammɛ labwɔɔpnɛ vveengodde laloko. Ulenɛ balɔɔt bubbi abbɛ lɛkkpɔlɔ, umii ɔtaa ka libat ka kɔbɔɔk-ɛlaabɔɔk Ɔlɔɔmɔlɔɔm wa ɔttanɛ lakke ɔkkpɛlɛ. 4Ɔlɔɔmɔlɔɔm ɔkkwɔɔ Awaan ɔttɛ ɔtta Bayilabɔtɔɔm ammɛ liggbenge, tɛ̀ttɛ̀ lɛkɔɔl sa unnyimɛnɛ lɛttanɛ za abbɛ. 5Ɔlɔɔmɔlɔɔm ba ɔtaka ɔlɔɔk la uyilabɔtɔɔm ammɛ ɔlɔk ɔttɛ, “Annɔ Waan anaam, mmwɔɔn anaam nssekenɛ Ssaawɔ.” Gɔɔ vvenɛ ule la uyilabɔtɔɔm ammɛ ɔlɔk lɛlɔɔk ɔttɛ, “Vvenɛ nle Abassɛ ammɛ, ammɛ ule Waan anaam.” 6Ka ɛkɛtɛ Ɔlɔɔmɔlɔɔm uttinanɛ kɛtɔɔm Awaan uffu ka vveengodde, ɔlɔɔk ’kwɔng ɔgbaa, ɔttɛ, “Bayilabɔtɔɔm Ɔlɔɔmɔlɔɔm ɔkkpɛlɛ bazɔɔm bannyi Awaan ’wɔng baang.” 7Uwɔng ulenɛ kwa Ɔlɔɔmɔlɔɔm ɔlɔɔknɛ utum bayilabɔtɔɔm Ammɛ, ɔttɛ, “Ɔlɔɔmɔlɔɔm ɔnaang bayilabɔtɔɔm Ammɛ bataa tɛ̀ttɛ̀ kɛffa, Ɔnaang ibɔɔyi Ammɛ itaa tɛ́ttɛ́ lalaak a lɔkɔɔn.” 8Ka kwa kutumnɛ Awaan, Ɔlɔɔmɔlɔɔm ɔttɛ; “Mkkpa kɔnaang, Oo Dedde Ɔlɔɔmɔlɔɔm, kibeet annɔ vvenɛ kittumu ka kɛfal a kɛfal. Akɔɔmbong itutum annɔ doddo. 9Kɔlɔɔk kwa doddo kɔsaapwɔnɛ, kwa bbɔl bbɔl wɔba kɔsaap. Kwakkwɛ Ɔlɔɔmɔlɔɔm annɔ ɔsangawɔnɛ unnyi laggele za latele ɔtta bannyɔɔng ɔkkpɛlɛ.” 10Ɔbbal lɛlɔɔk ɔttɛ, “Uyini, annɔ alɔɔmnɛ ɛkpansi ka ussinɛ ka lutte. Akɔɔm labɔɔk annɔ anaang libat. 11Vvenɛ bɛfɛɛn ’byɔng baang ɔkkpɛlɛ bɛtaak ussekewɔ annɔ ataa. Ɔkkpɛlɛ abbyɛ vvenɛ bɛkkpɛɛm tɛ̀ttɛ̀ iwɔkɔlɔ. 12Vvenɛ akkɔtbyɛ tɛ̀ttɛ̀ uwɔkɔlɔ. Vvenɛ bifoolo tɛ̀ttɛ̀ iwɔkɔlɔ. Ɔzzànga annɔ keem baala afoolo. Baala akkpɛɛm.” 13Ɔlɔɔmɔlɔɔm ba ɔtaka ɔlɔɔk la Uyilabɔtɔɔm ammɛ ɔlɔk ɔttɛ, “Taa mung ka kɔbɔɔk ɛlaabɔɔk anaam, ɔddɔkɔddɔkɔ nloko balɔɔt a kɔfɔk annɔ bassekewɔ utele-bukkpɔ.” 14Babang balenɛ bayilabɔtɔɔm Ɔlɔɔmɔlɔɔm? Abbɛ balenɛ liyeeng sa litelenɛ Ɔlɔɔmɔlɔɔm. Ɔtɔɔmsɛ ɔttɛ liffu littele balɔɔt ba bale ka batɔknɛ kuddu ka Ɔlɔɔmɔlɔɔm.

will be added

X\