GALATIANS 5

1Kɛtta ka kɔlɔɔk ulenɛ bɔfɛɛn bwa iyanganɛ. Christ ɔsangabongyɛlɛ ka kɔlɔɔk. Abeeyɔng tɛ̀ttɛ̀ balɔɔt ba balenɛ ka kɔlɔɔk lɛtta, tɛ̀ttɛ́ abɛlɛwɔyɔng kɛyɔɔng lɛfɔngɔ abbalyɔng babili lile. 2Gɔpɔlɔyɔng! Anaam Paul nbwɔɔlɔwɔnɛyɔng ’kwɔng: Afɔngɔnɛ babɛkɛwɔyɔng lataa, nzang Christ ka bulɔk mɛyɔng ba atɔkyɔng kpong-kpong. 3Nbbalwɔyɔng lɛttama! Ɔlɔɔt duu wa batutmɛnɛ uyila ɔzza lɛtaa usseke wa utelenɛ Lafɔɔ ɔkkpɛlɛ. 4Annyɔɔng balɔɔt balɔk ba abumnɛ attɛ ataayɔng bbwak la Ɔlɔɔmɔlɔɔm ka atelenɛyɔng Lafɔɔ, azzawɔyɔngbong kɛyɔɔng assekeyɔng Christ, attayɔng ka ppyɛɛ Ɔlɔɔmɔlɔɔm. 5Ka kwa ayyɔɔt, luttina ayyɔɔt lule lɔttɛ Ɔlɔɔmɔlɔɔm vvenɛ ulokoyɛlɛ bbwak la ammɛ. Uwɔng mung ulenɛ bwa ikatnɛ ka lakke Kuyeeng-Ɔlɔɔmɔlɔɔm za lalenɛ ka kɛnaang ka kiyila ayyɔɔt. 6Ka ilenɛ ka bɔkaat la Christ Jesus, kɛbɛkɛ lɛtaa la kisi lɛtaa lɛbɛkɛ buubuu ba bile. Kwa kɔttanɛ ulenɛ kiyila sa kɛssɛnɛ la kɛsaap. 7Adɔkɔ anaangyɔng doddo. Nnyinɔɔng ɔnaangwɔnɛyɔng asiyɔng lɔkkwɔɔn a kɔlɔɔk lɛbɛlɛ litele? Ɔlɔɔt ’wɔng baang ɔdɔkɔ ɔfɛɛtwɔyɔng nang? 8Ɔlɔɔmɔlɔɔm wa ɔkkwɔɔwɔnɛyɔng lissi ɔnaangnɛ kwɛ. 9Kɔtaa tɛ̀ttɛ̀ balɔɔknɛ battɛ, “Bwaan-izuku a yeast ssup ning bɛnaangnɛ ugɔngɔ a brɛɛd ɔkkpɛlɛ ammɛ utum.” 10Ɔzzànga ntii baang ka nttinanɛ ntumwɔyɔng. Bɔkaat ayyɔɔt la Christ bunaangnɛnɛ nyanga kiyila nttɛ baala asikiliyɔng luttina. Ɔzzànga ɔlɔɔt ’wɔng baang wa ɔggyanwɔnɛyɔng kisikili luttina, mkkpa ule ɔlɔɔt wa ule, wa ule vvenɛ Ɔlɔɔmɔlɔɔm ɔyɔɔmɛ akama. 11Ikpana anaam, ka kwa anaam, ntiinɛ baang ka nbwɔɔlɔnɛ nttɛ kɛzza lɛtaa kɛyyɛɛppɔyyɛɛp, akama bayɔɔnɛ kwa ’bɔng? Nkwɔng baang budɔkɔnɛ ka lɔkkwɔɔn, nzang lukopolo anaam gwa lutumnɛ Cross a Christ kɔlɔɔk baala lɔggyan. 12Nggyan nttɛ balɔɔt ba baggyanwɔnɛyɔng kɛbɛpɛ ippyam baang ɔkkaambɛ. Battɛnɛ bale ka bafaatnɛ idakɔp ya abbɛ kɛyɔɔng, bafaat. 13Ikpana anaam ka kwa annyɔɔng, badɔkɔ bakkwɔɔwɔyɔng battɛ attayɔng ka kɔlɔɔk. Ɔzzànga tɛ̀ttɛ́ afɔngɔyɔng kɛtta ka kɔlɔɔk ’sɔng mung kile bɔfɛɛn a luteele gwa afɔngɔnɛyɔng iyyɛɛp a vveeng ikkwɔɔwɔyɔng. Lutini ’gwɔng afɔngɔyɔng kɛsaap kɛnaangwɔyɔng ateleyɔng wannyɔɔng. 14Lafɔɔ ɔkkpɛlɛ azzɛ lale ka tɔkɔlɔ lifɔɔ zzɔn za lɛttɛnɛ, “Wannyɔɔng ɔsaapwɔ tɛ̀ttɛ̀ asaapwɔnɛ kɛyɔɔng.” 15Ɔzzànga anaangnɛyɔng tɛ̀ttɛ̀ isɛɛn ka kɛmat, addopoyɔng bannyɔɔng, akatyɔng nzang vvenɛ awwɔɔlyɔng ɔlɔɔt la vvɔn ɔkkpɛlɛ. 16Nkwɔng kulenɛ kwa nlɔɔknɛ nttɛ afɔngɔyɔng Kuyeeng-Ɔlɔɔmɔlɔɔm kɔkɔɔm lafal annyɔɔng. Tɛ̀ttɛ́ anaangyɔng bɛfɛɛn bya lafal annyɔɔng laggyannɛ. 17Kwa lɛfal ɔlɔɔt lɛggyannɛ, Kuyeeng-Ɔlɔɔmɔlɔɔm ba kɔggyan. Kwa Kuyeeng-Ɔlɔɔmɔlɔɔm kɔggyannɛ, lɛfal ɔlɔɔt ba lɛggyan. Bɛfɛɛn ’byɔng baang bɛffa bile ka kɔfɔk. Ning ulenɛ kɛttɛ tɛ̀ttɛ́ anaangyɔng bwa lɛfal annyɔɔng laggyannɛ lɛttɛ anaangyɔng. 18Ulenɛ Kuyeeng-Ɔlɔɔmɔlɔɔm kɔkɔɔmwɔnɛyɔng, nzang annyɔɔng babili Lafɔɔ lissi. 19Kɔlɔɔk kwa lɛfal ɔlɔɔt lɛnaangnɛ kule kkpelegedee, lɛyɔɔzɛ kɛyɔɔng ka ɛtɔk a kɛssɛ-kɛzak la linaang a isɛɛn a kɛmat. 20Lɛyɔɔzɛ kɛyɔɔng ka ɛtɔk a kɛzɔɔm kinnyi ilat la litaan. Balɔɔt basseke lifɔk a lifɔk. Bakɔɔm ballu, banaang babbɛ ileep, kɔkɔɔm kutunbɛ la kɛnaang a lilɔɔk ka lakke. Babɛngɛlɛbɛ kɛyɔɔng basseke lakup lakup. 21Bale banaang-a-luleep. bavva batak babimi. Bamini la bwanavva kyaakyaa. Ɔzzànga gedegede mung nbbalwɔyɔngbong lɛttama tɛ̀ttɛ̀ ndɔkɔnɛ nttamawɔyɔng. Balɔɔt ba banaangnɛ bɛfɛɛn ’byɔng baang ba Itutum-Ɔlɔɔmɔlɔɔm basibong lile. 22Ɔzzànga Kuyeeng-Ɔlɔɔmɔlɔɔm kunnyiyɛlɛ kɛsaap la laggele la bɔkaat, la kibbe luppyam, la kibbe lɛttɔ, la budoddo kɛyyɛɛp a bɛnaang. 23La bukee-waan ɔbɛtɛ la kɛkɔɔm a kɛyɔɔng. Lafɔɔ za lattɛnɛ tɛ̀ttɛ́ anaang bɛfɛɛn ’byɔng bya Kuyeeng-Ɔlɔɔmɔlɔɔm kunnyinɛ ba lale. 24Balɔɔt ba balenɛ ba Christ Jesus basambong lafal abbɛ la ittina abbɛ ya ibbɔlnɛ bannyi lubbe. 25Kuyeeng-Ɔlɔɔmɔlɔɔm kunnyibongyɛlɛ lafal. Mkkpa kɔnaang vvenɛ kɔkɔɔm lafal ayyɔɔt. 26Tɛ̀ttɛ́ inaang bisese ka nakanaka, ɔlɔk vvenɛ inaang kwa kɔssɔpnɛ wayyɔɔt, ɔlɔk vvenɛ inaang wayyɔɔt luleep.

will be added

X\