GALATIANS 4

1Nttɛ waanawalam duu wa ule uzzi kazzi kullu bɛfɛɛn abassɛ, bale bakɔɔmmɛ tɛ̀ttɛ̀ ubili ka utiinɛ waan, mkkpa bɛfɛɛn ɔkkpɛlɛ bile bya ammɛ. 2Ka utiinɛ waan, balɔɔt bale baang ba bappyɛɛkmɛnɛ, banaang bɛfɛɛn bakkalamɛ ɔddɔkɔddɔkɔ ɔffɔ ka ɛkɛtɛ ya abassɛ ɔlɔɔknɛ uloko. 3Ayyɔɔt ɔgbaa idɔkɔ ile babili ilat ikɔɔmnɛ ka vveengodde, tɛ́ttɛ́ uffu ɔffɔ ka ɛkɛtɛ isannɛ Ɔlɔɔmɔlɔɔm ka bbwak. 4Ɔzzánga ɛkɛtɛ ya bbwak ɛffɔnɛ, Ebinukkpaapi ɛtɔɔm Waan annyɛ uffu tɛ̀ttɛ̀ waan wa ɔlɔɔt ɔmaatnɛ, ɔtaa tɛ̀ttɛ̀ Lafɔɔ balɔɔt a Jews lalɔɔknɛ. 5Lattɛ uffu ɔttɛ ɔkkala balɔɔt ba balenɛ ka Lafɔɔ lɛttɔ, nkwaaning ɔkkpɛlɛ izzangayɔng bwaan-Ɔlɔɔmɔlɔɔm. 6Ka ɛggyannɛ ɛttɛ isan ittɛ annyɔɔng bwaan annyɛ, Ebinukkpaapi ɛtɔɔm Kuyeeng a Waan annyɛ gwa lɔkkwanɛ lɔttɛ, “Dedde, Dedde anaam” luffu ka ippyam ayyɔɔt. 7Kwakkwɛ baang asinɛyɔng babili lɛbɛlɛ lile, assekeyɔng bwaan-Ɔlɔɔmɔlɔɔm. Ka alenɛyɔng bwaan annyɛ, Ebinukkpaapi vvenɛ ennyiwɔyɔng bɛfɛɛn ɔkkpɛlɛ bya ɛyanganɛ eloko bwɔɔn annyɛ. 8Ka isimi ka isimi, Ɔlɔɔmɔlɔɔm ba asanyɔng. Kwakkwɛ adɔkɔnɛyɔng ka bubili bɛfɛɛn bya bisinɛ bya Ɔlɔɔmɔlɔɔm lile. 9Ngkka gedegede mung ka alenɛyɔng Ɔlɔɔmɔlɔɔm lɛsan (Nlɔɔk nttɛ ka Ɔlɔɔmɔlɔɔm ulewɔnɛyɔng lɛsan) mbɔng ale ka appyɛɛnɛ anaangwɔyɔng kɛyɔɔng babili a iwikiwiki liyeeng ’sɔng baang tɛ̀ttɛ̀ adɔkɔnɛ aleyɔng? Bubili assɛ abbalyɔng mbɔng lɛggyan? 10Ateleyɔng zzeen ka bɛtɔm la ittina la laggbeel a kukkpa la likkpa biini. 11Luppyam lɔzzanɛ lɔzza lɔsak kwa annyɔɔng. Ɔzzánga kɛnaang anaam nnaangnɛ kɛttɔbong gbɔɔ kɛtaak ɔɔ? 12Nkkpengewɔyɔng lukkpenge, ikpana anaam, anaangyɔng tɛ̀ttɛ̀ anaam nnaangnɛ. Uvve kaang anaam nle tɛ̀ttɛ̀ annyɔɔng. Bulɔk bwa bubbɔlnɛ ba ataka anaangyɔng. 13Akke asan attɛyɔng ɔdɔkɔ iffaak inaangnɛnɛ nkopolowɔyɔng kuttu-budoddo ka ikeeng ikeeng tɛ! 14Ɔzzànga asinɛyɔng lɛggba, gɔɔ kɛwɔlɔnɛ gbɔɔ mkkpa iffaak anaam idɔkɔ ile ya ballɛwɔnɛyɔng. Lutini ’gwɔng atɔknɛyɔng tɛ̀ttɛ̀ butɔknɛ uyilabɔtɔɔm Ɔlɔɔmɔlɔɔm. Atɔknɛyɔng tɛ̀ttɛ̀ butɔknɛyɔng Christ Jesus. 15Adɔkɔ aleyɔng ka laggele gaang gaang, ’bɔng bunaangnɛ? Nkkwoong mung nlɔɔk nttɛ bukkwoongnɛ asangayɔng zzeen annyɔɔng nzang asangayɔngbong annyinɛyɔng. 16Ngkka mung ba ntaka nsseke ɔlɔɔt kɔfɔk annyɔɔng ka nbwɔɔlɔwɔnɛyɔng lɔkkwɔɔn a kɔlɔɔk ɔɔ? 17Balɔɔt ’bɔng baang bayɔɔ kɛsaap gaang gaang ka kkwɔɔt annyɔɔng. Ɔzzànga ittina abbɛ ba iyyɛɛp. Baggyan battɛ basamwɔyɔng bagbata bassekenɛ, ɔkkɔɔnɛ kɔssɛ kɔbɛtɛwɔyɔng kwa abbɛ tɛ̀ttɛ̀ abbɛ kɔbɛtɛnɛbɛ kwa annyɔɔng. 18Kɔyyɛɛp mung ka ayanganɛyɔng ittina ya doddo atumyɔng kɔlɔɔk kwa kɔyyɛɛpnɛ. Nkwɔng mung kulenɛ bbwak kɔ̀yyɛ́ɛ̀p ɛkɛtɛ ɔkkpɛlɛ. Ɛkɛtɛ ya nlenɛ la annyɔɔng keem lissi. 19Bwaan anaam! Assɔpnɛyɔng tɛ̀ttɛ̀ ɔssɔpnɛ wanavva wa ulenɛ ka kɛppwɔlɔ imala. Gedegede mung nttina uttina ntumwɔyɔng tɛ̀ttɛ̀ abakka ɔlɔɔt uttinanɛ utum waan ammɛ ka ɛkɛtɛ lɛmaat. Akama ɔnaangnɛ gaang ntumwɔyɔng tɔttɔt ɔffɔ ɛkɛtɛ atɔknɛyɔng lɛfal a Christ assɛɛnyɔng ka luppyam. 20Bɔng baang nsinɛ la annyɔɔng lile gedegede mung ɔlɔk nfoolo eleme ɛlɔk nppyɛɛkwɔyɔng. Nttina kwa annyɔɔng gaang gaang. 21Fɔngɔbong nbapwɔyɔng annyɔɔng ba attɛnɛ aleyɔng ba Lafɔɔ: Ba ataka appyeeyɔng bwa Lafɔɔ lalɔɔknɛ ɔɔ? 22Lafɔɔ lalɔɔk lattɛ Abraham ɔyanga bwɔɔn baffa. Vvɔn ubili ammɛ wa wanavva ɔmaatnɛ. Wa vvɔn wanavva ammɛ wa usinɛ ubili lile ɔmaatnɛ. 23Waan ammɛ wa ubili ɔmaatnɛ bamaatmɛ tɛ̀ttɛ̀ bamaatnɛ bwɔɔn ɔkkpɛlɛ. Ɔzzànga waan ammɛ wa wanavva ammɛ wa usinɛ ubili lile ɔmaatnɛ, bamaatmɛ ka nsekele wa Ebinukkpaapi elene lɛnaang. 24Nkwɔng mung kulenɛ ifɛɛt: Bwanavva ’bɔng baang baffa balenɛ isekele iffa. Wanavva wa ulenɛ ubili ɔmaat bwɔɔn ulenɛ Hagar. Ammɛ ɔtaanɛ tɛ̀ttɛ̀ kɛbɛtɛ-kɛnnɔ sa Ɔlɔɔmɔlɔɔm ɔbɛtɛnɛ ka lɛttaal a Sinai. 25Hagar, wa ɔtaanɛ tɛ̀ttɛ̀ lɛttaal a Sinai za ka Arabia, ulenɛ lɛffɛ a Jerusalem gedegede mung. Kwakkwɛ lɛffɛ ’zɔng baang ɔkkpɛlɛ balenɛ babili. 26Ɔzzànga Jerusalem wa ulenɛ ka libat ka bubili ba ule. Ammɛ ulenɛ ɛnɛ ayyɔɔt. 27Luvva-Ɔlɔɔmɔlɔɔm lɔttɛ, “Wanavva wa ɔtakanɛ bwɔɔn lɛmaat uggele. Abungu la laggele ka atakanɛ bɔssɔp a lɛmaat lippyee. Wanavva wa ulenɛ buyya vvenɛ ɔmaat bwɔɔn ɔgbaa ɔtta wanavva wa ulenɛ ka ssala walam ka ullenɛ.” 28Gedegede mung, ikpana anaam, assekeyɔng bwɔɔn Ɔlɔɔmɔlɔɔm tɛ̀ttɛ̀ Isaac ɔdɔkɔnɛ, ɔssanga ka nsekele wa Ɔlɔɔmɔlɔɔm ulenɛ lɛnaang. 29Ka ɛkɛtɛ ’yɔng baang, waan wa badɔkɔnɛ bamaat tɛ̀ttɛ̀ bamaatnɛ bwɔɔn ɔkkpɛlɛ ɔyɔɔ wa bamaatnɛ ka Kuyeeng-Ɔlɔɔmɔlɔɔm akama. Kule kɛssanga ssɔn gedegede mung. 30Mung luvva-Ɔlɔɔmɔlɔɔm lɔlɔɔk nang? Lɔlɔɔk lɔttɛ, “Asamyɔng ubili wa wanavva la waan ammɛ azzɔɔkyɔng. Waan wa ubili wa ulenɛ wanavva ɔmaatnɛ, bɛfɛɛn abassɛ baala utul uzzi la waan wa abakka ammɛ usinɛ ubili lile.” 31Ikpana anaam, ayyɔɔt bwɔɔn a wanavva ubili ba ile. Wanavva wa usinɛ ubili lile ɔmaatnɛyɛlɛ.

will be added

X\