1 Annyɔɔng bazingizingi balɔɔt a Galatia ’bɔng! Nyinɛ ɔmanawɔnɛyɔng? Ayɛnyɔngbong Jesus Christ kkpelegedee ka zzeen annyɔɔng ka ubbenɛ ka Cross! 2 Abwɔɔlɔnɛyɔng kɔlɔɔk ’kwɔng mung kkwɔn. Adɔkɔ atɔkyɔng Kuyeeng-Ɔlɔɔmɔlɔɔm ka anaangnɛyɔng bwa Lafɔɔ laggyannɛ faa ka appyeenɛyɔng, ayilayɔng kwa kuttu-budoddo Ɔlɔɔmɔlɔɔm kɔlɔɔknɛ? 3 Anaang nang anaangnɛyɔng kizingizingi ning! Adɔkɔ atteyɔng la Kuyeeng-Ɔlɔɔmɔlɔɔm, mung aggyan attɛ appyɛɛ akɔɔmyɔng lakke za annyɔɔng akeeleyɔng ɔɔ? 4 Kwa alenɛyɔng lɛsan ɔkkpɛlɛ mung ka bulɔk ba kɔffɔ ɔɔ? Ka lɔkkwɔɔn, kɔffɔ mung. 5 Mung Ɔlɔɔmɔlɔɔm unnyiwɔyɔng Kuyeeng ammɛ, ɔnaang bɛmaanga ka annyɔɔng ka anaangnɛyɔng kwa Lafɔɔ laggyannɛ faa ka appyeenɛyɔng, ayilayɔng kuttu-budoddo ammɛ? 6 Attinayɔng kwa luvva-Ɔlɔɔmɔlɔɔm lɔlɔɔknɛ lutum Abraham. Lɔttɛ, “Uyila kwa Ɔlɔɔmɔlɔɔm. Kussi kwakkwɛ baang Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak.” 7 Asan attɛyɔng balɔɔt ba bayanganɛ kiyila balenɛ balɔɔt ba kikkwu Abraham ba lɔkkwɔɔn. 8 Luvva-Ɔlɔɔmɔlɔɔm lɔggba lɛyɛn lɔlɔɔk lɔttɛ Ɔlɔɔmɔlɔɔm vvenɛ uloko Ikanakana bbwak la ammɛ biini ka kiyila. Kwakkwɛ luvva Ɔlɔɔmɔlɔɔm lɔggbanɛ Abraham Kuttu-Budoddo Ɔlɔɔmɔlɔɔm lɛbwɔɔlɔ tɛ́ttɛ́ ɛkɛtɛ ɛffɔ. Lɔttɛ, “Kule kussi ka lɛttɔ annɔ, Ɔlɔɔmɔlɔɔm ɔnaang Ɔssɛbibit ɔkkpɛlɛ ppyɛɛ.” 9 Abraham uyila kwa Ɔlɔɔmɔlɔɔm, Ɔlɔɔmɔlɔɔm ɔnaangmɛ ppyɛɛ. Balɔɔt ɔkkpɛlɛ bayilanɛ kwa Ɔlɔɔmɔlɔɔm, vvenɛ ɔssɛ ɔnaangbɛ ppyɛɛ tɛ̀ttɛ̀ Abraham. 10 Balɔɔt ba kɔbɛtɛnɛbɛ ka kitele lafɔɔ bale ka akama. Luvva-Ɔlɔɔmɔlɔɔm lɔttɛ, “Ɔlɔɔt duu wa usinɛ kwa bakkpɔknɛ ka luvva Lafɔɔ Ɔlɔɔmɔlɔɔm litele vvenɛ ɔyɛn akama.” 11 Kutii ppwool, Ɔlɔɔt wa ɔtaanɛ bbwak la Ɔlɔɔmɔlɔɔm ka ulokonɛ Lafɔɔ ba ule. Luvva-Ɔlɔɔmɔlɔɔm lɔlɔɔkbong lɔttɛ, “Ɔlɔɔt duu wa ɔtaanɛ bbwak la Ɔlɔɔmɔlɔɔm ka ɔyanganɛ kiyila vvenɛ uddu.” 12 Ɔzzànga Lafɔɔ ka kiyila ba lale. Lutini ’gwɔng lale tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔt duu wa ɔnaangnɛ duu bwa Lafɔɔ lalɔɔknɛ ule uddu kwa azzɛ.” 13 Ɔzzànga Christ ɔsangabongyɛlɛ ka nzɔɔm wa Lafɔɔ lafeenɛyɛlɛ (ka ɔyɛnnɛ akama ka lɛttɔ ayyɔɔt) tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔt wa bazzengemɛnɛ ka kɛssɛ ɔttɔbong ka nzɔɔm Ɔlɔɔmɔlɔɔm.” 14 Christ ɔnaang ’kwɔng nkwaaning ppyɛɛ wa Ɔlɔɔmɔlɔɔm ɔttɛnɛ vvenɛ ɔnaang Abraham, ɔssɛ ɔnaang Ikanakana ka lɛttɔ a Jesus Christ, nkwaaning ikɔɔm kiyila iyanga Kuyeeng kwa Ɔlɔɔmɔlɔɔm usekelenɛ. 15 Ikpana anaam nle ka nkɔɔmnɛ kɔlɔɔk kwa kɔnaangnɛ la kɛtɔm la kɛtɔm nbwɔɔlɔwɔyɔng. Balɔɔt baffa bayilanɛ ka kɔlɔɔk, babɛtɛ kɛnnɔ, ɔlɔɔt wa ukkwoongnɛ ɔbɛpɛ kɛbɛtɛ kɛnnɔ ’sɔng baang ba ɔbɛlɛ lile, gɔɔ kɛgbaa bɔfɛɛn ka assɛ. 16 Ebinukkpaapi ɛnaang nsekele la Abraham la ɔlɔɔt a kikkwu ammɛ. Luvva-Ɔlɔɔmɔlɔɔm ba lɔlɔɔk lɔttɛ, “Balɔɔt a kikkwu annɔ.” Ning baang ulenɛ kɛttɛ la balɔɔt ggbadam. Lɔlɔɔk lɔttɛ, “La ɔlɔɔt a kikkwu annɔ” ning baang ulenɛ ɔlɔɔt vvɔn keem; ammɛ ulenɛ Christ. 17 Kwa nlɔɔknɛ ulenɛ ’kwɔng: Ebinukkpaapi ɛbɛtɛ kɛnnɔ la Abraham ɛttɛ vvenɛ ɛnaang kwa ɛlɔɔknɛ. Lafɔɔ za lassinɛ ka nnɔ la lɔlɔp la likkpa zzɔɔp baala lakkwong labɛpɛ kɛbɛtɛ-kɛnnɔ sa Ebinukkpaapi elenɛ lɛbɛtɛ. 18 Bɔfɛɛn bwa Ebinukkpaapi ennyinɛ bussinɛ ka Lafɔɔ, busibong ka nsekele Ebinukkpaapi lɛbɛlɛ lissi. Kɔdɔkɔ ning baang Ebinukkpaapi ɛnaang nsekele ’wɔng baang ɛtɔk ennyi Abraham. 19 Lafɔɔ ladɔkɔ laggyan ’bɔng? Bassɛɛn Lafɔɔ nkwaaning basan kɔlɔɔk kwa kulenɛ ubbu kɔlɔɔk. Bassɛɛn battɛ lataa Lafɔɔ ka ɛkɛtɛ ɔlɔɔt a kikkwu Abraham wa Ebinukkpaapi ɛnaangnɛ nsekele kwa ammɛ ule uffu. Ebinukkpaapi ɛsam Lafɔɔ ennyi bayilabɔtɔɔm annyɛ. Bayilabɔtɔɔm Ebinukkpaapi basamzɛ bafee Moses kuttɔɔk. Ammɛ ɔtaa tɛ̀ttɛ̀ ɔssɛ-bukkpɔ. 20 Ɔzzànga ɔssɛ-bukkpɔ baala ka kinnyi nsekele ka ulenɛ ɔlɔɔt vvɔn, Ebinukkpaapi ele nnyɔn keem. 21 Baang attina attɛ Lafɔɔ kutunzɛ lutun ka nsekele wa Ebinukkpaapi ɛnaangnɛ ɔɔ? Maaye! Ning baang lissi. Ɔssɛbibit butɔknɛ lifɔɔ za likɔɔmnɛ kuddu liffu nzang ɔlɔɔt ukkwoong mung ɔtaa bbwak la Ɔlɔɔmɔlɔɔm ka utelenɛ Lafɔɔ. 22 Ɔzzàngà luvva-Ɔlɔɔmɔlɔɔm lɔlɔɔkbong lɔttɛ ɛkpansi ɔkkpɛlɛ esseke ya lakke bubbi, nkwaaning lɛsɔɔk za Ɔlɔɔmɔlɔɔm usekelenɛ kinnyi balɔɔt kwa Jesus Christ, basam bannyi balɔɔt ba bayilanɛ kwa Jesus Christ. 23 Bong tɛ́ttɛ́ ɛkɛtɛ kiyila effu, idɔkɔ itii ka Lafɔɔ lasamnɛyɛlɛ ɔkkpɛlɛ lassɛɛn ka ggwoon tɛ̀ttɛ̀ balɔɔt a igbakkɔpɔ tɔttɔt kɔlɔɔk a kiyila sa kile ka kiffunɛ kutuma. 24 Ɔzzánga idɔkɔ ile ba Lafɔɔ lakɔɔmnɛyɛlɛ tɔttɔt Christ uffu nkwaaning itaa bbwak la Ɔlɔɔmɔlɔɔm ka kɛyanga kiyila. 25 Gedegede mung ɛkɛtɛ kiyila etii mung. Lafɔɔ lakke ba labɛlɛ lɛyanga la ayyɔɔt. 26 Kussi ka kiyila ɔkkpɛlɛ annyɔɔng azzangayɔng bwaan-Ɔlɔɔmɔlɔɔm ka bɔkaat annyɔɔng la Christ Jesus. 27 Adɔkɔ anaangyɔng baptizim ka bɔkaat la Christ. Mung atɔkyɔngbong ileme ammɛ ayangayɔng. 28 Ɔzzànga balɔɔt a Jews buubuu ba babɛlɛ lile la Ikanakana. Babili buu ba babɛlɛ lile la balɔɔt ba basinɛ babili lile. Bwaanbwalam buu ba babɛlɛ lile la bwanavva. Ɔkkpɛlɛ assekeyɔng ikɛlɛlɛ ka bɔkaat la Jesus. 29 Alenɛyɔng ba Christ, ɔzzànga nzang aleyɔng balɔɔt a kikkwu Abraham. Vvenɛ ayangayɔng etini ka bwa Ɔlɔɔmɔlɔɔm ulenɛ lisekele.
