GALATIANS 2

1Likkpa ɔsɛlɛzzil lisaknɛ, nppyɛlɛ nmii Jerusalem la Barnabas, Titus ɔssɛ umii la anaam ɔgbaa. 2Nmii ka Ebinukkpaapi ɛttɛnɛ nmii. Nbwɔɔlɔbɛ ka likup la bazzilɛttɔ tɛ̀ttɛ̀ nkopolonɛ Ikanakana kuttu-budoddo. Nsi lɛggyan nttɛ kɛnaang anaam ka kissinɛ ka isimi ka isimi la gedegede mung kɛttɔ gbɔɔ kɛtaak. 3Ɛnngwa anaam ya ɛzzanganɛ Titus nkkpa ndɔk ule wa Greek, basimɛ litut kɛzza lɛtaa. 4Balɔɔt Balɔk badɔkɔ baggyan battɛ ɔzzazɛ. Abbɛ balenɛ ba babɔɔlnɛ bafula ka kɛkaan ayyɔɔt basseke bagbɛɛk-a-lɔgbɛɛk babbwa battɛ abbɛ bassɛ bayanga kiyila tɛ̀ttɛ̀ ayyɔɔt. Ning banaang nkwaaning bakɔɔlɔ tɛ̀ttɛ̀ ɔkkyaanɛyɛlɛ ɔffɔ ka ilenɛ ka bɔkaat la Christ Jesus. Badɔkɔ baggyan battɛ bakɔɔmyɛlɛ tɛ̀ttɛ̀ babili. 5Isibɛ lɛfɔngɔ babɛtɛyɛlɛ ka ɛkɛtɛ nnyɔn gbɔɔ ffet. Inaang ning baang ɔkkɔɔnɛ lɔkkwɔɔn a kɔlɔɔk a kuttu-budoddo a Jesus Christ lɔtaawɔyɔng. 6Ɔzzànga kwa balɔɔt ba bappyɛɛknɛ tɛ̀ttɛ̀ bazzilɛttɔ—Nlɔɔk ka nsinɛ kifoolo linaang kɛlɔk lɛyɛn. Ebinukkpaapi linaang ɔlɔɔt ba effik. — Bazzilɛttɔ ’bɔng baang luttina lɔlɔk basimɛ linnyi. 7Ɔzzànga kɔyɛn bayɛnbong basan battɛ Ebinukkpaapi ennyinɛbong kikopolo Ikanakana kuttu-budoddo a Christ, tɛ̀ttɛ̀ ɛnnyinɛ Peter lakke za kikopolo balɔɔt a Jews lɛmmwɔɔl annyɛ. 8Kussi ka lakke Ebinukkpaapi tɛ́ttɛ́ nzzanga Uyilabɔtɔɔm wa Jesus ɔtɔɔmnɛ ufee Ikanakana tɛ̀ttɛ̀ Peter ɔdɔkɔnɛ wa balɔɔt a Jews. 9James, Peter la John ba badɔkɔnɛ tɛ̀ttɛ̀ bazzilɛttɔ, basan lɔsan battɛ Ebinukkpaapi ennyinɛbong likke ’zɔng baan zzekep. Ɔzzángá batɔkyɛlɛ labɔɔk la Barnabas ka ilenɛ balɔɔt a kɔssɛ kkwɔn. Ayyɔɔt iyila kamma kɛnaang a kɛnaang ka Ikanakana. Abbɛ bayila kamma kɛnaang a kɛnaang ka ɛfɛɛn a balɔɔt a Jews. 10Bwa babapnɛ ɔdɔkɔ kɛttɛ ikke balɔɔt ba ɔbbɔlnɛbɛ ka kɛkaan abbɛ. Akkwɛ kulenɛ kwa nggbanɛ lissi nbum kɛnaang ka isimi ka isimi. 11Ɔzzánga Peter uffunɛ ka Antioch, nfim kwa utolonɛ ka lusso balɔɔt ka usinɛ bbwak lile. 12Peter ɔdɔkɔ ka kazzi la ikpana ayyɔɔt Ikanakana, ka balɔɔt ba James ɔtɔɔmnɛ baffɔnɛ. Balɔɔt ’bɔng baang baffɔnɛ, ammɛ Peter kazzi kattunmɛ la Ikanakana. Ɔttɔm ɔppyɛlɛ isimi-simi. Ɔbbwɔpɔmɛ ka ɔyɛnnɛ balɔɔt ba bayilanɛ battɛ Ikanakana babɛkɛ lɛtaa. 13Ikpana ayyɔɔt balɔk ba Jews basseke ka banaangnɛ tɛ̀ttɛ̀ babbwɔp gbaak la Peter. Gɔɔ Barnabas ɔssɛ ukupbɛ ka linaang a bbwɔp abbɛ. 14Nyɛnnɛ nttɛ bbwak ba bassɛ bakup lɔkkwɔɔn a kɔlɔɔk a lukopolo kuttu budoddo, nlɔɔk la Peter ka lusso abbɛ ɔkkpɛlɛ nttɛ, “Annɔ wa Jews, ɔzzànga anaang tɛ̀ttɛ̀ wa akanakana, tɛ̀ttɛ̀ wa Jews ba anaang. Mung ale anaang nang vvenɛ anaang Ikanakana bataa tɛ̀ttɛ̀ balɔɔt a Jews?” 15Kule kule ayyɔɔt balɔɔt a Jews pputup, ayyɔɔt “Ikanakana banaang a bubbi” tɛ̀ttɛ̀ bakkwɔɔnɛbɛ lissi. 16Ɔzzànga isan mung ittɛ ɔlɔɔt ɔtaa bbwak la Ɔlɔɔmɔlɔɔm ka kiyila kwa Awaan, Jesus Christ, kɛnaang a kwa Lafɔɔ laggyannɛ lissi. Ayyɔɔt ɔgbaa iyangabong kiyila itum Christ Jesus nkwaaning itaa bbwak la Ɔlɔɔmɔlɔɔm. Kwa kɛnaang kwa Lafɔɔ laggyannɛ lissi. Ɔlɔɔt wa ukkwoongnɛ ɔtaa bbwak la Ɔlɔɔmɔlɔɔm ka ɔnaangnɛ kwa Lafɔɔ laggyannɛ ba ule. 17Bayɛnnɛ battɛ ayyɔɔt issɛ ile banaang-a-bubbi tɛ̀ttɛ̀ Ikanakana ka ilenɛ ka kɛggyan a ɛtɔk a kɛtaa bbwak la Ɔlɔɔmɔlɔɔm ka kiyila kwa Awaan Jesus Christ, vvenɛ kule kɔttɛ Christ uyilabɔtɔɔm a bubbi ɔɔ? Ning lissi kpong kpong! 18Nppyɛlɛnɛ nlɔngɔlɔ kɛssanga lafɔɔ za nlenɛ lɛbɛpɛ, nzang nyɔɔnɛbong kɛyɔɔng nttɛ anaam nlenɛ ɔlɔɔt wa ɔbɛpɛnɛzɛ. 19Ka ulenɛ kɔlɔɔk a Lafɔɔ, nbbebong. Lafɔɔ biini lawwɔɔlnɛnɛ ɔkkɔɔnɛ nnaang kwa Ɔlɔɔmɔlɔɔm ɔggyannɛ. Bawwɔɔlnɛbong batoolo la Christ ka Cross, 20ɔkkɔɔnɛ usinɛ anaam lile nddunɛ mung. Usseke Christ ka ulenɛ ka kuddu ka tɔkɔlɔ anaam. Kuddu kwa nddunɛ mung, nddu ka nyilanɛ kwa Waan Ɔlɔɔmɔlɔɔm wa nsaapmɛnɛ ɔsam lɛfal ammɛ unnyi kwa anaam. 21Lɛsɔɔk Ɔlɔɔmɔlɔɔm ba nfim. Ulenɛ bɔfɛɛn a kussinɛ ka Lafɔɔ ɔlɔɔt ɔtaa bbwak la Ɔlɔɔmɔlɔɔm ɔzzànga nzang lubbe a Christ ubbebong gbɔɔ.

will be added

X\