GALATIANS 1

1Lɛmmwɔɔl ’zɔng lissi ka Paul wa Ɔlɔɔmɔlɔɔm ɔkkwɔɔmɛnɛ ɔttɛ ɔ̀zzánga uyilabɔtɔɔm a Jesus Christ. Kɛkkwɔɔ ammɛ ka ɔlɔɔt ba kissi, gɔɔ ɔlɔɔt lissi ɔnaangnɛ tɛ́ttɛ́ ɔkkwɔɔmɛ. Ɔzzànga kissi ka Jesus Christ la abassɛ Ɔlɔɔmɔlɔɔm wa ufungalamɛnɛ ka lubbe. 2Ikpana ayyɔɔt ɔkkpɛlɛ ya ilenɛ mung la anaam batoolobong la anaam itɔɔm luwomo ifee izɔɔm ɔkkpɛlɛ ya ilenɛ ka Galatia. 3Numa Dedde ayyɔɔt, Ɔlɔɔmɔlɔɔm, la Jesus Christ, Uyini, bannyiwɔyɔng lakke la bɔkaat. 4Christ ɔsammɛbong kɛyɔɔng unnyi ka bubbi ayyɔɔt, ka latele a Dedde ayyɔɔt, Ebinukkpaapi, ɔttɛ nkwaaning itta ka bubbi bɛtɔm ’byɔng mung. 5Ɔlɔɔmɔlɔɔm ulenɛ wa latele kɛfal a kɛfal. Kule ning. 6Akɛɛlɛnɛ yɔng gaang gaang! Appyɛɛ agbatayɔng like like ning assekemɛyɔng ammɛ wa ɔkkwɔɔwɔnɛyɔng ka likke a Christ appyɛɛ amii akupyɔng kuttu budoddo kɔlɔk. 7Ka lɔkkwɔɔn, kuttu budoddo kɔlɔk ba kule. Ɔzzànga nlɔɔk ’kwɔng ka balɔɔt balɔk balenɛ baang ba babumnɛ kisikiliwɔyɔng ippyam, babum kifoolo kuttu budoddo a Christ bagbaa. 8Gɔɔ mkkpa uleyɛlɛ ayyɔɔt mung, ɔ̀ppyɛ́ɛ ule uyilabɔtɔɔm Ɔlɔɔmɔlɔɔm wa ussinɛ ka libat, ukopolowɔnɛyɔng kuttu budoddo kwa kulenɛ zzekep la kwa ayyɔɔt ikopolowɔnɛyɔng, ɔlɔɔt ’wɔng baang ule wa kɛfɔɔp ka lɔkɔɔn. 9Ilɔɔkbongkwɛ kkpal tɛ, ɔzzanga gedegede mung nle ka nbbalnɛkwɛ lɛlɔɔk. Ɔlɔt ɔlɔk ukopolowɔnɛyɔng kuttu budoddo kwa kulenɛ zzekep la kwa ayyɔɔt ilewɔnɛyɔng likopolo, ɔlɔɔt ’wɔng baang ule wa kɛfɔɔp ka lɔkɔɔn. 10Mung nkwɔng kɔbal mung tɛ̀ttɛ̀ nlenɛ ka lubum nttɛ kɔsaap balɔɔt ɔɔ? Maaye kpongkpong! Nggyan nttɛ kɔsaap Ɔlɔɔmɔlɔɔm. Mung nle ka kibum nttɛ balɔɔt basannɛ ɔɔ? Butiinɛ ka nbumnɛ nttɛ balɔɔt basannɛ nzang bɔɔyi a Christ ba nle. 11Fɔngɔyɔngbong ssii nbwɔɔlɔwɔyɔng ikpana anaam; Kuttu-Budoddo Ɔlɔɔmɔlɔɔm kwa nkopolowɔnɛyɔng mung ka ɔlɔɔt ba kussi. 12Nsikwɛ lɛtɔk ka ɔlɔɔt ɔlɔk. Gɔɔ ɔlɔɔt ɔlɔk usinɛ kwɛ likopolo. Jesus Christ biini uwongolonɛkwɛ pwool ɔyɔɔnɛ. 13Babwɔɔlɔwɔyɔng tɛ̀ttɛ̀ nyɔɔnɛ luzɔɔm Ɔlɔɔmɔlɔɔm akama lusinɛ lɛttɔ libbe. Nbum gaang gaang nttɛ ntakagwɛ. 14Ndɔkɔ nyanga kiyila gaang gaang ka eleme balɔɔt ayyɔɔt ba iyɛddɛ iyɛddɛ ntta bayyɔɔt-uggba. 15Ɔzzànga ka kiggwoom a kɔlɔɔk ammɛ la lakke, ɔsanganɛ tɛ́ttɛ́ bamaatnɛ ɔttɛ nnaang kɛnaang ammɛ. Ka ɛkɛtɛ ya ɔnaangnɛ luttina 16ɔttɛ ɔnaangnɛ nsan waan ammɛ nkwaaning nkopolo Kuttu-Budoddo ammɛ nbwɔɔlɔ Ikanakana, nsi ka ɔlɔɔt ɔlɔk limii ɔbbanɛ bikɔɔm. 17Gɔɔ Jerusalem nsi limii kɛyɛn a balɔɔt ba baggbanɛ bayilabɔtɔɔm a Jesus lile tɛ́ttɛ́ anaam nle. Lutini ’gwɔng nfeele eseese nmii Arabia, nppyɛlɛnɛ nmii Damascus. 18Likkpa likkyaat lisaknɛ nmii Jerusalem kippyee kɔlɔɔk ka kamma Peter. Ntaa la ammɛ ka bɛtɔm ɔsɛlɛzzil. 19Uyilabɔtɔɔm a Jesus ɔlɔk nsi lɛyɛn ɔgbaa la James, ɔkpana Uyini. 20Kwa nkkpɔknɛ kule ka lɔkkwɔɔn. Ɔlɔɔmɔlɔɔm ɔsan lɔsan ɔttɛ lɛlaak ba nkkala. 21Ɔttɛ ɔnaang nmii ka ifɛɛn ya ilenɛ ka Syria la Cilicia. 22Ka ɛkɛtɛ ’yɔng baang, balɔɔt a luzɔɔm ba balenɛ ka izɔɔm ka Judaea basinɛ anaam biini lɛsan. 23Basan kwa balɔɔt balɔk balɔɔknɛ keem battɛ, “Ɔlɔɔt wa ɔtaanɛ ɔyɔɔyɛlɛ akama, gedegede mung ammɛ ussekenɛ ka ukopolonɛyɛlɛ utum kiyila sa ubumnɛ kɛbɛpɛ!” 24Keem babungu Ɔlɔɔmɔlɔɔm kwa anaam.

will be added

X\