EPHESIANS 6

1Bwɔɔntiti, kɛnaang annyɔɔng, bakup-a-Christ, ulenɛ kitele ssakawɔ la ssaawɔ annyɔɔng. Uwɔng ulenɛ kɔlɔɔk kwa kulenɛ bbwak a kɛnaang. 2“Atele ssaawɔ la ssakawɔ.” Ulenɛ lifɔɔ za kɛkɔɔm a ɛtɔk za lɛyanganɛ nsekele lɛgbaa lɛttɛ, 3“nkwaaning ataa ka budoddo ka ɛkpansi.” 4Ibassɛ la ibakka bwɔɔntiti, tɛ̀ttɛ́ akɔɔmyɔng bwɔɔn annyɔɔng ka ɛtɔk ya kule kutunbɛ. Lutini ’gwɔng akɔɔmyɔngbɛ la linaang a bakup-a-Christ, akatyɔngbɛ, ayɔɔyɔngbɛ ɛtɔk ya doddo tɛ̀ttɛ̀ Uyini ɔnaangnɛ. 5Babili, ateleyɔng issaawɔ annyɔɔng ya vveeng ’wɔng gaang gaang. Anaangyɔng ning baang la luppyam gwa doddo tɛ̀ttɛ̀ alenɛ ka atelenɛyɔng Christ. 6Afɔngɔyɔng ɛdda kɛnaang ɔlɔk nkwaaning babunguwɔyɔng. Anaangyɔng kwa Ɔlɔɔmɔlɔɔm ɔggyannɛ la luppyam annyɔɔng ɔkkpɛlɛ tɛ̀ttɛ̀ babili a Christ. 7Anaangyɔng kɛnaang tɛ̀ttɛ̀ babili la laggele, tɛ̀ttɛ̀ alenɛyɔng ka kɛnaang Uyini, usi kɛnaang a balɔɔt ba gbɔɔ lile. 8Akke attɛyɔng Uyini vvenɛ ukipili ɔlɔɔt ɔkkpɛlɛ, ale ubili, appyɛɛ asi ubili lile, ka kɛnaang duu sa anaangnɛ kɛyyɛɛp tɛ! 9Bayini babili, akɔɔmyɔng babili annyɔɔng kɛssanga ssɔn. Afɔngɔyɔng ibbyap kɛkɔɔm. Akke attɛyɔng annyɔɔng la babili annyɔɔng aleyɔng ba Uyini vvɔn ka libat wa ɔkaalnɛ kɛkaal ɔlɔɔt la vvɔn kɛssanga ssɔn. 10Ka lakpeke, akɔɔmyɔng lakke Uyini akɔɔmwɔyɔng kɛyɔɔng kpɔk ka bɔkaat annyɔɔng la ammɛ. 11Assɛɛnyɔng uwɔkɔlɔ-lɛkɔɔng annyɔɔng ɔkkpɛlɛ wa Ɔlɔɔmɔlɔɔm ulewɔnɛyɔng linnyi nkwaaning abeeyɔng kkpɔk alluyɔng ubbu kullu la lagban Ɔnaang-a-Kɛsɛɛm a Kuyeeng. 12Mung kullu la balɔɔt ba illu. Illu la babbu liyeeng sa lilenɛ ka vveengodde, la bakɔɔm ɛfɛɛn, la lakke la babbyap a bazzilɛttɔ ɛkpansi ’yɔng. 13Awɔkɔlɔyɔng iwɔkɔlɔ lɛkɔɔng Ɔlɔɔmɔlɔɔm gedegede mung nkwaaning kɛtɔm sa kɛbbɔlnɛ kiffunɛ akkwoong abeeyɔng bbwak alluyɔng kɔfɔk annyɔɔng kullu. Alenɛyɔng lillu affɔyɔng ka lakpeke, ale atiiyɔng baang ka abeenɛyɔng kkpɔk. 14Abeeyɔng kkpɔk akatyɔng. Akɔɔmyɔng lɔkkwɔɔn a kɔlɔɔk tɛ̀ttɛ̀ ɛkkpa ya aggbɔnɛyɔng ka kɛsan. Akɔɔmyɔng budoddo akupuwɔyɔng kɛyɔɔng ka ikukulu tɛ̀ttɛ̀ kɛfaak a kɛkkpala. 15Bukkpakkpa bwa kɛbwɔɔlɔ Kuttu-Budoddo bɔkaat butaawɔyɔng tɛ̀ttɛ̀ ikkpa-bukkpɔ ya assɛɛnnɛyɔng ka bukkpɔ. 16Ɛkɛtɛ ɔkkpɛlɛ akɔɔmyɔng kiyila annyɔɔng tɛ̀ttɛ̀ kɛbba sa ale akɔɔm afɛɛnyɔng bɛfɛɛn-ibɔk bya Satan ule ɔtta, 17Atɔkyɔng ikkala ya Ɔlɔɔmɔlɔɔm ɔkkalawɔnɛyɔng tɛ̀ttɛ̀ kɛttɔpɔ sa avvoongnɛyɔng ka lɛttɔ. Atɔkyɔng lɛmmwɔɔl-Ɔlɔɔmɔlɔɔm tɛ̀ttɛ̀ ogge wa Kuyeeng-Ɔlɔɔmɔlɔɔm kunnyiwɔnɛyɔng. 18Anaangyɔng ’kwɔng ɛkɛtɛ ɔkkpɛlɛ la luzɔɔm. Abapyɔng Ɔlɔɔmɔlɔɔm attɛ ɔkkalawɔyɔng. Ɔzɔɔmyɔng ka kɔlɔɔk duu tɛ̀ttɛ̀ Kuyeeng-Ɔlɔɔmɔlɔɔm kɔbwɔɔlɔwɔnɛyɔng. Ka ’kwɔng mung, abeeyɔng kkpɔk, tɛ̀ttɛ́ ayilayɔng kɛbɛtɛ, azɔɔmyɔng ɛkɛtɛ ɔkkpɛlɛ, annyiyɔng balɔɔt Ɔlɔɔmɔlɔɔm. 19Azɔɔm annyinɛyɔng anaam ɔgbaa, attɛyɔng Ɔlɔɔmɔlɔɔm ɔtɔɔmmɛ bɔtɔɔm, ɛkɛtɛ ya nle nbwɔɔlɔ bwa ɔtɔɔmmɛnɛ, nbwɔɔlɔ la kɛkkaam a luppyam, nnaang balɔɔt basan kɔlɔɔk a lalup a lɛmmwɔɔl-Ammɛ. 20Anaam nlenɛ uyilabɔtɔɔm ka kɔlɔɔk a lɛmmwɔɔl-Ɔlɔɔmɔlɔɔm ’zɔng mung. Ɔzzànga gedegede mung nle ka igbakkɔpɔ. Azɔɔm attɛyɔng nkkaam luppyam ntolo kutolo ntumzɛ tɛ̀ttɛ̀ nggyannɛ. 21Ɔkpana ayyɔɔt Tychicus, bɔɔyi a Christ wa ɔyanganɛ kiyila ka kɛnaang Uyini vvenɛ ɔbwɔɔlɔwɔyɔng kɔlɔɔk anaam ɔkkpɛlɛ; nkwaaning asanyɔng tɛ̀ttɛ̀ nlenɛ baang ka nnaangnɛ. 22Kwakkwɛ baang ntɔɔmmɛnɛ nfeewɔyɔng nkwaaning ɔbwɔɔlɔwɔyɔng tɛ̀ttɛ̀ ɔkkpɛlɛ ayyɔɔt ilenɛ baang ka inaangnɛ ɔlɔk ɔssɛɛnwɔyɔng bittele. 23Ɔlɔɔmɔlɔɔm, Dedde ayyɔɔt, la Uyini ayyɔɔt, Jesus Christ, unnyiwɔyɔng annyɔɔng la ikpana ayyɔɔt ɔkkpɛlɛ ka kiyila, bɔkaat la kɛsaap. 24Numa ppyɛɛ Ɔlɔɔmɔlɔɔm ɔtaa la balɔɔt ba batelenɛ Uyini ayyɔɔt, Jesus Christ, la kɛsaap sa kisinɛ lɛsaal.

will be added

X\