EPHESIANS 5

1Ka alenɛyɔng bwaan a luppyam Ɔlɔɔmɔlɔɔm, abum anaangyɔng tɛ̀ttɛ̀ ammɛ biini. 2Kɛsaap kɛkɔɔm lɛfal annyɔɔng tɛ̀ttɛ̀ ayyɔɔt isaapnɛ Christ ɔsam kɛfal ammɛ unnyi kwa ayyɔɔt tɛ̀ttɛ̀ bɔfɛɛn bwa buggwoomnɛ kizzoom bakɔɔm banaang lɛtɔm za lɛsaapnɛ Ɔlɔɔmɔlɔɔm. 3Ka alenɛyɔng balɔɔt Ɔlɔɔmɔlɔɔm, ba kɔyyɛɛp kɛtala lilɔɔk tɛ̀ttɛ̀ kɛssɛ-kɛzak, ɔlɔk kisi luppyam kkpaladada liloko, ɔlɔk kɛsaap a bɔfɛɛn ka bɛzzɔkɔ annyɔɔng. 4Ba kɔyyɛɛp ka anaangnɛyɔng ibbyap, ɔlɔk anaangyɔng kikun, alɔɔkyɔng babbu lammwɔɔl. Lutini ’gwɔng, awomoyɔng Ɔlɔɔmɔlɔɔm kɛnaang, ka bwa unnyiwɔnɛyɔng. 5Asanyɔng lɔsan attɛyɔng Itutum a Christ la Ɔlɔɔmɔlɔɔm, ya ɔlɔɔt wa ɔssɛnɛ kɛzak, ɔlɔk ɔsaap bɔfɛɛn ba ile ka lɔkkwɔɔn. (Ɔsaap-a-bɔfɛɛn ulenɛ ɔlɔɔt wa ɔnaangnɛ ilat, ɔyanga kɛsaap ɔzɔɔm unnyi iyyɛɛp a kɛfal ka vveengodde ɔtta Ɔlɔɔmɔlɔɔm.) 6Tɛ̀ttɛ́ afɔngɔyɔng ɔlɔɔt ɔlɔk ɔkɔɔm babbu lammwɔɔl uffu ɔfɛɛtwɔyɔng; kussi ka bɛfɛɛn bya ning mung Ɔlɔɔmɔlɔɔm vvenɛ ɔyɔɔ balɔɔt ba basimɛnɛ litele akama. 7Ɔzzànga tɛ̀ttɛ́ aleyɔng ka kɔlɔɔk kɔlɔk la kɛssanga balɔɔt ’sɔng baang. 8Annyɔɔng biini adɔkɔ aleyɔng ka kisul, ɔzzànga ka alenɛyɔng balɔɔt Uyini lile assekeyɔng balɔɔt a buppwolo. Ka assekenɛyɔng balɔɔt a buppwolo, abum anaangyɔng linaang a balɔɔt a buppwolo. 9Buppwolo bukɔɔmnɛ bɛssanga iyyɛɛp a liyaat ɔkkpɛlɛ buffu la budoddo linaang sa bbwak, la lɔkkwɔɔn a kɔlɔɔk. 10Abum akkoopyɔng kwa kɔsaapnɛ Uyini. 11Tɛ̀ttɛ́ ayangayɔng luttina ka babbu bɛfɛɛn bya balɔɔt banaangnɛ bya bilenɛ ka kisul. Lutini ’gwɔng asamyɔng byɛ attayɔng ka buppwolo. 12(Kɔnaang izzit ffet kɛlɔɔk kitum bɛfɛɛn bya banaangnɛ ka lalup). 13Ɔ̀zzànga bɛfɛɛn ɔkkpɛlɛ bɛ́ttanɛ́ ka ppwool, vvenɛ bɛyɔɔ lafal abbyɛ za lɔkkwɔɔn kkpelegedee. 14Bɔfɛɛn duu bwa buyɔɔnɛbwɛ kɛyɔɔng ppwool busseke buppwolo. Kwakkwɛ baang balɔɔknɛ battɛ, “Fungala, Ɔlaa-bilaa. Afungala ka lubbe! Buppwolo a Christ vvenɛ buppwolo bullɔtwɔ.” 15Ɔzzànga asan tɛ̀ttɛ̀ ataanɛyɔng. Tɛ̀ttɛ́ ataayɔng tɛ̀ttɛ̀ bazingizingi. Ataayɔng tɛ̀ttɛ̀ basan a kɔlɔɔk. 16Asan akɔɔm ɛkɛtɛ annɔ doddo, vveeng ɔbbɔlbong. 17Tɛ̀ttɛ́ azizingiyɔng, ɔzzànga abum asanyɔng bwa Uyini ɔggyannɛ ɔttɛ anaangyɔng. 18Tɛ̀ttɛ́ avvayɔng batak ba babɛpɛwɔnɛyɔng abimiyɔng. Lutini ’gwɔng afɔngɔyɔng Kuyeeng-Ɔlɔɔmɔlɔɔm kɔtɔkwɔyɔng kɔyanga. 19Akɔɔmyɔng lammwɔɔl a Psalm la bisoom bya bɛllɔtnɛ buyila atoloyɔng kutolo la bannyɔɔng. Asoomyɔng bisoom atoloyɔng lammwɔɔl annyiyɔng Uyini, akɔɔm abungumɛyɔng ka ippyam. 20Ɛkɛtɛ ɔkkpɛlɛ awomoyɔng Dedde, Ɔlɔɔmɔlɔɔm, kɛnaang ka bɛfɛɛn ɔkkpɛlɛ ka lɛkɔɔl Uyini ayyɔɔt, Jesus Christ. 21Asamwɔyɔng kɛyɔɔng annyiwɔyɔng kɛyɔɔng. Anaangyɔng ning baang ka latele a Christ. 22Bwanavva, asamwɔyɔng kɛyɔɔng annyiyɔng bwalam annyɔɔng tɛ̀ttɛ̀ annyinɛyɔng Uyini. 23Waanwalam ɔyanga lakke ɔtta wanavva ammɛ, tɛ̀ttɛ̀ Christ ɔyanganɛ lakke ka luzɔɔm. Christ biini ulenɛ ɔkkala-ikkala luzɔɔm gwa lulenɛ kkwɔɔt ammɛ. 24Bwanavva, assɛ asamwɔyɔng kɛyɔɔng ɔkkpɛlɛ annyiyɔng bwalam annyɔɔng tɛ̀ttɛ̀ luzɔɔm lɔsamnɛ gwɛ kɛyɔɔng lunnyi Christ. 25Bwalam, bwanavva annyɔɔng basaapwɔyɔng, tɛ̀ttɛ̀ Christ luzɔɔm lɔsaapmɛnɛ, ɔsam kɛfal ammɛ unnyigwɛ. 26Ɔnaang ’kwɔng nkwaaning ɔkɔɔm lɛmmwɔɔl ammɛ za ulenɛzɛ lɛzzaa ka bannyi lɛllaat, ɔzɔɔm luzɔɔm unnyi Ebinukkpaapi, 27ɔkkɔɔnɛ ɔsam luzɔɔm ka bɔllɛ aggwɛ ɔkkpɛlɛ unnyimɛ ammɛ biini kɛyɔɔng, lule kkpaladada, lɔsɛlɛ kɔlɔɔk a lɛlaak, lɔsɛlɛ lɛggba la lilɔɔk lilɔk sa lisinɛ lɛyyɛɛp. 28Bwaanbwalam nzang bwanavva abbɛ basaapbɛ tɛ̀ttɛ̀ basaapnɛbɛ kɛyɔɔng, batele kkwɔɔt abbɛ. Ɔlɔɔt wa ɔsaapmɛnɛ kɛyɔɔng, wanavva ammɛ ɔssɛ ɔsaapmɛ ning baang. 29(Ɔlɔɔt wa kkwɔɔt ammɛ litunmɛnɛ ba ule. Lutini ’gwɔng uzzi kazzi ɔssɛɛnsɛ ɔkɔɔm kkwɔɔt ammɛ doddo, tɛ̀ttɛ̀ Christ ɔnaangnɛ la luzɔɔm bbwak, 30ka ayyɔɔt ilenɛ bikkeep a kkwɔɔt ammɛ.) 31Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ka ’kwɔng mung, waanwalam vvenɛ ɔgbata ɔkɔngɔ abassɛ la abakka bataa la wanavva ammɛ, ɔkkpɛlɛ abbɛ basseke ɔlɔɔt vvɔn.” 32Luvva Ɔlɔɔmɔlɔɔm ’gwɔng mung lɔbwɔɔlɔyɛlɛ lɔkkwɔɔn a kɔlɔɔk gwa ddɔng, anaam nsangwɛ nttɛ lutum Christ la luzɔɔm. 33Ɔzzànga lutumwɔyɔng annyɔɔng ɔgbaa. Waanwalam ɔkkpɛlɛ utele wanavva ammɛ tɛ̀ttɛ̀ ulemɛnɛ kɛyɔɔng. Wanavva ɔkkpɛlɛ unnyi walam ammɛ latele.

will be added

X\