EPHESIANS 4

1Anaam wa nlenɛ ɔlɔɔt a ngbakkɔpɔ ka nnaangnɛ kɛnaang Uyini nttɛnɛ: Anaanyɔng linaang liyyɛɛp liffɔ la sa Ɔlɔɔmɔlɔɔm ɔttɛnɛ anaangyɔng ka ɛkɛtɛ ɔkkwɔɔwɔnɛyɔng. 2Anaangyɔng linaang a bukee, la linaang sa bɛtɛbɛtɛ la kibbe luppyam ɛkɛtɛ ɔkkpɛlɛ. Ayɔɔyɔng kɛsaap annyɔɔng ka kittele ɔlɔɔt la vvɔn. 3Abumyɔng gaang gaang alokoyɔng bɔkaat bwa Kuyeeng-Ɔlɔɔmɔlɔɔm kunnyiwɔnɛyɔng, ka kilokowɔyɔng ɛfɛɛn kkwɔn doddo. 4Kkwɔɔt lile ssɔn, Kuyeeng kule kkwɔn tɛ̀ttɛ̀ Ɔlɔɔmɔlɔɔm ɔkkwɔɔwɔnɛyɔng kwa kɔlɔɔk kkwɔn keem. 5Uyini ule vvɔn, kiyila kile ssɔn, baptizim ule vvɔn. 6Ɔlɔɔmɔlɔɔm ule vvɔn, Dedde balɔɔt ɔkkpɛlɛ. Ammɛ ulenɛ Uyini bɛfɛɛn ɔkkpɛlɛ. Ule ka tɔkɔlɔ bɛfɛɛn ɔkkpɛlɛ. Ɔssɛ la abbyɛ ɔnaang kɛnaang. 7Ɔlɔɔt la vvɔn ɔyanga lɛsɔɔk za ammɛ ikɛlɛlɛ la kɛssanga sa Christ ulenɛ linnyi. 8Tɛ̀ttɛ̀ luvva-Ɔlɔɔmɔlɔɔm lɔlɔɔknɛ, lɔttɛ, “Ka umiinɛ ka ggologgolo, Ɔkɔɔm balɔɔt igbakkɔpɔ ggbadam ɔbɛtɛ la ammɛ umii. Ɔsɔɔk balɔɔt lasɔɔk.” 9Mung “ùmii ka libat” ulenɛ ’bɔng? Ning baang ulenɛ kɛttɛ ka ikeeng ikeeng uffu ka kuttɔɔk ɛkpansi. 10Ammɛ wa uffunɛ ka ɛkpansi ulemɛnɛ ammɛ vvɔn baang wa umiinɛ ka libat. Ɔsak umii fulu fulu ka libat, nkwaaning uyipi ɛfɛɛn ɔkkpɛlɛ ka vveengodde. 11Ɔdɔkɔmɛ ammɛ wa “unnyinɛ ɔssɛbibit lɛsɔɔk”. Ɔssang balɔɔt balɔk bale bayilabɔtɔɔm ammɛ, balɔk bappyee-kutolo ammɛ, balɔk bakopolo-luzɔɔm, balɔk bassɛɛn-a-luzɔɔm la bakopolo-lukopolo. 12Jesus ɔnaang ’kwɔng nkwaaning ɔbama balɔɔt Ɔlɔɔmɔlɔɔm ɔkkpɛlɛ kwa kɛnaang a luzɔɔm, nkwaaning kkwɔɔt a Christ limmala. 13Ɔkkpɛlɛ ayyɔɔt vvenɛ iggba ɛfɛɛn kkwɔn isseke ɔlɔɔt vvɔn ka kiyila ayyɔɔt la bisana pya bitumnɛ Waan-Ɔlɔɔmɔlɔɔm. Vvenɛ ile balɔɔt ba balenɛ kɔlɔɔk lɛsan baffɔ ka ennenggele kɛfal a Christ. 14Ɛkɛtɛ ’kwɔng baang, bwɔɔn ba ibɛlɛ lile; ba babɛlɛyɛlɛ lɛkɔɔm bawuwungu tɔkɔtɔkɔtɔkɔ tɛ̀ttɛ̀ kɛffa kɛffanɛ bɛfɛɛn kɛssanga bakkala lalaak ba bakɔɔmnɛ lagban banaang babbɛ battɔ ka bubbi. 15Ɔzzànga ilɔɔknɛ lɔkkwɔɔn a kɔlɔɔk ka kɛsaap, vvenɛ immala ka itɔk ɔkkpɛlɛ innyi Christ wa ulenɛ uzzilɛttɔ. 16Ka ilenɛ ka kɛkɔɔm ammɛ, bikkeep a balɔɔt ɔkkpɛlɛ bitoolobong ɛfɛɛn kkwɔn. Bikkeep bɛbwɔɔpnɛ kkwɔɔt ɔkkpɛlɛ biloko ɛfɛɛn kkwɔn. Nkwaaning kikkeep la ssɔn kɛnaangnɛ kwa kɔyyɛɛpnɛ, kkwɔɔt ɔkkpɛlɛ limmala ka kɛsaap. 17Ka lɛkɔɔl Uyini, nttamawɔyɔng nttɛ tɛ̀ttɛ́ abɛlɛyɔng lɛtaa tɛ̀ttɛ̀ balɔɔt ɛkpansi ba basinɛ kwa doddo littina. 18Ittina abbɛ ile ka kisul. Etini ba bayanga ka lɛfal za Ɔlɔɔmɔlɔɔm unnyinɛ, ka basinɛ kwɛ lɛsan basi kɔlɔɔk lippyee. 19Luttina gwa izzit bɛ ba lɔbɛlɛ lile. Basambongbɛ kɛyɔɔng bannyi kɛssɛ-kɛzak. Banaang bɛssanga bɛfɛɛn bya bisinɛ lɛyyɛɛp, bafim kɛkkyaa kɛfɔngɔ. 20Nkwɔng baang lissi ulenɛ kwa akkoopnɛ atumyɔng Christ. 21Ka lɔkkwɔɔn appyeeyɔng kɔlɔɔk ammɛ. Ka alenɛyɔng balɔɔt a kɔssɛ ammɛ, bakopolowɔyɔng lɔkkwɔɔn a kɔlɔɔk a Jesus. 22Akkyaayɔng linaang annyɔɔng sa iyɛddɛ-iyɛddɛ sa linaangwɔnɛyɔng ataayɔng tɛ̀ttɛ̀ aggbanɛ lissi aleyɔng afɔngɔyɔng, linaang sa babbu ikkɔlɔ annyɔɔng lilenɛ lɛtɔk libɛpɛ. 23Ippyam la itan annyɔɔng ippyɛlɛ ka bufaa ɔkkpɛlɛ annyɛ. 24Vvenɛ ayangayɔng ufaa luttina gwa Ebinukkpaapi ɛnaangnɛ tɛttɛ gwa annyɛ. Ufaa luttina ’gwɔng baang ɛyɔɔgwɛ kɛyɔɔng ka kɛfal sa lɔkkwɔɔn, sa kilenɛ bbwak, kɛyyɛɛp. 25Kɛkkala lɛlaak kɛlɔk kɛfɔngɔ lile. Ɔlɔɔt ɔkkpɛlɛ ɔlɔɔk lɔkkwɔɔn a kɔlɔɔk la wabbɛ wa ɔyanganɛ kiyila: ka ilenɛyɔng bikkeep a Christ, Uyini ayyɔɔt ɔkkpɛlɛ. 26Gɔɔ mkkpa kɔlɔɔk kutunwɔ, tɛ̀ttɛ́ kɔdɛmwɔ anaang bubbi. Gɔɔ tɛ̀ttɛ́ kutunwɔ kɛtɔm uwɔlɔlɔ. 27Tɛ̀ttɛ́ annyi Satan kufuk. 28Ɔlɔɔt wa ussinɛ uyip, ɔkkyaa ssip ɔfɔngɔ. Ɔnaang kɛnaang ɔkkɔɔnɛ ukkwoong ɔtaa ka kuddu kwa latele, usseke uttele balɔɔt ba ɔbbɔlnɛbɛ. 29Tɛ̀ttɛ́ akɔɔm babbu lammwɔɔl ka kutolo. Akɔɔm lammwɔɔl za layaamnɛ keem. Lammwɔɔl za labɔɔknɛ, lakkwoong mung lanaang ayanga bwa aggyannɛ, nkwaaning kwa alɔɔknɛ kɔyaam balɔɔt ba bagɔpɔlɔwɔnɛkwɛ. 30Tɛ̀ttɛ́ anaang kwa kule kɔnaang Kuyeeng-Ɔlɔɔmɔlɔɔm bukee. Kuyeeng kulenɛ lɛmwang za Ɔlɔɔmɔlɔɔm ɔnaangwɔnɛ ɔyɔɔ ɔttɛ ammɛ ɔyangawɔnɛ. Uwɔng baang ulenɛ nsekele wa Ɔlɔɔmɔlɔɔm ɔnaangnɛ ɔttɛ vvenɛ ɔsangawɔyɔng ka bubili. 31Akkyaayɔng kɛbbɔl ippyam la ibbyap la kitun a kɔlɔɔk afɔngɔyɔng. Kivvoko la kɛnaang a kɔfɔk kɛfɔngɔ lɛbɛlɛ lile. Latun ɔkkpɛlɛ lasaal. 32Lutini ’gwɔng, aggwoomyɔng kɔlɔɔk la luppyam gwa kɛyaam a bannyɔɔng. Asɔɔkyɔng ɔlɔɔt la vvɔn bubbi bwa ɔnaangnɛ tɛ̀ttɛ̀ Ɔlɔɔmɔlɔɔm ulewɔnɛyɔng annyɔɔng lɛsɔɔk ka Christ.

will be added

X\