EPHESIANS 3

1Ka ɛtɔk ’yɔng, anaam Paul, ɔlɔɔt a ngbakkɔpɔ a Christ Jesus ka lɛttɔ annyɔɔng Ikanakana, nzɔɔm nnyi Ɔlɔɔmɔlɔɔm. 2Kule ka lɔkkwɔɔn appyeeyɔngbong attɛyɔng Ɔlɔɔmɔlɔɔm, ka kiggwoom a kɔlɔɔk ammɛ, unnyinɛbong kɛnaang ’sɔng ɔttɛ nnaang kwa budoddo annyɔɔng ɔkkpɛlɛ. 3Ɔlɔɔmɔlɔɔm ɔyɔɔ ittina ammɛ ya lalup, ɔnaangnɛ nsanyɛ. (Nkkpɔkbong ’kwɔng mung bwɛt. 4Ɔzzànga akkwɔɔnɛyɔng bwa nlenɛ lɛkkpɔk vvenɛ asanyɔng bwa anaam nsannɛ ntum kɔlɔɔk a lalup a Christ.) 5Ka isimi ka isimi, ɔssɛbibit usi kɔlɔɔk a lalup ’kwɔng mung lippyee. Ɔzzànga Ɔlɔɔmɔlɔɔm ɔkɔɔmbong Kuyeeng ammɛ ɔyɔɔ bayilabɔtɔɔm ammɛ ba doddo la bappyee-kutolo ammɛ kɔlɔɔk a lalup ’kwɔng mung. 6Kɔlɔɔk ’kwɔng baang kule kɔttɛ; Ka kɔlɔɔk a lɛmmwɔɔl Ɔlɔɔmɔlɔɔm, Ikanakana bayangabong etini a ppyɛɛ Ɔlɔɔmɔlɔɔm tɛ̀ttɛ̀ balɔɔt a Jews. Ɔkkpɛlɛ abbɛ basseke bikkeep a kkwɔɔt ssɔn. Batulbong nsekele wa Ɔlɔɔmɔlɔɔm ɔnaangnɛ ka labɔɔk a Christ Jesus. 7Ndɔkɔ nzzanga bɔɔyi kɛbwɔɔlɔ lɛmmwɔɔl Ɔlɔɔmɔlɔɔm ka lɛsɔɔk za Ɔlɔɔmɔlɔɔm ɔsɔɔknɛnɛ ka lakke kɛnaang ammɛ. 8Nssup lussup ntta balɔɔt Ɔlɔɔmɔlɔɔm ɔkkpɛlɛ, ɔzzànga Ɔlɔɔmɔlɔɔm unnyinɛ lakke za kɛkɔɔm a Kuttu-Budoddo budoddo a Christ bwa businɛ lɛsaal, nfee Ikanakana 9nkwaaning nnaang balɔɔt ɔkkpɛlɛ basan tɛ̀ttɛ̀ ile ikɔɔm kɔlɔɔk a lalup Ɔlɔɔmɔlɔɔm doddo. Ɔlɔɔmɔlɔɔm wa ulenɛ Ɔlɔɔm-a-bɛfɛɛn ɔkkpɛlɛ ulup kɔlɔɔk a lalup ammɛ usseke bɛkkpa bya isimi bya isimi. 10Nkwaaning gedegede mung, ka kɔlɔɔk a luzɔɔm, liyeeng sa likɔɔmnɛ libat la lakke a vveeng lisan kɔlɔɔk Ɔlɔɔmɔlɔɔm la kɛssanga la kɛssanga. 11Ɔlɔɔmɔlɔɔm ɔnaang ukup tɛ̀ttɛ̀ ulenɛ Jesus Christ, Uyini ayyɔɔt, lɛkɔɔm ɔnaang kwa ɔggbanɛ lissi uttina. 12Ka ilenɛ ka bɔkaat la Christ ka kiyila sa iyanganɛ itummɛ, iyangabong lakke za kɛtaa ka ɛfɛɛn Ɔlɔɔmɔlɔɔm usiyɛlɛ lɛllɛk ɔkkpɛlɛ. 13Elleeyɔng, tɛ̀ttɛ́ akkyaayɔng ntɛtɛ afɔngɔyɔng ka nlenɛ mung ka nyɛnnɛ akama ka lɛttɔ annyɔɔng. Akama anaam ɔkkpɛlɛ nyɛn kwa budoddo annyɔɔng. 14Ka ɛtɔk ’yɔng mung, nkunbong Dedde, Ɔlɔɔmɔlɔɔm, laddu. 15Ammɛ wa unnyinɛ itutum ɔkkpɛlɛ ka libat la ɛkpansi lɛkɔɔl annyɛ za bbwak. 16Nkkpenge Dedde, Ɔlɔɔmɔlɔɔm, nttɛ lakke ammɛ lassɛ la Kuyeeng ufeewɔyɔng usseke ayangayɔng lakke ka tɔkɔlɔ annyɔɔng. 17Ɔkkɔɔnɛ Christ ɔnaang ssala ammmɛ ka ippyam annyɔɔng ka kɛyanga kiyila. Nzɔɔm nttɛ ayangayɔng lutte la iffaat ka kɛsaap, 18nkwaaning annyɔɔng la balɔɔt Ɔlɔɔmɔlɔɔm ɔkkpɛlɛ ayangayɔng lakke za kɛsan a bɔggbam la bɔlɔm, la buggolo, la bɔddɔng a kɛsaap Christ. 19Iii, butɔk asanyɔng kɛsaap ammɛ. Baala akkwoong asanyɔngsɛ ɔkkpɛlɛ, ɔzzànga vvenɛ Ɔlɔɔmɔlɔɔm ubee la annyɔɔng gaang gaang. Vvenɛ lɔtan ammɛ luyipi tɔkɔlɔ annyɔɔng. 20Ammɛ ukkwoongnɛ ɔnaang ɔsak tɛ̀ttɛ̀ ibapmɛnɛ, gɔɔ bwa ittinanɛ, ka lakke za lalenɛ ka kɛnaang ka kkwɔɔt ayyɔɔt. 21Ɔlɔɔmɔlɔɔm ulenɛ wa latele ka luzɔɔm la Christ Jesus ɛkɛtɛ ɔkkpɛlɛ, ka kɛfal a kɛfal; Kulening.

will be added

X\