EPHESIANS 2

1Ka isimi ka isimi, adɔkɔyɔng babbu ka kɛnaang a bubbi la kɛsɛlɛ latele. 2Ka ɛkɛtɛ ’yɔng baang, akupyɔng babbu linaang a vveengodde. Ateleyɔng balɔɔt ba bayanganɛ lakke ilat. Azzɛ lakke ’zɔng baang lakɔɔmnɛ balɔɔt ba basinɛ Ɔlɔɔmɔlɔɔm litele gedegede mung. 3Kule ka lɔkkwɔɔn, ɔkkpɛlɛ ayyɔɔt idɔkɔ tɛ̀ttɛ̀ abbɛ. Itaa tɛ̀ttɛ̀ lafal ayyɔɔt laggyannɛ. Inaang bwa busaapnɛ kkwɔɔt ayyɔɔt la ittina ayyɔɔt. Tɛ̀ttɛ̀ ɔlɔɔt ɔkkpɛlɛ, ayyɔɔt ɔgbaa idɔkɔ wa Ɔlɔɔmɔlɔɔm bussɛnɛ ɔnyanga la ayyɔɔt. 4Ɔzzànga kiggwoom a kɔlɔɔk Ɔlɔɔmɔlɔɔm kiggbengebong gaang ka kkwɔɔt ayyɔɔt, ɔgbaa kɛsaap ammɛ la ayyɔɔt kɛttalabong kɛsak. 5Kwakkwɛ ɛkɛtɛ idɔkɔnɛ babbu ka bubbi ayyɔɔt, Ɔlɔɔmɔlɔɔm ɔsangayɛlɛ a kɔlɔɔk Ammɛ. 6Ka ilenɛ ka bɔkaat la Christ Jesus, Ɔlɔɔmɔlɔɔm ufungalayɛlɛ la Christ ikɔɔm vveeng wa libat la ammɛ. 7Ɔnaang ’kwɔng ɔyɔɔyɛlɛ ɛkɛtɛ ɔkkpɛlɛ, ɔttɛ nkwaaning iyɛn kiggwoom a kɔlɔɔk sa lɛbaang sa kilenɛ ka Christ Jesus. 8Kule ka kiggwoom a kɔlɔɔk Ɔlɔɔmɔlɔɔm kwakkwɛ addunɛyɔng ka kɛyanga kiyila, kwa linaang annyɔɔng lissi, ule lɛsɔɔk Ɔlɔɔmɔlɔɔm. 9Bulɔk ba bule bwa ale anaangyɔng kamma atumyɔng ka asinɛyɔng lakke annyɔɔng lɛkɔɔm anaangyɔng kwɛ. 10Ɔlɔɔmɔlɔɔm ulenɛ wa ɔlɔɔmnɛyɛlɛ tɛ̀ttɛ̀ ilenɛ mung. Ka ilenɛ ka bɔkaat la Christ Jesus, ɔlɔɔmbongyɛlɛ kwa kuddu kwa kɛnaang a budoddo bwa ulenɛyɛlɛ lɛggba likoko ɔttɛ inaang. 11Annyɔɔng Ikanakana ka lɛfal ba balɔɔt a Jews bakkwɔɔwɔyɔng “Basi lɛtaa lɛzza” bakkwɔɔbɛ abbɛ kɛyɔɔng “Bazza lɛtaa” (Kɛzza lɛtaa ule iyɔɔ ya balɔɔt banaangnɛ ka kkwɔɔt abbɛ biini.) Akkeyɔng bwa ɔdɔkɔnɛ aleyɔng tɛ. 12Ka ɛkɛtɛ ya atakanɛyɔng Christ lɛkkɛtɛ, adɔkɔyɔng Ikanakana. Asiyɔng balɔɔt ba Ɔlɔɔmɔlɔɔm ɔsanganɛ lile. Etini asiyɔng lɛyanga ka kɛbɛtɛ-kɛnnɔ sa Ɔlɔɔmɔlɔɔm ɔbɛtɛnɛ ka nsekele wa ɔnaangnɛ la balɔɔt ammɛ. Ataayɔng ka vveeng ’wɔng mung gbɔɔ, luttina asiyɔng lɛyanga, gɔɔ Ebinukkpaapi asiyɔng lɛyanga. 13Ɔzzànga gedegede mung, ka bɔkaat annyɔɔng la Christ Jesus, annyɔɔng ba alenɛyɔng fulufulu assekeyɔng Ɔlɔɔmɔlɔɔm, akkɛtɛmɛyɔng ka lubbe a Christ. 14Christ biini ɔkɔɔmbong bɔkaat ufeeyɛlɛ ka utoolonɛ balɔɔt a Jews la Ikanakana basseke ɔlɔɔt vvɔn. Ɔkɔɔm kkwɔɔt ammɛ ɔbɔl kɛbat sa kɛbɛngɛlɛnɛbɛ bataa zzekep basi ka bɔkaat lile. 15Utunu Lafɔɔ balɔɔt a Jews la nsekele azzɛ, nkwaaning ɔlɔɔm kɛssanga balɔɔt ’bɔng baang baffa basseke ufaa ɔlɔɔt vvɔn ka bɔkaat la ammɛ biini. Ɔnaang bɔkaat ka ɛtɔk ’yɔng. 16Christ ɔbɛpɛbong kɔfɔk ka lubbe ammɛ ka cross. Ɔkɔɔm cross utoolo balɔɔt ’bɔng baang baffa basseke kkwɔɔt ssɔn, ɔkɔɔmbɛ uffu ka ɛfɛɛn Ɔlɔɔmɔlɔɔm. 17Ɔzzánga Christ uffu ukopolo ikaan ɔkkpɛlɛ Kuttu-Budoddo bɔkaat. Ukopolowɔyɔng annyɔɔng Ikanakana ba adɔkɔnɛyɔng fulufulu assekeyɔng Ɔlɔɔmɔlɔɔm, la balɔɔt a Jews ba balenɛ kɛtɛkɛtɛ ammɛ. 18Kussi ka Christ tɛ́ttɛ́ ayyɔɔt ɔkkpɛlɛ, balɔɔt a Jews la Ikanakana, ikkwoong iffu ka Kuyeeng kkwɔn ka lusso Dedde Ɔlɔɔmɔlɔɔm. 19Annyɔɔng Ikanakana bakekeen ba abɛlɛyɔng lile. Assekeyɔng bɔfɛɛn bbwɔn la balɔɔt Ɔlɔɔmɔlɔɔm. Atiiyɔng ka itutum nnyɔn la Ɔlɔɔmɔlɔɔm. 20Annyɔɔng ɔgbaa babɔɔkwɔyɔng ka libat a lutte gwa bayilabɔtɔɔm la bappyee-kutolo Ɔlɔɔmɔlɔɔm battenɛ. Lutte biini lulenɛ Christ Jesus. 21Ammɛ ulenɛ wa ɔkɔɔmmɛ ggwoon ɔkkpɛlɛ aggwɛ kkɔk. Ɔnaang gwɛ lɔmmala lule Ggwoon-Ɔlɔɔmɔlɔɔm. 22Ka alenɛyɔng ka bɔkaat la ammɛ, annyɔɔng ɔgbaa batoolowɔyɔngbong la balɔɔt balɔk babɔɔk ɛfɛɛn ya Ɔlɔɔmɔlɔɔm ɔtaanɛ ka Kuyeeng ammɛ.

will be added

X\