EPHESIANS 1

1Lɛmmwɔɔl ’zɔng Paul wa kɔsaapnɛ Ɔlɔɔmɔlɔɔm ɔnaangmɛ ɔ̀zzánga uyilabɔtɔɔm a Jesus Christ, ɔkkpɔknɛ ufee balɔɔt Ɔlɔɔmɔlɔɔm ba balenɛ ka Ephesus; ba bayanganɛ kiyila ka bɔkaat abbɛ la Christ Jesus. 2Dedde ayyɔɔt, Ɔlɔɔmɔlɔɔm, la Uyini ayyɔɔt, Jesus Christ, banaangwɔyɔng ppyɛɛ bannyiwɔyɔng bɔkaat. 3Affu iwomoyɔng Ɔlɔɔmɔlɔɔm, Abassɛ Uyini ayyɔɔt, Jesus Christ, kɛnaang ka ulenɛyɛlɛ ppyɛɛ lɛnaang ka bɔkaat ayyɔɔt la Christ. Ka ulenɛyɛlɛ linnyi lutini lɛsɔɔk a Kuyeeng-Ɔlɔɔmɔlɔɔm ɔkkpɛlɛ za vveeng wa libat. 4Bong tɛ́ttɛ́ ɛkpansi ele la kɔnaang, Ɔlɔɔmɔlɔɔm ɔggbayɛlɛ lɛsanga ɔttɛ ile ba ammɛ ka Christ nkwaaning ile ba doddo isɛlɛ bubbi ka lusso Ammɛ. Kɛsaap sa isaapnɛ Ɔlɔɔmɔlɔɔm 5kɛnaangbong Ɔlɔɔmɔlɔɔm ɔggba luttina lɛnaang ɔttɛ vvenɛ issɛ la Jesus Christ ɔkɔɔmyɛlɛ umii ka ɛfɛɛn ammɛ isseke bwaan ammɛ. Uwɔng ulenɛ laggele ammɛ la luttina ammɛ. 6Ibunguyɔng Ɔlɔɔmɔlɔɔm ka kiggwoom a kɔlɔɔk ammɛ sa lɛbaang ka lɛsɔɔk za ulenɛyɛlɛ linnyi ka Waan ammɛ wa luppyam. 7Lubbe gwa Christ ubbenɛ ɔnaangbonyɛlɛ itta ka kɔlɔɔk. Kwakkwɛ bubbi ayyɔɔt bulenɛ la kɛsɔɔk lile. Uwɔng baang ulenɛ tɛ̀ttɛ̀ Ɔlɔɔmɔlɔɔm ɔyɔɔnɛyɛlɛ kiggwoom a kɔlɔɔk ammɛ. 8Unnyibongyɛlɛ bɔfɛɛn bwa lɛbaang ka bisana ammɛ ɔkkpɛlɛ la kwa uttinanɛ. 9Ɔlɔɔmɔlɔɔm ɔdɔkɔ ɔnaang kwa uttinanɛ. Ɔnaangyɛlɛ isan kɔlɔɔk a lalup kwa ɔggbanɛ littina ɔttɛ vvenɛ ɔnaangkwɛ kɔsaal ka ɛkɛtɛ ule ɔtɔɔm Christ uffu. 10Lutini gwa Ɔlɔɔmɔlɔɔm ulenɛ litini ɔttɛ vvenɛ ɔnaanggwɛ lɔsaal ka ɛkɛtɛ ya bbwak, ule kɛttɛ vvenɛ ɔsam bɛfɛɛn ɔkkpɛlɛ bya ulenɛ lɛlɔɔm uloko ɛfɛɛn kkwɔn. Christ ule uzzilɛttɔ lutini bɔfɛɛn ɔkkpɛlɛ bwa bulenɛ ka libat la bwa bulenɛ ka ɛkpansi. 11Bɛfɛɛn ɔkkpɛlɛ bɛnaang tɛ̀ttɛ̀ Ɔlɔɔmɔlɔɔm uttinanɛ. Ɔzzànga Ɔlɔɔmɔlɔɔm ɔsangayɛlɛ ɔttɛ ile balɔɔt ammɛ biini ka bɔkaat ayyɔɔt la Christ. Nkwɔng kulenɛ kwa uttinanɛ kɛnaang ka ussinɛ ka lutte. 12Ɔzzànga, ayyɔɔt ba ikɔɔmnɛ ɛtɔk ittina kwa Christ, ibunguyɔng lakke Ɔlɔɔmɔlɔɔm. 13Kɔssɛ kule ning baang la annyɔɔng ɔgbaa: Ka ɛkɛtɛ appyeenɛyɔng bɔtɔɔm bwa lɔkkwɔɔn, bwa bulenɛ Kuttu-Budoddo Ɔlɔɔmɔlɔɔm kwa kɔkɔɔmnɛ ikkala kufeewɔyɔng, ayilayɔng kwa Christ. Ɔlɔɔmɔlɔɔm ɔnaangwɔyɔng eleme ka kkwɔɔt ɔttɛ ammɛ ulenɛ uyini annyɔɔng ka kinnyiwɔyɔng Kuyeeng-Ɔlɔɔmɔlɔɔm kwa ulenɛ lisekele. 14Kuyeeng kulenɛ iyɔɔ kɛttɛ vvenɛ itɔk bwa Ɔlɔɔmɔlɔɔm ulenɛ liloko ɔttɛ vvenɛ unnyi balɔɔt ammɛ. Kɔnaangyɛlɛ isan ittɛ Ɔlɔɔmɔlɔɔm vvenɛ unnyi balɔɔt ammɛ lakke bassɛ ɔkkyaabɛ. Ibunguyɔng lakke ammɛ. 15Ka ’kwɔng mung, nggba lippyee kiyila sa ayanganɛyɔng ka Uyini, Jesus, la kɛsaap sa balɔɔt Ɔlɔɔmɔlɔɔm basaapwɔnɛyɔng. 16Kiwomo Ɔlɔɔmɔlɔɔm nkkalawɔyɔng ba ntaka nkkyaa nfɔngɔ. Nle baang ka nkkewɔnɛyɔng ka luzɔɔm anaam. 17Nbap Ebinukkpaapi ya ɛyanganɛ Uyini ayyɔɔt, Jesus Christ, Dedde lakke ɔkkpɛlɛ, nttɛ unnyiwɔyɔng Kuyeeng ammɛ, kwa kule kɔnaangwɔyɔng asanmɛyɔng. 18Nkkpenge Ɔlɔɔmɔlɔɔm nttɛ zzeen annyɔɔng lawongolo ayɛnyɔng buppwolo ammɛ nkwaaning asanyɔng bwa luttina ammɛ gwa ɔkkwɔɔwɔnɛyɔng kwakkwɛ lulenɛ. Nkwaaning asanyɔng tɛ̀ttɛ̀ ppyɛɛ ammɛ wa bikɛɛlɛ, wa ulenɛ balɔɔt ammɛ lisekele uggbengenɛ. 19Nkwaaning asanyɔng tɛ̀ttɛ̀ lakke ammɛ za lalenɛ ka kɛnaang ka kkwɔɔt ayyɔɔt balɔɔt ba iyanganɛ kiyila laggbengenɛ laffɔ. Lakke za lalenɛ ka kkwɔɔt ayyɔɔt mung lale ikɛlɛlɛ la lakke Ɔlɔɔmɔlɔɔm. 20Uwɔng ulenɛ lakke za Ɔlɔɔmɔlɔɔm ɔkɔɔmnɛ ka ɛkɛtɛ ya ufungalanɛ Jesus Christ ka lubbe, ɔnaangmɛ ɔtaa ka kɔbɔɔk ɛlaabɔɔk ammɛ ka libat. 21Christ ɔkɔɔmnɛ bazzilɛttɔ ɔkkpɛlɛ, ba libat la ɛkpansi, la lakke bayini. Ɔlɔɔmɔlɔɔm unnyimɛbong lɛkɔɔl za lɛttanɛ lakɔɔl ɔkkpɛlɛ ka vveeng mung la vveeng wa ule uffu. 22Ɔlɔɔmɔlɔɔm ɔsam bɛfɛɛn ɔkkpɛlɛ uloko Christ using bukkpɔ, ɔsammɛ unnyi luzɔɔm ɔttɛ ule uzzilɛttɔ la Uyini bɛfɛɛn ɔkkpɛlɛ. 23Luzɔɔm lulenɛ kkwɔɔt a Christ. Aggwɛ lulenɛ ɔkkpɛlɛ ammɛ wa ɔnaangnɛ bɛfɛɛn ɔkkpɛlɛ ka ifɛɛn ka ifɛɛn.

will be added

X\