COLOSSIANS 4

1Ibassɛ babili, akɔɔmyɔng babili annyɔɔng doddo. Akke attɛyɔng annyɔɔng assɛ ayangayɔng ssaawɔ wa annyɔɔng ka libat. 2Assɛɛnyɔng luzɔɔm ɛkɛtɛ ɔkkpɛlɛ. Agepeleyɔng ka azɔɔmnɛ annyiyɔng Ɔlɔɔmɔlɔɔm la kiwomo kɛnaang. 3Ka ɛkɛtɛ nnyɔn ’yɔng baang assɛ azɔɔm annyiyɔngyɛlɛ ayyɔɔt, nkwaaning Ɔlɔɔmɔlɔɔm unnyiyɛlɛ kufuk kwa kikopolo lɛmmwɔɔl ammɛ la kɛbwɔɔlɔ kɔlɔɔk a lalup a Christ. Akkwɛ baang kulenɛ kwa nlenɛ ka igbakkɔpɔ. 4Azɔɔmyɔng nkwaaning nlɔɔk ppwool ppwool tɛ̀ttɛ̀ kulenɛ bbwak. 5Akɔɔmyɔng kɛsan a kɔlɔɔk ataayɔng la balɔɔt ba basinɛ kiyila lɛyanga. Waan a kufuk duu kwa ayanganɛyɔng, akɔɔmnɛyɔng doddo. 6Kutolo annyɔɔng kɔyyɛɛp, kuggwoom ɔlɔɔt ɔkkpɛlɛ ɛkɛtɛ duu. Asanyɔng tɛ̀ttɛ̀ appyɛlɛnɛyɔng kamma kayyɛɛp ka lɔbap gwa ɔlɔɔt ɔbapnɛ. 7Tichycus, ɔkpana ayyɔɔt wa luppyam, wayyɔɔt a bɔɔyi, wa ulokonɛ luttina ka kɛnaang Uyini, vvenɛ ɔbwɔɔlɔwɔyɔng kɔlɔɔk anaam ɔkkpɛlɛ. 8Kwakkwɛ nle ka ntɔɔmmɛnɛ uffu ɔnaangwɔyɔng aggeleyɔng, ka ule ɔbwɔɔlɔwɔyɔng tɛ̀ttɛ̀ ɔkkpɛlɛ ayyɔɔt ilenɛ baang ka inaangnɛ. 9Ammɛ la Onesimus, ɔkpana ayyɔɔt wa luppyam wa ulenɛ ka likup annyɔɔng ɔssɛ ule utele a zzeen ka kɛnaang Uyini vvenɛ baffu. Baffunɛ, vvenɛ babwɔɔlɔwɔyɔng kwa kɔnaangnɛ kaang ɔkkpɛlɛ. 10Aristarchus wa ulenɛ ka igbakkɔpɔ mung la anaam ɔttɛ nwomowɔyɔng. Mark, waan etele a abassɛ a Barnabas ɔgbaa ɔttɛ nwomowɔyɔng. (Aggbayɔng lippyee bwa ale anaangyɔng ɛkɛtɛ duu ya ule uffu ka ɛfɛɛn annyɔɔng.) 11Joshua, wa bakkwɔɔmɛnɛ Justus, ɔttɛ nwomowɔyɔng. Balɔɔt ba bakkyaat ’bɔng mung balenɛ balɔɔt a Jews ba ittina ilenɛbɛ lisikili bakupnɛ, banaang kɛnaang la anaam ka Itutum-Ɔlɔɔmɔlɔɔm. Abbɛ balenɛ balɔɔt ba battelenɛnɛ gaang gaang. 12Epaphras, bɔɔyi a Christ, wa ɔssɛnɛ ule ka likup annyɔɔng ɔttɛ nwomowɔyɔng. Ɔzɔɔm ɛkɛtɛ ɔkkpɛlɛ unnyiwɔyɔng ɔbap Ɔlɔɔmɔlɔɔm ɔttɛ ɔnaangwɔyɔng ayangayɔng kiyila sa kɛkkaamnɛ, kiggbenge. Asikiliyɔng ippyam annyɔɔng ɔkkpɛlɛ atelemɛyɔng ka kɛnaang ammɛ. 13Anaam biini nkkwoong mung nbwɔɔlɔwɔyɔng nttɛ ɔnaang kɛnaang gaang gaang unnyiwɔyɔng, annyɔɔng la balɔɔt a Laodicea la balɔɔt a Hierapolis. 14Luke, dongkitta ayyɔɔt wa luppyam, la Demas battɛ nwomowɔyɔng. 15Awomoyɔng ikpana ayyɔɔt ba balenɛ ka Laodicea, la Nympha la luzɔɔm gwa lɔtaanɛ ka ssala ammɛ. 16Alenɛyɔng lɛmmwɔɔl ’zɔng mung livve lɛkkwɔɔ, assɛ akkwɔɔyɔngzɛ abwɔɔlɔyɔng luzɔɔm gwa Laodicea. Assɛ akkwɔɔyɔng lɛmmwɔɔl za balɔɔt a Laodicea bale bannyiwɔyɔng. 17Abwɔɔlɔyɔng Archippus attɛyɔng, “Asan attɛ vvenɛ avve kɛnaang sa bannyiwɔnɛ battɛ anaang annyi Uyini tɛ.” 18Anaam nkɔɔmnɛ kɔbɔɔk anaam nkkpɔk ’kwɔng: Anaam Paul nwomowɔyɔngbong. Tɛ̀ttɛ́ asumalayɔng ikpɔkɔlɔ ya ilenɛnɛ ka labɔɔk. Ɔlɔɔmɔlɔɔm ɔnaangwɔyɔng ppyɛɛ.

will be added

X\