COLOSSIANS 3

1Afungalayɔngbong ka lubbe la Christ. Appyɛɛ asam ippyam annyɔɔng annyiyɔng bɛfɛɛn bya bilenɛ ka libat, ka ɛfɛɛn a Christ ɔtaanɛ ka kɔbɔɔk ɛlaabɔɔk Abassɛ, Ɔlɔɔmɔlɔɔm. 2Asam ittina annyɔɔng alokoyɔng ka bɛfɛɛn ’byɔng bakang, tɛ̀ttɛ́ alokoyɔngyɛ ka bɛfɛɛn bya ɛkpansi mung. 3Abbeyɔngbong, ɔzzànga Ɔlɔɔmɔlɔɔm ɔtɔkbong kuddu annyɔɔng la kwa Christ ulup ka kkwɔɔt ammɛ. 4Kuddu annyɔɔng biini ulenɛ Christ. Ɛkɛtɛ ya Ɔlɔɔmɔlɔɔm ule ɔnaang Christ wa ulenɛ kuddu annyɔɔng ɔtta ka vveeng, annyɔɔng ɔgbaa vvenɛ assɛ attayɔng ayangayɔng etini ka lakke la latele ammɛ. 5Awwɔɔlyɔng kɛsaap a bɛfɛɛn ’byɔng ɔkkpɛlɛ bya bilewɔnɛyɔng ka kkwɔɔt. Abbyɛ bilenɛ kɛssɛ-kɛzak, kɛbbɔl a tɔkɔlɔ, babbu linaang, ikkɔlɔ, ubbu luttina. (Kuwɔnɔk kɔtaa tɛ̀ttɛ̀ kɛzɔɔm ɛlat) 6Ka bɛfɛɛn ’byɔng mung, Ɔlɔɔmɔlɔɔm vvenɛ ɔnyanga la balɔɔt ba bafimmɛnɛ kitele. 7Annyɔɔng ɔgbaa ɛkɛtɛ ɛdɔkɔ baang ya akupnɛyɔng babbu linaang ’sɔng baang ka ɛkɛtɛ lafal annyɔɔng latiinɛ ka kɔkɔɔm a bɛfɛɛn ’byɔng baang. 8Ɔzzànga gedegede mung ɔllɛ ka akkyaanɛyɔng bɛfɛɛn ’byɔng ɔkkpɛlɛ afɔngɔyɔng: Kitun a kɔlɔɔk, kɛssɔp a luppyam la luttina kɛnaang a kɔfɔk. Tɛ̀ttɛ́ babbu lilɔɔk sa libbɔlnɛ libɛlɛwɔyɔng ka kamma lɛtta. 9Tɛ̀ttɛ́ akkala wannyɔɔng lɛlaak ka alenɛyɔng ɔtɔm a lafal lɛkkyaa azzɔɔkyɔng la babbu linaang assɛ, 10aleyɔng ufaa lɛyanga. Uwɔng ulenɛ ufaa ɔlɔɔt wa Ɔlɔɔmɔlɔɔm ɔlɔɔm assɛ, ulenɛ baang ka ɔnaangnɛsɛ ɛkɛtɛ ɔkkpɛlɛ liyyɛɛp tɛ̀ttɛ̀ ammɛ. Ɔnaang ning mung nkwaaning asanmɛyɔng gaang gaang. 11Kwakkwɛ baang Wakanakana usinɛ lile, wa Jews usi lile, bazza lataa la basi lataa lɛzza basi lile. Batolo babbu likaan ba babɛlɛ lile. Babbyap ba bale. Babili ba babɛlɛ lile. Basi babili lile ba babɛlɛ lile. Christ ulenɛ ɔkkpɛlɛ abbɛ. Ulebɛ ka tɔkɔlɔ ɔkkpɛlɛ. 12Annyɔɔng, balɔɔt-Ɔlɔɔmɔlɔɔm, asaapmɛyɔng lɔsaap tɛ́ttɛ́ ɔsangawɔyɔng ɔttɛ aleyɔng ba ammɛ. Ka kulenɛ ning lile, ɔllɛ ka ɔlɔɔt ubbewɔnɛyɔng lɛttɔ. Aggwoomyɔng kɔlɔɔk, ateleyɔng ɔlɔɔt, abbeyɔng luppyam ka kɔlɔɔk, akɔɔmwɔyɔng kɛyɔɔng ɔgbaa. 13Ayaamyɔng wannyɔɔng. Asɔɔkyɔng wannyɔɔng bubbi bwa ɔnaangnɛ la annyɔɔng. Ule ɔllɛ ka asɔɔknɛyɔng wannyɔɔng bubbi tɛ̀ttɛ̀ Uyini ulewɔnɛyɔng annyɔɔng lɛsɔɔk. 14Asamyɔng kɛsaap anɔkyɔng baang la abbyɛ, usseke kɛggbɔbyɛ kiloko ɛfɛɛn kkwɔn ka bɔkaat bwa lɔkkwɔɔn. 15Bɔkaat bwa Christ unnyinɛ butaa tɛ̀ttɛ̀ ikata ka ippyam annyɔɔng. Kussi ka bɔkaat ’bwɔng mung Christ ulokowɔyng ka kkwɔɔt ssɔn. Aggeleyɔng gaang gaang ka akkwɛ mung. 16Lɛmmwɔɔl a Christ ɔkkpɛlɛ azzɛ lɛtaa la annyɔɔng ɔkkpɛlɛ ka ippyam. Akopolowɔyɔng kɛyɔɔng ka itɔk a lilɔɔk ɔkkpɛlɛ ya bisana. Asoomyɔng kisoom a kutolo a David, la bisoom bya bɛllɔtnɛ buyili annyiyɔng Ɔlɔɔmɔlɔɔm la kiwomo kɛnaang ka ippyam. 17Kɔlɔɔk duu kwa anaangnɛyɔng, ɔlɔk alɔɔkyɔng kɔ̀ppyɛ́ɛ̀ kutum Jesus Uyini, ka assɛnɛyɔng ka ammɛ awomoyɔng abassɛ Ɔlɔɔmɔlɔɔm kɛnaang. 18Bwanavva ssala bwalam, ateleyɔng bwalam annyɔɔng, ka ulenɛ kukkam a kɔlɔɔk kwa kɛnaang ka alenɛyɔng balɔɔt a kɔssɛ Uyini. 19Batɔk a bwanavva, bwanavva annyɔɔng basaapwɔyɔng, tɛ̀ttɛ́ anyangayɔngbɛ. 20Bwɔɔntiti ateleyɔng issakawɔ la issaawɔ annyɔɔng. Uwɔng baang ulenɛ kɛnaang annyɔɔng balɔɔt a kɔssɛ Uyini. Nkwɔng kulenɛ kwa kɔsaapnɛ Ɔlɔɔmɔlɔɔm. 21Ibassɛ a bwɔɔn, tɛ̀ttɛ́ anaangyɔng bwaan annyɔɔng kɔlɔɔk kwa kutunnɛbɛ, vvenɛ bási kwa ssɔng lɛbɛlɛ lɛnaang. 22Annyɔɔng babili ateleyɔng issaawɔ annyɔɔng ya ɛkpansi ka itɔk a lilɔɔk ɔkkpɛlɛ. Tɛ̀ttɛ́ anaangyɔng kwa ɛdda ɔlɔk babunguwɔyɔng. Ɔllɛ ka anaangnɛyɔng kwa ka kɛyyɛɛp a luppyam ka alenɛyɔng ba Uyini. 23Bɔfɛɛn duu bwa anaangnɛyɔng, anaangyɔngbwɛ tɛ̀ttɛ̀ anaangnɛ annyiyɔng Uyini. Tɛ̀ttɛ́ anaangyɔng tɛ̀ttɛ̀ anaangnɛ annyiyɔng balɔɔt ɛkpansi. 24Akke asan attɛyɔng Ɔlɔɔmɔlɔɔm vvenɛ ɔsɔɔkwɔyɔng bwa ulenɛ balɔɔt ammɛ liloko. Christ ulenɛ ssaawɔ annyɔɔng wa anaangnɛyɔng kɛnaang ammɛ. 25Ɔnaang-a-bubbi duu vvenɛ ɔssɛ ɔyanga ikipili ɔssanga kɛssanga kɔlɔɔk kwa ɔnaangnɛ. Ɔlɔɔmɔlɔɔm ɔkaal kɛkaal ɔssɛbibit ɔkkpɛlɛ la kamma kɛkaal kkwɔn.

will be added

X\