COLOSSIANS 2

1Ssiibong nbwɔɔlɔwɔyɔng tɛ̀ttɛ̀ nlenɛ kɛnaang lɛnaang ka lɛttɔ balɔɔt a Laodicea ɔbɛtɛ la balɔɔt ba batakanɛnɛ ka zzeen lɛyɛn. 2Nkwɔng mung nnaang nkwaaning bakkaam luppyam, ɔlɔk baffu bataa ɛfɛɛn kkwɔn ka kɛsaap, bayanga iyyɛɛp ya lɔkkwɔɔn ya kɛsan a kɔlɔɔk sa bbwak kile kɛkɔɔm kiffu. Vvenɛ basan Christ biini, wa ulenɛ bwa Ɔlɔɔmɔlɔɔm ulupnɛ. 3Ammɛ ulenɛ ɛkpɔkɔlɔ ya ewongolonɛ libɔngɔ iyyɛɛp la bisana, la kukele Ɔlɔɔmɔlɔɔm ɔkkpɛlɛ. 4Nbwɔɔlɔwɔyɔng nttɛ tɛ̀ttɛ́ afɔngɔyɔng ɔlɔɔt ɔlɔk ɔkɔɔmwɔyɔng ugbigbini ka kɛyyɛɛp a kamma. 5Mkkpa nsi lile la annyɔɔng ka ɛkkpa-kkwɔɔt nle baang la annyɔɔng ka kuyeeng. Nggele ngbaa ka nyɛnwɔnɛyɔng kkpɔk ka abeenɛyɔng ka kiyila annyɔɔng ka Christ. 6Ataayɔng ka bɔkaat la Christ Jesus ka alemɛnɛyɔng tɛ̀ttɛ̀ Uyini annyɔɔng lɛtɔk. 7Iffaat annyɔɔng imal ddɔng ka kkwɔɔt a Christ. Abɔɔkyɔng lɛfal annyɔɔng ka libat ammɛ. Assekeyɔng kkɔk ka akkaamnɛyɔng ka kɛnaang ammɛ la kiyila tɛ̀ttɛ̀ bakopolowɔnɛyɔng. Kiwomo kɛnaang kɛttalawɔyɔng ka ippyam. 8Asanyɔng tɛ̀ttɛ́ ɔlɔɔt uffu ɔkɔɔm kɛsan a kukele sa vveeng ’wɔng mung ɔdɛmwɔyɔng. Kɛsan a kɔlɔɔk ’sɔng kissi ka lukopolo gwa ɔssɛbibit la liyeeng ɛkpansi likopolonɛ, ka Christ ba kissi. 9Ɔlɔɔmɔlɔɔm ɔkkpɛlɛ ammɛ ullu ka Christ ka lɛfal ammɛ tɛ̀ttɛ̀ ɔlɔɔt. 10Ɔlɔɔmɔlɔɔm unnyiwɔyɔngbong kuddu kwa bbwak ka bɔkaat annyɔɔng la Christ. Ammɛ ɔttanɛ lutini lakke ɔssɛbibit ɔkkpɛlɛ ka vveeng ’wɔng mung. 11Ussi ka bɔkaat bwa ayanganɛyɔng la Christ tɛ́ttɛ́ bazzawɔyɔng lataa. Kɛzza lɛtaa sa balɔɔt bazzanɛ lissi, sa Christ biini ɔzzanɛ. Assɛ kilenɛ, kɛ̀ttá ka lakke bubbi a kkwɔɔt ’sɔng. 12Ka banaangwɔnɛyɔng baptizim, balliwɔyɔngbong la Christ. Ka baptizim ’wɔng baang ɔgbaa, assɛbong afungalayɔng ka lubbe la Christ ka kiyila sa ayanganɛ atumyɔng lakke Ɔlɔɔmɔlɔɔm wa ufungalanɛ Christ ka lubbe. 13Ɛkɛtɛ ɛdɔkɔ baang ya abbenɛyɔng ka ittina annyɔɔng ɔssanga bubbi bwa anaangnɛyɔng. Ɔgbaa ka alenɛyɔng Ikanakana asɛlɛyɔng Lifɔɔ. Ɔzzànga Ɔlɔɔmɔlɔɔm ufungalawɔyɔngbong ka lubbe assekeyɔng ka kuddu la Christ. Ɔlɔɔmɔlɔɔm ɔsɔɔkbongyɛlɛ bubbi ayyɔɔt ɔkkpɛlɛ. 14Ɔlɔɔmɔlɔɔm ɔlɔmbong luffik a bubbi annyɔɔng ubbum la lafɔɔ abbwɛ ɔkkpɛlɛ. Ususukubong ippwoot a bubbi ayyɔɔt ’yɔng baang ɔkkpɛlɛ ka ɔsamnɛyɛ ɔkama bɛfɔl ɔkaka ka Cross. 15Christ ɔssɛ la Cross ’wɔng baang ɔtta ka labɔɔk a bakɔɔm-a-liyeeng, la bayanga-lakke ɔkkpɛlɛ. Ɔnaangbɛ basseke bɔfɛɛn a lɛppyɛɛk ka battulunɛ bɛkaan bakupmɛ tɛ̀ttɛ̀ battɔ-ka-kɔlɔɔk ɛkɛtɛ ɔbɛtɛnɛ ɔkkpɛlɛ. 16Tɛ̀ttɛ́ ɔlɔɔt ɔlɔk unnyiwɔyɔng lafɔɔ utum kazzi ɔlɔk kɛvva. Gɔɔ tɛ̀ttɛ́ ɔssɛɛnzɛ utum lavve za kiloko ɔlɔk lɛtɔm Ufaa Ettuma, ɔlɔk Kɛfɛkɛlɛ. 17Bɛfɛɛn ’byɔng ɔkkpɛlɛ bilenɛ kuyeeng a bɛfɛɛn bya bile bɛnaang ka lusso; Christ ulenɛkwɛ akkwɛ ssɔng. 18Tɛ̀ttɛ́ afɔngɔyɔng ɔlɔɔt wa uffikmɛnɛ kɛyɔɔng ɔttɛ ammɛ uggboggbo ɔlɔɔt utum biyɛnɛ bya ɔyɛnnɛ ɔnaangwɔyɔng attɔyɔng ka ubbu kɔlɔɔk. Ɔzzanga ɔttɛ bukkengga ammɛ butum ka kɛnaang ɛnngwa la Uyilabɔtɔɔm Ɔlɔɔmɔlɔɔm. Kɛssanga ɔlɔɔt sa ning baang kile ukun wa gbɔɔ ka babbu ittina ammɛ la linaang. 19Ɔlɔɔt ’wɔng baang ɔkkyaabong kiloko luttina ka Christ wa ulenɛ lɛttɔ a kkwɔɔt ɔfɔngɔ. Ka ilenɛ ka kɛkɔɔm a Christ kkwɔɔt lileyɛlɛ fulɛfulɛ. Lagbeel la bɛffaat bɛnaangsɛ likkaam, limmala tɛ̀ttɛ̀ Ɔlɔɔmɔlɔɔm ɔggyannɛ. 20Abbeyɔngbong la Christ, bakkyaawɔyɔngbong ka lilɔɔk a vveeng ’wɔng bafɔngɔ. Mbɔng tɛ́ttɛ́ atiiyɔng baang ka anaangnɛyɔng tɛ̀ttɛ̀ alenɛyɔng ba vveeng ’wɔng? Mbɔng tɛ́ttɛ́ ateleyɔng lafɔɔ tɛ̀ttɛ̀ ’zɔng: 21“Tɛ̀ttɛ́ asingiyɔng mbwɔng”, “Tɛ̀ttɛ́ allɛyɔng mbwɔng kang,” “Tɛ̀ttɛ́ asingiyɔng mbbwakang.”? 22Bɛfɛɛn ’byɔng mung ɔkkpɛlɛ balenɛ lɛffɔ bakɔɔmbyɛ, bisseke bya kɛzzɔɔk. Uwɔng baang lafɔɔ ɔlɔɔt ɔnaangnɛ, ɔkɔɔm ukopolo. 23Ɔzzánga ka ayɛnnɛbɛ bataa tɛ̀ttɛ̀ basannɛ kɔlɔɔk ka kɛzɔɔm kinnyi bayilabɔtɔɔm Ɔlɔɔmɔlɔɔm la kɛbbwa bukee-waan, la kɛnaang a bɛfɛɛn a bɔssɔp ka kkwɔɔt ɔlɔɔt; kwa kɛkat a kkwɔɔt abbɛ ba battina. Ɔzzànga isak ya lɔkkwɔɔn ba bayanga ka bayɛnnɛ akama kkwɔɔt ’wɔng.

will be added

X\