COLOSSIANS 1

1Paul, wa kɔsaapnɛ Ɔlɔɔmɔlɔɔm ɔnaangmɛ ɔttɛ ɔ̀zzánga Uyilabɔtɔɔm a Christ Jesus, ɔkkpɔknɛ lɛmmwɔɔl ’zɔng la ɔkpana ayyɔɔt Timothy 2ifee balɔɔt Ɔlɔɔmɔlɔɔm ba balenɛ ka Colossae bale ikpana ayyɔɔt ka kiyila ka Christ Jesus. Dedde ayyɔɔt, Ɔlɔɔmɔlɔɔm, ɔnaangwɔyɔng ppyɛɛ unnyiwɔyɔng bɔkaat. 3Iwomo Ɔlɔɔmɔlɔɔm, Abassɛ Uyini ayyɔɔt, Jesus Christ, kɛnaang ɛkɛtɛ ɔkkpɛlɛ ya izɔɔmnɛ issɛɛnwɔyɔng. 4Ippyeebong kwa kiyila annyɔɔng ka Christ Jesus la kɛsaap sa balɔɔt Ɔlɔɔmɔlɔɔm ɔkkpɛlɛ basaapwɔnɛyɔng. 5Ka ɛkɛtɛ ya lɛmwɔɔl za lɔkkwɔɔn za lilenɛ Kuttu-Budoddo Ɔlɔɔmɔlɔɔm littenɛ liffu, appyeeyɔng luttina gwa lɛssɛɛnnɛ. Kwakkwɛ kiyila annyɔɔng la kɛsaap bilenɛ ka kwa attinanɛ atumyɔng. Akkwɛ kulenɛ kwa bale babɔngɔlɔwɔyɔng kwɛ ka budoddo ka libat. 6Kuttu-budoddo Ɔlɔɔmɔlɔɔm kɔkɔɔm ppyɛɛ kufeewɔyɔng. Kule baang ka kɔwaalanɛ ɛkpansi tɛ̀ttɛ̀ kɔnaangnɛ la annyɔɔng ka ussinɛ ka kɛtɔm sa appyeenɛyɔng kwɛ asanyɔng tɛ̀ttɛ̀ kulenɛ ka lɔkkwɔɔn. 7Akkoopyɔngbong kɔlɔɔk a ppyɛɛ Ɔlɔɔmɔlɔɔm ka Epaphras wayyɔɔt a bɔɔyi wa ɔnaangnɛ kɛnaang doddo unnyi Christ ka lɛttɔ ayyɔɔt. 8Ɔbwɔɔlɔyɛlɛ kɔlɔɔk a kɛsaap sa Kuyeeng-Ɔlɔɔmɔlɔɔm kulewɔnɛyɔng linnyi. 9Kwakkwɛ baang izɔɔmnɛ ɛkɛtɛ ɔkkpɛlɛ issɛɛnwɔyɔng ka issinɛ ippyee kɔlɔɔk annyɔɔng. Ibap Ɔlɔɔmɔlɔɔm ittɛ unnyiwɔyɔng bikɔɔm la kɛsan a kɛnaang ammɛ, la bɛfɛɛn bya Kuyeeng kunnyinɛ. 10Ning vvenɛ ataayɔng tɛ̀ttɛ̀ Uyini ɔggyannɛ, anaangyɔng kwa kɔsaapmɛnɛ ɛkɛtɛ ɔkkpɛlɛ. Lafal annyɔɔng vvenɛ layyɛɛp ka utini linaang sa doddo ɔkkpɛlɛ. Vvenɛ ammalayɔng ka kɛsan a kɔlɔɔk Ɔlɔɔmɔlɔɔm. 11Ɔlɔɔmɔlɔɔm ɔnaangwɔyɔng ɔkkpɛlɛ annyɔɔng akkaamyɔng, la lakke ɔkkpɛlɛ za lassinɛ ka ammɛ, nkwaaning akkwoong abbɔyɔng akama la kibbe luppyam. 12Awomoyɔng Dedde Ɔlɔɔmɔlɔɔm kɛnaang la laggele. Ɔnaangwɔyɔng akkɔnɔyɔng kitul a bɛfɛɛn bya ɔbɔngɔlɔnɛ balɔɔt ammɛ ka ɛsam a buppwolo. 13- 14Ɔlɔɔmɔlɔɔm ɔkkalabongyɛlɛ ka labɔɔk a lakke bubbi, ɔkɔɔmyɛlɛ la bɔppwa kkwɔɔt uffu ka ɛsam a Waan ammɛ wa luppyam wa ɔsanganɛ ka kɔlɔɔk. Kɛsanga ka kɔlɔɔk ulenɛ kɛttɛ Ɔlɔɔmɔlɔɔm ɔsɔɔkbongyɛlɛ bubbi ayyɔɔt. 15Christ ulenɛ Ɔlɔɔmɔlɔɔm wa iyɛnnɛ isan Ɔlɔɔmɔlɔɔm wa isinɛ lɛyɛn. Ammɛ ulenɛ Waan wa battenɛ lɛmaat. Ammɛ ɔttanɛ bɛfɛɛn ɔkkpɛlɛ bya Ɔlɔɔmɔlɔɔm ɔlɔɔmnɛ. 16Ɔlɔɔmɔlɔɔm ɔkɔɔmmɛ ammɛ ɔlɔɔm bɛfɛɛn ɔkkpɛlɛ ka libat la ɛkpansi, bya iyɛnnɛ la bya isinɛ lɛyɛn, liyeeng, bakɔɔm-ɛfɛɛn la bazzilɛttɔ. 17Ammɛ uttenɛ bɛfɛɛn ɔkkpɛlɛ lɛfal liffu. Bɛfɛɛn ɔkkpɛlɛ bɛtaanɛ ka bɔkaat la ammɛ, bɛyanga kɛtaa abbyɛ sa bbwak. 18Ammɛ ulenɛ lɛttɔ a kkwɔɔt ammɛ, sa lilenɛ luzɔɔm. Kuddu a kkwɔɔt ɔkkpɛlɛ kussi ka ammɛ. Ammɛ ulenɛ ɔkɔɔm-ɛtɔk, Awaan wa ufungalanɛ ka lubbe, nkwaaning ammɛ kɛyɔɔng ɔkɔɔm ɛtɔk ɔyanga bɛfɛɛn ɔkkpɛlɛ. 19Kɔdɔkɔ ka luttina Ɔlɔɔmɔlɔɔm biini tɛ́ttɛ́ Awaan ɔyanga lɛfal za lɔkkwɔɔn tɛ̀ttɛ̀ za ammɛ biini. 20Kussi ka lubbe Awaan, Ɔlɔɔmɔlɔɔm ɔnaang weengodde la balɔɔt ka ussinɛ ka lubbe Awaan ka Cross, ɔppyɛlɛ ɔtɔk bɛfɛɛn ɔkkpɛlɛ ka ɛkpansi ɔbɛtɛ la libat ɔyanga. 21Ka iyaadɛ, adɔkɔyɔng fulufulu assekeyɔng Ɔlɔɔmɔlɔɔm. Adɔkɔyɔng balɔɔt a kɔfɔk ammɛ ka babbu bɛfɛɛn bya anaangnɛyɔng la bya attinanɛyɔng. 22Ɔzzànga mung, ka ussinɛ ka lubbe gwa kkwɔɔt Awaan ammɛ libbenɛ ka lagabwɔ, Ɔlɔɔmɔlɔɔm ɔnaangwɔyɔngbong ɛnngwa, nkwaaning ɔsamwɔyɔng bbwak, kpaladada, la kɛsɛlɛ bubbi umii ka lusso ammɛ. 23Ka lɔkkwɔɔn, akɔɔmyɔng kiyila annyɔɔng bbwak, ka lutte gwa lɔkkaamnɛ. Afɔngɔyɔng kɛnnyɛkɛ ka kiyila sa alenɛyɔng lɛyanga ka appyeenɛyɔng kuttu-budoddo Ɔlɔɔmɔlɔɔm. Kussi ka kuttu-budoddo ’kwɔng mung anaam Paul nzzanga bɔɔyi. Kuttu-budoddo ’kwɔng mung kulenɛ kwa balenɛ ɔlɔɔt ɔkkpɛlɛ lɛbwɔɔlɔ ka ɛkpansi. 24Ɔzzánga gedegede mung, nggele uggele nsak ka akama wa nyɛnnɛ nnyiwɔyɔng. Ka kɛyɛn akama anaam, nvvebong akama wa bussekenɛ wa Christ buyɛnnɛ ka lɛttɔ a kkwɔɔt ammɛ sa lilenɛ luzɔɔm. 25Ɔlɔɔmɔlɔɔm ɔsanganɛbong ɔttɛ nsseke bɔɔyi luzɔɔm. Ammɛ unnyinɛnɛ ’kwɔng ɔttɛ nnaang ka budoddo annyɔɔng. Nkwɔng kulenɛ bɔtɔɔm ammɛ bwa ɔttɛnɛ nbwɔɔlɔ ppwool. 26Akkwɛ kulenɛ kɔlɔɔk a lalup kwa ulupnɛ usseke ɔssɛbibit iyɛddɛ iyɛddɛ ɔkkpɛlɛ. Ɔzzànga gedegede mung ɔbwɔɔlɔbong balɔɔt ammɛ kɔlɔɔk ’kwɔng baang. 27Kwa Ɔlɔɔmɔlɔɔm uttinanɛ ulenɛ ’kwɔng: Ɔttɛ ɔnaang balɔɔt basan kɔlɔɔk a lalup ammɛ. Akkwɛ kulenɛ iyyɛɛp ’yɔng ya lɛbaang la latele za ɔyanganɛ la ɔlɔɔt ɔkkpɛlɛ. Kɔlɔɔk a lalup ’kwɔng baang ulenɛ ’kwɔng: Christ ule la annyɔɔng. Ning baang ulenɛ kɛttɛ vvenɛ ayangayɔng etini ka laggele Ɔlɔɔmɔlɔɔm. 28Ibwɔɔlɔ balɔɔt ɔkkpɛlɛ kɔlɔɔk a Christ. Ittamabɛ, ikopolobɛ ɔkkpɛlɛ la bisana pya iyanganɛ nkwaaning ikɔɔm ɔlɔɔt la duu imii ka lusso Ɔlɔɔmɔlɔɔm tɛ̀ttɛ̀ ɔlɔɔt wa ulenɛ kɔlɔɔk lɛsan ka bɔkaat ammɛ la Christ. 29Ka nggyannɛ nttɛ nnaang ’kwɔng, nkɔɔm lakke za Christ unnyinɛnɛ za lalenɛ ka kɛnaang ka kkwɔɔt anaam nbum nnaang kɛnaang.

will be added

X\