1 Ɔmmɛnɛ ssup ka bayilabɔtɔɔm a Jesus balenɛ baang ka bayipinɛ bagbaa, kɔwɔlɔ kɔttɔ ka kasɛkɛ balɔɔt a Jews ba balɔɔknɛ Greek la bwaan ɛkpansi Jews. Balɔɔt a Jews ba balɔɔknɛ Greek battɛ, basumalabong bwanavva abbɛ ba bwalam abbɛ babbenɛ bakɔngɔbɛ ka kɛbɛngɛlɛ bɛfɛɛn bya babɛngɛlɛnɛ kɛtɔm ɔkkpɛlɛ. 2 Bayilabɔtɔɔm a Jesus ba zzɔɔppabaffa bakkwɔɔ balɔɔt a kɔssɛ Jesus, ɔkkpɛlɛ abbɛ baloko ɛfɛɛn kkwɔn. Babwɔɔlɔbɛ battɛ, “Ba kɔyyɛɛp ka isinɛ zzeen ka lukopolo Ɔlɔɔmɔlɔɔm lɛssɛɛn, ɔssanga kwa kɛbɛngɛlɛ bɛfɛɛn. 3 Ikpana ayyɔɔt, assangyɔng balɔɔt bannambakkyaat ba asannɛ attɛyɔng Kuyeeng-Ɔlɔɔmɔlɔɔm kule la abbɛ, basan kɔlɔɔk ɔgbaa. Abbɛ bazzanga batan a lɔtan. 4 Ayyɔɔt ippyɛɛ isseke ba kɛssɛɛn a luzɔɔm la kikopolo kuttu Ɔlɔɔmɔlɔɔm ɛkɛtɛ ɔkkpɛlɛ. 5 Balɔɔt ’bɔng baang ɔkkpɛlɛ baggele, ɔwaabɛ la bayilabɔtɔɔm a Jesus. Ɔzzánga basanga Stephen, ɔlɔɔt wa ɔyanganɛ kiyila gaang gaang la Kuyeeng-Ɔlɔɔmɔlɔɔm. Philip, Prochorus, Nicanor, Timon, Parmenas, Nicolaus, wa akanakana wa usinɛ wa Jews lile, ussi Antioch uffu ufulanɛ luzɔɔm a Jews. 6 Kibbi ’sɔng baang kɛsangabɛ, kɛyɔɔ bayilabɔtɔɔm a Jesus. Bayilabɔtɔɔm a Jesus bassɛɛn luzɔɔm, batelebɛ labɔɔk. 7 Ka ussinɛ baang, lɛmmwɔɔl Ɔlɔɔmɔlɔɔm lɛkama-ɔkama lɛwaala. Balɔɔt a kɔssɛ a Jesus ka Jerusalem bayipi ggbadam bagbaa. Bassɛɛn-a-luzɔɔm ggbadam bayanga kiyila. 8 Stephen ulenɛ ɔlɔɔt wa Ɔlɔɔmɔlɔɔm ɔnaangmɛnɛ ppyɛɛ ɔttala, unnyimɛ lakke bɛmaanga bya lɛbaang bya bɛkɛɛlɛnɛ balɔɔt ɔkkpɛlɛ. 9 Balɔɔt balɔk batunumɛ. Badɔkɔ balɔɔt a ɔdda mitin wa banaangnɛbɛ bazzanga Bwaan a Lusse (tɛ̀ttɛ̀ bakkwɔɔnɛbɛ). Balɔɔt a Jews ba bassinɛ Cyrenia la Alexandria bale ka mitin ’wɔng baang. Balɔɔt balɔk ba bassinɛ Cilicia la Asia, bazzɔɔk bakangala la Stephen. 10 Kuyeeng-Ɔlɔɔmɔlɔɔm kunnyi Stephen kɛsan a kɔlɔɔk sa ɔzzanganɛ ɔttɛ ɔlɔɔknɛ ba bakkwoong bappyɛlɛmɛ kamma. 11 Ɔzzanga balup balɔɔt balɔk libbwu, battɛ balɔɔk battɛ, “Ippyeemɛbong ka ɔlɔɔknɛ kɔlɔɔk bbɔl-bbɔl utum Moses la Ɔlɔɔmɔlɔɔm.” 12 Kɔlɔɔk ’kwɔng baang kutun balɔɔt ɔkkpɛlɛ, bagɛlɛnya la bakopolo-Lafɔɔ. Bamii battulu Stephen, basammɛ bamii ka lusso Ikkansulu. 13 Bakɔɔm balɔɔt balɔk ba bakkalanɛ lɛlaak batummɛ, baffu babee baang battɛ, “Ɔlɔɔt ’wɔng mung ɛkɛtɛ ɔkkpɛlɛ ule ka kɛlɔɔk a babbu lilɔɔk utum Ggwoon a latele Ɔlɔɔmɔlɔɔm la Lafɔɔ a Moses. 14 Ippyeemɛ ka ɔlɔɔknɛ ɔttɛ, Jesus wa Nazareth vvenɛ ɔkkyama Ggwoon-Ɔlɔɔmɔlɔɔm, ufoolo Lafɔɔ za Moses unnyiyɛlɛ!” 15 Ikkansulu ’yɔng baang ɔkkpɛlɛ bamat Stephen lɛppyɛɛk. Bayɛnmɛ lusso ka lussekenɛ tɛ̀ttɛ̀ gwa Uyilabɔtɔɔm a Ɔlɔɔmɔlɔɔm.
