BƐNAANG 3

1Kɛtɔm ssɔn, Peter la John bamii ka Ggwoon-Ɔlɔɔmɔlɔɔm ka ikalangka ikkyaat kikoon, ɛkɛtɛ a luzɔɔm. 2Ɔlɔɔt ɔdɔkɔ baang wa ɔnnɔknɛ kikkwu ka ussinɛ ɔfal, ka ɔtaanɛ ka ‘Ubeet a Kikkwu’ tɛ̀ttɛ̀ bakkwɔɔnɛsɛ. Basammɛ kɛtɔm ɔkkpɛlɛ bamii baloko ka kikkwu ’sɔng baang. Ubbwoom ikkpoko ka balɔɔt ba basaknɛ bamii ka tɔkɔlɔ a Ggwoon-Ɔlɔɔmɔlɔɔm. 3Ɔyɛnnɛ Peter la John ka bamiinɛ, ukkpengebɛ ɔttɛ bannyimɛ bɔfɛɛn. 4Bappyɛɛkmɛ ssii, Peter ɔttɛ, “Ppyɛɛkyɛlɛ!” 5Ɔzzánga ɔppyɛɛkbɛ, uttina ɔttɛ baang bale ka bannyimɛnɛ bɔfɛɛn. 6Peter ɔttɛ, “Ikkpoko ba nyanga ya nnyiwɔnɛ, ɔzzànga vvenɛ nnyiwɔ bwa nyanganɛ: Ka lakke Jesus Christ wa ussinɛ Nazareth, nbwɔɔlɔwɔ nttɛ afeele, assɛ.” 7Ɔlɔmmɛ ka kɔbɔɔk a ɛlaabɔɔk uttelemɛ ufeele ubee, eseese laluk lakkaammɛ. 8Ukut, ɔppyɛlɛ ubee, ɔssɛ ukkpit, ukupbɛ, bamii ka Ggwoon-Ɔlɔɔmɔlɔɔm; ɔkɔɔm, ukut ubungu Ɔlɔɔmɔlɔɔm kɛnaang. 9Kibbi ’sɔng baang ɔkkpɛlɛ bayɛnmɛ ka ɔssɛnɛ, uwomo Ɔlɔɔmɔlɔɔm kɛnaang. 10Bakɔɔlɔmɛ battɛ, ubbwoom a lubbwoom wa ɔtaanɛ ɔtaa ka “Ubeet a Kikkwu” a Ggwoon-Ɔlɔɔmɔlɔɔm. Ɔkkpɛlɛ abbɛ kɔkɛɛlɛbɛ ka kɔlɔɔk kwa kɔnaangmɛnɛ tɛ́ttɛ́ ukkwoong ɔssɛ. 11Ɔlɔɔt ’wɔng baang ukupnɛ Peter la John ning baang, balɔɔt ɔkkpɛlɛ kɔkɛɛlɛbɛ. Bamma bakupbɛ ka Ikkɔlɔ a Solomon, tɛ̀ttɛ̀ bakkwɔɔnɛyɛ. 12Peter ɔyɛnnɛ balɔɔt ’bɔng baang, utolo unnyibɛ ɔttɛ, “Balɔɔt a Israel, ’bɔng tɛ́ttɛ́ kɔlɔɔk ’kwɔng kɔkɛɛlɛwɔyɔng, bɔng tɛ́ttɛ́ appyɛɛkyɔngyɛlɛ? Attina attɛyɔng, mung ikɔɔm likke za ayyɔɔt biini inaang ɔlɔɔt ’wɔng mung ɔssɛ ɔɔ? 13Ɔlɔɔmɔlɔɔm a Abraham la Isaac la Jacob la balɔɔt ayyɔɔt ba iyɛddɛ-iyɛddɛ, unnyibong bɔɔyi ammɛ Jesus Christ likke ammɛ. Annyɔɔng asammɛnɛyɔng annyiyɔng bayanga-lakke ka ɛkpansi. Afimmɛyɔng ka lusso a Pilate, wa uttinanɛ ɔttɛ, nzang vvenɛ ɔkkyaamɛ ɔfɔngɔ. 14Ɔdɔkɔ ɔlɔɔt wa doddo, ɔzzànga afimmɛyɔng. Attɛyɔng Pilate ɔkkyaa Barabas wa ɔwwɔɔlnɛ balɔɔt ɔfɔngɔ. 15Ɔzzánga awwɔɔlyɔng Ɔkɔɔm-ɛtɔk a kuddu. Ɔlɔɔmɔlɔɔm ufungalamɛbong ka lubbe. Ayyɔɔt ilenɛ ittɛɛsɛ kɔlɔɔk ’kwɔng. 16Likke ammɛ linaangnɛ ɔnnɔk a kikkwu ’wɔng ɔkkaam. Bwa ayɛnnɛyɔng, aleyɔng lɛsan mung ulenɛ kɛnaang sa kiyila ka lɛkɔɔl a Jesus kɛnaangnɛ. Kiyila ka lɛkɔɔl a Jesus kɛnaangmɛnɛ ɔppwamɛ ka lusso annyɔɔng mung ɔkkpɛlɛ. 17“Ikpana anaam, nsan lɔsan nttɛ kwa annyɔɔng la bazzilɛttɔ annyɔɔng anaangnɛyɔng la Jesus, adɔkɔ anaangyɔng ka kisɛsan. 18Ɔlɔɔmɔlɔɔm ɔggba bappyee-kutolo ammɛ lɛlɔɔk ɔssɛɛn ɔttɛ Ɔlɔɔt wa ammɛ ɔsanganɛ vvenɛ ɔyɛn akama. Ɔnaang kwɛ kɔnaang ka lɔkkwɔɔn. 19Anaangyɔng busannɛ ka bubbi; akkpengeyɔng Ɔlɔɔmɔlɔɔm nkwaaning ɔsɔɔkwɔyɔng. 20Nkwaaning ɛkɛtɛ lakke Ɔlɔɔmɔlɔɔm ɛffɔnɛ, essi ka lusso Ebinukkpaapi, ɔlɔk ɔtɔɔm Jesus, wa ulenɛ Ɔlɔɔt wa ɔggbanɛ lɛsanga, unnyiwɔyɔng. 21Vvenɛ ɔtaa bakang ka libat tɔttɔt ɔffɔ ɛkɛtɛ ya ule ufoolo bɛfɛɛn ɔkkpɛlɛ tɛ̀ttɛ̀ bappyee-kutolo-Ɔlɔɔmɔlɔɔm ba iyɛddɛ-iyɛddɛ balɔɔknɛ. 22Moses ɔttɛ, ‘Ebinukkpaapi, Ɔlɔɔmɔlɔɔm annyɔɔng, vvenɛ ɛtɔɔm uppyee-kutolo-Ɔlɔɔmɔlɔɔm efeewɔyɔng tɛ̀ttɛ̀ ɛtɔɔmnɛnɛ anaam mung. Ule ussi ka balɔɔt annyɔɔng. Agɔpɔlɔyɔng lilɔɔk ɔkkpɛlɛ sa ɔbwɔɔlɔwɔnɛyɔng. 23Ɔlɔɔt ɔkkpɛlɛ wa ule usi kɔlɔɔk kwa uppyee-kutolo-Ɔlɔɔmɔlɔɔm ’kwɔng baang lɛgɔpɔlɔ, vvenɛ basangamɛ ka kɔssɛ balɔɔt Ɔlɔɔmɔlɔɔm bawwɔɔl.’ 24Bappyee-kutolo-Ɔlɔɔmɔlɔɔm ka ɔbɛtɛnɛ la Samuel la ba bakupmɛnɛ ka isimi, ɔkkpɛlɛ abbɛ ba bayanganɛ kɔlɔɔk kwa kɛbwɔɔlɔ, babwɔɔlɔ kɔlɔɔk ’kwɔng kwa kɔnaangnɛ ka bɛtɔm ’byɔng mung. 25Nlɔɔk-nloko Ɔlɔɔmɔlɔɔm ka labɔɔk a bappyee-kutolo ammɛ, ule wa annyɔɔng. Ayangayɔng etini ka kɛbɛtɛ-kɛnnɔ sa Ɔlɔɔmɔlɔɔm ɔbɛtɛnɛ la balɔɔt annyɔɔng ba iyɛddɛ-iyɛddɛ tɛ̀ttɛ̀ ɔlɔɔknɛ la Abraham ɔttɛ, ‘Ka lɛttɔ bwaan annɔ vvenɛ nnaang balɔɔt ɔkkpɛlɛ ppyɛɛ ka ɛkpansi.’ 26Kwakkwɛ Ɔlɔɔmɔlɔɔm ɔkɔɔmnɛ ɛtɔk, ɔsanga bɔɔyi ammɛ, ɔtɔɔm ufeewɔyɔng ɔttɛ ɔnaangwɔyɔng ppyɛɛ ka ule ɔnaangwɔyɔng akkyaayɔng bubbi afɔngɔyɔng.”

will be added

X\