BƐNAANG 27

1Batininɛ battɛ issɛ ka akkpaat imii Italy, basanga Paul la balɔɔt igbakkɔpɔ balɔk batɔɔm bafee Julius, uzzilɛttɔ isɔgya wa ɔppyɛɛknɛ lalɔp isɔgya kubbwɔɔk, ya izzanganɛ ‘Isɔgya Uzzilɛttɔ a Rome.’ 2Imal ka akkpaat wa lɛbaang a lɛbaang wa ulenɛ ka kɛgbata ka Adramyttium kimii ka lagga za ɛkpansi a Asia iwaat imii. Aristarchus wa ussinɛ Thessalonica ka Macedonia ɔdɔkɔ baang la ayyɔɔt. 3Ɔffɔnɛ libbessolo, iffɔ ka Sidon. Julius ɔyyɛɛp bɛnaang la Paul, ɔfɔngɔmɛ umii ɔyɛn inngwa ammɛ, bannyimɛ bwa ɔggyannɛ. 4Ifeele ka ussinɛ baang iwaat, keem ka imiinɛ lusso gwa kɛffa kissinɛ ippyɛɛ isseke ka iwaatnɛ ka lufoom a Cyprus gwa kɛffa kisinɛ lɛkkaam. 5Ikum lihu ka isaknɛ Cilicia la Pamphylia imii, iffɔ Myra ka ɛkpansi a Lycia. 6Iffɔnɛ baang, uzzilɛttɔ isɔgya ɔyɛn akkpaat wa lɛbaang wa ussinɛ Alexandria ule ka kimii Italy, ɔzzánga ɔssɛɛnyɛlɛ ka akkpaat ’wɔng baang. 7Iwaat bɛtɛ-bɛtɛ la akama la akama ka bɛtɔm ppwap tɔttɔt iffɔ ka asaknɛ lɛffɛ Cnidus, kɛffa kisiyɛlɛ lɛbɛlɛ liyila imii lusso lusso ’gwɔng baang. Ɔzzánga isseke ka iwaatnɛ kuttɔɔk ka lufoom a likkpɔ ɛkpansi za lɛzzanganɛ Crete, ka ɛfɛɛn a kɛffa kisinɛ lɛkkaam. Isak ka Lɛgga Salmone. 8Iwaat lufoom lufoom ikkɛtɛ likum. Ilenɛ libum kɔbɛtɛyɛlɛ, iffu iffɔ ka ɛfɛɛn ya bakkwɔɔnɛyɛ Lɛgga Bɔppwa-kkwɔɔt. Ka ussinɛ baang umii killu a Lasea ba ufulu. 9Itaa baang ɛkɛtɛ ɛlɔm, ɔddɔkɔddɔkɔ kɔbbɔl kɛwaat kimii lusso lusso, ka Kɛtɔm-a-laggele-kɛsɔɔk-a-bubbi kilenɛ lɛsak. Ɔzzánga Paul ɔbbabɛ bikɔɔm ɔttɛ, 10“Bwaanbwalam, nyɛnbong nsan nttɛ, kɔssɛ ayyɔɔt vvenɛ kɔbbɔlyɛlɛ ka ussinɛ mung umii lusso lusso. Kɛbɛpɛ vvenɛ kɛttala ka lɛtɔkɔ la akkpaat biini, ɔbɛtɛ la lafal a balɔɔt.” 11Ɔzzànga uzzilɛttɔ isɔgya ’wɔng baang ɔdɔkɔ uyila kwa uzzilɛttɔ akkpaat la ɔwaat akkpaat balɔɔknɛ, ufim kwa Paul. 12Lɛgga ’zɔng baang ba lɛyyɛɛp za ɔlɔɔt ɔtaanɛ ka ɛkɛtɛ a lukook. Ɔzzànga balɔɔt ggbadam kɔdɔkɔ kɔsaapbɛ kɛwaat tɔttɔt kimii ɔlɔk bakkwoongnɛ baffɔ lɛgga za lɛzzanganɛ Phoenix. Phoenix ɔdɔkɔnɛ lɛgga za lilenɛ ka Crete za lɛppyɛɛknɛ lusso livve-luwee kulele. Bakkwoong mung bataa baang ka ɛkɛtɛ lukook. 13Kɛffa za bɛtɛbɛtɛ kissi kuttɔɔk a lɔfɔɔn kɛffa kiffu, ɔzzánga balɔɔt ’bɔng baang battina kifeele kɔssɛ. Bakkyaa kizzi akkpaat bawaat lufoom lufoom bakkɛtɛ likum a Crete. 14Usi lɛmmɛ, kɛffa sa lɛbaang a lɛbaang kissi libat a lɔfɔɔn ka lusso gwa livve-luwee lɔfɔm, kissi ka ukkpɔ ɛkpansi kɛffa kiffu. 15Kilip akkpaat isi lɛbɛlɛ likkwoong iwaat imii lusso gwa lɛffa kissinɛ. Ɔzzánga ikkyaa kɛwaat ifɔngɔ, kɛffa kɛffamɛ kimii ka ɛfɛɛn a kɔsaapnɛsɛ. 16Ɔzzánga iwaat lufoom a lufoom kuttɔɔk a lɔfɔɔn a likkpɔ ɛkpansi Cauda, ka ɛfɛɛn a kɛffa kisinɛ lɛkkaam. Ibumnɛ, izzeme iloko waan akkpaat wa utiti doddo. 17Basangamɛ batele ka libat akkpaat wa lɛbaang. baggbɔmɛ bizzi bakaka. Ɔbwɔpɔbɛ battɛ vvenɛ ɔtɔkɔbɛ umii ka kususuk kwa likum za Libya. Ɔzzánga batɛt kɛwaat, bafɔngɔ kɛffa kitutmɛ bɛtɛbɛtɛ kimii. 18Kɛffa bannyi sa lɛbaang ’sɔng baang kɛ̀ffá tɛ̀ttɛ̀ kɛffanɛ baang. Ɔzzánga ɔffɔnɛ libbessolo, bassang bɛfɛɛn ka tɔkɔlɔ bassɛɛn ka bannyi. 19Ɔbbalnɛ libbessolo za zzɔn lɛffɔ, bassang bɛfɛɛn akkpaat ka labɔɔk abbɛ biini ballɔt. 20Isi livve-luwee gɔɔ bwaanttuma lɛyɛn ka bɛtɔm ggbadam. Kɛffa bannyi ’sɔng baang sa lɛbaang kile baang ka kɛffanɛ gaang gaang. Ɔkkpɛlɛ ayyɔɔt isumala kwa kuddu. 21Balɔɔt ’bɔng baang balenɛ lɛwaat ɛkɛtɛ ɛlɔm, buwɔɔng a buwɔɔng, Paul ufeele ubeebɛ ka lusso ɔlɔɔk ɔttɛ, “Bwaanbwalam, bulenɛ ka ayilanɛyɔng kwa anaam, nzang gɔɔ ka Crete isi lissi iwaatyɔng. Nzang itunubong kɛbɛpɛ ’sɔng la kɛtaka lafal. 22Ɔzzànga nkkpengewɔyɔng nttɛ akkaamyɔng luppyam!; ɔlɔɔt vvɔn gbɔɔ wa ule ɔtaka lɛfal ammɛ mung ba ule. Ukpeke akkpaat kɛyɔɔng ka ule ɔtaak. 23Lisee kɛtɔm, uyilabɔtɔɔm Ɔlɔɔmɔlɔɔm wa ulenɛ wa Ɔlɔɔmɔlɔɔm wa nzɔɔmnɛ nnyi, uffu ukupnɛ. 24Ɔlɔɔk la anaam ɔttɛ, ‘Paul, tɛ̀ttɛ́ ɔbbwɔpɔwɔ! Nkkpa kɔnaang vvenɛ abee ka lusso Uzzilɛttɔ a Rome. Ɔgbaa Ɔlɔɔmɔlɔɔm la budoddo ammɛ, ɔsambong kuddu balɔɔt ’bɔng baang ɔkkpɛlɛ ba alenɛyɔng ka akkpaat vvɔn la abbɛ unnyiwɔ’. 25Kule ning tɛ bwaanbwalam, kkaamyɔng luppyam kkpɔk! Anaam nyanga kiyila ka Ɔlɔɔmɔlɔɔm nttɛ vvenɛ kule ning baang tɛ̀ttɛ̀ ɔbwɔɔlɔnɛnɛ. 26Ɔzzànga vvenɛ ɔffayɛlɛ umii ufik ka likkpɔ ɛkpansi lɛlɔk.” 27Ɔdɔkɔ kɛtɔm sa kɛnaangnɛ bɛtɔm ɔsɛlɛzzil ka kɛffa kɛffanɛyɛlɛ ka lihu za bakkwɔɔnɛzɛ Mediterrenean. Ɔffɔnɛ ka kasɛkɛ kɛtɔm, bawaat akkpaat battina battɛ ile ka iffɔnɛ kɛtɛkɛtɛ ɛkpansi. 28Ɔzzánga basam okkili, basiki ka lɛttaal, basinimɛ bassɛɛn ka lihu basan tɛ̀ttɛ̀ ɔddɔngnɛ ɔffɔ. Bayɛn basan battɛ ule lalɔp a bukkpɔ bwalaaning ka bɔddɔng. Baffɔnɛ ka lusso babbal ning baang lɛnaang. Bakɔɔlɔ battɛ usseke lalɔp a bukkpɔ lanna la bukkpɔ zzɔɔp ka bɔddɔng. 29Ɔbbwɔpɔbɛ ka banngwanɛ battɛ akkpaat ayyɔɔt vvenɛ umii ulip ka lattaal. Ɔzzánga basini ikkili inna ya ibwɔɔpnɛ akkpaat bassɛɛn ka bannyi ka isimi a akkpaat, babee baang bazɔɔm battɛ ussolo. 30Bawaat-akkpaat babum kɛtta ka tɔkɔlɔ akkpaat kɛmma. Basini akkpaat wa utiti bassɛɛn ka bannyi, babbwa battɛ abbɛ bamii basiki ikkili ka akkpaat wa lɛbaang. 31Ɔzzánga Paul ɔlɔɔk la uzzilɛttɔ ɔttɛ, “Bawaat-akkpaat ’bɔng mung basinɛ ka akkpaat lɛtaa baala baddu.” 32Ɔzzánga isɔgya izza ikkili ’yɔng baang ya ilɔmnɛ akkpaat, bafɔngɔ akkpaat umii. 33Ka ule ka ussolonɛ, Paul ukkpengebɛ ɔkkpɛlɛ ɔttɛ bazzi kazzi. Ɔttɛ, “Ataabong akatyɔng ka bɛtɔm ɔsɛlɛzzil bulɔk ba azziyɔng. 34Nkkpengewɔyɔng nttɛ azziyɔng kazzi, nkwaaning adduyɔng. Gɔɔ eggbe kittulu annyɔɔng nnyɔn gbɔɔ baala ɛtaak.” 35Ulenɛ ’kwɔng livve lɛlɔɔk, Paul ɔsam brɛɛd, uwomo Ɔlɔɔmɔlɔɔm kɛnaang ka lusso abbɛ ɔkkpɛlɛ, ɔbɛkɛ uzzi. 36Bakkaam luppyam ɔkkpɛlɛ abbɛ bassɛ bazzi kazzi. 37Idɔkɔ ile lalɔp a balɔɔt zzɔɔppalakkyaat la balɔɔt zzillavvɔn ka tɔkɔlɔ. 38Ɔlɔɔt ɔkkpɛlɛ ulenɛ kazzi lizzi tɛ̀ttɛ̀ kaddumɛnɛ, banaang akkpaat uffeke ka basamnɛ issɔ kazzi bassɛɛn ka lihu. 39Ussolonɛ, bawaat-akkpaat likum basi lɛbɛlɛ lɛkɔɔlɔ. Bayɛn kususuk, ɔzzánga battɛ kulenɛ lɛsak lɛttala bawaat akkpaat bamii ka kususuk ’kwɔng baang. 40Ɔzzánga babbɔk bizzi akkpaat, usseke akkpaat upiti. Bakkyaa ikkili ya basikinɛ ka ifeet-akkpaat. Bafeele bamii bayaala ubba ka lusso akkpaat nkwaaning kɛffa kɛffa akkpaat kimii lusso gwa likum. 41Keem akkpaat umii ulip ka likum za lilenɛ kususuk a kususuk. Lusso akkpaat lufula ka tɔkɔlɔ a kususuk, akkpaat usi lɛbɛlɛ likkwoong ɔssɛ. Ɔzzanga labba-bannyi latup lɔnnyɔ akkpaat labwɔɔt kyɛkɛkyɛkɛ. 42Isɔgya banaang likup za kɛwwɔɔl a balɔɔt igbakkɔpɔ ɔkkpɛlɛ tɛ̀ttɛ́ ɔlɔɔt vvɔn gbɔɔ uffu uwook ukum ɔsɛɛm. 43Keem uzzilɛttɔ isɔgya ɔggyan ɔttɛ akkala Paul. Ɔzzánga utunubɛ ɔttɛ tɛ̀ttɛ́ banaang ning baang. Ɔppyɛɛ ɔdda balɔɔt ɔkkpɛlɛ ba bakkwoongnɛ ewoko ɔttɛ bakɔɔm ɛtɔk bakut battɔ ka bannyi bawook bamii ka likum. 44Ba bassekenɛ balɔm ka bɛfaak a bɛssɛ, ɔlɔk ka bɛfaak akkpaat bya bɛbɛpɛnɛ bakupbɛ. Nkwɔng kulenɛ kwa kɔnaangnɛ ikkwoong ikum bɛlɛng-bɛlɛng imii kukupa.

will be added

X\