BƐNAANG 25

1Bɛtɔm bɛkkyaat bɛsaknɛ, Festus ussi Caesarea uffu Jerusalem ka ɛkpansi ’yɔng baang. 2Ɔffɔnɛ bakang bazzilɛttɔ bassɛɛn-a-luzɔɔm la bazzilɛttɔ balɔɔt a Jews baffu balɔɔk kwa Paul ɔnaangnɛbɛ tɛ́ttɛ́ bakaamɛ. Bakkpenge Festus battɛ uyila kwa abbɛ, 3ɔfɔngɔ Paul uffu Jerusalem. Balɔɔk ka balenɛ likup lɛnaang za bale ka babeenɛ ka ɛtɔk bawwɔɔl Paul. 4Festus ɔttɛ, “Paul ule ka igbakkɔpɔ ka Caesarea, ɔzzànga nle ka nppyɛlɛnɛ nmii bakang gedegede mung. 5Afɔngɔyɔng bazzilɛttɔ annyɔɔng bamii Caesarea bakkwɔɔ Paul kɛkaal, ulenɛ kwa kɔbbɔlnɛ lɛnaang.” 6Festus ukkwunu bɛtɔm zzɔɔp la abbɛ tɛ́ttɛ́ ufeele umii Caesarea. Ɔffɔnɛ libbessolo, umii ɔtaa ka ɔdda kɛkaal ɔttɛ bakɔɔm Paul bamii ka ɔdda kɛkaal ’wɔng baang. 7Paul umii. Balɔɔt a Jews ba bassinɛ Jerusalem babee ggbii bakkpitmɛ. Bannyi imma kɛkaal ggbadam ya basinɛ likkwoong babwɔɔlɔ lɛttɔ annyɛ. 8Paul ututalamɛ kɛyɔɔng ɔttɛ, “Kɔlɔɔk kɔlɔk kwa kɔbbɔlnɛ ba ntaka nnaang ntum Lafɔɔ balɔɔt a Jews, gɔɔ Ggwoon-Ɔlɔɔmɔlɔɔm, ɔlɔk nnaang kwa kɔbbɔlnɛ ntum Uzzilɛttɔ a Rome.” 9Festus ɔdɔkɔ ɔggyan kɛyyɛɛp a bɛnaang la balɔɔt a Jews. Ɔzzánga ɔbap Paul ɔttɛ, “Vvenɛ kɔsaapwɔ amii Jerusalem bakaal kɛkaal annɔ bakang ka lusso anaam ɔɔ?” 10Paul ɔttɛ, “Mung mbee ka lusso Uzzilɛttɔ a Rome, ka ɔdda kɛkaal ammɛ wa ulenɛ ɛfɛɛn ya bbwak ya bakaalnɛ kɛkaal anaam. Kɔlɔk kwa kɔbbɔlnɛ ba ntaka nnaang ntum balɔɔt a Jews tɛ̀ttɛ̀ annɔ biini asannɛkwɛ. 11Bulenɛ lafɔɔ lɛbɛpɛ, ɔlɔk nnaang kɔlɔk kwa lɛttɔ anaam lile lɛssɛ, nzang baala nmma. Ɔzzànga lɔkkwɔɔn a kɔlɔɔk lusinɛ lile ka lilɔɔk sa bakaanɛnɛ, ɔlɔɔt wa ule ukkwoong ɔlɔmmɛ unnyibɛ ɔlɔk ba ule. Nkkpenge nttɛ Uzzilɛttɔ a Rome ɔkaal kɛkaal anaam.” 12Festus ulenɛ likup la babba-bikɔɔm ammɛ livve lɛbwɔɔp, ɔppyɛlɛ Paul kamma ɔttɛ, “Ka alenɛ lɛlɔɔk attɛ Uzzilɛttɔ a Rome ɔkaal kɛkaal annɔ, vvenɛ bakɔɔmwɔ amii.” 13Ɔttɛ ɔnaang, ubeet Agrippa la Bernice baffu Caesarea kikoolo a Festus. 14Balenɛ likkwunu ka bwaan a bɛtɔm ssup, Festus ɔbwɔɔlɔ ubeet kɔlɔɔk a Paul ɔttɛ, “Ɔlɔɔt ule mung wa Felix ɔgbatanɛ ɔkɔngɔ ka igbakkɔpɔ. 15Nfeele nmii Jerusalem, bazzilɛttɔ bassɛɛn-a-luzɔɔm ba Jews ba bagɛlɛnya balɔɔk lilɔɔk sa Paul ɔnaangnɛ. Babwɔɔlɔnɛ battɛ nzang nnyibɛ lakke, bawwɔɔlmɛ. 16Ɔzzánga nbwɔɔlɔbɛ nttɛ balɔɔt a Rome, ka eleme abbɛ, ba basam ɔlɔɔt wa bakaanɛ bannyi bawwɔɔl ka batakanɛ kɛkaal ammɛ lɛkaal ka lusso ɔlɔɔt wa ɔkaamɛnɛ. Ɔyanga lakke za ututalamɛnɛ kɛyɔɔng ɔgbaa. 17Baffunɛ mung, ɛkɛtɛ nsi lɛbɛpɛ. Libbessolo ’zɔng baang nmii ntaa ka ɔdda kɛkaal. Ntɔɔm nttɛ bakɔɔm ɔlɔɔt ’wɔng baang, baffu. 18Balɔɔt ba bakaamɛnɛ baffunɛ babee, basi kamma kɛkaal kwa kɔbbɔlnɛ linnyi tɛ̀ttɛ̀ nttinanɛ nttɛ vvenɛ bannyi batummɛ. 19Kwa balɔɔknɛ ɔkkpɛlɛ ɔdɔkɔ ikangala ya bakangalanɛ la ammɛ batum luzɔɔm la ɔlɔɔt bakkwɔɔmɛnɛ Jesus wa ulenɛ libbe, Paul ɔttɛ ufungalabong. 20Ndɔkɔ nsi lɛsan tɛ̀ttɛ̀ nle nnaang nppyee kuttu lilɔɔk ’sɔng baang doddo. Ɔzzánga nbap Paul nttɛ vvenɛ kɔsaapmɛ umii kɛkaal ammɛ bakang ka Jerusalem ka lusso anaam nsan. 21Ɔzzánga Paul ukkpenge ɔttɛ nfɔngɔmɛ ɔtaa mung ka igbakkɔpɔ; Uzzilɛttɔ a Rome ɔkaal kɛkaal ammɛ. Ɔzzánga nnyibɛ lakke nttɛ ɔtaa baang ka igbakkɔpɔ tɔttɔt nkɔɔmmɛ nfee Uzzilɛttɔ a Rome.” 22Agrippa ɔlɔɔk la Festus ɔttɛ, “Anaam biini nggyan nttɛ nppyee kɔlɔɔk ammɛ kɛyɔɔng.” Festus ɔttɛ, “Vvenɛ appyeemɛ lufat.” 23Ɔffɔnɛ libbessolo, Agrippa la Bernice baffu la lɛbaang abbɛ. Ɔlɔɔt ɔkkpɛlɛ utelebɛ. Bamii bamal ka ɔdda-kɛkaal la bazzilɛttɔ isɔgya, la bazzilɛttɔ ɛkpansi ’yɔng baang. Festus ɔtɔɔm bakɔɔm Paul baffu ka tɔkɔlɔ ɔdda. 24Festus ɔttɛ, “Ubeet Agrippa la balɔɔt ɔkkpɛlɛ ba alenɛyɔng mung la ayyɔɔt: Ppyɛɛkyɔng ɔlɔɔt ’wɔng mung ulenɛ wa balɔɔt a Jews ɔkkpɛlɛ mung ka Caesarea ɔgbaa la Jerusalem balenɛnɛ lilɔɔk ppwap lɛbwɔɔlɔ batummɛ. Kɔssɔpbɛ balam imakkpa battɛ tɛ̀ttɛ́ ɔbɛlɛ liddu, bawwɔɔlmɛ. 25Ɔzzànga anaam kɔlɔɔk kɔlɔk kwa ɔnaangnɛ kɔbbɔl kwa nle nzza kɛkaal ammɛ nttɛ ubbe, nsi lɛyɛn. Ammɛ biini ka ulenɛ likkpenge ɔttɛ Uzzilɛttɔ a Rome ɔkaal kɛkaal ammɛ, vvenɛ ntɔɔmmɛ, umii. 26Kɔlɔɔk kwa bbwak kwa nle nkkpɔk ntummɛ nfee Uzzilɛttɔ a Rome ba ntaka nsan. Ɔzzánga nkɔɔmmɛbong nffu mung ka lusso annyɔɔng. Gaang gaang ka lusso annɔ Ubeet Agrippa, nkwaaning ilenɛ lɛttɔ kɛkaal ’sɔng lɛggyan iyɛn, tɛ́ttɛ́ bɔk nsan bwa nle nkkpɔk. 27Ba kɔkkɔnɔ ka nsamnɛ ɔlɔɔt igbakkɔpɔ, nfee Uzzilɛttɔ a Rome nsimɛ lɛbwɔɔlɔ bwa bakaamɛnɛ lɛttɔ batele.”

will be added

X\