BƐNAANG 24

1Bɛtɔm kubbwɔɔk bɛsaknɛ, Uzzilɛttɔ Bassɛɛn-a-luzɔɔm wa Lɛbaang wa ɔzzanganɛ Ananias ufeele umii Caesarea la bagɛlɛnya balɔk la lɔya wa ɔzzanganɛ Tertullus. Batuma ka lusso uzzilɛttɔ Felix. Bannyi kamma kɛkaal batum Paul. 2Bakkwɔɔ Paul uffu, Tertullus ubee unnyi kamma kɛkaal utum Paul ɔttɛ, “Dedde! Kikkwoong a kɛkɔɔm ɛfɛɛn annɔ kɛnaangbongyɛlɛ itaa ka bɔkaat ɛkɛtɛ ɛlɔm. Alongɔlɔbong lilɔɔk ppwap sa lisinɛ lɛyyɛɛp, liyyɛɛp ka ɛkpansi ayyɔɔt. 3Iggyan ning baang ka ɛfɛɛn ɔkkpɛlɛ, ɛkɛtɛ ɔkkpɛlɛ. Ɔwaayɛlɛ gaang gaang kwa annɔ. 4Ba nggyan nttɛ ntɔk ɛkɛtɛ annɔ nbɛpɛ gaang ɔzzànga nkkpengewɔ nttɛ agɔpɔlɔ kwa ile ka ilɔɔknɛ la luppyam gwa doddo. 5Isanbong ittɛ linaang sa ɔlɔɔt ’wɔng mung ɔnaangnɛ vvenɛ kɔlɔɔk kɔbbɔl ka ussoonɛ. Ɔzzɔɔkbong lɔnyaata ka ɛfɛɛn a balɔɔt a Jews ɔkkpɛlɛ ukkpit ɛkpansi. Ammɛ ulenɛ uzzilɛttɔ kɔssɛ balɔɔt a Nazareth. 6Ɔgbaa, ubum kɛyyaa Ggwoon-Ɔlɔɔmɔlɔɔm, ɔzzánga ikaamɛ. [Ittɛ nzang ikaal kɛkaal ammɛ tɛ̀ttɛ̀ lafɔɔ ayyɔɔt lalɔɔknɛ. 7Ɔzzánga Lysias, uzzilɛttɔ isɔgya, uffu ɔnnaayɛlɛwɛ ka lagabwɔ umii. 8Ɔbwɔɔlɔ ɔttɛ balɔɔt ba bakaamɛnɛ baffu ka ɛfɛɛn annɔ.] Abapnɛ ɔlɔɔt ’wɔng mung ibap, annɔ biini vvenɛ asan bɛfɛɛn ɔkkpɛlɛ bya ikaamɛnɛ, itele lɛttɔ.” 9Balɔɔt a Jews ɔgbaa bassɛ bayila kamma kɛkaal ’kwɔng baang battɛ lilɔɔk ’sɔng mung ɔkkpɛlɛ lile ka lɔkkwɔɔn. 10Uzzilɛttɔ Felix ɔkkwɔɔ Paul ɔttɛ ɔlɔɔk. Ɔzzanga Paul ɔttɛ, “Nsan lɔsan nttɛ aggba lissi ale ɔkalakala ɛkpansi ’yɔng mung ka likkpa ggbadam. Nggele luggele nsak ka ntutalanɛnɛ kɛyɔɔng ka lusso annɔ. 11Aggyannɛ attɛ asan, bɛtɔm zzɔɔppabɛffa ba bɛtaka bɛsak ka nfeelenɛ nmii Jerusalem nzɔɔm luzɔɔm, nnyi Ɔlɔɔmɔlɔɔm. 12Balɔɔt a Jews balɔk basinɛ lɛyɛn ka nkangalanɛ ikangala ka Ggwoon-Ɔlɔɔmɔlɔɔm. Ɔlɔk vvenɛ nzzɔɔk lɔnyaata ka idda mitin, ɔlɔk ka ɛfɛɛn ɛlɔk gbɔɔ la lɛffɛ. 13Gɔɔ vvenɛ ba bakkwoong babwɔɔlɔwɔ bwa bakaanɛnɛ lɛttɔ batele. 14Nyila mung ka lusso annɔ nttɛ nzɔɔm nnyi Ɔlɔɔmɔlɔɔm wa balɔɔt ayyɔɔt ba iyɛddɛ-iyɛddɛ ka nkupnɛ Ɛtɔk-a-kuddu ya balɔɔt a Jews ’bɔng mung battɛnɛ bbwak ba ele. Anaam nssɛ mung nyila lilɔɔk ɔkkpɛlɛ sa bakkpɔknɛ ka luvva Lafɔɔ a Moses, la Bappyee-kutolo Ɔlɔɔmɔlɔɔm. 15Nyanga luttina ggwɔn ntum Ɔlɔɔmɔlɔɔm tɛ̀ttɛ̀ balɔɔt ’bɔng mung bayanganɛ, battɛ ɔlɔɔt duu ka vveeng ’wɔng mung ayyɛɛp ɔlɔk abbɔl, abbenɛ vvenɛ afungala ka lubbe. 16Nbumbong gaang gaang ɛkɛtɛ ɔkkpɛlɛ nttɛ nyanga tɔkɔlɔ wa ppwool, nppyɛɛk Ɔlɔɔmɔlɔɔm la balɔɔt. 17“Likkpa ggbadam lilenɛ lɛsak ka ngbatanɛ Jerusalem, nppyɛlɛ isimisimi nsam ikkpoko nfee balɔɔt anaam. Nssɛɛn luzɔɔm ɔgbaa. 18Badɔkɔ bayɛnnɛ ka Ggwoon-Ɔlɔɔmɔlɔɔm ka ɛkɛtɛ nlenɛ kɛnaang a lɛtɔm a kikup a laggbo livve. Balɔɔt ggbadam la anaam basi lile, lɔsap lɔlɔk lusi lɛttɔ. 19Ɔzzànga balɔɔt a Jews ba bassinɛ lɔfɔɔn a Asia badɔkɔ baang. Nzang abbɛ biini buffunɛ babee bannyi kamma kɛkaal abbɛ, bayanganɛ kɔlɔɔk kɔlɔk batumnɛ. 20Ɔlɔk balɔɔt ’bɔng mung babwɔɔlɔ kɔlɔɔk kwa nlenɛ lɛnaang kɔbbɔl ka nbeenɛ ka lusso ikkansulu. 21Ukpeke kɔlɔɔk kkwɔn kɛyɔɔng ka nlɔɔknɛ ka nbeenɛ ka lusso abbɛ. Nttɛ, ‘Mung mmwɔɔn bakkwɔɔnɛyɔngbong kɛkaal ka nyilanɛ nttɛ babbu vvenɛ bafungala bataa ka kuddu tɛ.’ ” 22Felix, wa ulenɛ Ɛtɔk-a-Kuddu doddo lɛsan, uvvoong kɛkaal ɔttɛ, “Vvenɛ nkaal kɛkaal annyɔɔng ka ɛkɛtɛ Lysias, uzzilɛttɔ isɔgya, ule uffu.” 23Ɔdda wa sɔgya wa ɔppyɛɛknɛ Paul ɔttɛ ɔkatmɛ. Ɔzzànga unnyimɛ kufuk ɔfɔngɔ inngwa ammɛ baffu bannyimɛ bwa ɔggyannɛ. 24Bwaan a bɛtɔm bɛsaknɛ, Felix baffu la wanavva ammɛ, Drusilla, wa Jews. Ɔtɔɔm ɔkkwɔɔ Paul uffu ɔgɔpɔlɔmɛ tɛ̀ttɛ̀ ɔlɔɔknɛ utum kiyila kwa Jesus Christ. 25Ka Paul ulenɛ baang ka ɔlɔɔknɛ utum budoddo la kɛkɔɔm-a-kɛyɔɔng, la Kɛtɔm-a-kɛkaal a vveengodde, Felix ɔbbwɔpɔmɛ ɔttɛ, “Akkwoong mung agbata amii. Vvenɛ nbbalwɔ lɛkkwɔɔ ka ɛkɛtɛ ya nle nyanga kufuk.” 26Ɔdɔkɔ uttina ɔttɛ Paul vvenɛ ɔssɛɛnmɛ issɔ. Kwakkwɛ ɔkkwɔɔmɛnɛ ɛkɛtɛ duu uffu utolo kutolo la ammɛ. 27Likkpa liffa lisaknɛ, Porcius Festus ɔtɔk kizzilɛttɔ ka Felix. Felix ɔdɔkɔ ɔggyan ɔttɛ ɔyyɛɛp bɛnaang la balɔɔt a Jews kwakkwɛ ɔgbatanɛ Paul ɔkɔngɔ ka igbakkɔpɔ.

will be added

X\