BƐNAANG 19

1Ka ɛkɛtɛ ya Apollos ɔdɔkɔnɛ ka Corinth, Paul ɔssɛ tɔkɔlɔ-tɔkɔlɔ lɔkaan ’gwɔng baang umii Ephesus. Ɔyɛn balɔɔt a kɔssɛ ammɛ balɔk ka Ephesus. 2Ɔzzánga ɔbapbɛ ɔttɛ, “Adɔkɔ atɔkyɔng Kuyeeng-Ɔlɔɔmɔlɔɔm ka ɛkɛtɛ ayanganɛyɔng kiyila ɔɔ?” Battɛ, “Ba itaka ippyee ffet a ffet ittɛ Kuyeeng-Ɔlɔɔmɔlɔɔm kule baang.” 3Paul ɔbapbɛ ɔttɛ, “Ngkka mung badɔkɔ banaangwɔyɔng bɔkka kɛssanga baptizim?” Abbɛ battɛ, “Baptizim wa John.” 4Paul ɔttɛ, “Baptizim wa John ɔdɔkɔ wa balɔɔt ba bafoolonɛ lafal abbɛ. Ɔgbaa ɔbwɔɔlɔ balɔɔt a Israel ɔttɛ bayila kwa ɔlɔɔt wa ule ka uffunɛ ukupmɛ, wa ɔzzanganɛ Jesus.” 5Bappyeenɛ ning baang, banaang baptizim ka lɛkɔɔl Uyini, Jesus. 6Paul utelebɛ labɔɔk, Kuyeeng-Ɔlɔɔmɔlɔɔm kusini kuffu kuttelebɛ, basseke ka balɔɔknɛ likaan buubuu. Bakopolo bɔtɔɔm Ɔlɔɔmɔlɔɔm bagbaa. 7Ɔkkpɛlɛ abbɛ badɔkɔ balɔɔt zzɔɔppabaffa. 8Paul ufeele umii ka ɔdda mitin a balɔɔt a Jews. Ɔtaa baang ɔkangala ikangala la balɔɔt ’bɔng baang ka ittuma ikkyaat. Ubum ɔttɛ bayila kwa Itutum-Ɔlɔɔmɔlɔɔm. 9Balɔɔt balɔk bassi-latɔɔk, bafim kiyila. Balɔɔk lilɔɔk sa libbɔlnɛ batum Ɛtɔk-Uyini ’yɔng baang ka lusso balɔɔt ɔkkpɛlɛ. Paul ɔgbata ɔkɔngɔbɛ ɔsam balɔɔt a kɔssɛ Jesus ɔkɔɔm ɔssɛ. Lutini livve la zzɔn, Paul ɔyanga kutolo la abbɛ ka ɔdda lukopolo a Tyrannus. 10Paul ɔnaang ’kwɔng ka likkpa liffa. Ɔzzánga balɔɔt ɔkkpɛlɛ ba ballunɛ ka ɛkpansi Asia ɔbɛtɛ la balɔɔt a Jews la Ikanakana bappyee lɛmmwɔɔl Uyini. 11Ɔlɔɔmɔlɔɔm unnyi Paul lakke kɛnaang a bɛmaanga bya ɔtakanɛ lɛnaang kɛtɔm kɛlɔk. 12Gɔɔ bappyɛɛ basam wanubba kɛkkpɔlɔ layungu la iwɔkɔlɔ ammɛ bafee balɔɔt ba usinɛbɛ lɛppwa, basingi ɔppwabɛ. Balɔɔt a ipiliza ɔppwabɛ ɔgbaa. 13Balɔɔt balɔk ba bassɛnɛ ka laffɛ ka laffɛ baggba ipiliza basseke balɔɔt, babum kɛkɔɔm a lɛkɔɔl a Uyini Jesus kɛssɛ kɛnaang ning baang. Balɔɔk ipiliza ’yɔng baang battɛ, “Mggbawɔyɔng ka lɛkɔɔl a Jesus wa Paul ukopolonɛ utum.” 14Ɔdɔkɔ bwaan a bwalam bannambakkyaat ba uzzilɛttɔ bassɛɛn-a-luzɔɔm wa lɛbaang wa balɔɔt a Jews wa ɔ̀zzànganɛ Sceva ɔfɔɔnnɛ ka banaangnɛ linaang ’sɔng. 15Ɔzzánga ippiliza ’yɔng baang ilɔɔk la abbɛ ittɛ, “Isan mung Jesus, isan Paul ngkka annyɔɔng alenɛyɔng babang?” 16Ɔlɔɔt wa ipiliza ilemɛnɛ ka kkwɔɔt ullubɛ kullu ɔbɛtɛbɛ. Ɔkkpɛlɛ abbɛ bamma la biddopo ka kkwɔɔt basseke ssala ɔlɔɔt ’wɔng baang. Iwɔkɔlɔ abbɛ iyaak ɔkkpɛlɛ. 17Balɔɔt a Jews ɔkkpɛlɛ la Ikanakana ba ballunɛ ka Ephesus bappyeenɛ ning baang, ɔbbwɔpɔbɛ gaang gaang bannyi lɛkɔɔl Uyini, Jesus, latele gaang gaang bagbaa. 18Balɔɔt ggbadam ba bayanganɛ kiyila baffu ppwool ppwool babwɔɔlɔ kwa balenɛ lɛnaang. 19Balɔɔt ggbadam ba balenɛ kɛnaang a bɛmaanga likkoop basam livva abbɛ baffu babbi ɛfɛɛn kkwɔn bassɛɛnsɛ lɔkɔɔn, likkɔm ka lusso balɔɔt ɔkkpɛlɛ. Kappya livva ’sɔng baang kaffɔ innɔ okkpoko 50,000. 20Lakke ’zɔng mung lanaang lɛmmwɔɔl Uyini lɛwaala la bɔkkaam. 21Lilɔɔk ’sɔng lilenɛ lɛnaang, Paul ɔnaang luttina gwa kɛssɛ ka Macedonia la Greece ɔsak umii Jerusalem. Ɔlɔɔk ɔttɛ, “Vvenɛ nmii nyɛn Rome ɔgbaa.” 22Ɔzzanga ɔtɔɔm Timothy la Erastus ba battelemɛnɛ ɔttɛ bamii Macedonia, ammɛ utii ka ɔtaanɛ mmɛmmɛ ka ɛkpansi a Asia. 23Ɛkɛtɛ ’yɔng baang bbwak ɛdɔkɔnɛ ya kɔlɔɔk kɔttɔnɛ ka Ephesus ka kɔlɔɔk a Ɛtɔk Uyini. 24Ɔlɔɔt vvɔn ɔdɔkɔ baang wa ɔzzanganɛ Demetrius wa ɔkɔɔmnɛ silver ɔsaak ilɔɔp. Ɔsaak ilɔɔp a ggwoon a luzɔɔm a umaat-ebinukkpaapi ya ɛzzanganɛ Artemis. Kɛnaang ammɛ kinnyi balɔɔt a kɛnaang ammɛ isak gaang gaang. 25Ɔzzánga ɔkkwɔɔbɛ uloko ɛfɛɛn kkwɔn la balɔɔt ba banaangnɛ kɛnaang kɛssanga ssɔn la ammɛ ɔttɛ, “Bwaanbwalam, asanyɔng lɔsan attɛyɔng kibeet ayyɔɔt kissiyɛlɛ ka kɛnaang ’sɔng mung. 26Akkwoong mung ayɛnyɔng, appyeeyɔng ka latɔɔk kɛyɔɔng kwa Paul ɔnaangnɛ. Ɔttɛ ibinukkpaapi ya ɔlɔɔt ɔnaangnɛ, Ebinukkpaapi lissi. Mung ɔtɔkbong lɛttɔ ka kɛnaang a balɔɔt ggbadam ba ballunɛ ka Ephesus la kufoom ɛkpansi Asia bayila kwa ammɛ. 27Kɛzza luppyam kile kɛttɛ kɛnaang ayyɔɔt ’sɔng mung vvenɛ kɛyanga ubbu lɛkɔɔl. Nkwɔng baang kɛyɔɔng lissi, kɛzza luppyam kɛlɔk kile kɛttɛ, ggwoon a umaat Artemis lusseke bɔfɛɛn bwa gbɔɔ. Kuttu annyɛ vvenɛ kɔtaak. Luzɔɔm annyɛ gwa balɔɔt ɔkkpɛlɛ bazɔɔmnɛ ka ɛkpansi Asia la vveengodde ɔkkpɛlɛ vvenɛ lɔtaak!” 28Kibbi ’sɔng baang bappyeenɛ lɛmmwɔɔl ’zɔng baang, kutunbɛ gaang gaang bazzɔɔk kibungu battɛ, “Buggboggbo bule bwa Artemis wa Ephesus.” 29Kibungu ’sɔng baang kɛwaala ka ɛkpansi ’yɔng baang ɔkkpɛlɛ. Kɛkaan a balɔɔt ’bɔng baang bakaa Gaius la Aristarchus, balɔɔt a Macedonia baffa ba bassɛnɛ la Paul, bamii baloko ka ogyila. 30Paul biini ɔdɔkɔ ɔttɛ ukup kibbi ’sɔng baang, keem balɔɔt ba bayanganɛ kiyila batunumɛ. 31Baggboggbo balɔɔt ɛkpansi ’yɔng baang ba badɔkɔnɛ inngwa ammɛ batɔɔm bakpenge Paul battɛ tɛ̀ttɛ́ ɔtta kikkpɔ umii. 32Ɔttɛ ɔnaang, kɛzɔk kɛttɔ ka mitin. Balɔɔt balɔk babungu bagaga kwa kɔlɔk: balɔk balɔɔk kɔlɔk, gɔɔ balɔɔt ggbadam ba basan bwa bamiinɛ baduda baang. 33Balɔɔt balɔk batele lɛttɔ battɛ Alexander ɔsan tɛ̀ttɛ̀ ɔnaangnɛ bɔfɛɛn bwa balɔɔt a Jews basangamɛnɛ ammɛ bakkwu lusso. Ɔzzánga Alexander uwung labɔɔk, ɔttɛ ukingi lɛkkɔ ɔkkalamɛ kɛyɔɔng ka lusso kibbi. 34Ɔzzánga bakɔɔlɔmɛnɛ battɛ baang wa Jews, ɔkkpɛlɛ abbɛ babungu tɛ̀ttɛ̀ baggbanɛ lissi babungu tɔttɔt ɛkɛtɛ ɛmmɛ ɛffɔ ikalangka iffa battɛ, “Buggboggbo bule bwa Artemis wa Ephesus.” 35Tɔttɔt akkala lɛffɛ ’zɔng baang ɔnaang kibbi ’sɔng baang kɛtɛtɛ. Ɔttɛ, “Balɔɔt Ephesus! ɔlɔɔt ɔkkpɛlɛ ɔsan lɔsan ɔttɛ balɔɔt a killu Ephesus balenɛ ba balokonɛ ggwoon a luzɔɔm Artemis la lɛttaal za latele, za lissinɛ ka libat liffu lɛttɔ ka lisse. 36Ɔlɔɔt wa ule ukkwoong ɔkala ɔttɛ ning ba kule, ba ule. Afɛkɛlɛyɔng, tɛ̀ttɛ́ anaangyɔng kɔlɔɔk a bizingizingi. 37Akɔɔmyɔngbong balɔɔt ’bɔng mung affuyɔng ɔzzànga ba bataka bayip ɔlɔk balɔɔk bubbi batum umaat-Artemis. 38Ulenɛ ka Demetrius la balɔɔt a kɛnaang ammɛ bayanganɛ kamma-kɛkaal batum ɔlɔɔt, bamii ka ɔdda kɛkaal wa bakaalnɛ kɛkaal kɛtɔm ɔkkpɛlɛ. Bakaal-ɔkala bale baang, bakkwoong mung bakkwɔɔbɛ kɛkaal kɛyɔɔng bakang. 39Kɔlɔɔk kɔlɔk kulenɛ bakang kwa aggyannɛyɔng kwa kɔsaknɛ ’kwɔng baang, vvenɛ bakaalkwɛ ka mitin a lusse. 40Baang kɔlɔɔk a bbɔlbbɔl kɔtaanɛ baang. Bakkwoong mung battɛ izzɔɔkbong kullu ka kɔlɔɔk kwa kɔnaangnɛ mmwɔɔn mung. Lakkpenge ba lale ka lɔsap ’gwɔng mung. Ɔgbaa baala ikkwoong itele lɛttɔ kɔlɔɔk ’kwɔng kɔyyɛɛp.” 41Uvvenɛ lɛlɔɔk, uvvoong mitin.

will be added

X\