BƐNAANG 16

1Paul umii Derbe la Lystra. Ɔyanga-kiyila wa ɔzzanganɛ Timothy ɔdɔkɔ ullu bakang. Abakka ammɛ ɔssɛ ɔyanga kiyila, ɔdɔkɔ wa Jews; abassɛ ammɛ wa Greek. 2Ikpana ammɛ ɔkkpɛlɛ ya issinɛ Lystra la Iconium balɔɔk budoddo batum Timothy. 3Paul ɔnngwa kɛsam a Timothy ɔkɔɔm umii ɛfɛɛn duu ya ule ka umiinɛ, ɔzzánga ɔzzamɛ lɛtaa. Ɔzza Timothy lɛtaa ɔmma ka balɔɔt a Jews ba ballunɛ ka ɛfɛɛn ’kwɔng baang basannɛ battɛ abassɛ Timothy ussi Greek. 4Lɛffɛ la zzɔn za bamiinɛ, babwɔɔlɔ balɔɔt ba bayanganɛ kiyila lafɔɔ za bayilabɔtɔɔm a Jesus la bagɛlɛnya ka Jerusalem balenɛ lɛssɛɛn babwɔɔlɔbɛ battɛ batelezɛ. 5Ɔzzánga banaang izɔɔm iggele la kiyila, balɔɔt baffu bagbaa kɛtɔm ɔkkpɛlɛ. 6Bassɛ ka ɛkpansi a Phrygia la ɛkpansi a Galatia. Kuyeeng-Ɔlɔɔmɔlɔɔm kusibɛ lɛfɔngɔ babwɔɔlɔ Lɛmmwɔɔl-Ɔlɔɔmɔlɔɔm ka ɛkpansi Asia. 7Baffɔnɛ ka kimeen a Mysia, babum battɛ nzang bamii ka ɛkpansi a Bithynia, keem Kuyeeng-a-Jesus kufim. 8Ɔzzánga bassɛ baang ssɔng basak ka ɛkpansi a Mysia bamii ka ɛkpansi a Troas. 9Paul ɔyɛn biyɛnɛ kɛtɔm ’sɔng baang. Ɔyɛn ɔlɔɔt a Macedonia ka ubeenɛ ukkpengemɛ ɔttɛ, “Affu ka Macedonia atteleyɛlɛ!” 10Paul ɔyɛnnɛ biyɛnɛ pyɔng mung uvve, eseese babama kimii Macedonia, ka ilenɛ liffik ittɛ Ɔlɔɔmɔlɔɔm ɔkkwɔɔbongyɛlɛ ɔttɛ imii ikopolo balɔɔt ’bɔng baang Kuttu-budoddo ammɛ. 11Ifeele imal ka akkpaat ka ussinɛ Troas imii ssɔng isak lɛffɛ za lɛzzanganɛ Samothrace. Libbessolo imii iddum Neapolis. 12Issi baang imii Philippi, ogyila ’wɔng baang ɔdɔkɔnɛ ɔkɔɔm-a-ɛtɔk a ogyila ka ɛkpansi a Macedonia. Balɔɔt a Rome badɔkɔ ballu ka ɛkpansi ’yɔng baang ɔgbaa. Itaa baang bɛtɔm ggbadam. 13Ɔffɔnɛ Kɛtɔm-a-Kɛfɛkɛlɛ, ifeele imii ka lufoom a lɔyɔngɔ, ka ɛkpansi ’yɔng baang, ka ɛfɛɛn a ittinanɛ ittɛ ɛfɛɛn ele baang ya balɔɔt a Jews bataanɛ bazɔɔm luzɔɔm. Itaa baang ilɔɔk la bwanavva ba babbinɛ baang. 14Wanavva wa uppyeenɛ kwa ilɔɔknɛ ɔdɔkɔ ɔzzanga Lydia, wa ussinɛ Thyatira wa ɔdɔkɔnɛ ɔssɛ-kappya ibba ya doddo. Ɔdɔkɔ wanavva wa utelenɛ Ɔlɔɔmɔlɔɔm. Uyini uwongolomɛ luppyam ɔgɔpɔlɔ kwa Paul ɔlɔɔknɛ. 15Lydia la balɔɔt a ssala ammɛ banaang baptizim, ɔzzánga ɔbwɔɔlɔyɛlɛ ɔttɛ, “Affu itaayɔng ka ssala anaam, alenɛyɔng liffik attɛyɔng anaam ɔlɔɔt wa ɔyanganɛ kiyila ka Uyini.” Ɔzzánga imii. 16Kɛtɔm ssɔn ka ilenɛ ka kimii ka ɛfɛɛn a luzɔɔm, iduda waanawanavva wa ulenɛ ubili; ɔyanga ipiliza ya inaangmɛnɛ ɔbɔɔk lɔbɔɔk. Ɔnaang ikkpoko gaang gaang unnyi balɔɔt ba bayangamɛnɛ. 17Ufeele ukupyɛlɛ la kibungu la kibungu ɔttɛ, “Balɔɔt ’bɔng mung, babili Ɔlɔɔmɔlɔɔm! Babwɔɔlɔwɔyɔng tɛ̀ttɛ̀ ale adduyɔng!” 18Ɔlɔɔk ’kwɔng mung ka bɛtɔm ggbadam ɔddɔkɔddɔkɔ luppyam lɔkkwɛɛt Paul usikili ɔlɔɔk la ipiliza ɔttɛ, “Nbwɔɔlɔwɔ ka lakke a Jesus Christ nttɛ atta asseke wanavva ’wɔng mung.” Eseese ipiliza itta issekemɛ. 19Bayini a waanawanavva ’wɔng baang basannɛ battɛ kufuk a kɛnaang a ikkpoko abbɛ kɔsaalbong, bakaa Paul la Silas battulu bamii ka ɛfɛɛn a bazzilɛttɔ ogyila. 20Bakɔɔmbɛ bamii ka ɛfɛɛn a ikkala balɔɔt a Rome, babwɔɔlɔbɛ battɛ, “Balɔɔt ’bɔng mung ba Jews. bale mung ka baggyannɛ kɔlɔɔk ka ɛkpansi ayyɔɔt. 21Bale baang ka bakopolonɛ balɔɔt lilɔɔk sa lafɔɔ ayyɔɔt lasinɛ lɛggyan. Ayyɔɔt balɔɔt a Rome baala ikup lilɔɔk sa bakopolonɛ baang.” 22Kibbi ’sɔng baang batoolo batul Paul la Silas. Ikkala balɔɔt a Rome bayaak Paul la Silas iwɔkɔlɔ, battɛ batupbɛ. 23Balenɛbɛ lɔkkpat gwa lɛbaang litup, basambɛ bassɛɛn ka ikkbakkɔpɔ. Badda ɔlɔɔt wa ɔssɛɛnnɛ igbakkɔpɔ battɛ ɔkamabɛ kkpɔk. 24Ɔssɛɛn-igbakkɔpɔ uppyeenɛ ning baang, ɔsambɛ umii ɔssɛɛn ka lɛnɔk za tɔkɔlɔ. Ɔsambɛ bukkpɔ ɔssɛɛn ka laffɛ bumele laffa, ɔkama ikpɔkɔlɔ ɔkaka. 25Ɔffɔnɛ ka kɛtɔm kile ka kɛppwanɛ, Paul la Silas bazɔɔm, basoom kisoom, bannyi Ɔlɔɔmɔlɔɔm. Balɔɔt igbakkɔpɔ balɔk ba badɔkɔnɛ baang basseke zzum ka bataanɛ bagɔpɔlɔbɛ. 26Eseese bappyee ɛkpansi ka ɛnnyɛkɛnɛ. Ggwoon igbakkɔpɔ lɔnnyɛkɛ lɔffɔ ka lutte. Lamma ggwoon igbakkɔpɔ ɔkkpɛlɛ lawongolo. Ikpɔkɔlɔ ikkyaa balɔɔt ba balenɛ baang ɔkkpɛlɛ ittɔ. 27Ɔssɛɛn-igbakkɔpɔ ufungalanɛ, ɔyɛn lamma ggwoon igbakkɔpɔ ka lalenɛ liwongolo, ammɛ ɔttɛ balɔɔt igbakkɔpɔ ’bɔng baang bammabong basaal. Ɔzzánga uttulu ogge ɔsanga ɔttɛ nzang ɔwwɔɔlmɛ kɛyɔɔng. 28Ɔzzánga Paul ubungu ɔgaga ɔttɛ, “Tɛ̀ttɛ́ addopowɔ kɛyɔɔng! ɔkkpɛlɛ ayyɔɔt ile mung!” 29Ɔssɛɛn-igbakkɔpɔ ɔggyan lɔkɔɔn, uzzuma umii ka tɔkɔlɔ a ggwoon. Ɔffɔnɛ bakang, ɔttɔ Paul la Silas ka lataak. 30Ɔsangabɛ ɔtta ka vveeng ɔbapbɛ ɔttɛ, “Badedde, nle nnaang nang nddu?” 31Balɔɔk la ammɛ battɛ, “Ayila kwa Uyini, Jesus, vvenɛ adduyɔng la itutum annɔ. 32Ɔzzánga bakopolomɛ lɛmmwɔɔl Ɔlɔɔmɔlɔɔm la balɔɔt ɔkkpɛlɛ ba badɔkɔnɛ ka ssala ammɛ. 33Ka kasɛkɛ kɛtɔm ’sɔng baang, ɔssɛɛn-igbakkɔpɔ ɔsambɛ umii ɔzzaabɛ biddopo. Ammɛ la balɔɔt ammɛ ɔkkpɛlɛ banaang baptizim eseese. 34Ɔlɛkɛ Paul la Silas umii ka ssala ammɛ; unnyibɛ kazzi, bazzi. Ammɛ la itutum ammɛ baggele gaang gaang ka balenɛ lɛmmwɔɔl Ɔlɔɔmɔlɔɔm liyila. 35Ɔffɔnɛ lɔfɔm a lɔfɔm a libbessolo, bazzilɛttɔ a Rome batɔɔm ippoloosi battɛ, “Afɔngɔyɔng balɔɔt ’bɔng baang bafula.” 36Ɔzzánga ɔssɛɛn-igbakkɔpɔ ɔbwɔɔlɔ Paul ɔttɛ, “Bazzilɛttɔ a Rome batɔɔmbong bɔtɔɔm battɛ isangawɔyɔng annyɔɔng la Silas ka igbakkɔpɔ. Agbata amiiyɔng ka bɔkaat.” 37Ɔzzanga Paul ɔlɔɔk la ippoloosi ɔttɛ, “Kɔlɔɔk kɔlɔk ba itaka izzɔɔk kwa kɔbbɔlnɛ, ɔzzànga batupyɛlɛ ka lusso balɔɔt ɔkkpɛlɛ ɔzzànga ayyɔɔt bwaan a ɛkpansi a Rome! Basamyɛlɛ bassɛɛn igbakkɔpɔ. Ning ba kule ffet a ffet. Bazzilɛttɔ a Rome biini baffu mung basangayɛlɛ ka igbakkɔpɔ.” 38Ippoloosi bamii babwɔɔlɔ bazzilɛttɔ a Rome ning baang. Bappyeenɛ battɛ Paul la Silas bwaan a Rome, ɔbbwɔpɔbɛ. 39Ɔzzánga bamii bakkpengebɛ. Basangabɛ batta ka ggwoon igbakkɔpɔ. Babwɔɔlɔbɛ battɛ bagbata ka ɛkpansi ’yɔng baang. 40Paul la silas bagbata ka ggwoon igbakkɔpɔ bamii ka ssala Lydia. Baffɔnɛ bakang, baduda la balɔɔt ba bayilanɛ kwa Jesus. Babbabɛ bikɔɔm a kɛkkaam a luppyam bagbata.

will be added

X\