BƐNAANG 14

1Kɛssanga kɔlɔɔk ’sɔng baang kɛbbal lɛnaang ka Iconium. Paul la Barnabas bamii ka ɔdda mitin a balɔɔt a Jews. Bakopolo lukopolo lɔyyɛɛp. Lukopolo ’gwɔng baang lɔnaang Ikanakana la balɔɔt a Jews gbbadam bayanga kiyila. 2Balɔɔt a Jews balɔk bafim kiyila babum kisikili Ikanakana ippyam kutunbɛ bappyɛɛk ikpana abbɛ. 3Bayilabɔtɔɔm a Jesus bataa baang ɔmmɛ. Balɔɔk ppwool ppwool batum Uyini wa unnyinɛbɛ lakke kɛnaang a bɛmaanga la bɛfɛɛn a bikɛɛlɛ, ɔyɔɔ ɔttɛ lɛmmwɔɔl ammɛ za babwɔɔlɔnɛ batum kɛsaap ammɛ lile ka lɔkkwɔɔn. 4Kibbi balɔɔt a lɛffɛ ’zɔng baang babɛngɛlɛ lakup laffa. Balɔɔt balɔk bayila kwa balɔɔt a Jews, balɔk bayila kwa bayilabɔtɔɔm a Jesus. 5Ɔzzánga Ikanakana ilɔk la balɔɔt a Jews, la bazzilɛttɔ abbɛ battɛ bayɔɔ bayilabɔtɔɔm a Jesus akama, batɔɔpbɛ lattaal. 6Bayilabɔtɔɔm a Jesus bappyeenɛ ning baang, bagbata bamii lɛffɛ a Lystra la Derbe ka ɛkpansi a Lycaonia la laffɛ za lallunɛ lakkpit ɛkpansi ’yɔng baang. 7Bakopolo Kuttu-budoddo Ɔlɔɔmɔlɔɔm baang. 8Ɔlɔɔt ɔdɔkɔ baang ka Lystra wa ɔnnɔknɛ kikkwu. Kikkwu kissimɛ ka lɛfal. Kɛtɔm kɛlɔk ba ɔtaka ukkwoong ufeele ɔssɛ. 9Ɔtaa baang ɔgɔpɔlɔ lukopolo a Paul. Paul ɔyɛnnɛ ɔsan ɔttɛ ɔyanga mung kiyila, uttulamɛnɛ vvenɛ ɔppwamɛ, ɔppyɛɛkmɛ ssii, 10ɔlɔɔk gagaga ɔttɛ, “Afeele abee ubee bbit!” Ɔlɔɔt ’wɔng baang utum ufeele ubee ubee utte kɔssɛ eseese ukkpit. 11Kibbi ’sɔng baang bayɛnnɛ basan battɛ Paul uttulamɛnɛ, bafeele ɔkkpɛlɛ abbɛ babungu ka kukaan abbɛ battɛ, “Ibinukkpaapi isikilibong balɔɔt, iffu ka lɔkaan ayyɔɔt tɛ!” 12Bakɔlɔ Barnabas Zeus; bakɔlɔ Paul Hermes ka ulenɛ ɔlɔɔk a kɛlɔɔk. 13Ɔssɛɛn-a-luzɔɔm ebinukkpaapi abbɛ ya ɛzzanganɛ Zeus, ya bayanganɛ ɔdda annyɛ ka lufoom a lɛffɛ ’zɔng baang, ɔkɔɔm balam igɔdɔ la idodo uffu ubee ka lusso lɛmma kikkwu. Ammɛ la balɔɔt ba babbinɛ baang badɔkɔ battɛ bassɛɛn luzɔɔm bannyi Barnabas la Paul. 14Barnabas la Paul bappyeenɛ kwa balɔɔt ’bɔng baang bale ka banaangnɛ, bayaak iwɔkɔlɔ abbɛ, bamma bamii ka tɔkɔlɔ kibbi ’sɔng baang la kibungu la kibungu battɛ, 15“Bɔng tɛ́ttɛ́ ale ka anaangnɛyɔng kwɔng? Ayyɔɔt balɔɔt gbɔɔ tɛ̀ttɛ̀ annyɔɔng. Kiffu sa iffunɛ mung, iffu ittɛ nkwaaning ibwɔɔlɔwɔyɔng Kuttu-budoddo Ɔlɔɔmɔlɔɔm, ɔlɔk akkyaayɔng kɛnaang a bubbi afɔngɔyɔng, akupyɔng kwa Ɔlɔɔmɔlɔɔm a kuddu, wa ɔnaangnɛ libat la ɛkpansi, la lihu la bɛfɛɛn ɔkkpɛlɛ bya bilenɛ ka tɔkɔlɔ azzɛ. 16Ka isimi ka isimi ɔkkyaa balɔɔt ɔkkpɛlɛ gbɔɔ ɔfɔngɔ banaang kwa kɔsaapnɛbɛ. 17Ɔzzànga ammɛ biini ɔyɔɔmɛbong kɛyɔɔng ɛkɛtɛ ɔkkpɛlɛ la budoddo bwa ɔnaangnɛ. Ɔnaang bannyi bateep ballɔtwɔyɔng, unnyiwɔyɔng ikɔnɔ-kɔnɔ ka ɛkɛtɛ ya bbwak, unnyiwɔyɔng kazzi, ɔgbaa la laggele.” 18Gɔɔ lɛmmwɔɔl za balɔɔknɛ baang lisi likkwoong litunu kibbi ’sɔng baang kɛkɔɔm a lɛkɔmɔlɔ kɛssɛɛn luzɔɔm kinnyi Barnabas la Paul. 19Balɔɔt a Jews balɔk ba bassinɛ Antioch ka Pisidia la ba bassinɛ Iconium baffunɛ, battulubɛ baffu ka lufoom gwa abbɛ. Batɔɔp Paul lattaal battulumɛ batta ka lɛffɛ abbɛ battina battɛ ubbebong. 20Ɔzzánga balɔɔt ba bayanganɛ kiyila, babbi bakkpitmɛ. Ammɛ ufeele ɔppyɛlɛ isimisimi umii ka lɛffɛ ’zɔng baang. Libbessolo, ammɛ la Barnabas bafeele bamii Derbe. 21Paul la Barnabas bakopolo Kuttu-budoddo Ɔlɔɔmɔlɔɔm ka Derbe, bayanga balɔɔt ba bayilanɛ kwa Jesus ggbadam. Bappyɛlɛ isimi isimi bamii Lystra, la Iconium, la Antioch ka Pisidia. 22Banaang bayanga-kiyila bayanga lakke, bayanga-kiyila sa lɔkkwɔɔn. Bakopolobɛ battɛ, “Vvenɛ iyɛn akama gaang gaang tɛ́ttɛ́ imal ka Itutum-Ɔlɔɔmɔlɔɔm.” 23Ka luzɔɔm duu gwa bamiinɛ bassang bagɛlɛnya, bataa buwɔɔng, bassɛɛn luzɔɔm bannyi Uyini wa balenɛ kiyila lɛyanga batummɛ. 24Balenɛ limii bakkpit ɛkpansi a Pisidia, bafeele bamii Pamphilia. 25Bayaam lɛmmwɔɔl Ɔlɔɔmɔlɔɔm babwɔɔlɔ balɔɔt ka Perga tɛ́ttɛ́ bamii Attalia. 26Bassi baang bamal akkpaat bappyɛlɛ isimi isimi bamii Antioch ka ɛfɛɛn a lakke Ɔlɔɔmɔlɔɔm lale lappyɛɛkbɛ ka kɛnaang sa balenɛ livve. 27Baffɔnɛ ka Antioch, bakkwɔɔ balɔɔt a luzɔɔm babbi ɛfɛɛn kkwɔn, babwɔɔlɔbɛ lilɔɔk ɔkkpɛlɛ sa Ɔlɔɔmɔlɔɔm ulenɛ lɛnaang la abbɛ. Tɛ̀ttɛ̀ Ɔlɔɔmɔlɔɔm ulenɛ likkwoong ɔnaang Ikanakana bayanga kiyila. 28Bataa baang la balɔɔt ba balenɛ kiyila lɛyanga ɛkɛtɛ ɛlɔm.

will be added

X\