BƐNAANG 11

1Bayilabɔtɔɔm a Jesus la bayanga kiyila ka Judea ɔkkpɛlɛ bappyee battɛ ikanakana ɔgbaa batɔkbong lɛmmwɔɔl Ɔlɔɔmɔlɔɔm. 2Peter umiinɛ Jerusalem, balɔɔt ba battɛnɛ bazza ikanakana lataa banyɔɔkamɛ Peter battɛ, 3“Adɔkɔ ka bikekeen ka ssala wa akanakana wa ɔtakanɛ lɛtaa lɛzza, atulyɔng kazzi azziyɔng la ammɛ. Bɔng tɛ́ttɛ́ anaang ning baang?” 4Ɔzzánga Peter ussi ka lutte ɔbwɔɔlɔbɛ la ɛtɔk la ɛtɔk utum kwa kɔnaangnɛ, ɔttɛ; 5“Ndɔkɔ ka kɛssɛɛn a luzɔɔm ka ogyila Joppa, ɔzzánga nyɛn biyɛnɛ. Nyɛn kɛfaak a bɔfɛɛn uggboggbo ning la lagook lanna ka bussinɛ ka libat buffu bukɔɔng kɛtɛkɛtɛ anaam bubee. 6Nvvoop doddo ka tɔkɔlɔ, nyɛn isɛɛn a bukkpɔ bunna la isɛɛn ya ikkwukunɛ lukkwuku, la bunɔɔn ka kɛmat. 7Nppyee lɛmmwɔɔl ka lɛttɛnɛ, ‘Peter afeele awwɔɔl azzi.’ 8Ɔzzanga nttɛ, ‘Ning baang baala kule, Uyini, kazzi kwa batakanɛkwɛ laggbo likup bafɔngɔ kang kɛtɔm kɛlɔk ka kamma anaam ba kataka kaffu.’ 9Mbbal lɛmmwɔɔl lippyee ka lissinɛ ka libat lɛttɛ, ‘Tɛ̀ttɛ́ ayɛn bɔfɛɛn bwa Ɔlɔɔmɔlɔɔm ulenɛbwɛ laggbo likup, ɔfɔngɔ kang; attɛ butii la laggbo ka kkwɔɔt.’ 10Kɔlɔɔk ’kwɔng baang kɔnaang ka bikkpit bɛkkyaat, ka lakpeke, buppyɛlɛ isimisimi bumii ka libat. 11Ɛkɛtɛ ’yɔng baang bbwak elenɛ ya balɔɔt ba batɔɔmnɛbɛ ka anaam ba bassinɛ Caesare baffɔnɛ ka ssala sa ndɔkɔnɛ ntaa. 12Kuyeeng-Ɔlɔɔmɔlɔɔm kɔbwɔɔlɔnɛ kɔttɛ nkupbɛ nmii eseese, tɛ̀ttɛ́ ngɔp. Balɔɔt ayyɔɔt ba bwɔlaaning ba bassinɛ Joppa bakupnɛ imii Caesarea ka ssala Cornelius. 13Cornelius ɔbwɔɔlɔyɛlɛ tɛ̀ttɛ̀ ɔyɛnnɛ uyilabɔtɔɔm Ɔlɔɔmɔlɔɔm ka ubeenɛ ka ggwoon ammɛ ɔlɔɔk ɔttɛ, ‘Atɔɔm ɔlɔɔt umii Joppa ɔkkwɔɔ ɔlɔɔt wa ɔzzanganɛ Simon Peter. 14Vvenɛ ɔlɔɔk lɛmmwɔɔl unnyiwɔ za annɔ la itutum annɔ, ale ataayɔng ka kuddu kwa kɛfal a kɛfal.’ 15Ka nlenɛ ka kutolo ka ssala Cornelius, Kuyeeng-Ɔlɔɔmɔlɔɔm kusini kuvoongbɛ, tɛ̀ttɛ̀ kɔnaangnɛ la ayyɔɔt ka lutte. 16Ɔzzánga nkke kɔlɔɔk kwa Uyini ɔlɔɔknɛ ɔttɛ; ‘John ɔnaang baptizim la bannyi ɔzzànga annyɔɔng bale banaangwɔyɔng baptizim la Kuyeeng-Ɔlɔɔmɔlɔɔm!’ 17Kule ka lɔkkwɔɔn, Ɔlɔɔmɔlɔɔm unnyi ikanakana lɛsɔɔk ’zɔng tɛ̀ttɛ̀ unnyiyɛlɛ ayyɔɔt ka ɛkɛtɛ ya iyilanɛ kɔlɔɔk a Jesus Christ. Anaam nlenɛ nnyinɛ wa nbumnɛ ɔlɔɔmɔlɔɔm kitunu.” 18Bappyeenɛ ning baang, bakkyaa kɛkpɛn a babbɛ bafɔngɔ babbungu Ɔlɔɔmɔlɔɔm battɛ, “Ɔlɔɔmɔlɔɔm ɔssɛbong unnyi ikanakana kufuk kwa kɛnaang a busannɛ ka bubbi abbɛ bataa ka kuddu.” 19Kɛyɔɔ akama sa bayɔɔnɛ luzɔɔm ka ɛkɛtɛ ya bawwɔɔlnɛ Stephen, kɛkkyama bayanga-kiyila. Balɔɔt balɔk bamii fulufulu baffɔ Phoenicia la Cyprus la Antioch babwɔɔlɔ balɔɔt a Jews keem Kuttu-budoddo Ɔlɔɔmɔlɔɔm. 20Ɔzzánga balɔɔt balɔk ba bayanganɛ kiyila ba bassinɛ Cyprus la Cyrene bassɛ bamii Antioch babwɔɔlɔ ikanakana kuttu lɛmmwɔɔl Ɔlɔɔmɔlɔɔm. Bakopolobɛ Kuttu-budoddo Uyini, Jesus. 21Lakke Ebinukkpaapi ladɔkɔ la abbɛ. Kɛkaan a balɔɔt ppwap kiyila bakup Uyini. 22Kuttu ’kwɔng baang kɔwaala tɔttɔt kɔffɔ luzɔɔm ka Jerusalem. Ɔzzánga batɔɔm Barnabas umii Antioch. 23Ɔffɔnɛ bakang, ɔyɛn tɛ̀ttɛ̀ Ɔlɔɔmɔlɔɔm ɔnaangnɛ balɔɔt ppyɛɛ, ɔyanga laggele gaang gaang, ɔbwɔɔlɔbɛ ɔkkpɛlɛ ɔttɛ bayanga kiyila sa lɔkkwɔɔn batum Uyini la ippyam abbɛ ɔkkpɛlɛ. 24Barnabas ɔdɔkɔ ɔlɔɔt wa doddo. Ɔyanga Kuyeeng-Ɔlɔɔmɔlɔɔm la kiyila ka luppyam. Banaang balɔɔt ggbadam bayila kwa Uyini. 25Ɔzzánga Barnabas umii Tarsus kɛggyan a Saul. 26Ɔyɛnmɛnɛ, ɔkɔɔmmɛ uffu ka Antioch. Ka kukkpa ’kwɔng baang, abbɛ baffa la balɔɔt a luzɔɔm, bakopolo balɔɔt ggbadam. Ɔdɔkɔ ka Antioch ka battenɛ kɛkkwɔɔ balɔɔt a kɔssɛ a Jesus ‘Bakup-a-Christ!’ 27Ka ɛkɛtɛ ’yɔng baang, bappyee-kutolo Ɔlɔɔmɔlɔɔm balɔk bafeele ka Jerusalem bamii Antioch. 28Wa vvɔn wa ɔzzanganɛ Agabus, ufeele ubee ka lakke Kuyeeng-Ɔlɔɔmɔlɔɔm, ɔlɔɔk ɔttɛ buwɔɔng bwa lɛbaang bule ka buttɔnɛ ka ɛkpansi ɔkkpɛlɛ. (Buttɔ ka ɛkɛtɛ ya Claudius ɔdɔkɔnɛ uzzilɛttɔ a Rome.) 29Balɔɔt a kɔssɛ a Jesus batini tɛ̀ttɛ̀ ɔlɔɔt ɔlɔɔt ule unnyi bɛfɛɛn batɔɔm bafee ikpana abbɛ ba ballunɛ ka Judea. 30Banaang ning baang ɔkkpɛlɛ basam ikkpoko, bannyi Barnabas la Saul battɛ bafee bagɛlɛnya luzɔɔm ka Judea.

will be added

X\