1 Ɔlɔɔt ɔdɔkɔ baang ka Caesarea wa ɔzzanganɛ Cornelius, uggboggbo ɔlɔɔt ka isɔgya Rome. Kɛkaan isɔgya sa ulenɛ ka assɛ bakkwɔɔsɛ “Kɛkaan a balɔɔt Italy.” 2 Ɔlɔɔt ’wɔng baang ɔdɔkɔ ɔlɔɔt wa kɔlɔɔk a luzɔɔm kɔsaapmɛnɛ. Ammɛ biini la itutum ammɛ bazɔɔm bannyi Ɔlɔɔmɔlɔɔm. Ɔdɔkɔ ɔlɔɔt wa uttelenɛ balɔɔt a Jews ba ɔbbɔlnɛbɛ. Ɛkɛtɛ ɔkkpɛlɛ ule ka kɛzɔɔm kinnyi Ɔlɔɔmɔlɔɔm. 3 Kɛtɔm ssɔn ka ikalangka ikkyaat kikoon ka ɔyɛnnɛ uyilabɔtɔɔm kpelegede wa uffunɛ utolo kutolo la ammɛ ɔttɛ, “Cornelius!” 4 Ɔppyɛɛk uyilabɔtɔɔm ɔbbwɔpɔmɛ ɔttɛ, “Kule nang Dedde?” Uyilabɔtɔɔm Ɔlɔɔmɔlɔɔm ɔppyɛlɛmɛ kamma ɔttɛ, “Ɔlɔɔmɔlɔɔm uppyeebong luzɔɔm annɔ, ɔyɛnwɔ kɛnaang a kibbe lɛttɔ, ukkewɔbong. 5 Atɔɔm balɔɔt balɔk gedegede mung bamii Joppa bakkwɔɔ ɔlɔɔt vvɔn wa ɔzzanganɛ Simon Peter. 6 Ule ka bukekeen ka ssala ɔlɔɔt wa ɔzzanganɛ Simon, ɔnaang-ikkpa, wa ullunɛ ka lufoom a lihu.” 7 Uyilabɔtɔɔm Ɔlɔɔmɔlɔɔm ’wɔng baang umii. Ɔzzánga Cornelius ɔkkwɔɔ ibɔɔyi ammɛ balɔɔt baffa la wa sɔgya wa ulenɛ ɔlɔɔt a luzɔɔm wa ɔtaanɛ la ammɛ biini baffu. 8 Ɔbwɔɔlɔbɛ kwa kɔnaangɛ, ɔsangabɛ ɔtɔɔm Joppa. 9 Ɔffɔnɛ libbessolo ka balenɛ Joppa lɛkkɛtɛ, Peter ufeele umii ubbulu libat a ggwoon ɔttɛ umii ɔssɛɛn luzɔɔm. 10 Buwɔɔng busaapmɛ, ɔggyan kazzi. Bale ka kɛnaang a kazzi, Peter ɔyɛn biyɛnɛ. 11 Ɔyɛn ka libat liwongolonɛ, bɔfɛɛn bussi bakang busini buffu ka ɛkpansi. Bule tɛ̀ttɛ̀ kɛkkpa bɔfɛɛn sa lɛbaang. Buyanga lagook lanna. 12 Bɛssanga isɛɛn ɔkkpɛlɛ bya bilenɛ ka lisse la bunɔɔn bile baang ka tɔkɔlɔ bɔfɛɛn ’bwɔng baang. 13 Lɛmmwɔɔl lɛttɛmɛ, “Peter, afeele awwɔɔl azzi.” 14 Ɔzzánga Peter ɔttɛ, “Uyini, ning baang baala kule, bɔfɛɛn bwa batakanɛbwɛ laggbo likup bafɔngɔ kang ba ntaka nzzi kɛtɔm kɛlɔk.” 15 Lɛmmwɔɔl lɛbbal lɛttɛmɛ, “Tɛ̀ttɛ́ ayɛn bɔfɛɛn bwa Ɔlɔɔmɔlɔɔm ulenɛbwɛ laggbo likup attɛ butii la laggbo.” 16 Nkwɔng kɔnaang bikkpit bɛkkyaat tɛ́ttɛ́ buppyɛlɛ isimisimi bumii ka libat. 17 Peter kɔkɛɛlɛmɛ kutum ifɛɛt a biyɛnɛ ’pyɔng baang pya ɔyɛnnɛ. Ɔttɛ ɔnaang, balɔɔt ba Cornelius ɔtɔɔmnɛ basanbong ssala Simon batii baang ka lusso kikku ka babeenɛ. 18 Bakkwɔɔ babap battɛ, “Ukekeen ɔlɔk ule mung wa ɔzzanganɛ Simon Peter ɔɔ?” 19 Peter ɔdɔkɔ ka kiffik a ifɛɛt a biyɛnɛ pyɔng baang. Ɔzzánga Kuyeeng-Ɔlɔɔmɔlɔɔm kɔttɛ, “Gɔpɔlɔ! balɔɔt bakkyaat bale mung ka baggyanwɔnɛ. 20 Abamawɔ kɛyɔɔng amiiyɔng eseese; anaam ntɔɔmnɛbɛ.” 21 Peter ufeele umii ɔbwɔɔlɔ balɔɔt ’bɔng baang ɔttɛ, “Anaam nlenɛ ɔlɔɔt wa aggyannɛyɔng, kulewɔyɔng nang?” 22 Abbɛ bappyɛlɛmɛ kamma battɛ, “Uggboggbo ɔlɔɔt ayyɔɔt, Cornelius, ɔtɔɔmnɛyɛlɛ tɛ. Ule ɔlɔɔt wa doddo ka ɔzɔɔmnɛ unnyi Ɔlɔɔmɔlɔɔm, balɔɔt a Jews ɔkkpɛlɛ batelemɛ lutele. Uyilabɔtɔɔm-Ɔlɔɔmɔlɔɔm ɔbwɔɔlɔmɛnɛ ɔttɛ ɔkkwɔɔwɔ amii ka ssala ammɛ nkwaaning uppyee kɔlɔɔk kwa ale alɔɔk.” 23 Peter ɔkkwɔɔ balɔɔt ’bɔng baang bamii ka ssala Simon, ɔdɛmbɛ bakkwunu baang ka kɛtɔm ssɔn. Ɔffɔnɛ libbessolo, ɔlɔngɔlɔ bɛfɛɛn; bafeele bamii. Balɔɔt a kɔssɛ ammɛ balɔk ba bassinɛ Joppa bakupmɛ bamii. 24 Ka libbessolo ɔffɔ Caesarea, ka ɛfɛɛn ya Cornelius ɔtaanɛ ɔkatmɛ la ikpana ammɛ la inngwa ammɛ ya ɔkkwɔɔnɛbɛ. 25 Peter ɔttɛ ɔmal ka tɔkɔlɔ, Cornelius ududamɛ ka lɛmma ggwoon; ɔttɔ ukunmɛ laddu ka lataak. 26 Ɔzzánga Peter ɔttɛ, “Afeele, anaam mung ɔlɔɔt a gbɔɔ.” 27 Peter utolo unnyi Cornelius ning baang tɔttɔt ɔmal ka ggwoon. Ɔyɛn balɔɔt ggbadam ka babbinɛ ka tɔkɔlɔ a ggwoon. 28 Utolo unnyibɛ ɔttɛ, “Annyɔɔng biini asanyɔngbong attɛyɔng luzɔɔm a balɔɔt a Jews ba luyila ɔlɔɔt a Jews ɔlap ukoolo wa akanakana, ɔlɔk ɔssɛmɛ ɛnngwa. Ɔzzànga Ebinukkpaapi ɛyɔɔnɛbong ɛttɛ, tɛ̀ttɛ́ nppyɛɛk ɔlɔɔt ɔlɔk nttɛ baang ɔlɔɔt a laggbo ka kkwɔɔt. 29 Kwakkwɛ nsinɛ lifim ka atɔɔmnɛ attɛ nffu. Kkpɔɔ kule nang atɔɔmnɛ attɛ nffu?” 30 Cornelius ɔttɛ, “Ɔdɔkɔ liyaadɛ ussolo lisee ɛkɛtɛ ning bbwak ka nlenɛ ka kɛzɔɔm a luzɔɔm ka ggwoon anaam, ka ikalangka ikkyaat kikoon. Eseese nyɛn ɔlɔɔt la iwɔkɔlɔ ya illaatnɛ nyanya ka ubeenɛnɛ ka lusso. 31 Ɔttɛ, ‘Cornelius! Ɔlɔɔmɔlɔɔm uppyeewɔbong luzɔɔm ukke kɛnaang a budoddo annɔ. 32 Atɔɔm ɔlɔɔt umii Joppa, ɔkkwɔɔ ɔlɔɔt wa ɔzzanganɛ Simon Peter, wa ulenɛ ka bikekeen ka ssala Simon, ɔnaang-ikkpa wa ullunɛ ɔkkɛtɛ lihu.’ 33 Ɔzzánga ntɔɔm eseese nkkwɔɔwɔ; alenɛ litele affu. Mung ɔkkpɛlɛ ayyɔɔt ile mung ka lusso Ɔlɔɔmɔlɔɔm ka itaanɛ ikatwɔ ittɛ ippyee bwa Ɔlɔɔmɔlɔɔm ɔddawɔnɛ ɔttɛ alɔɔk.” 34 Peter ɔttɛ, “Gedegede mung nsanbong nttɛ Ɔlɔɔmɔlɔɔm ɔkɔɔm ɔlɔɔt ɔkkpɛlɛ kɛssanga ssɔn. 35 Ɔlɔɔt ɔkkpɛlɛ wa Ɔlɔɔmɔlɔɔm ɔbbwɔpɔmɛnɛ, ɔnaang kwa bbwak vvenɛ Ɔlɔɔmɔlɔɔm ɔtɔkmɛ, mkkpa ussi ɛfɛɛn duu. 36 Asanyɔngbong bɔtɔɔm bwa ɔtɔɔmnɛ Jesus, Uyini balɔɔt ɔkkpɛlɛ, ufee balɔɔt a Israel, ɔbwɔɔlɔbɛ Kuttu-bɔkaat. 37 Appyeeyɔngbong kɔlɔɔk kwa kɔnaangnɛ ka ɛkpansi Israel, kwa kuttenɛ ka Galilee ka ɛkɛtɛ a John uvvenɛ lukopolo a baptizim. 38 Appyeeyɔngbong kwa kutumnɛ Jesus wa Nazareth, tɛ̀ttɛ̀ Ɔlɔɔmɔlɔɔm ɔtɔɔmnɛ Kuyeeng ammɛ la lakke ufeemɛ, ufeele umii ɛfɛɛn ɔkkpɛlɛ, ɔnaang budoddo. Uttula balɔɔt ɔkkpɛlɛ ba badɔkɔnɛ ka labɔɔk a Ɔnaang-a-kɛsɛɛm-a-kuyeeng, ka Ɔlɔɔmɔlɔɔm ulenɛ la ammɛ. 39 Ayyɔɔt ilenɛ ittɛɛsɛ lilɔɔk ɔkkpɛlɛ sa ɔnaangnɛ ka lɔkaan a Jews, la Jerusalem. Bakamamɛ bɛfɔl bakaka ka cross, ubbe. 40 Ɔzzànga bɛtɔm bɛffa bɛsaknɛ ka bɛkkyaat Ɔlɔɔmɔlɔɔm ufungalamɛ ka lubbe; ɔnaangmɛ ɔttɛ balɔɔt bayɛnmɛ. 41 Ka lusso balɔɔt ɔkkpɛlɛ lissi ka utumanɛ, utuma ka lusso balɔɔt ba balenɛ ittɛɛsɛ ya Ɔlɔɔmɔlɔɔm ulenɛ lɛsanga. Izzi ivva la ammɛ ka ulenɛ ka lubbe lifungala. 42 Ɔddayɛlɛ ɔttɛ ikopolo kuttu budoddo Ɔlɔɔmɔlɔɔm ibwɔɔlɔ balɔɔt Ɔlɔɔmɔlɔɔm ittɛ, uwɔng ulenɛ Ɔlɔɔt wa Ɔlɔɔmɔlɔɔm ɔsanganɛ ɔttɛ ɔzzánga ɔkaal a kɛkaal a bakokolo la babbu. 43 Bappyee-kutolo Ɔlɔɔmɔlɔɔm ɔkkpɛlɛ balɔɔk batummɛ battɛ ɔlɔɔt wa uyilanɛ kwa ammɛ vvenɛ ɔsɔɔkmɛ bubbi ammɛ ka lakke lɛkɔɔl ammɛ.” 44 Peter ɔdɔkɔ baang ka kɛlɔɔk, Kuyeeng-Ɔlɔɔmɔlɔɔm kusini kuffu kuvvoong balɔɔt ba badɔkɔnɛ baang ka bagɔpɔlɔnɛ. 45 Balɔɔt a Jews ba bayanganɛ kiyila ba bassinɛ Joppa la Peter baffu, kɔkɛɛlɛbɛ gaang gaang ka Ɔlɔɔmɔlɔɔm ɔssɛnɛ ɔsɔɔk ikanakana Kuyeeng ammɛ 46 ka bappyeenɛbɛ ka balɔɔknɛ likaan lilɔk, bakɔɔm babungu lɛbaang Ɔlɔɔmɔlɔɔm. Peter ɔlɔɔk ɔttɛ, 47 “Balɔɔt ’bɔng mung batɔkbong Kuyeeng-Ɔlɔɔmɔlɔɔm tɛ̀ttɛ̀ ayyɔɔt itɔknɛ, ɔlɔɔt ule mung wa ule utunu balɔɔt ’bɔng mung kɛnaang a baptizim la bannyi ɔɔ?” 48 Ɔzzánga ɔddabɛ ɔttɛ, banaang baptizim ka lɛkɔɔl a Jesus Christ. Balɔɔkmɛ battɛ ukkunu la abbɛ ka bwaan a bɛtɔm ssup.
