3 JOHN 1

1Lɛmmwɔɔl ’zɔng lissi ka Ɔgɛlɛnga– Nfee Gaius wa ɔsaapnɛnɛ ka lɔkkwɔɔn. 2Ɛnngwa anaam, Gaius, nzɔɔm nttɛ kɔlɔɔk ɔkkpɛlɛ kɔfɔngɔwɔ kikoolo, ɔzzànga vvenɛ ataa ka buppwolo a kkwɔɔt tɛ̀ttɛ̀ nsannɛ nttɛ aggba mung la kuyeeng. 3Ndɔkɔ nggele gaang ka ikpana anaam ilɔk baffunɛ babwɔɔlɔnɛ tɛ̀ttɛ̀ ayanganɛ kiyila ka lɔkkwɔɔn, tɛ̀ttɛ̀ aggbanɛ lissi ataa ka lɔkkwɔɔn. 4Bulɔk bwa bunaangnɛnɛ nggele gaang ba bule ɔgbaa la kwa nppyeenɛ nttɛ bwaan anaam bale ka lɔkkwɔɔn a kɔlɔɔk. 5Ɛnngwa anaam ya luppyam, àyàngà kiyila gaang gaang ka kɛnaang sa anaangnɛ annyi ikpana annɔ, ɔgbaa la ɛkɛtɛ ya batiinɛ bakekeen. 6Balɔɔkbong kɔlɔɔk a kɛsaap annɔ babwɔɔlɔ luzɔɔm. Ellee, attelebɛ ka kɔssɛ abbɛ tɛ̀ttɛ̀ kule kɔsaap Ɔlɔɔmɔlɔɔm. 7Ka bafeelenɛ kɔssɛ abbɛ bamii kɛnaang a Christ, basi lɛggyan battɛ ɔlɔɔt wa ɔsɛlɛnɛ kiyila uttelebɛ. 8Ayyɔɔt balɔɔt a luzɔɔm ittele balɔɔt ’bɔng mung nkwaaning itul lɔkkwɔɔn a kɛnaang abbɛ iyanga. 9Nkkpɔk waan a lɛmmwɔɔl bbwɛt ning nfee luzɔɔm, ɔzzànga Diotrephes, wa ɔggyannɛ ɔttɛ ule ɔkɔɔm-ɛtɔk abbɛ, baala ɔgɔpɔlɔ kwa nlɔɔknɛ. 10Ɛkɛtɛ ya nle nffu, vvenɛ nssɛɛl bɛfɛɛn ɔkkpɛlɛ bya ulenɛ lɛnaang. Babbu lilɔɔk sa ɔlɔɔknɛ utumyɛlɛ, la lalaak za ɔkkalanɛ utumyɛlɛ. Ɔzzànga ’kwɔng baang keem ba kɔtaka kɔyyɛɛpmɛ, baala ɔtɔk ikpana ammɛ ka laggele ka ɛkɛtɛ ya bale baffu, gɔɔ vvenɛ utunu balɔɔt ba battɛnɛ nzang batɔkbɛ. Gɔɔ ɔggyanbɛ kɛggba batta basseke ggwoon a luzɔɔm. 11Ɛnngwa anaam ya luppyam, tɛ̀ttɛ́ akeet kɔlɔɔk kwa kɔbbɔlnɛ, ɔzzànga akeet kwa kɔyyɛɛpnɛ. Ɔlɔɔt duu wa ɔnaangnɛ kwa kɔyyɛɛpnɛ nzang ammɛ wa Ɔlɔɔmɔlɔɔm. Ɔlɔɔt duu wa ɔnaangnɛ kwa kɔbbɔlnɛ, Ɔlɔɔmɔlɔɔm ba ɔtaka ɔyɛn. 12Ɔlɔɔt ɔkkpɛlɛ ɔlɔɔk budoddo utum Demetrius, lɔkkwɔɔn biini lɔlɔɔk kɔlɔɔk a budoddo lutummɛ. Ayyɔɔt ɔgbaa, igbaa buttɛɛsɛ ayyɔɔt, ɔsan ɔttɛ kwa ilɔɔknɛ kule ka lɔkkwɔɔn. 13Nyanga lilɔɔk ggbadam sa bubwɔɔlɔwɔnɛ, ɔzzànga ba nggyan nttɛ nkkpɔk ka luvva nbwɔɔlɔwɔ. 14Nggyanwɔ kɛyɛn ssuma ssuma mung nkwaaning ilɔɔk ka isso ka isso. 15Bɔkaat butaa la annɔ. Inngwa annɔ ɔkkpɛlɛ bawomowɔbong. Akɔɔm kamma annɔ awomo inngwa ayyɔɔt ɔkkpɛlɛ.

will be added

X\